Read ngakarimojong 1 Ŋimak. 1 Bible Online

1 Ŋimak. 1 - ngakarimojong bible

1 Ŋimak. 1

¹Kedau Alekisanda lokoku a Pilipo ŋolo arae Emacedoniait ka ŋolo abunit anakwap a Kitim akiloun erwosit Darius ŋolo a Ŋiperisan ka Ŋimedes, abu kilunyokin lokicoloŋ a Darius toruwor erwosit (Aris sek iŋes keruwor erwosit a Ŋigirik.)

²Abu Alekisanda toji ŋijiesyo ŋulu alalak, kikamana ŋaduketa ŋunajiet ka toar ŋirwosi ŋulu ka akwap.

³Abu iŋes tolot nakisaleta a akwap toŋatana ŋiboro a ŋituŋa a ŋakwapin. Ani eyakaun ekisil nakwap, abu iŋes kiturokin, kitopoloor bon alotau keŋ.

⁴Tocunak Alekisanda asigar ŋina agogoŋon, ido kipuka ŋakwapin, ŋirwosi ka totaca ŋul daadaŋ ocur neni keŋ.

⁵Ekaku a ŋun, abu iŋes todyakakin, toyenu atemar etwani iŋes.

⁶Aŋun, abu iŋes tonyarau ŋikapolok a ŋasigarya keŋ ŋulu etopolooritae, ŋulu apolounete kaapei ka iŋes ŋinapei anasoroko, ido abu tokorak ikes akwap eriŋa iŋes eyari.

⁷Kedau Alekisanda akipuka ŋikaru ŋitomon ka ŋiarei, abu iŋes totwana.

⁸Togeut nai ŋikapolok a ŋasigarya ka Alekisanda akipukat, ŋinituŋanan kipuka anakibois keŋ.

⁹Apotu ŋikapolok ŋul daadaŋ tonapa ŋibokoto kedau Alekisanda atwanare, apotu ŋiletok kec daŋ kitiyata ŋunapei kedaut ikes atwakare, torubakis ŋun itiyasi ŋikaru ŋulu alalak ka apotu ikes yaut ŋakiro ŋuna alalak ŋuna aronok nakwap.

¹⁰Apotu ŋikapolok ŋul touruut ituŋanan ŋini asecan, iŋes Antiokus Epipanes lokoku ka Antiokus, ekamaritae sek iŋes alo Roma. Abu iŋes togeik akipuka alokaru a ŋolo a amiat ka ŋatomoniuni ka ŋikanikaarei a apukan a ŋina a Ŋigirik.

¹¹Alorwa a ŋul, apotu ŋikesyaak ŋice potu alo Isirael kicocoiyasi ŋituŋa ŋulu alalak ebasi, “Oloto ocamunos ka ŋituŋa ŋulu nyerae Ŋiyudayan ŋulu iboiyete anawaetin yok, anerae ŋinapei atyakarere iwon aneni kec atakanut neni yok ŋican ŋulu alalak.”

¹²Apotu ŋakiro ŋun kitalakasi ikes

¹³ka apotu ŋituŋa ŋice toloto neni a erwosit, ido abu erwosit tolimok ikes akiwuap ŋikisila a ŋituŋa a ŋulu nyarae Ŋiyudayan.

¹⁴Aŋun, apotu ikes todukokis Yerusalem esukul ŋolo itatamere ŋituŋa ŋabolyasinei ŋuna egelegelya lopite ŋolo a ŋitalyo a ŋituŋa a ŋulu nyerae Ŋiyudayan,

¹⁵ido tolemasi ŋimacarin a akileŋeryo ka kimyekis acamunet ŋina asegan. Apotu ikes kimorikinos ka ŋituŋa ŋulu nyerae Ŋiyudayan ka togyelasi ŋawat kec aŋuna ka akitiya aronis.

¹⁶Ani eanyuni Antiokus atemar awuo akwap keŋ ejok, abu kiitan aruwor erwosit a akwap a Ijipit, ikotere iŋes eruwor ekepukan a ŋakwapin a ŋaarei.

¹⁷Aŋun, abu iŋes tolot akirem Ijipit, ya ŋasigarya ŋuna agogoŋ nooi ka ya ŋagaari, ŋitome, ŋasigarya ŋuna ameto ŋaŋolei ka ŋasigarya ŋuna alalak ŋuna alosete a ŋakejen.

¹⁸Abu iŋes kitijik Pitolemi erwosit a Ijipit ka abu Pitolemi toem aneni keŋ ka aponi towanae ka toarae Ŋijipitian ŋulu alalak.

¹⁹Apotu ŋasigarya ka Antiokus kikamasi ŋitaunio a Ijipit ŋulu aya ŋaduketa ŋunajiet ka toŋatasi ŋiboro a akwap a Ijipit.

²⁰Kedau Antiokus akikamar Ijipit toboŋo nakwap keŋ, alokaru a ŋolo a amiat ka ŋatomoniomwon ka ŋiuni. Tolot iŋes akitijikin Ŋisirael, toloma Yerusalem erukito ka ŋasigarya ŋuna agogoŋok nooi.

