Read ngakarimojong Ekim. 35 Bible Online

Ekim. 35 - ngakarimojong bible

Ekim. 35

¹Abu Ekapolon kirwor neni a Moses anadipoe a Moab alodiyete Yorodan aneni iteosi ka Yeriko tema,

²“Kicik Ŋisirael inakis neni a ŋilepi alotooma akwap kec ŋitaunio ŋulu iboiyoto ŋilepi, emaikina daŋ iyes inakis ŋilepi neni edakasi ŋibaren kec alodiyete ŋitaunio ŋulu iboiyoto ikes.

³Eruworosi ŋitaunio ŋul ŋulu kec ŋulu iboiyoto ikes ka eruworosi ŋadakarisinei a ŋitaunio a ŋul neni edakasi ŋaatuk kec, ŋamesekin kec ka ŋibaren kec ŋuluce.

⁴Emaikina ŋadakarisinei ŋuna iinakinete iyes ŋilepi erae ŋuna egeunete anarwatatain a ŋitaunio kec tari neni isalakin ŋimitae ŋamiae ŋaomwon ka ŋatomonikan alowaetin a daadaŋ a ŋolotaun.

⁵Emaikina iyes kipima kiŋa ŋolotaun ameun anarwatata tari neni emaikina kisalak; alowae a ŋolo alo Kide kipima ŋimitae ŋamiae ŋakanikaomwon, alowae a ŋolo alo Kwap ŋimitae ŋamiae ŋakanikaomwon, alowae a ŋolo alo To kipima ŋimitae ŋamiae ŋakanikaomwon, alowae a ŋolo alo Kuju kipima ŋimitae ŋamiae ŋakanikaomwon. Eruwor nen ŋalup kec neni edakasi ŋibaren alotaunio kec.

⁶“Alotaunio a ŋulu iinakinete iyes ŋilepi, kimarakisi daŋ lotaunio ŋul, ŋikanikapei ŋulu edoonokinete ŋituŋa, ŋitaunio ŋulu icamakinete iyes ŋituŋa ŋulu ebucakin akiar ŋuluce todokis, tosodi emaikina iyes inakis ikes ŋitaunio ŋice ŋatomoniomwon ka ŋiarei.

⁷Ekimar a ŋitaunio a daadaŋ a ŋulu iinakinete iyes ŋilepi erae ŋatomoniomwon ka ŋikanikauni ka ŋadakarisinei kec.

⁸Ani iinakinete iyes ŋitaunio neni a ŋilepi alotooma akwap ŋina ekorakinitae Ŋisirael, emaikina totyakarae ŋitaunio ŋulu elalak ka totyakarae ŋitaunio ŋulu ekudyoko alokabilae a ŋulu eryamunito ŋitaunio ŋulu ekudyoko. Etyakakinio ŋilepi ŋitaunio alotyae a ŋolo eryamunit ŋolokabila.”

⁹Tolimok Ekapolon Moses tema,

¹⁰“Tolimok Ŋisirael ebe, ‘Ani ituborosi iyes lowae ye Yorodan, tolomasi nakwap ŋina a Kanaan,

¹¹emaikina iyes toseut aŋuna kus ŋitaunio ŋulu edoonokinio, ikotere ituŋanan ŋini ebucakin akiar ŋinice epedori adokin nen.

¹²Eruworosi ŋitaunio ŋulu neni iŋopiyata iyes aneni a ituŋanan a ŋini ecamit akinyaŋ ituŋanan keŋ ŋini earitae, ikotere nyeari ituŋanan ŋini ebucakin akiar ŋinice mati kitowoi iŋes kisitakinae aloikiiko a ŋolo ka atukot.’ ”

¹³Emaikina iyes toseut ŋitaunio ŋikanikapei ŋulu edoonokinete ŋituŋa kus,

¹⁴ŋitaunio ŋiuni alowae a ye Yorodan ka ŋiuni anakwap a Kanaan.

¹⁵Eruworosi ŋitaunio ŋul ŋulu edoonokinete Ŋisirael, kori ŋituŋa ŋulugelae ŋulu iboiyete ka Ŋisirael, kori ŋipeyok ŋulu eya Isirael, ikotere ituŋanan ŋini ebucakin akiar ŋinice epedori adokin nen.

