Read ngakarimojong Agai 2 Bible Online

Agai 2 - ngakarimojong bible

Agai 2

¹Ani edolete ŋikaru ŋulu araakar Darius erwosit a Perisia ŋiarei, ŋirwa ke elap ŋatomoniarei ke epei, elap ŋolo a ŋikanikaarei, bu akirot ke Ekapolon aneni a ekadwaran Agai ebala,

²“Kirwor tokona neni a ekepukan a Yudaya a ŋolo enyaritae Serubabel lokoku a Sealtiel ka neni a esacaradoti a ŋolo Apolon nooi a ŋolo enyaritae Yosua lokoku a Yeosadak ta neni a ŋituŋa a ŋulu kepotu kideun erikoryo ŋuluce nakwapin a ŋimoe kec, kiŋit ikes nu;

³‘Ataŋae alokidiŋ kus ŋulu ideuna eŋolikinito paaran akibuses a Akai a na? Ikoni tokona iŋes etakani aneni kus ai? Nyetakani mono iŋes aneni kus erae akoŋinait a?’ Ekapolon ŋolo Etiron,

⁴nai tokona ebala, ‘Okoe, Serubabel totitinyik iyoŋ, Okoe esacaradoti ŋolo Apolon nooi Yosua, lokoku a Yeosadak, totitinyik, iyes ŋituŋa daadaŋ ŋulu ka akwap, totitinyikisi, ido kitiyata, anerae ikirukit ayoŋ ka iyes;

⁵ikwapei abunio ayoŋ ekeikinia iyes apaki ŋina iponiata iyes alo Ijipit. Erubakinit Etau kaŋ eyai neni kus. Nyikuryaketa!’

⁶Ŋuna alimu Ekapolon ŋolo Etiron ikes nu, ‘Alotooma apaki ŋina euruwuana, eiŋiiŋakini ayoŋ nakuj ka akwap, anam ka akwap neni aonon.

⁷Eiŋiiŋakini ayoŋ ŋakwapin daadaŋ, ikotere ebari a ŋakwapin a daadaŋ ebuni, ido elelebik ayoŋ akibuses Kai na.

⁸Ayoŋ Ekapolon ŋolo Etiron abala nen, erae Esilipa ŋolo kaŋ ka erae egolid ŋolo kaŋ.

⁹Ilouni akibuses a Akai a na a ŋinakitete akibuses a Akai a ŋina a ekiŋaren, ido ayauni ayoŋ ekisil nakibois na.’ ”

¹⁰Ani edoli ŋirwa ke elap ŋatomoniarei ka ŋiomwon, elap ŋolo a ŋikanikaomwon, alokaru a ŋolo a ŋiarei ipukat Darius, bu akirot ŋina ke Ekapolon neni a ekadwaran Agai. Tema Agai,

¹¹“Ebala Ekapolon ŋolo Etiron, kiŋit ŋisacaradotin neni ebasi ŋikisila.

¹²‘Ani mono kedak ituŋanan anabilet a elou keŋ akiriŋ ŋina italeoritae, ido totapakin abilet ŋin namugati, kori loboka, kori lopiini edio, kori nakimyet, kori nakimuj ace daadaŋ, eruwor mono ŋamuja ŋun ŋuna italeoritae a? ’” Toboŋokis ŋisacaradotin temasi, “Mam.”

¹³Kiŋit nai Agai ikes tema, “Ani mono ketap ituŋanan ŋini etapit ituŋanan ŋini etwanit apei a ŋamuja a ŋun, eruwor mono akimuj ŋin ŋina nyitaleoritae a?” Toboŋokis ŋisacaradotin temasi, “Ee, eruwor ŋina nyitaleoritae.”

¹⁴Tema nai Agai neni kec, “Ebala Ekapolon, ikote nenipei ŋakiro aneni kus a ŋituŋa a ŋulu ete ayoŋ ka akwap na ŋina ete ayoŋ. Aŋun nai, ŋiticisyo kec daadaŋ ka ibore kec daadaŋ ŋini eyaununeete ikes, erae ŋulu nyitaleoritae.

¹⁵“Nai tokona, ekelipit ayoŋ iyes totamatamata nu nooi alotai kus, ageun akoloŋit na tari ŋirwa ŋulu eponito, totamatamata epite ŋolo eyakaunotor ŋakiro nyedukokina amoru kidiama amoru ŋinace alo Kai ke Ekapolon.

¹⁶Apaki ŋin, ani kelot ituŋanan idio natukot a ŋikinyom etami akilelebikin loguniyae ŋatomoniarei, ilelebikini iŋes lotomon bon. Kelot ituŋanan ice neni ecuyere epiini etami akilelebikin namoti ŋatomonikan anataker a epiini, ilelebikini iŋes ŋatomoniarei bon.

¹⁷Abu ayoŋ ekesican iyes, eyakuu ekuwuam ŋolo akusi nooi ka ekurut ŋolo abu kitubuta ŋimomwa kus, abu daŋ eyakuu ŋakako, nai nyekiwa iyes.

¹⁸Nai ageun akoloŋit na, ŋina eraakar ŋirwa ke elap ŋatomoniarei ka ŋiomwon, elap ŋolo a ŋikanikaomwon, totamatamata nooi ŋuna ka akoloŋit a ŋina egeunere akiduk Akai ke Ekapolon.

¹⁹Tari kemam tokona ŋikinyom anatukito kus, tari pa keraito ŋikito lu: Ŋulu ke epiini, ŋiboboryo, ŋikito ŋulu ikwaan ka ekacikicikit ŋulu enyaritae Pomegrate ka ŋulu enyaritae Olipa, Ameun akoloŋit na tari momit, eketerereŋi ayoŋ iyes.”

²⁰Abu akirot ka Akuj bu neni ka Agai abunet ŋina a ŋaarei, ŋirwa ke elap ŋatomoniarei ka ŋiomwon ebala,

²¹“Tolimok erwosit ŋolo a Yudaya Serubabel atemar eapi ayoŋ akiiŋiiŋakin nakuj ka akwap,

²²ido olema ŋikepukak a ŋapukasinei; eapi ayoŋ amunaar agogoŋu a ŋapukasinei a ŋakwapin, akimasar ŋagaari ka ŋikametok kec, imasarosi ŋaŋolei ka ŋikametok kec, eari ŋinituŋanan lokaato keŋ ka atum.”

²³Ebala Ekapolon ŋolo Etiron ebe, “Akoloŋit ŋin, akayai ayoŋ iyoŋ eketiyan kaŋ Serubabel lokoku a Sealtiel, akainakini ayoŋ iyoŋ apolou, anerae akaseu ayoŋ iyoŋ. Ayoŋ Ekapolon ŋolo Etiron alimu ŋun.”