Read ngakarimojong Sepan. 1 Bible Online

Sepan. 1 - ngakarimojong bible

Sepan. 1

¹Ŋakiro nu ikes abu Ekapolon tolimok Sepania apaki ŋina araakar Yosia lokoku ka Amon erwosit a Yudaya. Arae Sepania lokoku a Kusi a ŋolo arae lokoku a Gedalia, a ŋolo arae lokoku ke Esekia.

²Tema Ekapolon, “Amunyari ayoŋ ibore daadaŋ ŋini eyai nakwap.

³Amunyari ayoŋ ŋituŋa ka ŋibaren ta ŋityaŋ, amunyari ayoŋ ŋikyeny ka ŋikolya. Esipiyori ayoŋ ŋulu aronok epite ŋolo eyaryata. Amunyari ayoŋ ŋituŋa anakwap.

⁴Esicani ayoŋ ka akan kaŋ ŋituŋa ŋulu a Yudaya ka daadaŋ ŋulu iboiyete alo Yerusalem: Amunyari ayoŋ anakiboisyo a ŋun ŋituŋa daadaŋ ŋulu idoŋito ŋulu ilipete neni a Baal ka ibore daadaŋ ŋini idoŋit neni ilipere neni a Baal, ekisari ayoŋ ŋisacaradotin ŋulu ilipete ŋakujo ŋace ka kitiyanakinete ŋakujo ŋun.

⁵Amunyari ayoŋ ŋulu edokanerete nakais akilip neni a akoloŋ, a elap ta neni a ŋikacer; amunyari ayoŋ ŋulu eryedikete kikoŋo ekiro ke Ekapolon, nai kikoŋete daŋ ekiro ka akuj a ŋina enyaritae Milikom;

⁶Amunyari ayoŋ ŋulu aŋero akiwuapit Ekapolon, ŋulu nyiwarito Ekapolon, kori nyiŋitasi iŋes ibore idio.”

⁷Kililiŋa alokiŋaren Ekapolon Akuj, anerae aapuu akoloŋit ŋina ke Ekapolon; etemok Ekapolon amuronot; adau iŋes akitaleun ŋulu enyarit iŋes.

⁸Ebala Ekapolon, “Ani edoli akoloŋit ŋina ka amuronot kaŋ, esicani ayoŋ ŋikapolok ka ŋidwe a ŋirwosi ŋulusapa ka daadaŋ ŋulu enapito ŋilowi lonape a ŋakwapin a ŋuna egelaaka.

⁹Esicani ayoŋ akoloŋit ŋin daadaŋ ŋulu ilipete neni a ŋakujo car, ŋulu ilelebete ŋakais a ŋakujo kec ŋiboro ŋulu edemyo ŋituŋa ka aryenyeo ta amodiyo.

¹⁰“Akoloŋit ŋin, iiraryo akigworo alopuke a ŋolo a ŋikolya ka akiwolol anakibois a ŋina kitete alotaun ka abilibiliunun ŋina ireta alokamukumukui.

¹¹Kiwololoto iyes ŋituŋa daadaŋ ŋulu iboiyete anakibois a ŋinadipal alotaun, a ŋina egelanerere ŋiboro, anerae amunyar ŋimucurus daadaŋ, adaun tari ŋulu sek ipimete esilipa.

¹²Apaki ŋin, atiŋi ayoŋ etaa ŋolo enoki, ewarya ŋikasecak Yerusalem, ido esicani ŋituŋa ŋulu ebasi ikiyakar ibore daadaŋ, ŋulu irworosi ebe, ‘Emam ibore itiyakini Ekapolon alopite a lo kori a ŋol.’

¹³Eŋatarete ŋituŋa ŋuluce ŋiboro kec, ebwaŋabwaŋaaryo ŋakais kec. Edukokinete ikes ŋakais, nai nyiboikinosi ikes nakais ŋun; edupakinete ikes ŋikito ke epiini; nai nyemasete epiini a ŋikito a ŋul.”

¹⁴“Aapuu akoloŋit ŋina apolon ŋina ke Ekapolon, aapuu, ido iburuburuuna atipei. Epipil nooi akigworo akoloŋit ŋin ŋina ke Ekapolon, ikalounete ŋikajiok a nen neni apipilan nooi.

¹⁵Eruwor akoloŋit ŋin ŋina ka anyunyura, akoloŋit ŋina ka akiyaloloŋ ka aryeba, akoloŋit ŋina ka amunaaro ka akinyasuno, akoloŋit ŋina ka akiryonut ka akilurur, akoloŋit ŋina elalaata ŋidouwon ka ŋina a akiryonut cuc,

¹⁶akoloŋit ŋina ituruunere arupepe ka ŋina eramakinere eli ŋolo itijikinere ŋitaunio ŋulu edukuk nooi ka ŋituŋa ŋulu eya naduketa ŋuna aoyak nooi, ŋuna ejiere.”

¹⁷“Ayauni ayoŋ akiyaloloŋ lotuŋa, toloto ikes esibit ŋimudukanotin; anerae aseca ikes aneni ke Ekapolon, ebukoryo ŋaokot kec ikwa ŋalup ka imasaryo ŋawat kec ikwa aoret.

¹⁸Nyepedori esilipa, kori egolid kec aiun ikes akoloŋit ŋin ŋina ka anyunyura ke Ekapolon; apaki ŋin ŋina elilitor iŋes nooi, emunyaryo ŋituŋa ka akwap a daadaŋ; anerae itasaluni Ekapolon atipei pa eyenio apaki ibore daadaŋ ŋini eyai nakwap.”