Read ngakarimojong 1 Ŋimak. 10 Bible Online

1 Ŋimak. 10 - ngakarimojong bible

1 Ŋimak. 10

¹Alokaru a ŋolo ka amiat ka ŋatomonikanikapei, tolot Alesanda Epipanes lokoku ka Antiokus neni anyaritae Pitolemais kiboikin nen. Kijaut ŋituŋa ŋulu aya Pitolemais Alesanda, ido kisyak iŋes akipuka nen.

²Ani iirari erwosit Demetrius ŋakiro ŋun, tocunak ŋasigarya ŋuna alalak, tolot akitijikin Alesanda.

³Kiyakik Demetrius Yonasan abaruwa igirit ŋakiro ŋuna ke ekisil ka ŋuna etopolooritor iŋes,

⁴anerae abu iŋes totamak ebala, “Emaikina iwon ogeikisi acamun ekisil ka Yonasan eriŋa iŋes nyecamuna ekisil ka Alesanda aŋuna ka akitijikin iwon;

⁵anerae etamuni iŋes ŋakiro ŋuna aronok daadaŋ ŋuna aponi iwon kitiyae neni keŋ ka neni a ŋikaitotoi keŋ ta neni a ŋituŋa a akwap keŋ.”

⁶Aŋun, abu Demetrius inak Yonasan apedor ŋinakigiret ŋasigarya ka ŋina inakinet ikes ŋiboro ŋulujiet ka akiri ka iŋes. Tolimok daŋ ŋituŋa keŋ alacakin ŋimabus ŋulu aenitae alokai a ŋinajiet, inakis neni a Yonasan.

⁷Bu nai Yonasan Yerusalem, tosyom abaruwa a Demetrius epupete ŋituŋa daadaŋ ka ŋulu aya naduketait ŋinajiet daŋ.

⁸Tobul ŋituŋa nooi iirarete atemar ainaki erwosit Yonasan apedor ŋinakigiret ŋasigarya.

⁹Nai apotu ŋulu aya naduketait ŋinajiet tolacakis ŋimabus, inakis neni a Yonasan, kinyakak nai Yonasan ŋituŋa ŋul neni a ŋikauruunak kec.

¹⁰Tolot nai Yonasan kiboiyo Yerusalem kisyak akiduk nabo ka asubakin neni amunaara alotaun.

¹¹Tolimok iŋes ŋulu etiyaete etic adukokin ŋarwatatain ka adukokin arwatata a ŋamoru moru Sion kiryam cib aŋuna ka awuaunia ejok etaun, ido apotu ŋul kitiyata ŋun.

¹²Apotu nai ŋituŋa ŋulugelae toema, ŋulu aya naduketa ŋunajiet ŋuna keduki Bakides.

¹³Toloto ikes daadaŋ aneni sek eboiyoto toboŋosi nakwapin kec.

¹⁴Besur bon iŋes apotu ŋice kidoŋo iboiyoto, ŋulu kepotu toŋero akiwuap ŋikisila ka ŋakiciketa, anerae arae nen neni apedoritotor ikes akiŋop.

¹⁵Toyenu Alesanda ŋuna a ŋakiikineta a ŋuna kebu Demetrius kiik neni a Yonasan, Kiira daŋ ŋuna a ŋijiesyo a ŋulu kepotu Yonasan ka ŋikaitotoi keŋ tojioto, ŋuna a ŋiticisyo a ŋulu ka atitinyu a ŋulu kepotu ikes kitiyata ka ŋican ŋulu kepotu ikes kidaŋidaŋa.

¹⁶Aŋun, tolimu iŋes tema, “Ikiryamuni mono iwon ituŋanan ice ŋini ikoni Yonasan a? Ocamunos tokona eturuwosi iŋes ekone yok ka ŋolo ikiriit ka iwon alojie.”

¹⁷Tosodi kigir abaruwa kiyakiya neni a Yonasan, egiritae ŋakiro nu nabaruwa ŋin:

¹⁸“Abaruwa aneni ka Alesanda, neni alokaato keŋ Yonasan, ekemalae ayoŋ iyoŋ.

¹⁹Ikiira isua ŋakiro kon atemar irae iyoŋ ekajion ŋolo arwon ŋolo itemokino toruwor ekone kosi.

²⁰Aŋun, ikiseun isua iyoŋ nakoloŋit na aruwor esacaradoti ŋolo apolon nooi a akwap kus, emaikina ikinyaritae iyoŋ ekone a erwosit, ido emaikina iyoŋ oriwo ka isua, kiric akoneo ka isua.” Kiyakik daŋ Alesanda Yonasan ekaaso ŋolo kipurat-areŋan ka ebokot ŋolo etiyaunitae a egolid.

