Read ngakarimojong Agai 1 Bible Online

Agai 1 - ngakarimojong bible

Agai 1

¹Ani edolete ŋikaru ŋulu araakar Darius erwosit a Perisia ŋiarei, ŋirwa ke elap epei elap ŋolo a ŋikanikapei, bu akirot ka Akuj aneni a ekadwaran a Agai neni a ekepukan a Yudaya a ŋolo anyaritae Serubabel lokoku Sealtiel ta neni a esacaradoti a ŋolo Apolon nooi a ŋolo anyaritae Yosua a lokoku a Yeosadak.

²Ŋakiro nu ikes abu Ekapolon ŋolo Etiron tolimok Agai tema, “Ebasi ŋituŋa lu eriŋa nyedolo apaki ŋina edukokinere Akai ke Ekapolon nabo.”

³Abu nai akirot ke Ekapolon bu neni kec aneni a ekadwaran Agai ebala,

⁴“Erae mono na apaki kus ŋina iboiyoto iyes anakais a ŋuna edukuk ejok tari kidiama, kiboiye Akai na eritakina a?”

⁵Aŋun nai tokona, ŋuna alimu Ekapolon ŋolo Etiron ikes nu ebe, “Totamatamata mono iyes ejok nooi epite ŋolo iyakatar iyes.

⁶Idaut iyes akitare akimuj ŋina alalan, nai ilemut adio cici; imujete iyes, nai nyeryamuna iyes akimuj ŋina ikitemokino; imasete iyes, nai nyeryamuna iyes ŋimaten ŋulu ikitemokino, inapete iyes ŋilowi, nai mam ipei daŋ ŋini nyenyamit akaterot ka iyes ŋulu iryamununeete eropit, iryamununeete eropit kus, nai iroporito ŋisiliŋa alocweei kus.”

⁷Ŋuna alimu Ekapolon ŋolo Etiron ikes nu ebe, “Totamatamata mono iyes ejok nooi epite ŋolo iyakatar iyes.

⁸Alimu Ekapolon atemar, todokasi lokamukumukui yaut ŋakito todukioto Akai na. Abuni ayoŋ alakar aŋuna ka Akai a na, ido eketopolooryo ayoŋ a nen.

⁹Ayoŋ Ekapolon ŋolo Etiron abala nen, ipotu iyes kiwara aryamun akimuj ŋina alalan, nai kiŋolikisi, abu toruwor ŋina edit, ani iyaunete iyes akimuj ŋin lore, abu ayoŋ okuta akimuj ŋin nariet. Kaanukiro? Erae aŋuna eriŋaakar Akai kaŋ eritakina, ido itiŋiyara iyes daadaŋ aŋuna a ŋakais kus a ŋikulepek.

¹⁰Aŋakiro aŋun, awounia kidiama ŋakipi keŋ, awout ŋalup akitara ŋinyomen.

¹¹Adau ayoŋ anyarare aonite min lomanikorin ka lokamukumukui, ido tonom ŋikinyom, ŋikito a epiini, ŋikito ŋulu a Olipa ka ibore daadaŋ ŋini eraununui analup, tonom ŋituŋa ka ŋityaŋ ta ibore daadaŋ ŋini itiyaete ikes.”

¹²Abu nai Serubabel lokoku a Sealtiel ka Yosua esacaradoti ŋolo Apolon nooi, lokoku a Yeosadak kaapei ka ŋituŋa daadaŋ ŋulu kideuna erikoryo ŋuluce nakwapin a ŋimoe kec, tocamut ŋakiro ŋuna erworo Ekapolon Akuj kec ka ŋuna erworo ekadwaran Agai; ikwapei arisyo Ekapolon Akuj kec kiyaku iŋes. Tokuryaketa ŋituŋa aŋuna ke Ekapolon.

¹³Tolimok nai Agai, ekiyakia ŋolo ke Ekapolon ŋituŋa ŋakiro ŋuna ke Ekapolon tema, “Ebala Ekapolon, ikirukit ayoŋ ka iyes.”

¹⁴Aŋun, abu Ekapolon kisimukek ekepukan a Yudaya ŋolo anyaritae Serubabel, lokoku a Sealtiel ka esacaradoti ŋolo Apolon nooi ŋolo anyaritae Yosua lokoku a Yeosadak ta ŋituŋa daadaŋ ŋulu kideuna erikoryo ŋuluce nakwapin a ŋimoe kec, tocunakin ikes daadaŋ, kisyakis akiduk Akai ke Ekapolon Akuj kec ŋina Etiron.

¹⁵Apotu ŋun daadaŋ kitiyakin ŋirwa ke elap ŋatomoniarei ka ŋiomwon elap ŋolo a ŋikanikapei.