Read ngakarimojong Ekim. 30 Bible Online

Ekim. 30 - ngakarimojong bible

Ekim. 30

¹Kirwor Moses neni a ŋikarikok a ŋikabilae a Ŋisirael tema, “Ŋakiro ŋuna ikicik iwon Ekapolon ikes nu,

²‘Ani kikoŋ ekile ainakin idiobore neni ke Ekapolon, kori kikoŋ anakiikinet keŋ ainakin ibore idio, nyemaikina iŋes kimyek ŋuna alimu, emaikina iŋes kitiya ŋuna ekoŋ iŋes analimunet keŋ.’”

³Ani kikoŋ aberu ainakin idiobore neni ke Ekapolon, kori kikoŋ anakiikinet keŋ ainakin idiobore eriŋa iŋes erae apese eyai lore a papa keŋ,

⁴ido kiira papa keŋ ŋuna ekoŋ iŋes, kori akiikinet keŋ ŋina ekoŋ iŋes akisiyookin, nyelimu ŋakiro ŋadi, emaikina apese ŋin kitiya daadaŋ ŋuna adau iŋes akikoŋ kori akiikin.

⁵Nai ani pa kecamu papa keŋ ŋakiro ŋuna ekoŋ apese ŋin, apaki ŋina iirarya ŋuna ekoŋ ka eik nakoku keŋ, epedori apese ŋin akimyekin akitiya ŋuna abu iŋes kikoŋ, kori kiik, ido isyoni Ekapolon iŋes, anerae abu papa keŋ nyecamu ŋakiro ŋuna ekoŋit ka eikinit nakoku keŋ.

⁶Ani kepudo apese ŋin toriŋa nyimyekina ŋuna abu iŋes kikoŋ, kori kikirikirak akiikin,

⁷ido kiira lokile keŋ ŋuna sek ikoŋit, kori iikinit apese ŋin ka nyelimu ŋakiro ŋadi apaki ŋina iirarya ŋuna ikoŋit, kori iikinit apese ŋin, emaikina apese ŋin kitiya daadaŋ ŋuna adau iŋes akikoŋ, kori akiikin.

⁸Nai ani kewou lokile keŋ iŋes akisiyookin akikoŋiet, kori akiikinet keŋ apaki ŋina iirarya, epedori aberu ŋin akimyekin kitiyae ŋuna adau iŋes akikoŋ, kori akiikin, ido isyoni Ekapolon iŋes.

⁹(Nai aberu daadaŋ ŋina elakitae, kori ŋina erae apuserut emaikina kisiyook ŋuna adau iŋes akikoŋ, kori akiikin.)

¹⁰Ani kikoŋ aberu ŋina eriŋa erukito ka ekile keŋ akitiya idiobore, kori kiik anakikoŋet keŋ ainakin idiobore,

¹¹ido kiira lokile keŋ ka nyelimu ŋakiro ŋadi apaki ŋina iirarya ŋuna ikoŋit, kori iikinit aberu keŋ, emaikina aberu ŋin kitiya daadaŋ ŋuna adau iŋes akikoŋ, kori akiikin.

¹²Nai ani kewou lokile keŋ iŋes akisiyookin akikoŋiet, kori akiikinet keŋ, epedori aberu ŋin akimyekin akitiya ŋuna adau iŋes akikoŋ, kori akiikin, ido isyoni Ekapolon iŋes, anerae awou lokile keŋ iŋes akisiyookin ŋuna ekoŋit, kori eikinit iŋes akitiya.

¹³Eyakar ekile a aberu a ŋin apedor ŋina kimyekinet aberu keŋ kisiyook; kori nyisiyook ŋuna ikoŋit, kori ŋuna iikinit aberu keŋ akitiya.

¹⁴Nai ani kililiŋia lokile a aberu a ŋin ŋakiro ŋun a ŋinakoloŋit, iŋes atemar ecamunit iŋes ŋakiro daadaŋ ŋuna abu aberu ŋin kikoŋ, kori kiik, anerae mam ŋakiro alimu iŋes kedau akiirar ŋuna ikoŋit, kori iikinit aberu keŋ akitiya.

¹⁵Nai ani kelunyar apaki, ido tolimok ekile ŋol aberu keŋ akimyekin akisiyookin ŋuna ikoŋit, kori iikinit akitiya, eruwor ekaile ŋolo ka asecit a aberu a ŋin nakou a ekile a ŋol.

¹⁶Erae ŋun ŋakiro ŋuna etubunitoe ŋuna abu Ekapolon tolimok Moses aŋuna aberu ka lokile keŋ ka aŋuna a papa ka nakoku keŋ eriŋa erae apese kiboiye alore a papa keŋ.