Read ngakarimojong Naum 3 Bible Online

Naum 3 - ngakarimojong bible

Naum 3

¹Ekaŋ iyoŋ etaun ŋolo ileleba ŋikalyokonok ka ŋikaarak! Etaun ŋolo ileleba ŋiboro ŋulu emaikina toŋatarae!

²Kiira, eruye ŋolo ka adaset ka eruye a ŋakejen a ŋaŋolei ta ŋolo a ŋagaari a ŋuna iritae a ŋaŋolei.

³Emotuno neni kon ŋikametok ŋaŋolei, imilyasi ŋileŋia ka epariparete ŋakwaaras! Etukosi alotooma kon ŋawat a ŋituŋa a ŋulu etwakito, etukosi alotooma kon ŋawat ŋuna nyimarun, ibusonokinete ŋawat ŋun ŋituŋa.

⁴Ikwapei etiyaa Ninepe esibit amalaat, aŋuna a ŋipitesyo keŋ a ŋulu etamalaaniasi ŋituŋa ka aŋuna ka akikukuja keŋ a ŋina arikokinia iŋes ŋituŋa napitoonut,

⁵ebala Ekapolon ŋolo a ŋajoresyo ebe, “Akaremokino ayoŋ iyoŋ Ninepe, alacari ayoŋ ŋilowi kon, ido tolerok iyoŋ, emyekini ayoŋ ŋituŋa a ŋakwapin ikiŋolikis iyoŋ ileri, iŋolikinete ŋapukasinei ŋileec kon.

⁶Eketoodikini ayoŋ iyoŋ atemar akajamuwarit ayoŋ iyoŋ, akawuatakini ayoŋ iyoŋ aoret,

⁷ikitekinete iyoŋ ŋituŋa eumokinito, ŋituŋa daadaŋ ŋulu ikiŋolikinete iyoŋ, eemete aneni kon ebasi, ‘Enyasun Ninepe, ŋae igwori aŋuna keŋ?’” Ŋae isiryoriuni iŋes?

⁸Ninepe, ijok mono iyoŋ akilo Tebes etaun ŋolo adukitoe diyete aŋolol Nile, etaun ŋolo ewuaunito ŋakipi kidiŋ a? Anam iŋes epakarit ŋimoe keŋ, ŋakipi ikes erae arwatata keŋ.

⁹Arae Esiopia ka Ijipit agogoŋu keŋ ŋina a ŋinapaki, arae Libia ka Put ŋikeŋarakinitok keŋ.

¹⁰Kikote neni daŋ, aponi torikoroe ŋituŋa a Tebes nakwapin, kituruworoe ikes ŋipi. toaranakinae ŋidwe kec nakiryamiryamet a ŋirotin, torikonoroe ŋikapolok a ŋituŋa keŋ eenitae a ŋiriko, kilamilama ŋikarikorok kec totedoreta ŋini eai edyo a ŋikapolok a ŋul.

¹¹Ninepe, emerakin ŋituŋa kon daadaŋ, eemete ikes akiŋop iwarito aiuno alomoe kec.

¹²Ikote ŋaduketa kon ŋunajiet ŋiboboryo ŋulu isyakinete akira, ŋulu iloilookinio torarakin ŋaraito nakituk a ŋinibore enyami.

¹³Kiŋolik ŋasigarya kon! Ekuryaka ikes ikwaan ka ŋaberu. Eŋaara ŋipukei a akwap kon aŋuna a ŋimoe kon. Anomiya akim ŋakito ŋuna edukunitere ŋipukei kon ŋul.

¹⁴Tookutu ŋakipi aŋuna a ŋituŋa, anerae irikaunete ŋimoe Ninepe. Kitogogoŋo ŋaduketa kus ŋunajiet, kicaka ecoto toramuniata ŋabulok,

¹⁵Ikinomiyari iyes akim a nen, ikimunyaryo iyes a ekileŋ. Ikirikaryo iyes ikwa irikarya emaase ŋikinyom, tari kipitunito iyes ikwa emaase, kori kilalak iyes ikwa ŋabeerei,

¹⁶tari kelalak nooi ŋikecurutak kon, kiloito ŋikacer ŋulu alokidiama, eŋopiyarete ikes lopite ŋolo epororya emaase elomunete ŋabebenuk.

¹⁷Ikote ŋikapolok akwap kon emaase, ikote ŋikarikok a ŋakwapin kon ŋabeerei ŋuna ani elilim akwap kinaminamakin narwatatain, nai ani elomuni akoloŋ toporosi, toloto neni emam ituŋanan eyeni.

¹⁸Okoe erwosit ka Asiriya, amunyar ŋikapolok ŋulu sek ipukatotor iyoŋ, atwaka ŋikarikok a ŋituŋa kon kire. Ealar ŋituŋa kon lomoru, mam ituŋanan ecununi ikes aina.

¹⁹Mam epite ŋolo ikitojokunere iyoŋ anawananu kon, erae awananu kon ŋina ikiari iyoŋ. Ŋituŋa daadaŋ ŋulu iirarete atemar enyasun Ninepe, eramakinete ŋakan elakara, anerae mam ituŋanan ibu iyoŋ nyisican anadedeŋu kon a ŋina nyesaluni.