²¹Abu Antiokus toloma nakibois ŋina asegan tolema namuroet ŋina etiyaunitae a egolid awoet a ŋitaae ka ŋiboro daadaŋ ŋulu esitiyao a nen.

²²Abu daŋ ya emesa ŋolo ewuanakinio ŋamugati ŋuna ka ayakau a Ekapolon, ya tari ŋikopoi ŋulu amasere ŋimaten ŋulu arae ŋainakineta, ŋabakuli, ŋibakuli ŋulu icunyere ekinyate ŋulu etiyaunitae a egolid, anaŋga ŋina enenekinitoe nakibois ŋina asegan, ŋibokoto ka egolid ŋolo esibusitere kiŋaren Akai ka Akuj, abu iŋes tolema alo Kai ka Akuj egolid ŋol daadaŋ.

²³Abu Antiokus ya esilipa ka egolid ka ŋiboro ŋulu esitiyao alo Kai ka Akuj ŋulu apol egyelit, abu daŋ iŋes ya ebari ŋolo ewuaitae ŋolo abu iŋes toryamu.

²⁴Abu Antiokus ya ŋiboro ŋul daadaŋ tolosyo nakwap keŋ a elope. Abu iŋes toar ŋituŋa ŋulu alalak ka kirwor ŋakiro ŋuna eturor nooi.

²⁵Apotu Ŋisirael kigworo aneni daadaŋ ayakasi ikes.

²⁶Toumeno ŋikepukak ka ŋikasikou topalagageta ŋaberu ŋunasorok ka ŋisorok todaun akibuses a ŋaberu.

²⁷Apotu ŋiterak daadaŋ kiwololoto ka kigworo ŋaterak anagulei kec.

²⁸Abu akwap ŋin daŋ tomaran aŋuna a ŋituŋa a ŋulu eboiyete anakwap a ŋin ka kiruma ŋileec ŋiletok a Yakob daadaŋ.

²⁹Kelunyar ŋikaru ŋiarei, kiyakiya erwosit lotaunio a Yudaya ekapolon ŋolo apolokinit ŋikerirak ocur ka abu ekapolokiniton ŋikerirak ocur ŋol tolot Yerusalem erukito ka ŋasigarya ŋuna alalak nooi.

³⁰Kirwor iŋes emodiyana neni a Ŋisirael ka arimao, ido apotu Ŋisirael tonupa ŋakiro keŋ, nai abu ekile ŋol kikama Yerusalem atipei, kisican ŋituŋa nooi ka toar Ŋisirael ŋulu alalak.

³¹Abu toŋata ŋiboro alotaun, kicuny etaun ka toritanak ŋakais a etaun ka ŋarwatatain ŋuna erimokinito etaun kidiŋ.

³²Apotu torikosi ŋaberu ka ŋidwe, tomyaasi daŋ ŋibaren.

³³Apotu ŋasigarya ŋun toduko ŋaduketa ŋunajiet lotaun a Daudi todukokis arwatata ŋina apolon ka ŋina agogoŋon, todukokis daŋ ŋaduketa ŋuna aoyak ŋuna kirereet, kituruwosi nen neni iboiyoto ŋasigarya kec.

³⁴Apotu ikes kiwuakis nen ŋituŋa ŋulu asecak, ŋikilyok ŋulu arae ŋikesyaak. Apotu ŋituŋa ŋul kitogogoŋo neni eboiyoto.

³⁵Kiwuakis nen ŋiboro ŋulujiet ka akimuj, kiriraut ŋiboro ŋulu acununete ikes alo Yerusalem, ido kiŋadakis nen ka kisicana ŋituŋa nooi.

³⁶Abu akibois a ŋasigarya ŋin toruwor neni edapitere ŋituŋa a akibois a ŋina asegan imanitae, toruwor emoit a Isirael ŋolo a ŋapakio a daadaŋ.

³⁷Toaranakis ikes ŋituŋa lowaetin daadaŋ ŋulu ka akibois a ŋina asegan, apotu daŋ ŋituŋa ŋul kinyasa akibois ŋina asegan.

³⁸Apotu ŋituŋa ŋulu eboiyete alo Yerusalem toema aŋuna kec; abu nen toruwor akibois a ŋituŋa a ŋulugelae, toruwor akibois ŋina egelaana aneni a ŋiletok keŋ, ido apotu ŋituŋa keŋ toŋero iŋes.

³⁹Abu akibois keŋ ŋina asegan toruwor ereŋorot tosub aloŋisat; kilocokin alakara kec ŋina a ŋasuban toruwor akigworo, toruworos ata Sabato keŋ ŋirwa ŋulu a ŋiyany ka toruwor apolou keŋ ajamuwaro.

⁴⁰Topoloor ajamuwaro keŋ nooi lopite ŋolo sek apoloo akibuses keŋ kilocokinoe akitopolooro keŋ toruwor ŋina egworore.

