Read ngakarimojong Ekim. 31 Bible Online

Ekim. 31 - ngakarimojong bible

Ekim. 31

²“Kisican Ŋimidian aŋuna apotu ikes kitiyata neni a Ŋisirael, ekaku itwani iyoŋ daŋ ikwapei ŋituŋa kon.”

³Aŋun tolimok Moses Ŋisirael tema, “Toseutu ŋituŋa ŋidi alokidiŋ kus, toloto ejie ka ŋituŋa a Midian, kinyaŋasi aŋuna ke Ekapolon ŋuna apotu Ŋimidian kitiyata.

⁴Emaikina ikiyakiyasi lojie ŋikilyok aliput a ŋolokabila a Ŋisirael.”

⁵Aŋun, alotuŋa a Isirael a ŋulu arae ekimar kec ŋalipyo ŋuna alalak, aponi toseunae ŋikilyok ŋalipyo ŋatomon ka ŋaarei, aliput a ŋolokabila, aŋuna ka alosit lojie.

⁶Abu nai Moses kiyakiya ŋikilyok ŋul lojie, a ŋolokabila alemunit ŋikilyok aliput. Apotu ŋikilyok ŋul torukosi kaapei ka Pineas lokoku ka Eleasar a esacaradoti a ŋolo atiŋit ŋiboro ŋulu esitiyao anakibois a ŋina asegan ka ŋarupepe ŋuna akusyo eramere eli.

⁷Apotu ikes kitijikis Ŋimidian, lopite ŋolo alimokinitor Ekapolon Moses, toara ŋikilyok ŋulu Midian ŋulusapa daadaŋ.

⁸Toara ikes ŋirwosi a Midian lu: Epi, Rekem, Sur ka Ur ta Reba. Arae ŋul ŋirwosi ŋikan ŋulu a Midian ŋulu apotu Ŋisirael toara kaapei ka ŋituŋa a Midian ŋice, toara daŋ Ŋisirael a ekileŋ Balaam lokoku a Beor.

⁹Apotu Ŋisirael torikosi ŋaberu ka ŋidwe a Ŋimidian erae ŋienan, tomeasi ŋaatuk kec daadaŋ ka ŋamesekin kec, yaasi daŋ ŋiboro kec daadaŋ ŋulu aŋatunete ikes.

¹⁰Kicunya Ŋisirael ŋitaunio daadaŋ ŋulu eboiyoto Ŋimidian ka ŋalomarisinei kec daadaŋ,

¹¹nai apotu ikes yaasi ŋiboro daadaŋ ŋulu aŋatunete ikes kaapei ka ŋituŋa ta ŋibaren.

¹²Yaut Ŋisirael ŋituŋa ŋulu ekamunete ka ŋiboro ŋulu aŋatunete ikes neni a Moses, neni ke Eleasar a esacaradoti ka neni ka atukot a Ŋisirael a ŋulu ayakasi nalomar kec ŋina ayai nadipoe ŋuna a Moab diyete Yorodan neni iteosi ka Yeriko.

¹³Apotu Moses, Eleasar esacaradoti ka ŋikarikok a Ŋisirael toloto akisiryam ŋikilyok ŋulu alosito lojie, kisiryama alokiŋa alomar.

¹⁴Abu Moses toŋoik ŋikapolokinitok a ŋajorei, ŋikarikok a ŋikajiok a ŋalipulipui ka ŋikarikok a ŋikajiok a ŋamiamiae a ŋulu aboŋunete alojie.

¹⁵Tolimok Moses ikes tema, “Imyekis iyes ŋaberu daadaŋ eyarete a?

¹⁶Ŋaberu nu pei nu, apotu kiwuapa ŋakiro a Balaam, ido apotu inakis Ŋisirael akiŋer Ekapolon anakiro a ŋuna apotu kitiyakin alo Peor, toyakaunor edeke ŋolo abu toar ŋituŋa ŋulu ke Ekapolon.

¹⁷Aŋun nai tokona, toara ŋidwe ŋulusapa daadaŋ alodwe a ŋaberu a nu ka toara ŋaberu daadaŋ ŋuna iryamakina ka ŋikilyok.

¹⁸Nai kimyekisi ŋapesur daadaŋ ŋuna nyiryamakina ka ŋikilyok toyara aŋuna kus.

