Read ngakarimojong Mika 6 Bible Online

Mika 6 - ngakarimojong bible

Mika 6

¹Kiirasi ŋakiro ŋuna irworo Ekapolon: “Tonyoutu! Todyekanaros aŋuna a ŋakiro kus aloŋaren ŋimoru, kimyekisi ŋikamukumukui kiirasi ŋitoilon kus.

²Kiirasi iyes ŋimoru ŋakiro ŋuna isitar Ekapolon, topupokisi iyes ŋawoeta ŋuna ka akwap ŋuna a ŋikaru ka ŋikaru, eyakar Ekapolon asitan lotuŋa keŋ, isitakinit iŋes Ŋisirael.

³Ŋikaatuŋa, anukiro etiya ayoŋ neni kus? Alipite eketeryamunia ayoŋ iyes ŋican? Toboŋokinoe ayoŋ.

⁴Abu ayoŋ okoyau iyes anakwap a Ijipit, okolaku anakwap a ŋina iraakatar ŋipi. Abu ayoŋ eyakiu Moses kaapei ka Aron ta Miriam akirik iyes.

⁵Ŋikaatuŋa, totamutu ŋakiro ŋuna abu erwosit ŋolo a Moab ŋolo anyaritae Balak totuk akitiya neni kus, ka ŋuna abu Balaam lokoku a Beor toboŋok Balak. Totamutu ŋakiro ŋuna apotu kitiyakin neni kus alorot ameun alo Sitim tari Giligal. Totamutu ŋakiro ŋun, ikotere iyenunete ŋuna abu ayoŋ etiya aŋuna ka aiun iyes.”

⁶“Nyo emaikina ayoŋ oyau neni ke Ekapolon a Akuj a ŋina alokidiama, apaki ŋina abunio akilip neni keŋ? Emaikina mono ayoŋ oyau ŋainakineta ŋuna epeyo, kaapei ka ŋitak ŋulu erae apolou kec ekaru epei a?

⁷Elakar mono Ekapolon keyaun neni keŋ ŋamesekin ŋalipyo ka akimyet ŋina ilelebun ŋaŋololin ŋalipyo ŋatomon a? Ainakini mono ayoŋ Ekapolon ikoku kaŋ ŋini kiyae aŋuna a ŋadyakanareta a? Ainakini mono ayoŋ iŋes arait ŋina ka akuwan kaŋ aŋuna ka asecit ke etau kaŋ a?”

⁸Iyoŋ ituŋanan, adau Ekapolon alimokin iyoŋ ŋuna ajokak; ŋuna ecamit Ekapolon aneni kon ikes nu: Akitiya ŋuna iyookino ka amina arimakinit ŋuluce ta alosit itiditeuna bon anakimorikina ka Akuj yok.

⁹Erae ibore ŋini ejok akitopoloorit Ekapolon. Enyarit iŋes ŋituŋa ŋulu ke etaun ebala, “Topupokisi, iyes ŋituŋa ŋulu itukokina lotaun.

¹⁰Ekemuryakinete mono ayoŋ ŋisiliŋa ŋulu emodiununiyo, ŋisiliŋa ŋulu eyakasi nakais a ŋulu aronok a? Ekemuryakinete mono ayoŋ ŋaratilyo ŋuna emodiyanakinere ŋituŋa ŋuna icenen a?

¹¹Arubakini mono ayoŋ emyekinit ituŋanan ŋini isitiyae aratil ŋina nyiyookino ka ecwee ŋolo nyiyookino ŋakiloi keŋ esibit nyitiyaete aronis a?

¹²Eryenyaaka ŋikabarak kon, irworosi ŋituŋa ŋulu iboiyete alotooma kon alyokonu, erae daadaŋ ŋuna irworosi ikes alyokonu.

¹³Aŋun, esyaki ayoŋ amunaar iyoŋ, esyaki ayoŋ akitisilun iyoŋ aŋuna a ŋasecisya kon.

¹⁴Imujete ŋituŋa kon nai nyimwokete; erubakinete ŋakookyes kec eororete. Iŋadaete ikes, nai mam ibore ideun, anerae ibore ŋini iŋadakinete ikes, etelemari ayoŋ ŋimoe.

¹⁵Epedorete ikes aekin, nai mam ibore elemunete; icuunete iyes akimyet alokito ka Olipa, nai nyiosakinosi akimyet adio daŋ, icuunete iyes epiini, nai nyimasete edio daŋ,

¹⁶anerae iwuapa iyes ŋakiro ke erwosit Omiri ka etiyata ŋituŋa kon ŋiticisyo daadaŋ ŋulu etiyaete ŋituŋa ke ekal ka Aab, iwuapa iyes ŋakiro ŋuna aronok ŋuna etiyaete ikes. Aŋun, ekepotokini ayoŋ iyoŋ namunaaro ka ŋituŋa kon najamuwaro; ikitekinete iyoŋ ŋituŋa a ŋakwapin irae koŋin.”