⁴¹Abu nai erwosit kigir abaruwa lotuŋa daadaŋ anakwap a ŋina epukat iŋes, tolimok ikes atemar emaikina ikes toruwor ŋipei

⁴²ka atemar emaikina ŋituŋa daadaŋ toesyanakis ŋitalyo kec a ŋilopeyek.

⁴³Apotu ŋituŋa daadaŋ ŋulu pa arae Ŋiyudayan tocamut ŋakiro ŋuna alimuni erwosit, apotu ŋice a Ŋisirael daŋ tocamut akiwuap edin a erwosit, inanakis ŋamuronisya neni a ŋakujo ka tojamuwasi akoloŋit ŋina a Sabato.

⁴⁴Abu nai erwosit kiyakiya ŋituŋa ayaar ŋabaruwae Yerusalem ka lotaunio a Yudaya. Tolimok erwosit Ŋisirael akiwuap ŋitalyo ŋulugelae, meere ŋulu ka akwap kec,

⁴⁵toŋero ainanakin ŋainakineta ŋuna epeyo ka ŋamuronisya ka akimat ŋainanakineta anakibois a ŋina asegan, ajamuwar akoloŋit ŋina a Sabato ka ŋirwa ŋulu a ŋasuban kec,

⁴⁶ajamuwar akibois ŋina asegan ka ŋisacaradotin,

⁴⁷akiduk ŋamuroeta ka ŋakiboisyo ŋuna ke etal ka neni ilipere neni a ŋakujo, akiar ŋiguruyei erae ŋamuronisya ka ŋibaren ŋuluce ŋulu itoroniyaritae

⁴⁸ka akimyekin ŋidwe kec pa ileŋeritae. Amaikina ikes toruworos ŋulu esiilyaka anakitiya ŋuna daadaŋ itoroniyaritae ka ŋuna ejamuwaritae,

⁴⁹ikotere ikes imuryakiniata ŋikisila ka kilocokis ŋakiro daadaŋ ŋuna etubunitoe.

⁵⁰Kiyatak iŋes ŋakiro nu, “Ituŋanan daadaŋ ŋini nyiwuapi ŋakiro a erwosit, emaikina totwana.”

⁵¹Abu Antiokus kiyakiya ŋabaruwae ŋuna egiritae ŋakiro ŋun lotuŋa daadaŋ ŋulu a akwap a ŋina epukat iŋes. Abu iŋes toseu ŋituŋa ŋulu eripiripete ŋakiro alotuŋa a daadaŋ ka tolimok ŋituŋa ŋulu eboiyete alotaunio a Yudaya ainanakin ŋamuronisya a ŋolotaun.

⁵²Apotu ŋituŋa ŋulu alalak, ŋulu daadaŋ apotu tocamut ekisil ŋol kimorikinos ka ŋituŋa ŋul ka apotu ikes kitiyata aronis anakwap kec,

⁵³kiritasi ŋituŋa ŋul Ŋisirael akiŋop anakiboisyo a daadaŋ a ŋuna apedoryata ikes aŋopya.

⁵⁴Ŋirwa ke elap ŋitomon ka ŋikan elap ŋolo enyaritae Kisilep alokaru a ŋolo a amiat ka ŋatomoniomwon ka ŋikan, apotu ikes todukokis ibore ŋini asiilyanan kidiama namuroet ŋina a ŋainakineta a ŋuna epeyo, apotu daŋ ikes todukokis ŋamuroeta lotaunio ŋulu aya Yudaya

⁵⁵ka kicunyanakis ekinyate alopukei a ŋakais ka alorotin.

⁵⁶Tociliciliyasi ŋikitaaboi ŋulu egiritae ŋikisila ŋul, ŋikitaaboi ŋulu apotu ikes toryamut, ido apotu kicunyasi a akim.

⁵⁷ituŋanan daadaŋ ŋini aryamunio eyakatar ekitaabo ŋolo ka acamunet ka iwuapit ŋikisila, aponi totubokinae atwanare lopite ŋolo atubunitor erwosit.

⁵⁸Torubakis ikes isicanito Ŋisirael, imanito daadaŋ ŋulu aryamunio a ŋololap alotaunio.

⁵⁹Ŋirwa ke elap ŋatomoniarei ka ŋikan, apotu ikes inakis amuronot alokidiama namuroet ŋina a ŋainakineta a ŋuna epeyo.

⁶⁰Lopite ŋolo atubunitor erwosit, apotu ikes toara atatoto a ŋidwe a ŋulu eleŋeritae,

⁶¹kaapei ka ŋituŋa a ŋikalya kec ta ŋulu eleŋerete ŋidwe ŋul ka kinenonokis ŋidwe lodokolei atatoto kec.

⁶²Nai apotu Ŋisirael ŋulu alalak kitogogoŋo ŋitai kec towout alotai kec, akinyam ŋamuja ŋuna itoroniyaritae.

⁶³Apotu ikes toseut atwanare akilo akinyam ŋamuja ŋuna italeo akinyam, kori ajamuwar acamunet ŋina asegan, ido apotu ikes totwaka.

⁶⁴Abu anyunyura ŋina apolon todolok Ŋisirael.