¹⁹Kiboiyoto alokiŋa alomar ŋirwa ŋikanikaarei iyes daadaŋ ŋulu ipotu toara ŋituŋa, kori totapa ŋituŋa ŋulu etwakito, emaikina iyes kitaleunos epete ŋirwa ŋiuni ka epete ŋirwa ŋikanikaarei kaapei ka ŋituŋa ŋulu irikunete iyes lojie.

²⁰Emaikina iyes kitaleut ŋilowi daadaŋ, ŋiboro ŋulu itiyaunitae elou a ibarasit, ŋiboro daadaŋ ŋulu itiyaunitae a ŋajul a ŋamee ka ŋiboro daadaŋ ŋulu itiyaunitae akitoe.”

²¹Tolimok Eleasar esacaradoti ŋikilyok ŋulu alosito lojie tema, “Erae nu ŋakiro ŋuna etubunit Ekapolon alokisil ŋuna abu Ekapolon tolimok Moses:

²²Egolid, esilipa, eburonis, asuwat, asuwat ŋina apotyon, asuwat ŋina enyaritae Tin,

²³ibore daadaŋ ŋini nyenomiyari anakim, emaikina kitaleunoe anakiwuakin nakim. Kikote neni daŋ, emaikina ikes kitaleunoe a ŋakipi a ŋunakitaleet. Ŋiboro daadaŋ ŋulu epedori akim anomiyar, emaikina kitaleunoe a ŋakipi a ŋunakitaleet.

²⁴Emaikina iyes kilotasi ŋilowi kus epete ŋirwa ŋikanikaarei, ido iruworosi ŋulu italeuno, ani ekaku ipedorete iyes alomun nalomar.”

²⁵Kirwor Ekapolon neni a Moses tema,

²⁶“Iyoŋ ka Eleasar esacaradoti kaapei ka ŋikarikok a ŋatekerin a Ŋisirael, emaikina kimara ibore daadaŋ ŋini aponi toŋatunae alojie, ŋituŋa, kori ŋibaren.

²⁷Totyak ibore daadaŋ ŋini eŋatunitae ŋarwa ŋaarei, inak neni a ŋikilyok a ŋulu alosito lojie ka ŋice neni a Ŋisirael a ŋuluce.

²⁸Alotooma ŋulu ekorakinio ŋikilyok ŋulu alosito lojie, totyaka ŋice erae ainakinet neni ke Ekapolon, totyaka atutubet apei alotooma ŋamiae ŋakan a ŋinibore ekorakinio ikes, kerae a ŋituŋa, kori a ŋimoŋin, kori a ŋisigirya, kori a ŋamesekin, kori a ŋamee.

²⁹Kijau ainakinet ŋin alotooma atutubet ŋina a ibore a ŋini ekorakinio ikes, ido inak Eliasar a esacaradoti ikwapei ainakinet neni ke Ekapolon.

³⁰“Nai alotooma atutubet ŋina ekorakinio Ŋisirael ŋuluce, emaikina iyoŋ tolemu ipei alotooma ŋatomonikan, kerae a ŋituŋa, a ŋimoŋin, a ŋisigirya, a ŋamesekin, kori a ŋamee, kori ŋibaren ŋuluce daadaŋ, tosodi inakis neni a ŋilepi, a ŋiketiyak loeema ŋolo ke Ekapolon.”

³¹Apotu Moses ka Eleasar esacaradoti kitiyata lopite ŋolo ecikitor Ekapolon Moses.

³²Ŋiboro ŋulu apotu kidoŋo aloboro a ŋulu aŋatunio kedaun akorakin ŋikilyok ŋulu alosito lojie ikes lu: Ŋamesekin ŋalipyo ŋamiae ŋakanikapei ka ŋatomonikanikaarei ka ŋakan,

³³ŋimoŋin ŋalipyo ŋatomonikanikaarei ka ŋaarei,

³⁴ŋisigirya ŋalipyo ŋatomonikanikapei ka apei,

³⁵ŋapesur ŋuna pa eryamakina ka ŋikilyok ŋalipyo ŋatomoniuni ka ŋaarei.