¹⁶Tolimok nabo Ekapolon Moses tema, “Tolimok Ŋisirael ebe, ‘Ani keram ituŋanan ŋinice ka asuwat, ido totwan ituŋanan ŋini aramyo, erae ŋini arami ŋinice ekaaran; emaikina ekaaran daŋ toarae,

¹⁷kori ani kimas ituŋanan ŋinice ka amoru, ido totwan ituŋanan ŋini emasyo, erae ŋini emasi ŋinice ekaaran; emaikina ekaaran daŋ toarae,

¹⁸kori ani keram ituŋanan ŋinice a ebela, ido totwan ituŋanan ŋini aramyo, erae ŋini arami ŋinice ekaaran; emaikina ekaaran daŋ toarae.

¹⁹Ekenyaŋan [13] iŋes ituŋanan ŋini eari ituŋanan ŋini earit ŋinice ŋini eyanatar iŋes, epedori ekenyaŋan akiar ituŋanan ŋini earit ŋinice apaki daadaŋ ŋina iryamunotor ikes.

²⁰Ikwaŋinapei, ani kijuka ituŋanan ŋinice aŋuna itidiŋitor, kori kimas ŋinice edapunit, ido totwan ituŋanan ŋini ijukaryo, kori emasyo,

²¹kori ani kibap ituŋanan ŋinice aŋuna imanitor, ido totwan ituŋanan ŋin ibapyo, emaikina toarae ituŋanan ŋini ebapi ŋinice, erae ituŋanan ŋini ebapi ŋinice ekaaran; epedori ekenyaŋan akiar ituŋanan ŋini earit ŋinice apaki daadaŋ ŋina iryamunotor ikes.

²²“‘Nai ani kijuka ituŋanan ŋinice pa itidiŋit, kori kimas iŋes a idiobore, pa sek edapunit,

²³kori kimasa ituŋanan amoru, ido toar amoru ŋin ituŋanan ŋini sek pa etidiŋit iŋes, kori ŋini sek pa adiŋasi ka iŋes, ido nyecamit iŋes akiwan ituŋanan ŋin,

²⁴anakiro a nu, emaikina atukot a ŋituŋa totubu ŋakiro a ekaaran ka a ekenyaŋan iwuapit ŋikisila.

²⁵Emaikina atukot toiu ituŋanan ŋini abucakin akiyar ŋinice aneni a ekenyaŋan, ido emaikina atukot kinyaka ituŋanan ŋin lotaun ŋolo sek adokinit iŋes kiboi a nen mati ketwana esacaradoti ŋolo Apolon nooi ŋolo aponi kiosae ka akimyet a ŋina asegan.

²⁶Nai ani keloma apaki daadaŋ ituŋanan ŋini aari ŋinice kiŋa etaun ŋolo adokinit iŋes,

²⁷ido kiryamunos ka ekenyaŋan toar ekenyaŋan ŋol iŋes, nyimaryo ekenyaŋan ŋol erae ŋolo esecit,

²⁸anerae amaikina ekaaran ŋol kiboi alotaun a ŋolo adokinit iŋes akitodol ŋina etwania esacaradoti ŋolo Apolon nooi, ekaku a atwanare a esacaradoti a ŋolo Apolon nooi epedori ituŋanan ŋin aboŋor lore keŋ.’

²⁹“Eruwor ŋakiro ŋun ŋuna etubunitoe ka ekisil aŋuna kus ka ananyameta kus a daadaŋ aneni daadaŋ iboiyoto iyes.

³⁰“Ani kear ituŋanan ŋinice, emaikina toarae iŋes daŋ daŋ anakiro a ŋisuudae, nai mam ituŋanan emaikina toarae anakiro a esuuda a epei bon.

³¹Kikote neni daŋ, nyemaikina iyes kijaut etacit edio aŋuna ka alakunia akiyar a ekaaran a ŋolo emaikina toarae aŋuna ka asecit keŋ. Emaikina ekaaran toarae.

³²Nyemaikina daŋ iyes kijaut etacit edio aŋuna ka alakunia ituŋanan ŋini asii lotaun ŋolo edoonokinio, ikotere eboŋuni ituŋanan ŋin nakwap keŋ eriŋa esacaradoti ŋolo Apolon nooi nyetwana.

³³Nyinyasa akwap ŋina iboiyoto iyes, anerae inyasete ŋaokot akwap ka emam epite ŋolo emookunere akwap mati ŋaokot a ituŋanan a ŋini abu toar ŋinice.

³⁴Nyinyasa akwap ŋina iboiyoto iyes, neni eboiyo ayoŋ daŋ, anerae ayoŋ Ekapolon ikiboi kaapei ka Ŋisirael.”