Read ngakarimojong Abak. 3 Bible Online

Abak. 3 - ngakarimojong bible

Abak. 3

¹Erae na akilip ŋina ka Abakuk a ekadwaran.

²Okoe Ekapolon, adau ayoŋ akiirar ŋuna ka arwonu kon, ido aumokinit ayoŋ aŋuna a ŋiticisyo kon. Kitiya tokona nabo alorwa kosi ŋun, kisileereu tokona nabo ŋiticisyo kon ŋul. Toyakaunor akisyon, tari anapaki a ŋina iŋoitor.

³Ebunit Akuj nabo alo Teman, ebunit Akuj ŋina Asegan alomoru Paran. Ileleba ailiil nakuj, ido ileleba nakwap akipuro iŋes.

⁴Ikoni akwaŋis a akica keŋ ŋina ka akoloŋ; eponito ŋikoi a akica anakan keŋ, aneni eyai apedor keŋ ŋina imunono.

⁵Iyakuununui iŋes ŋican eriŋa iŋes nyebuno, ido icikakini atwanare kiwuapu iŋes.

⁶Ani ewoi iŋes tomaranik akwap; ani eŋoleŋolekini iŋes tomaranikis ŋituŋa. Ielielaari iŋes ŋimoru ŋulurubae; esiporete ŋikamukumukui ŋuluŋorok, ŋulu koloŋ etorenene iŋes.

⁷Abu ayoŋ eŋolik ŋituŋa a Kuc eyakatar akuryanu, abu eŋolik Ŋimidian ebulit emaranete.

⁸Okoe Ekapolon itoŋoit mono iyoŋ ŋaŋololin a? Ayai mono anyunyura kon naŋololin a? Arae mono anam ikitoŋoit iyoŋ nooi apaki ŋina imyaarya ŋagaari ŋuna ke ejie akilounia ŋimoe kon a?

⁹Ibu iyoŋ kitemonokin akisitiya akau a ŋikaleŋeŋe kon, kitemokin agumar ŋikaleŋeleŋe kon, ibu iyoŋ toduŋok ŋaŋololin nakwap, apotu ŋaŋololin toduŋo akwap.

¹⁰Apotu ŋimoru tomaranikis ikiŋolikinete iyoŋ; apotu ŋakipi todout alo kidiama, apotu ŋakalele anauwata kisyakis arwore. Abu akoloŋ tojoŋo akica.

¹¹Abu elap towo aneni sek ayai, iŋolikini akimilyaa ŋina a ŋikaleŋeleŋe kon eiror, iŋolikini akimilyaa ŋina ka akwara kon eiror.

¹²Ibu iyoŋ ibu nakwap iŋoit nooi; ido ibu iyoŋ ananyunyura kipudaa ŋakwapin.

¹³Ibu iyoŋ toloma kiŋa aiun ŋituŋa kon, aiun erwosit kon ŋolo iseunit iyoŋ. Ibu iyoŋ toar ekarikon a apukan a ŋina aronon, ido ibu tomunya apukan ŋin.

¹⁴Ibu iyoŋ toar ekarikon a ŋasigarya a ŋulu aronok a ŋikaleŋeleŋe keŋ pei, ekarikon ŋol ŋolo abu kipiripiriu ikwa ekuwuam akielar isua, abunit iŋes alelyani ecamit amunyar ŋulu a ŋican ŋulu aŋopito,

¹⁵Ibu iyoŋ kipudaa anam a ŋaŋolei kon, kigurok ŋakipi a anam ŋuna alalak ŋun.

¹⁶Apupi ayoŋ ŋakiro ŋun daadaŋ, ido amarani; emaranete ŋipon kaŋ aŋuna a ekabule a ŋakiro a ŋun. alilimiyosi ŋakoyo anakuwan kaŋ, amarani ayoŋ aneni awuar, edaruni ayoŋ ekililiŋat apaki bu, apaki ŋina isicania Akuj ŋituŋa ŋul ŋulu eketijiete ayoŋ.

¹⁷Tari daŋ pa keraito ŋiboboryo ka pa keraito ŋikito ŋulu ke epiini, tari daŋ pa keraito ŋikito ŋulu ka olipa ka kemam ibore erait alomanikor, tari daŋ kemunyar ŋamesekin daadaŋ, toororut ŋatamausinei a ŋaatuk,

¹⁸arubakini ayoŋ alelyani ka alakara, anerae Ekapolon Akuj kaŋ iŋes erae ekaiunan kaŋ.

¹⁹Ekapolon Akuj iŋes erae agogoŋu kaŋ; ekesitori ayoŋ neni nyawanar, ekeuryari nyekegukis ŋamoru alokamukumukui akeri. Egiritae ŋakiro ŋun neni a ŋolo apolokinit ŋiboro ŋulu eeore ŋulu eya ŋaunoi.