Read ngakarimojong Mal. 2 Bible Online

Mal. 2 - ngakarimojong bible

Mal. 2

¹Ebala Ekapolon ŋolo Etiron neni a ŋisacaradotin ebe, “Erae tokona akiciket na ŋina emaikina iyes kiwuapa.

²Ani pa kiwuapa iyes iŋes ka ani pa kikitopoloosi iyes ayoŋ alotai kus, eyakuuni ayoŋ ŋicen neni kus, ido alemari ayoŋ ŋarereŋisyo ŋuna iryamunete iyes, toryamut ŋicen nabo daŋ adau ayoŋ alemar ŋarereŋisyo ŋun, anerae nyikitopoloorito iyes ayoŋ alotai kus.

³Esicani ayoŋ ŋiletok kus; awuatakini ayoŋ loreetin kus ŋikujit a ŋibaren a ŋulu imurotor iyes, ido itorikor iyes kiŋa eya ŋikujit loreetin.

⁴“Ipedorete nai iyes ayenun atemar akainak ayoŋ iyes akiciket ŋin, ikotere erubakini Acamunet kaŋ ŋina abu ayoŋ ocamunotor ka Lepi.

⁵Arae Acamunet kaŋ ka Lepi ŋina ka akiyar ke ekisil. Abu ayoŋ oinak iŋes akiyar ke ekisil, ikotere eketopoloorit ayoŋ, ido abu iŋes eketopoloo ayoŋ tomunik erae ŋolo ekerit ekiro kaŋ.

⁶“Abu ayoŋ etatam iŋes ŋakiro ŋuna iyookino, abu ayoŋ eboiyoto ka iŋes a ekisil ka akiyookino, ido abu iŋes kibeleu ŋikalalak anasecit.

⁷Erae etic ke esacaradoti akitatam ŋuna ka aosou, ido emaikina ŋituŋa kiwara ŋakiro ŋuna itatami iŋes, anerae erae iŋes ekiyakia ŋolo ke Ekapolon a ŋolo Etiron.

⁸Nai imyekis iyes ŋuna emaikina kitatama, ido anakitatam kus, irikokis ŋikalalak akitiya aronis. Iŋero iyes Acamunet ŋina abu ayoŋ ocamunotor ka Lepi.

⁹Aŋun, ayoŋ daŋ eketuruwori iyes ŋulu ikijamuwaritae ka ŋulu ikisirumito ŋituŋa daadaŋ ŋileec, anerae iŋero iyes ŋuna abala ayoŋ kiwuapa, ido nyitatamete iyes ŋituŋa ŋakiro ŋapei.”

¹⁰“Meere mono iwon daadaŋ papa yok epei a? Meere mono Akuj apei ikisubi iwon a? Kaanukiro nai emamukar iwon anupit neni a ŋinice? Kaanukiro ejamuwarere iwon Acamunet ŋina a atapapaa yok?

¹¹Adaun anupit a lotuŋa a Yudaya, ido etiyae aronis alo Isirael ka alo Yerusalem, anerae ajamuwasi ŋituŋa a Yudaya akibois ŋina asegan ŋina ke Ekapolon, akibois ŋina emina Ekapolon. Adaut ŋikilyok akiitun ŋaberu ŋuna ilipete ŋakujo ŋunagelae.

¹²Elipi Ekapolon tolema alotuŋa a Yakob daadaŋ ŋulu eiitut ŋaberu ŋun, ŋulu isimukekinito ŋakiro ŋun, ŋulu egasete ŋakiro ŋun, tari daŋ keyaununete ikes ŋainakineta kec neni ke Ekapolon a ŋolo Etiron.

¹³“Icebore ŋini itiyaete iyes iŋes en: Iteleleete iyes ŋakiyo kus a Namuroet ke Ekapolon. Igworosi ka iwololoete, anerae nyeriŋa Ekapolon emitakinit ŋainakineta, kori nyeriŋa elakara akijaun ikes anakan kus.

¹⁴Nai iŋitasi iyes ibasi, ‘Kaanukiro?’ Erae aŋuna eraakar Ekapolon esuuda ŋolo eyeni atemar nyeriŋa iyoŋ ikinyomit aberu ŋina ibu iyoŋ kiit eriŋa irae esorokit. Arae sek aberu ŋin ŋina irukito ka iyoŋ ejok, ido tokona nyeriŋa iyoŋ ikinyomit iŋes tari daŋ ŋina ibunio iyoŋ kiik Akuj ekiŋaren atemar ikinyomi iŋes.

¹⁵Pa mono abu Akuj ikituruwo iyoŋ ka iŋes akuwan apei ke etau epei a? Kaanukiro ikituruworya iŋes iyes ŋipei? Arae aŋuna acamitor Akuj iyes touruut ŋidwe ŋulu itopoloorit iŋes. Aŋun, toripiripas make, ido nyemaikina idio alokidiŋ kus eesikini akikinyomit aberu keŋ ŋina abu iŋes kiit eriŋa erae esorokit.

¹⁶Ebala Ekapolon Akuj a Ŋisirael ebe, ‘Aŋerit ayoŋ elakit, nyacamit ayoŋ iŋes apaki ŋina itiyaa idio alokidiŋ kus ŋakiro ŋuna ka aryenyeo ŋun neni ka aberu keŋ. Kiirasi ebe nyemaikina idio alokidiŋ kus tojamak akiricit araakau ŋini ikinyoma neni ka aberu keŋ.’”

¹⁷“Ituupa iyes Ekapolon a ŋakiro kus. Nai iŋitasi iyes ibasi, ‘Alipite ikituupya isua Ekapolon?’ Erae aŋuna irworotor iyes ibasi, ‘Ejokak ŋituŋa daadaŋ ŋulu itiyaete aronis alokiŋaren Ekapolon, ido elakara Ekapolon aŋuna kec,’ ka erae aŋuna iŋitatar iyes ibasi, ‘Ai mono eyai Akuj ŋina ka akiyookino?’ ”