²¹Aŋun, tonap Yonasan ŋilowi ŋulu ke etal, etiyakin ŋun elap ŋolo a ŋikanikaarei ekaru ŋolo ka amiat ka ŋatomonikanikapei, akoloŋit ŋina a ŋasuban a ŋuna a ŋisakaitei; kigir Yonasan ŋasigarya ka inak ŋiboro ŋulujiet ŋulu alalak nooi.

²²Ani iirari Demetrius ŋakiro ŋun, abu tolili tema,

²³“Anukiro nu ŋuna etiyae iwon? Aryamu Alesanda akoneo aneni a Ŋiyudayan eriŋa iwon aŋuna ka akitogogoŋo bon.

²⁴Egiri ayoŋ daŋ abaruwa neni a Ŋiyudayan olimok ikes ŋakiro ŋuna ka akisimukekin ka eik ikes apolou ka ŋainakineta, ikotere ikes ekeŋarakinete ayoŋ.”

²⁵Aŋun, kiyakiya Demetrius abaruwa ŋina egiritae ŋakiro nu: “Abaruwa aneni a erwosit Demetrius neni a ŋituŋa a akwap a Ŋiyudayan, ekemalae ayoŋ iyes.

²⁶Ikwapei iricakiniata iyes acamunet kus ka isua ka irubakis irae ŋikonei kosi, ido nyeriwo iyes ka ŋimoe kosi, ikilakara isua a ŋun, ido elelyanio.

²⁷Torubakisi ikikinyomito isua, ido itiyao isua daŋ ŋuna ajokak neni kus aŋuna itiyaata iyes neni kosi ŋuna ajokak.

²⁸Ikiinakinio isua iyes ajoŋore akitac ocur ŋolo alalan ka ikiinakinio daŋ ŋainakineta.

²⁹“Alema tokona ayoŋ aneni kon ka aneni a Ŋiyudayan akitac ocur ŋolo ka acumbi a ŋina sek elemununio ka akitac ocur ŋolo sek elemununio aŋuna a erwosit

³⁰ka ameun nakoloŋit na tari ŋirwa ŋulu eponito nyiriraununio nabo atutubet apei alotooma ŋauni a ŋikinyom ka atutubet apei a ŋaraito a ŋuna sek aryamununui ayoŋ. Nyerirauni ayoŋ ŋiboro ŋul anakwap a Yudaya, kori anakiboisyo a ŋunauni a ŋuna ecunakinitae Yudaya, alo Samaria ka alo Galileya. Nyerirauni ayoŋ ŋiboro ŋul ameun nakoloŋit na ka ŋikaru ka ŋikaru.

³¹Eruwor atubet apei alotooma ŋitomon a ŋiboro a ŋulu sek elemununeete ŋituŋa ka etacit a ŋiboro alo Yerusalem ka anakiboisyo a ŋuna idunyatar Yerusalem ŋulu asegak ka nyemaikina totacae ocur a ŋiboro a ŋul.

³²Ajal daŋ ayoŋ apolou kaŋ ŋina sek apolokinitor aduketait ŋinajiet ŋina eyai Yerusalem, ainak ayoŋ esacaradoti ŋolo apolon nooi topolok aduketait ŋin; ikotere iŋes iwuakini nen ŋikilyok ŋulu ecamit iŋes akiyok akibois ŋin.

³³Alacakini daŋ ayoŋ emam etacit Ŋiyudayan daadaŋ ŋulu keponi torikoroe nakibois adio a akwap a ŋina epukat ayoŋ, emaikina ŋikapolok tolemasi etacit ŋolo sek elemununuyo aŋuna a ŋibaren.

³⁴“Ŋirwa ŋulu a ŋasuban daadaŋ, ŋulu a Sabato, ŋirwa ŋulu ke elap a ŋolokitete, ŋirwa ŋulu etubunitoe ka ŋirwa ŋiuni eriŋa nyedolo akoloŋit ŋina a ŋasuban ka ŋirwa ŋiuni kelunyar ŋasuban, emaikina ŋirwa ŋul daadaŋ eruwor ŋulu nyemaikina Ŋiyudayan totaca ibore idio ka eruwor ŋirwa ŋulu elacakinere Ŋiyudayan daadaŋ ŋulu iboiyete anakwap a ŋina epukat ayoŋ.

