Read ngakarimojong Sakar 11 Bible Online

Sakar 11 - ngakarimojong bible

Sakar 11

¹Iyes ŋituŋa a Lebanon, toŋaasi ŋipukei a akwap kus, ikotere akim tonom ŋikito kus ŋulu enyaritae Cedar.

²Kiololoto iyes ŋikito ŋulu enyaritae Cipres, anerae aukonor ŋikito ŋulu enyaritae Cedar, amunaar ŋikito ŋul ŋulu apolok nooi! Kiololoto iyes ŋikuyono ŋulu alo Basan; anerae ayepakin kwap amoni ŋina amutonon!

³Kiirasi epite ŋolo igworotor ŋikeyokok; anerae amunaar ŋadakarisinei kec ŋuna alibak! Kiirasi epite ŋolo irurumaata ŋiŋatunyo; anerae amunaar amoni ŋina sek eyakasi ikes, ŋina alodiye aŋolol a Yorodan!

⁴Ŋakiro ŋuna irworo Ekapolon Akuj kaŋ ikes nu, “Toruwor ekeyokon a ŋamesekin a ŋuna erae toŋolae.

⁵Ŋituŋa ŋulu egyelununeete ŋamesekin ŋun, eŋolete, ido kimyekinitetei nyisicana; tobasi ŋulu egyelanarete akiriŋ a ŋamesekin a ŋun ebe, ‘Kipuroe Ekapolon, anerae abar ayoŋ.’ Emam akisyon eyakatar tari ŋikeyokok neni a ŋamesekin kec.

⁶Emam nabo ituŋanan eroko ayoŋ esyoni anakwap. Emyekini ayoŋ ŋituŋa kipukata ŋulu epolokinito ikes. Emunaarete ŋikepukak ŋul akwap, ido nyaiuni ayoŋ ŋituŋa anapedor a ŋikepukak kec.”

⁷Aŋun, apotu ŋimucurus a ŋamesekin a ŋuna erae toŋolae okolimokis ayoŋ acok ŋamesekin kec, ido abu ayoŋ oruwor ekeyokon a ŋamesekin a ŋun. Abu ayoŋ olemu ŋibelae ŋiarei, onyara ekiro ke epei ebe, “Ajokis” ka ŋoloce ebe, “Akimorikina,” Abu ayoŋ eyok ŋamesekin ŋun.

⁸Alotooma elap epei, abu ayoŋ oar ŋikeyokok a ŋamesekin ŋiuni anerae abu okoup ayoŋ akidaŋidaŋ ŋakiro kec, apotu daŋ ŋamesekin okoremokin ayoŋ.

⁹Aŋun, abu ayoŋ olimok ŋamesekin ebe, “Nyaruwor nabo ayoŋ jik ekeyokon kus. Kimyekisi ŋuna erae totwaka totwaka, ŋuna erae tomunyarae tomunyarae, ŋuna idoŋete daŋ emunyarosi ikes make.”

¹⁰Abu nai ayoŋ olemu ebela ŋolo enyaritae “Ajokis” ido obil aŋuna ka akikisar acamunet ŋina abu ayoŋ ocamunotor ka ŋakwapin daadaŋ.

¹¹Aŋun, aponi kikisarae acamunet akoloŋit ŋin. Eteete ŋimucurus a ŋamesekin etiyae ayoŋ ŋun, ido apotu toyenut atemar erworo Ekapolon alotooma ŋuna etiyae ayoŋ.

¹²Abu nai ayoŋ otema neni kec, “Ani kejok aneni kus, inakinae ayoŋ eropit kaŋ; nai ani pa kejok, yaasi iŋes.” Aŋun, apotu ikes okoinakis ayoŋ ŋisilipae ŋatomoniuni.

¹³Tema nai Ekapolon neni kaŋ, “Kimasak ŋisilipae ŋul neni a eketiyan ŋamoti a ebari a ŋolo ka Akai ka Akuj.” Aŋun, abu ayoŋ olemu ŋisilipae ŋul ŋatomoniuni etyae ŋolo atamakinito ikes atemar akagyelere ayoŋ, abu ayoŋ olemu ŋisilipae ŋul, emasak Kai ka Akuj, neni a eketiyan ŋamoti.

¹⁴Ekaku, abu ayoŋ obil ebela ŋolo a ŋiarei ŋolo anyaritae “Akimorikina”, ido abu akimorikina a Yudaya ka Isirael tomunaar.

¹⁵Abu nai Ekapolon tema neni kaŋ, “Tolemu nabo ŋiboro ŋulu a ekeyokon a ŋolobaŋaanot,

¹⁶anerae alosi ayoŋ alemun ekeyokon ŋolo iyoki akwap, nai nyepedori iŋes akiyok ŋulu adaut aoliyor, kori akiwarar ŋulu cicik, kori akimadun ŋulu ewanan, kori akitan ŋulu eŋaleete, nai enyami iŋes akiriŋ a ŋamesekin a ŋuna atumak, erutonori ŋigece kec.

¹⁷Ekaŋ iyoŋ ekeyokon kaŋ ŋolocaryoit, ŋolo iesianakini ŋamesekin! Elemaryo apedor kon alojie. Einiiyari akan kon ka emudukani akoŋu kon ŋina alo teten.”