Read ngakarimojong Naum 2 Bible Online

Naum 2 - ngakarimojong bible

Naum 2

¹Iyoŋ Ninepe, ikidolok iyoŋ ekenyasunan kon, kiyok ŋaduketa ŋunajiet, kiyok erot ŋolo elomunere neni kon, totena aŋuna ke ejie, tocunak ŋasigarya kon daadaŋ aŋuna ke ejie.

²(Inyakakini Ekapolon apolou ŋina ailiilon neni a Isirael kikok nenipei sek ekoni ekiŋaren eriŋa ŋimoe keŋ nyinyasuna iŋes.)

³Eyakatar ŋasigarya a ŋimoe ŋaupala ŋuna areŋak, ido tonapito ŋilowi ŋulu areŋak. Imilyasi ŋasuwa a ŋagaari kec akoloŋit ŋina itemonokinere aŋuna ke ejie. Ibunyasi ŋaŋolei alosit lojie.

⁴Ekerete nooi ŋagaari ŋuna iritae a ŋaŋolei alorotin a ŋulu ke etaun esibit ikerepikinit, ekerete toboŋete analapatui a ŋuna ke etaun, ecayete esibit ŋatocio ka imilyasi esibit akimilyaunet.

⁵Abu Akuj tonyara ŋikapolokinitok ŋajorei keŋ, kibusonokinos ŋul epote neni keŋ. Tomaryaaros ŋikajiok narwatata ŋina ewuat etaun, towaut etaun irimokinito kidiŋ.

⁶Apotu ŋipukei ŋulu ayakasi diyete ŋaŋololin toŋaaros, abu ekabule min neni a ŋituŋa a ŋulu aya kai ŋina ka apukan.

⁷Apotu ŋikaremok kikamasi arwosit ŋina a etaun, torikosi; Kialoloŋo ŋaketiyak a arwosit a ŋin, kigworo iworoete lopite ŋolo erwotor ŋakuryo, toramete ŋatorobwo kec iyaloloŋete.

⁸Kipumunos ŋituŋa alotaun Ninepe esibit ŋakipi ka anam ŋuna sek egolitoe. Tocelu etoil ebala “Towua! Towua!” Nai mam ituŋanan abu toboŋu.

⁹“Toŋatasi egolid! toŋatasi esilipa! Ileleba ebari lotaun, eyai ŋinibore daadaŋ ŋini epol egyelit!”

¹⁰Enyasun Ninepe, mam ŋituŋa eriŋa iboiyete a nen, eturuwor ereŋorot, einaiya ekabule ŋituŋa daadaŋ, emaranete ŋakuŋin kec, esecec ŋireetin kec aŋuna a ekabule.

¹¹Ai tokona eyai Ninepe, etaun ŋolo sek agogoŋ esibit neni iboiyoto ŋiŋatunyo esibit adui a ŋitak a ŋiŋatunyo, adui ŋina eboiyoto ikes tomam ŋini isicani

¹²Aar eŋatuny ŋityaŋ ŋulu itemokino aŋuna a ŋitak keŋ, aar daŋ etyaŋ ece aŋuna a ŋaŋatunyo a ŋuna erukito ka iŋes; elelebik naduyon keŋ akiriŋ a ŋityaŋ a ŋulu aari iŋes, elelebik neni iboiyo iŋes akiriŋ ŋina enyilinyilitae.

¹³Ebala Ekapolon ŋolo a ŋajoresyo neni kon Ninepe, “Akaremokino ayoŋ iyoŋ, ido ecunyakini ayoŋ ŋagaari kon ŋuna iritae a ŋaŋolei topuruut, earyo alojie ŋasigarya kon, alemari ayoŋ ŋiboro daadaŋ ŋulu ibu iyoŋ tolema aneni a ŋulucetuŋa ka nyiiraryo nabo ŋitoilon a ŋikiyakia kon.”