Read ngakarimojong Mal. 1 Bible Online

Mal. 1 - ngakarimojong bible

Mal. 1

¹Ŋakiro ŋuna abu Ekapolon tolimok Malakai alimokin Ŋisirael ikes nu:

²Ebala Ekapolon neni a Ŋisirael, “Adau ayoŋ amina iyes jwi jwi. Nai iŋitasi iyes ibasi: ‘Alipite ikiminakinia iyoŋ isua?’ ” Iŋita Ekapolon ebe, “Pa mono arae Esau lokato a Yakob a? Abu robo ayoŋ ominak Yakob,

³ido oŋer Esau; adau ayoŋ akituruwor akwap keŋ ŋina a ŋikamukumukui ŋireŋoroto ka aloŋisat ŋina iboiyoto ŋikweei.

⁴Ani ketemasi ŋituŋa ke Edom, ‘Tari daŋ kielielitae akwap kosi, ikidukokini isua nabo.’ Nai ŋuna irworo Ekapolon ŋolo Etiron ikes nu ebe, ‘Epedorete ikes adukokin, nai eeliyalari ayoŋ. Enyarao ikes akwap ŋina aronon, ŋituŋa ŋulu erubakinit Ekapolon enyunyurikina.

⁵Iŋolikinete iyes ŋun, ido itemarete, epol Ekapolon nooi, epol tari anakwapin a ŋuna idunyatar Isirael.’”

⁶Ebala Ekapolon ŋolo Etiron neni a ŋisacaradotin ebe, “Itopoloorit ikoku ŋinisapat papa keŋ ka itopoloorit eketiyan ekapolon keŋ. Arae ayoŋ papa kus, kaanukiro nyikitopolooritotor iyes ayoŋ? Arae ayoŋ Ekapolon kus, kaanukiro nyikikeritotor iyes ayoŋ? Ikijamuwarito iyes ayoŋ, ido ibasi iŋitasi ebe, ‘Alipite ikijamuwarya isua iyoŋ?’

⁷Epite lo iŋes ikijamuwaryata iyes ayoŋ, iyaununete iyes ŋamuja ŋuna nyejokak Namuroet kaŋ, ido ibasi iŋitasi, ‘Alipite ikimyekinia isua akerit iyoŋ?’ Akalimokini, nyikikerito iyes ayoŋ alopite a ŋolo itamyata iyes atemar mam aronis tari pa kekeritae Namuroet ŋina ke Ekapolon.

⁸Ani mono ŋina iyauniata iyes ibarasit ŋini emudukana ikwapei amuronot neni kaŋ, nyeroko mono ŋakiro ŋun a? Ani mono ŋina iyauniata iyes ŋibaren ŋulu icodosi, kori edyakasi, nyeroko mono ŋakiro ŋun a? Kikatakisi mono iyes ainakin ŋul neni ke erwosit kus; elakar mono iŋes a ŋuna kus kori iruwori mono iyes ŋulu ajokak aneni keŋ a?

⁹Iyes ŋisacaradotin, kikatakisi mono iyes akimaima Ekapolon tojokyar a ŋuna yok. Nyeboŋokini iŋes akilip kus, ido erae ŋun nakyes kus.”

¹⁰Ebala Ekapolon ŋolo etiron ebe, “Okoe kerae ca topedori epei alokidiŋ kus agolokin ŋikekya ŋulu ka Akai ka Akuj, itogolo iyes tojoŋoto akinok ŋakimya ŋuna emam ajokis Namuroet kaŋ! Nyalakara ayoŋ aŋuna kus; nyacamuni ayoŋ ŋainakineta ŋuna iyaunete iyes neni kaŋ.

¹¹Itopoloorete ŋituŋa a ŋakwapin ekiro kaŋ taparacu ka eboŋ. Alotooma ŋinakibois daadaŋ, eyaunete ŋituŋa ekinyate ka ŋainakineta ŋuna ajokak neni kaŋ, anerae epol ekiro kaŋ anakwapin.

¹²Nai iyanyete iyes ekiro kaŋ apaki ŋina irworotor atemar erae Namuroet ke Ekapolon acaryoit ka apaki ŋina iyauniata iyes nen ŋamuja ŋuna ijamuwarito iyes.

¹³Ibasi iyes, ‘Ikiup isua akitiya ŋun!’ Nabo iwunyonorete iyes ŋikumes kus kidiama ikijamuwarito ayoŋ. Iyaununete iyes neni kaŋ ŋibaren ŋulu ikokounito, kori ŋulu aŋwalak, kori ŋulu edyakasi. Itamete iyes atemar acamuni ayoŋ ŋul aneni kus a?

¹⁴Ilamam ituŋanan ŋini emodiyana, ŋini ani kiik ainakin ayoŋ ibarasit ŋini ajokan alosipan keŋ, yau neni kaŋ ibarasit ŋini nyejok; arae ayoŋ Erwosit ŋolo apol akilo ŋuluce, ido itopolooritae ekiro kaŋ anakwapin.”