Read ngakarimojong Abak. 2 Bible Online

Abak. 2 - ngakarimojong bible

Abak. 2

¹Awoi ayoŋ eteu, adokari neni irereere eboikin nen, ido eteu eira ŋuna akalimokini Ekapolon ayoŋ eira ŋuna akaboŋokini iŋes ayoŋ alotooma akiŋuruŋura kaŋ.

²Abu nai Ekapolon okoboŋok ayoŋ a ŋakiro a nu, “Kigir ilereete ejok namoru ŋuna edapal ŋakiro ŋuna ekesileerekini ayoŋ iyoŋ, ikotere epedori ŋini iŋolikini akisyom.

³Kigir ikes, anerae eriŋa apaki ŋina iyookinotor, nai ebunit apaki ŋin atipei ka iyookinosi ŋun, etakanuni esibit nyitiyakin atipei, nai kidaru ikes, itiyakin kire jik, nyedidiyete.

⁴Ŋakiro ŋun ikes nu, ‘Nyeyarete ŋulu itiyaete aronis, nai eyarete ŋulu iyookino, anerae ikinyomito Akuj.’ ”

⁵Emodiyana ebari. Ŋiyeŋunenete ŋituŋa ŋulu eturok, eŋaamete ikes nooi ikwa akibois a ŋikatwak, ŋakiro ŋun iŋes ikamanaryata ikes ŋakwapin ka ŋakwapin kituruwosi ŋuna kec.

⁶Eŋoikinete ŋituŋa ŋulu aponi toreunae ŋulu apotu kikamasi ŋakwapin kec, ido ejamuarete temasi, “Ipotu iyes yaasi ibore ŋini pa arae ŋini kus, aŋun, ikisicani Akuj iyes!” Irubakinete iyes tari ori itukete ebari anareikinit ŋulu ideniyorito ŋiboro kus akitac ikes?

⁷Nyepedorete mono ŋulu ideniyorito ŋiboro kus akitac atipei pa iyenete iyes a? Nyetakanunete mono ŋituŋa ŋulu egogoŋ ŋulu ikitubulete iyes a? Ikiŋatarete ikes iyes.

⁸Aŋuna idauniata iyes aŋatanar ŋakwapin ŋuna alalak, ikiŋatarete iyes ŋituŋa daadaŋ ŋulu idoŋito nakwapin ŋun, itiyakinosi ŋun aŋuna a ŋituŋa a ŋulu ipotu iyes toara ka aŋuna ka aryenyeo kus anakwap, alotaunio ka neni a daadaŋ a ŋulu eya lotaunio ŋul.

⁹Ekaŋ iyes ŋulu ipotu kitabara ŋikalya kus aloboro a ŋulu idemete ŋituŋa. Idaut iyes akiduk ŋirerya kus kidiama ŋimoru, itamete atemar mam ibore ikitapi.

¹⁰Adaut ŋiticisyo kus ayaun ŋileec lokalya kus aŋuna tokona imunyaryata iyes ŋakwapin ŋuna alalak; idaut iyes ayaun ŋican nawat kus.

¹¹Ikamarete ŋamoru ka ŋakito ŋuna edukitere ŋakais kus ekigwore kus, isuudato aronis ŋina itiyaete iyes.

¹²Ekaŋ iyes ŋulu idukete etaun anabukonor ŋaokot, idaut iyes akiduk etaun kus anakitiya aronis.

¹³Etiyata ŋituŋa ŋulu ikamasi iyes etic ŋolo a ikoŋin, anerae ibore daadaŋ ŋini etiyata ikes, icunyaryo, Ekapolon ŋolo Etiron iŋes itiyae ŋun.

¹⁴Nai ilelebun nakwap aosou ŋina ka apolou ke Ekapolon, lopite ŋolo ilelebakatar ŋakipi anam.

¹⁵Ekaŋ iyes ŋulu ipotu anaryenyeo kus kitemerakis ŋikidunyet kus; ipotu iyes inakis ikes akiteritereonor esibit ŋikamerak. ikotere ikienatar ikes.

¹⁶Iyes daŋ ekaku, ikiboŋokinete ŋileec akilo akitopolooro. Imasete iyes ŋikulepek ŋun kiteritereonor. Ikitamasi Ekapolon iyes aronis kus a ŋikulepek, ido kilocokinoe akitopolooro kus make toruworos ŋicaryo.

¹⁷Idaut iyes ayepakin kwap ŋamon ŋuna a Lebanon; iyes daŋ ikiyepakinio kwap. Ipotu iyes toara ŋityaŋ a Lebanon, iyes daŋ, ikiryetarete ŋityaŋ. Itiyakin ŋakiro ŋun aŋuna idauniata iyes akiar ŋuluce ka aŋuna ka aryenyeo kus neni a ŋituŋa a akwap ka lotaunio kec.

¹⁸Nyo epoida a akuj a ŋina itiyaunitae? Erae iŋes ibore koŋin ŋini erae ituŋanan itiyaunit, emam ŋakiro ŋuna ikilimokini, nai irworosi ŋiketiyaunak kec alyokonu aŋuna kec. Anijokis itiyae iŋes neni a ŋini abu kiceu iŋes, ikotere kikinyomae iŋes? Erae iŋes akuj ŋina itiyaunitae ka erae iŋes koŋin, nyirworo.

¹⁹Ekaŋ iyes, ŋulu ibasi neni ka akitoe ebe, “Tonyou!” Kori neni ka amoru ebe, “Tonyou!” Epedori mono akuj ŋina itiyaunitae alimokin iyoŋ ŋakiro ŋadi a? Epedoryo akuj ŋin bon akitiyaun ke esilipa, kori ke egolid, nai mam akiyar eyai tooma keŋ.

²⁰Eyai Ekapolon Kai keŋ ŋina asegan; emaikina ŋituŋa daadaŋ anakwap kililiŋa alokiŋaren keŋ.