Read ngakarimojong Sakar 7 Bible Online

Sakar 7 - ngakarimojong bible

Sakar 7

¹Ani edoli ekaru ŋolo a ŋiomwon erae Darius erwosit, ŋirwa ke elap ŋiomwon, elap ŋolo a ŋikanikaomwon ŋolo enyaritae Kisilep, abu Ekapolon kirwor neni a Sakariya.

²Apaki ŋin, kiyakiyarito ŋituŋa ŋulu a Besel Sareser ka Regemelek ta ŋikilyok ŋice alotaun kec, Kai ŋina ke Ekapolon a ŋolo Etiron akilip neni ke Ekapolon ainakin ikes ŋarereŋisyo

³ka akiŋit ŋisacaradotin ka ŋikadwarak akiŋiset na, “Erubakinio mono isua ikigworo aŋuna ka Akai a ŋina emunaara a ŋina ka Akuj a? Ikirubakini mono isua ikiredanakini akiron elap ŋolo a ŋikan lopite ŋolo sek ikiredanakinia akiron ŋikaru ŋulu alalak ŋulu alunyar a?”

⁴Abu nai Ekapolon okolimok ayoŋ tema,

⁵“Kiŋit ŋituŋa ŋulu ka akwap kon ka ŋisacaradotin ebe, ‘Ani mono apaki ŋina iponiata iyes kiredakis akiron ka kigworo elap ŋolo a ŋikan ka ŋolo a ŋikanikaarei ŋikaru ŋatomonikanikaarei ŋulu alunyarosi, arae mono kire aŋuna kaŋ iredakinitotor iyes akiron a?

⁶Ani bo apaki ŋina imujata ka imatatar iyes, pa mono imujete ka imasete iyes aŋuna a ŋawat kus a?

⁷Meere mono ŋakiro ke Ekapolon ŋuna apotu ŋikadwarak ŋulu esyaunak kiserata apaki ŋina eboiyoto alokisil ka anakiyar a ŋina ajokan ŋituŋa ŋulu a Yerusalem ka ŋulu a ŋitaunio a ŋulu edunyatar iŋes kaapei ka ŋituŋa ŋulu a Negeb ta ŋulu alomito nakejen a ŋimukura a ŋulu alo To a?’ ”

⁸Abu nabo Ekapolon tolimok Sakariya ŋakiro nu tema,

⁹“Ŋakiro ŋuna irworo Ekapolon ŋolo Etiron ikes nu ebe, ‘Emaikina iyes totubo ŋakiro anakiyookino ka kitoodiut arimao ka akisyon neni a ŋinice.

¹⁰Nyisicanito ŋapuseru, ŋikokyok, ŋigyelaanotin, kori ŋikulyak. Nyitamatamaete alotai kus akitiya ŋuna aronok neni a ŋuluce.’

¹¹Nai apotu ŋituŋa towout akiirar ŋun, apotu nyecamut akiwuap ŋakiro kaŋ.

¹²Apotu kitogogoŋo ŋakyes kec ikwa ŋatabab, todaun epite ŋolo iiraryata ŋikisila kori ŋakiro ŋuna abu Ekapolon ŋolo Etiron kiyakiu alotooma Etau keŋ alorwori a ŋikadwarak a ŋulu esyaunak. Aŋun, abu Ekapolon ŋolo Etiron toŋo nooi.

¹³Ikwapei aponiata ikes nyiirasi ŋakiro kaŋ apaki ŋina erworor ayoŋ, abu ayoŋ daŋ nyaboŋok ŋakiro kec apaki ŋina elipatar.

¹⁴Aŋun, abu ayoŋ eela ikes lopite ŋolo ielarya ekuwuam ibore, apotu ikes kielar akiboi nakwapin ŋuna sek pa ayenete. Apotu kimyekis akwap na ŋina ajokan erae ŋina asilon, ŋina emam ituŋanan iboi alotooma keŋ.”