Read ngakarimojong Sakar 1 Bible Online

Sakar 1 - ngakarimojong bible

Sakar 1

¹Ani edoli elap ŋolo a ŋikanikauni alokaru a ŋolo a ŋiarei, a ŋolo araakar Darius ekepukan ŋolo a Perisia, abu akirot ke Ekapolon bu neni a Sakariya ke ekadwaran a ŋolo arae lokoku a Berekia. Arae Berekia lokoku a Ido. Abala akirot ŋin ebe,

²“Eŋoit Ekapolon nooi aŋuna atapapaa kus.

³Aŋun, tolimok ŋituŋa atemar ebala Ekapolon ŋolo Etiron ebe, ‘Toboŋutu neni kaŋ, ido aboŋuni ayoŋ daŋ neni kus.’

⁴Nyikwaanikinosi ka atapapaa kus, a ŋulu apotu ŋikadwarak paaran kiserakis ŋakiro nu ebe, ‘Ebala Ekapolon ŋolo Etiron, toboŋutu alopitesyo kus a ŋulu ka aronis ka anakitiya aronis. Nai apotu ikes nyiirasi ŋun, kori nyiwuapakis ŋakiro kaŋ.’

⁵Ai mono nai eya atapapaa kus tokona? Ani bo ŋikadwarak, iboiyete mono ikes ŋikaru ka ŋikaru a?

⁶Ani bo ŋakiro kaŋ ka ŋikisila kaŋ, ŋulu abu ayoŋ olimok ŋikadwarak kaŋ, ŋulu arae ŋiketiyak kaŋ, pa mono apotu ŋun kiduposi atapapaa kus toryamut ŋican aŋun a? Aŋun, apotu ikes tokiwa temasi, ‘Adau Ekapolon ŋolo Etiron akitiya neni yok ŋuna emaikina iwon oryamutu aŋuna ka aronis yok ka aŋuna a ŋiticisyo yok a ŋulu aronok. Etiya iŋes ŋun lopite ŋolo sek ayeunitor akitiyakin.’ ”

⁷Ani edoli ŋirwa ke elap ŋatomoniarei ka ŋiomwon, elap ŋolo a ŋitomon ke epei, ŋolo enyaritae Sebat, torae ekaru ŋol ŋolo a ŋiarei ipukat Darius, abu akirot ke Ekapolon bu neni a Sakariya alokoku a Berekia aŋolo arai lokoku a Ido.

⁸Abu Sakariya tema, “Abu ayoŋ anakiruja nakwaare eŋolik ekile emyat aŋole ŋina areŋan. Awoi ekile ŋol alokidiŋ ŋikito ŋulu ikwaan ka ŋikamurya, toyai nakadipaalat. Ayakasi kaku keŋ ŋaŋolei ŋuna areŋak, ŋuna oŋora areŋak ka ŋuna akwaŋak.”

⁹Abu ayoŋ eŋit otema, “Ekapolon kaŋ nyo ŋiboorei lu?” Abu emalaika ŋolo ikirworo ka ayoŋ okoboŋok ayoŋ tema, “Eketoodikini ayoŋ iyoŋ atemar nyo ikes.”

¹⁰Abu nai ekile ŋolo awoi alokidiŋ ŋikito ŋulu ikwaan ka ŋikamurya toboŋok tema, “Erae ikes ŋulu eyakuu Ekapolon akirimokin akwap.”

¹¹Apotu nai ikes kisirworikis emalaika ke Ekapolon ŋolo awoi alokidiŋ ŋikito ŋulu ikwaan ka ŋikamurya temasi, “Erimokin isua akwap, ido aryamun atemar eyai akwap daadaŋ inapakina ka isilit.”

¹²Kiŋit nai emalaika Ekapolon tema, “Ekapolon ŋolo Etiron, tari ori iwounit iyoŋ ainakin akisyon neni a Yerusalem ka lotaunio ŋulu a Yudaya, ŋulu irubak iyoŋ iŋoikinit tari tokona ŋikaru ŋatomonikanikaarei?”

¹³Aŋun, abu Ekapolon kirwor neni ke emalaika a ŋolo ikirworo ka ayoŋ ŋakiro ŋuna etalakarak ka ŋuna esirworiunak.

¹⁴Tema nai emalaika ŋolo ikirworo ka ayoŋ neni kaŋ, “Kisera ŋakiro nu, ‘Amina ayoŋ nooi Yerusalem ka Sion,

¹⁵nai aŋoikinit ayoŋ ŋakwapin ŋuna ebasi kori mam ikes ŋace. Pa sek aŋoikinit ayoŋ ikes nooi, nai eyatakis ikes akitiya aronis.’

¹⁶Aŋun ŋakiro ŋuna irworo Ekapolon ikes nu, ‘Aboŋuni ayoŋ Yerusalem esyoni iŋes, ido edukokinio nabo Akai kaŋ nen. Ebutari etaun Yerusalem daadaŋ.’

¹⁷Kisera jik atemar ŋakiro ŋuna irworo Ekapolon ŋolo Etiron ikes nu, ‘Ilelebun nabo ebari lotaunio kaŋ; isirworiuni nabo Ekapolon Sion, ido eseuni nabo Ekapolon Yerusalem ikwapei etaun keŋ.’”

¹⁸Abu nai ayoŋ eŋoliya kidiama, eŋolik alokiŋaren kaŋ ŋamomwar ŋaomwon.

¹⁹Abu ayoŋ eŋit emalaika ŋolo ikirworo ka ayoŋ otema, “Nyo ŋiboorei lu?” Abu iŋes okoboŋok ayoŋ tema, “Erae ikes ŋituŋa a ŋakwapin a ŋuna agogoŋok, ŋulu ealasi ŋituŋa a Yudaya, Isirael ka Yerusalem nariet.”

²⁰Ekaku, abu emalaika eketoodik ayoŋ ŋiketyakak ŋasuwa ŋiomwon.

²¹Abu ayoŋ eŋit iŋes otema, “Nyo eponito ikes akitiya?” Okoboŋok iŋes ayoŋ tema, “Erae ikes ŋituŋa a ŋakwapin a ŋuna agogoŋok a ŋuna apotu kielasi ŋituŋa a Yudaya, ikotere edaun ituŋanan ŋini ewoikini ikes kitijik, nai eponito ŋiketyakak ŋasuwa ŋuluomwon ŋul akitubul ikes ka areun ŋakwapin ŋuna agogoŋok ŋun ŋuna apotu tomunaaasi akwap ŋina a Yudaya ka akielar ŋituŋa keŋ.”