³⁶Epeiwae a ŋiboro ŋulu aponi tokorakinae ŋikilyok ŋulu alosito lojie arae ŋakinei ŋalipyo ŋamiae ŋauni ka ŋatomoniuni ka ŋakanikaarei ka ŋamiae ŋakan,

³⁷ido aponi inakinae neni ke Ekapolon ŋakinei ŋalipyo ŋakanikapei ka ŋatomonikanikaarei ka ŋakan.

³⁸Ŋimoŋin ŋalipyo ŋatomoniuni ka ŋakanikapei, ido aponi inakinae neni ke Ekapolon ŋimoŋin ŋatomonikanikaarei ka ŋaarei.

³⁹Ŋisigirya ŋalipyo ŋatomoniuni ka ŋaarei ka ŋamiae ŋakan, ido aponi inakinae neni ke Ekapolon ŋisigirya ŋatomonikanikapei ka apei,

⁴⁰Ŋapesur ŋuna pa eryamakina ka ŋikilyok ŋalipyo ŋatomon ka ŋakanikapei, ido aponi inakinae neni ke Ekapolon aŋuna ke etic keŋ ŋapesur ŋatomoniuni ka ŋaarei.

⁴¹Abu Moses inak ŋainakineta ŋuna atyakakinitae Ekapolon neni ke Eleasar a esacaradoti, lopite ŋolo ecikitor Ekapolon Moses.

⁴²Epeiwae a ŋiboro a ŋulu aŋatunio alojie a ŋulu abu Moses totyakaki Ŋisirael ŋuluce kedau atyakakin ŋikilyok ŋulu alosito lojie ikes lu:

⁴³Ŋakinei ŋalipyo ŋamiae ŋauni ka ŋatomoniuni ka ŋakanikaarei ka ŋamiae ŋakan,

⁴⁴ŋimoŋin ŋalipyo ŋatomoniuni ka ŋakanikapei,

⁴⁵ŋisigirya ŋalipyo ŋatomoniuni ka ŋamiae ŋakan

⁴⁶ka ŋapesur ŋuna pa eryamakina ka ŋikilyok ŋalipyo ŋatomon ka ŋakanikapei.

⁴⁷Alotooma ŋiboro lu ŋulu atyakakinitae Ŋisirael ŋuluce daadaŋ, abu Moses totyaka ipei alotooma ŋatomonikan a ŋituŋa ka a ŋibaren, ido inak neni a ŋilepi a ŋiketiyak loeema ŋolo ke Ekapolon, lopite ŋolo ecikitor Ekapolon Moses.

⁴⁸Ekaku ŋun, apotu ŋikarikok a ŋikajiok a ŋalipulipui ka ŋikarikok a ŋikajiok a ŋamiamiae potu neni a Moses,

⁴⁹Tolimokis iŋes temasi, “Emari isua ŋikilyok ŋulu epolokinitoe isua ka aryamun atemar eyakasi daadaŋ.

⁵⁰Tosodi eyaunitae isua ainakinet neni ke Ekapolon, ŋiboro lu ŋulu abu ŋinituŋanan kosi toryamu: Ŋiboro ŋulu etiyaunitae ke egolid, ŋinapen anakan, ŋiriko, ŋikabobooe, ŋikadoŋidoŋ, ŋinapen alodokolei aŋuna ka amookunor alokiŋaren Ekapolon.”

⁵¹Apotu Moses ka Eleasar esacaradoti kijaut aneni a ŋikilyok a ŋul egolid ŋolo etiyaunitere ŋiboro ŋulu egelegelya.

⁵²Tosodi arae egolid daadaŋ ŋolo etiyaunitere ŋiboro ŋulu apotu ŋikarikok a ŋalipulipui ka ŋamiamiae ŋul inakis Ekapolon ŋakiloi ŋuna eapikinito ŋamiae ŋaarei.

⁵³(Kebu ŋolokajion toŋata ŋiboro aŋuna keŋ a ilope ŋulu apotu ikes toŋatut.)

⁵⁴Aŋun, apotu Moses ka Eleasar esacaradoti kijaut egolid aneni ŋikarikok a ŋikajiok a ŋulu arae ŋalipulipui ka ŋamiamiae, kiwuakis egolid ŋol tooma eema ŋolokilipet ikwapei ibore ŋini etamunitotor Ŋisirael Ekapolon.