Read ngakarimojong Mika 5 Bible Online

Mika 5 - ngakarimojong bible

Mika 5

¹Ŋituŋa a Yerusalem tocunakisi ŋajorei kus! Adaut ŋimoe akirimokin iwon kidiŋ; itijiete ekarikon a Isirael.

²Abu Ekapolon tema, “Betelem, etaun ŋolo eyai Epurata, tari kerae iyoŋ idit nooi alotaunio a ŋulu ka ateker a Yuda, alemuni ayoŋ ekepukan aneni kon, ekepukan ŋolo ebuni akipuka Isirael, ekepukan ŋolo eponito ŋakiro keŋ ananyameta a ŋuna a koloŋ.”

³Aŋun, imyekini Ekapolon ŋituŋa keŋ mono a lomoe kec, akitodol ŋina idounio aberu ŋina emaikina kidou lokoku keŋ, ŋolo erae ekepukan. Apaki nai ŋin iŋes eboŋunioto ŋikaitotoi keŋ ŋuluce kimorikin ka Ŋisirael.

⁴Apaki ŋina ebunio ekepukan ŋol, ipukae iŋes ŋituŋa keŋ ka apedor a ŋina a Ekapolon ka anapolou a ŋina ailiilon a ŋina ke ekiro ke Ekapolon Akuj keŋ. Iboikinosi ŋituŋa keŋ eiuna, anerae eyenunete ŋituŋa ka akwap a daadaŋ agogoŋu ŋina eyakar iŋes.

⁵Iŋes eyauni ekisil. Ani kepotu ŋituŋa ŋulu ka Asiriya nakwap yok, kitorut naduketa ŋunajiet, iyakiyaryo iwon ŋikarikok yok ŋulu egogoŋ kitijikis ikes.

⁶Isitiyaete ikes ŋiboro ŋulujiet areunia akwap ŋina ka Asiriya ka akwap ŋina a Nimirod, ido ikiiunete ikes iwon erae kepotu ŋituŋa ka Asiriya nakwap yok, kori kepotu lokukworin ŋulu ka akwap yok.

⁷Epote nai ŋituŋa a Yakob ŋulu apiyanun akiboiyor nakwapin ŋuna alalak, ikwaanikin ikes a nen ka ŋakopi ŋuna eyaunit Ekapolon, ŋuna itojokete akwap, ikwaanikin ikes a nen ka akiru ŋina itilibuni ŋinya. Eruwor Akuj iyoki ikes, meere ituŋanan.

⁸Alokidiŋ ŋakwapin eyakaun ŋipiya a Yakob, eyakaun ikes kidiŋ ŋituŋa ŋulu alalak, ededeŋiata ikwa eŋatuny alokidiŋ ŋityaŋ ŋulu ka amoni, ikwaanikin ka iŋatuny ŋini eyai kidiŋ esipan a ŋamesekin, ŋini ani eporokini amesek, iimakini kwap toryeta ka tonyilinyiliya, todaun ikaiunan amesek.

⁹Ereunete Ŋisirael ŋimoe kec, emunyarete daadaŋ.

¹⁰Ebala Ekapolon ebe, “Ani edoli akoloŋit ŋin, alemari ayoŋ ŋaŋolei kus, amunaari ayoŋ ŋagaari kus.

¹¹Amunaari ayoŋ ŋitaunio ŋulu anakwap kus, oukonok kwap ŋaduketa ŋuna ijioto iyes.

¹²Amunaari ayoŋ ŋiboorei ŋulu inapito iyes itisibito eyakatar apedor, ekemyek iyes imamukatar ŋimurok.

¹³Amunaari ayoŋ ŋakujo kus ka ŋipirin ŋulu a ŋitalyo kus; nyirubakinete nabo iyes ilipete neni a ŋiboorei a ŋulu itiyaunito iyes.

¹⁴Alemari ayoŋ anakwap kus ŋitorubei a akuj a ŋina enyaritae Asera, amunaari ayoŋ ŋitaunio kus.

¹⁵Anaŋoit kaŋ a ŋina apolon nooi, esicani ayoŋ ŋakwapin daadaŋ ŋuna awout akiwuap ayoŋ.”