Read ngakarimojong Sepan. 3 Bible Online

Sepan. 3 - ngakarimojong bible

Sepan. 3

¹“Okoe etaun a ŋikesiyaloloŋok, a ŋikaŋerok ka ŋikenyasak!

²Mam ipei daŋ ŋini iira iyoŋ ŋakiro keŋ; nyecamuna iyoŋ ŋuna ebookoi toesik. Nyikinyoma iyoŋ neni ke Ekapolon; nyeapuuna iyoŋ neni ke Ekapolon kon.”

³“Irurumaete ŋikapolok ŋulu eya tooma keŋ ikwa ŋiŋatunyo; ikwaan ŋikatubok keŋ ka ŋipeei ŋulu ka ataboŋ ŋulu emam ibore imyekinete mati kiwala akwap.

⁴Nyemukyaka ŋikadwarak keŋ, mam anupit eyakatar ikes; etisiilyan ŋisacaradotin keŋ akibois ka Akuj. Abila ŋikisila ka Akuj emam ŋileec.

⁵Nai iyookino Ekapolon ŋolo iboi alotooma keŋ, mam ŋuna aronok ŋuna itiyae. A ŋinataparacu itiyae neni a ituŋanan keŋ ŋuna iyookino, itiyae iŋes ŋun a ŋinakoloŋit, nai mam ŋileec eyenete ŋulu nyiyookino.”

⁶Ebala Ekapolon Akuj ebe, “Amunya ayoŋ ŋituŋa a ŋakwapin a ŋunagelae, eelielaa ayoŋ ŋakiboisyo ŋuna ejioto ikes, eturuwo ayoŋ ŋirotin kec ŋikoŋinae, ikotere edaun ituŋanan itori nen; adaun ŋitaunio kec akituruwor ŋireŋoroto, ŋulu emam ŋituŋa eyakasi, mam tari ipei daŋ.

⁷Abu ayoŋ olimok etaun ŋol atemar, Kire jik, ikikeri iyoŋ ayoŋ, icamuni ŋuna sek iŋerit; nyikimuryakinete iyoŋ ŋuna daadaŋ adau ayoŋ alimokin iyoŋ. Nai eriŋa iŋes elelyanikinit akitiya ŋuna aronok lopite ŋolopei sek etiya.”

⁸Ebala Ekapolon ebe, “Aŋun kidarunae ayoŋ akoloŋit ŋina awuoya okolimonok ŋakiro kus ŋuna ayeni. Adau ayoŋ atubun acunakin ŋakwapin, acunakini ŋapukasinei, ido etaanyuwa ikes anyunyura kaŋ, aŋoit daadaŋ ŋina ka aryenyeo kaŋ. Amunyari ayoŋ ŋituŋa ka akwap a daadaŋ alotooma aŋoit ŋina ka alilit kaŋ.”

⁹“Apaki ŋin, elocokini ayoŋ epite ŋolo irworotor ŋituŋa kaŋ, toruwor erwor ŋolo ajokan, ikotere ikes daadaŋ enyaraete ekiro ŋolo ke Ekapolon, ido kitiyanakis Ekapolon ecamuna kaapei.

¹⁰Tari ŋituŋa ŋulu eyalaritae nakwap ŋina a Kus ŋina alwanan, eyaununeete ŋainanakineta neni kaŋ.”

¹¹“Akoloŋit ŋin, nyikisurumyo iyes ŋileec aŋuna a ŋipegeta a ŋulu iponiata iyes ikiŋierioto ayoŋ; anerae alemari ayoŋ aneni kus ŋituŋa ŋulu elelyanete aŋuna ka akituro kec. Nyiboŋokinete nabo iyes akiŋer ayoŋ alomukura kaŋ a ŋolo asegan.

¹²Nai emyekini ayoŋ aneni kus, ŋituŋa ŋulu itiditeuna ka ŋulu iyapara, ŋituŋa ŋulu iwarete aiuno aneni kaŋ a Ekapolon.

¹³Mam aronis itiyaete iyes ŋipiya a Ŋisirael, nyirworete ikes alyokonu, kori nyelimunete ikes ŋakiro ŋuna nyiyookino, imujete ikes ido topero. Mam ituŋanan itubuli ikes.”

¹⁴“Toekisi iyes ŋituŋa a Sion! Tocelutu nooi iyes Ŋisirael! Tolakaros ka tolelyana nooi a ŋitai kus a daadaŋ, iyes ŋituŋa a Yerusalem.

¹⁵Emyek Ekapolon akisican iyes, erita iŋes ŋimoe kus. Irukito iyes ke Ekapolon erwosit a Ŋisirael; aŋun, tojoŋoto akuryanu.

¹⁶Akoloŋit ŋin, elimokinio ŋituŋa a Yerusalem, ‘Nyikibul iyes ŋituŋa a Sion; nyicamut apalagu emini neni kus.

¹⁷Irukito iyes ke Ekapolon Akuj kus, ekajion ŋolo ikiinanakini akiloun. Elakar iŋes nooi aŋuna kus, ikituruwori iŋes iyes ŋikitet anamina keŋ;

¹⁸elelyani iŋes aŋuna kus eeo lopite ŋolo eeore akoloŋit ŋina a ŋasuban.’ ” Ebala Ekapolon “Alemari ayoŋ ŋican aneni kus, ikotere nyikitoŋoi iyes aŋuna a ŋican a ŋul.

¹⁹Apaki ŋin, esicani ayoŋ ŋulu ikiimakinito iyes, aiuni ayoŋ ŋikaŋwalak, ido ocunak ŋulu ejamuwaritae, elocokini ayoŋ aleeco kec, ainakini ayoŋ ŋituŋa kitopoloosi ikes, ikotere todaun ŋileec aneni kec.

²⁰Apaki ŋin, akayauni ayoŋ iyes lore, akacunakini ayoŋ iyes kaapei; eketuruwori ayoŋ iyes ŋulu ikiyenio ka ikipuroi alotuŋa a daadaŋ a ŋulu ka akwap; ekenyakakinia ayoŋ iyes ŋarereŋisyo kus iteete iyes.” Ayoŋ Ekapolon alimu ŋun.