Read ngakarimojong Sakar 6 Bible Online

Sakar 6 - ngakarimojong bible

Sakar 6

¹Abu nabo ayoŋ eŋoliya kidiama, eŋolik alokiŋaren kaŋ ŋagaari ŋaomwon ŋuna eritae a ŋaŋolei, eponito alokidiŋ ŋimoru ŋiarei. Arae ŋimoru ŋul ŋulu a ŋasuwa a ŋuna enyaritae eburonis.

²Agaari ŋina esyaunan, arikitoe a ŋaŋolei a ŋuna areŋak, ŋina a ŋaarei arikitoe a ŋaŋolei a ŋunakiryonok,

³ŋina a ŋauni, arikitoe a ŋaŋolei a ŋuna akwaŋak ka ŋina a ŋaomwon, arikitoe a ŋaŋolei a ŋunameriyek-pusiyek.

⁴Abu nai ayoŋ eŋit emalaika ŋolo ikirworo ka ayoŋ otema, “Ekapolon kaŋ, nyo ŋiboorei lu?”

⁵Okoboŋok ayoŋ emalaika tema, “Erae ŋul ŋitai ŋiomwon ŋulu anakuj, ŋulu alomut kiŋa, kedaut akitoodiyar neni ke Ekapolon a ŋolo ka akwap a daadaŋ:

⁶Ŋolo eyakar ŋaŋolei ŋunakiryonok, elosi nakwap ŋina alo Kuju, ŋolo eyakar ŋaŋolei ŋuna akwaŋak, elosi nakwap ŋina alo To, ido ŋolo eyakar ŋaŋolei ŋunameriyek-pusiyek, elosi nakwap ŋina alokwap.”

⁷Ani elomunete ŋaŋolei ŋuna atironok ŋun kiŋa, acamito arotokin atipei akirimokin akwap daadaŋ. Tema emalaika neni kec, “Apesi, kirimokisi akwap.” Aŋun, apotu ikes kirimokis akwap.

⁸Abu emalaika okonyar ayoŋ tema, “Kiŋolik iyoŋ, ekesieŋut ayoŋ ŋaŋolei ŋuna alosete nakwap ŋina alo Kuju anaŋoikinit kaŋ akwap ŋina alo Kuju.”

⁹Abu Ekapolon okolimok ayoŋ

¹⁰tema, “Ape ya ŋainakineta nu ŋuna a esilipa ka egolid, ŋainakineta a ŋituŋa a lu: Elidai, Tobiya, Yedaia, a ŋulu aboŋut alo Babilon aneni sek ayaitae ikes, tolot atipei lore a Yosia a lokoku a Sepania.

¹¹Kitiyau ebokot alosilipa ka alogolid a ŋolo alemut ikes, ido kiwuak ebokot ŋol nakou a Yosua a esacaradoti a ŋolo Apolon nooi, a ŋolo erae lokoku a Yeosadak.

¹²Tolimok iŋes atemar, ebala Ekapolon ŋolo Etiron ebe, ‘Ekile ŋolo enyaritae Ateni iŋes lo, epetari iŋes anakibois keŋ, ikwa ateni ŋina ke ekitoe, ido edukokini iŋes Akai ŋina ke Ekapolon.

¹³Erae iŋes edukokini Akai ŋina ke Ekapolon, ido einakinio iŋes apolou ŋina ailiilon, iboikin iŋes kipuka alokicoloŋ a ŋolo ka apolou. Eruwor iŋes esacaradoti anapukan keŋ. Itiyaete ikes ŋiarei kaapei alotooma ekisil ka akimorikina.’

¹⁴Emaikina erae Elidai, Tobiya ka Yedaia ta Yosia lokoku a Sepania idarete ebokot ŋol, ikwapei ibore ŋini etamunitae alo Kai ke Ekapolon.”

¹⁵Emaikina ŋituŋa ŋulu eya neni alwanan potu ikiŋarakis iyes akiduk Akai ke Ekapolon, neni iŋes iyenuniata iyes atemar Ekapolon ŋolo Etiron iŋes akeyakiunit ayoŋ neni kus. Itiyakin ŋakiro ŋun erae kiwuapa iyes imukekinito ŋakiro a Ekapolon Akuj kus.