Read ngakarimojong Ekim. 34 Bible Online

Ekim. 34 - ngakarimojong bible

Ekim. 34

¹Kirwor Ekapolon neni a Moses tema,

²“Kicik Ŋisirael, tolimok ikes ebe, ‘Ani ilomarete iyes nakwap a Kanaan (iŋes akwap ŋina akainakinit ayoŋ iyes toruwor ŋina kus, erae akwap a Kanaan ŋina igerunito ŋikukorin lu:)

³Alowae a ŋolo alo Kwap, emyeari ekukoru analoŋisat a ŋina a Sin (iŋes Kades) alokukoruu a ŋolo ka akwap a Edom. Egeuni ekukoru ŋolo alo Kwap alokisal a Anam ŋina Atwan a ŋina eyai Kide. [11]

⁴kilugok a nen lowae ŋolo alo Kwap totub aloŋisat Sin tomyaa Kwap Akirabim-Pas, totubor naloŋisat Sin kisalakin Kades-Barinea alowae a ŋolo alo Kwap tomea a nen tari Asar-Adar, totubor Asimon

⁵neni ilugokinia tomyaa nayonae ŋina a Ijipit, kisalakin nanam Mediteranian.

⁶“‘Ekukoru kus ŋolo alo To iŋes anam Mediteranian.

⁷“‘Ekukoru kus ŋolo alo Kuju iŋes lo: Ageun ananam Mediteranian tari Moru Or

⁸ka ameun alo Moru Or emyaari tari Leboamas, tomyaa nabo tari Sedad,

⁹tomyaa a nen tari Sipiron kisalakin Asarenan. Eruwor ŋol ekukoru kus ŋolo alo Kuju.

¹⁰“‘Egeuni ekukoru kus ŋolo alo Kide alo Asar-Enam, toremor Sepam

¹¹totiyaar a nen tomyaa Ribila alowae a ŋolo alo Kide Ain, totiyaar a nen toman adipo anam Kineres [12] alo Kide,

¹²totiyaar nabo a nen tari Yorodan, tomek Yorodan kisalak nanam ŋina Atwan. Eruwor ŋin akwap kus ka ŋikukorin ŋulu irimokinito iŋes kidiŋ.’”

¹³Kicik Moses Ŋisirael tema, “Erae ŋin akwap ŋina eruwor ŋina kus anakilamilam, akwap ŋina ecik Ekapolon ainakin lotuŋa a ŋikabilae a ŋikanikaomwon ka atutubet apei ŋina a ekabila a epei;

¹⁴anerae adaut ŋituŋa a ekabila a Ruben ka ŋulu a ekabila a Gad aryamun akwap kec kaapei ka atutubet apei ŋina a ekabila a Manase.

¹⁵Aryamut ŋikabilae ŋuluarei ŋul ka atutubet apei a ekabila a epei akwap ŋina aruwor ŋina kec alokekwaye Yorodan amyar alo Yeriko tomyaa lowae ŋolo alo Kide.”

¹⁶Kirwor Ekapolon neni a Moses tema,

¹⁷“Erae lu ŋirorwa a ŋikilyok a ŋulu ikikorakinete iyes akwap ŋina eruwor ŋina kus: Esacaradoti Eleasar ka Yosua lokoku a Nun.

¹⁸Emaikina iyes tonyaraut ekarikon epei alotooma ŋolokabila akoranakin ŋituŋa akwap ŋina eruwor ŋina kec.”

¹⁹Ŋirorwa a ŋikilyok a ŋul ikes lu: Alokabila a Yuda Kaleb lokoku a Yepune.

²⁰Alokabila a Simon Semuel lokoku a Amiud.

²¹Alokabila a Benjamin Elidad lokoku a Kisilon.

²²Alokabila a Dan Buki lokoku a Yogili.

²³Alokabilae a ŋiletok a Yosepu tonyara lu: Alokabila a Manase Aniel lokoku a Epod

²⁴ka alokabila a Epuraim Kemuel lokoku a Sipitan.

²⁵Alokabila a Sebulon Elisapan lokoku a Paranak.

²⁶Alokabila a Isakar Palitiel lokoku ka Asan.

²⁷Alokabila ka Aser ekarikon iŋes Aiud lokoku a Selomi.

²⁸Alokabila a Naputali Padael lokoku ka Amiud.

²⁹Erae ŋul ŋikilyok ŋulu alimoki Ekapolon akorakin Ŋisirael akwap ŋina eruwor ŋina kec anakwap a Kanaan