³⁵Mam ituŋanan eyakar apedor ŋinakitatacet ikes ibore idio, kori ŋinakitoŋoet idio kec anakiro a ŋadi.

³⁶“Emaikina Ŋiyudayan kigirae najore ŋina a erwosit, ajore ŋina emaikina erae ŋina eya Ŋiyudayan ŋalipyo ŋatomoniuni, ido emaikina inakinae ikes akimuj ŋina emaikina ŋasigarya a erwosit daadaŋ toryamut.

³⁷Emaikina ikes ŋice kiwuakinae naduketa ŋunajiet ŋuna a erwosit ka kiwuakinae ŋice loticisyo ŋulu ikinyomitere ikes anakwap a ŋina epukat ayoŋ. Emaikina ŋikapolok kec ka ŋikarikok kec toseunae alokimar kec pei ka emaikina kimyekinae ikes kiwuapa ŋikisila kec, lopite ŋolo alimunio erwosit kitiyae anakwap a Yudaya.

³⁸“Ani eruwor ŋakiboisyo ŋunauni ŋuna eyatakin nakwap a Yudaya, ŋuna anakwap a Samaria, emaikina ŋakiboisyo ŋun kiyatakinae nakwap a Yudaya toruwor ekepukan epei bon ipukat; nyemaikina ikes topupo ŋakiro a ekapolon a ece mati ŋuna a esacaradoti a ŋolo apolon nooi.

³⁹Adau ayoŋ ainakin erae ainakinet Pitolemais ka ŋakwapin ŋuna idunyatar iŋes aruwor ŋuna ka akibois a ŋina asegan alo Yerusalem, ikotere etacere ŋisiliŋa ŋulu iitanitae aŋuna a ŋiticisyo anakibois a ŋina asegan.

⁴⁰Eik daŋ ayoŋ atemar tolemununetei aŋuna a akibois a ŋina asegan ŋicekelya ŋulu ke esilipa ŋalipyo ŋatomon ka ŋakan alosiliŋa a ŋulu iriraununuyo aŋuna a erwosit anakiboisyo a ŋuna emaikina elemununere.

⁴¹Ŋisiliŋa daadaŋ ŋulu sek amaikina ŋiketiyak a apukan tolemununeete, ido nyetacito ikes alotooma ŋikaru ŋulu alunyar, ameun tokona, emaikina ikes tolemununut aŋuna a ŋiticisyo alo Kai ka Akuj.

⁴²Alemar daŋ akijaunun ŋicekelya ŋulu ke esilipa ŋulu arae ŋalipyo ŋakan ŋulu sek ejaununeete ŋikapolok ŋulu ikipukator ayoŋ alemar ŋisiliŋa ŋul alosiliŋa a ŋulu eryamununuyo aloticisyo alo Kai ka Akuj, anerae erae ŋulu a ŋisacaradotin a ŋulu itiyaete Kai ka Akuj.

⁴³Tosodi ŋituŋa daadaŋ ŋulu apotu tosiwa aŋuna ka aiun Kai ka Akuj ŋina eyai Yerusalem, kori iwadio alo Kai ka Akuj, anerae emaikina ikes totaca ŋisiliŋa neni a erwosit, kori aŋuna ayakatar amica adio, amaikina tolacakinae ikes, ido kinyakakinae ŋiboro kec daadaŋ anakwap a ŋina epukat ayoŋ.

⁴⁴“Emaikina ŋisiliŋa ŋulu iitanitae aŋuna ka adukokinia nabo ka ŋulu esubakinere neni emunaara anakibois a ŋina asegan tolemunae alosiliŋa a ŋulu iriraununuyo aŋuna a erwosit.

⁴⁵Emaikina daŋ ŋisiliŋa ŋulu edukokinere nabo ŋarwatatain a Yerusalem ka ŋulu edukere ŋaduketa ŋunajiet kiryama cib ka ŋisiliŋa ŋulu edukokinere nabo ŋarwatatain a ŋitaunio a Yudaya tolemunae alosiliŋa a ŋulu iriraununuyo aŋuna a erwosit.”

⁴⁶Ani iirarete Yonasan ka ŋituŋa ŋakiro ŋun, apotu nyenupa, kori tocamut ŋakiro ŋun, anerae apotu ikes totamut ŋakiro ŋuna aronok nooi ŋuna abu Demetrius kitiya Isirael ka epite ŋolo esicanitor iŋes Ŋisirael.

⁴⁷Apotu ikes tocamut ŋakiro ka Alesanda, anerae iŋes esyauni akirwor neni kec ŋakiro ŋuna ke ekisil, ido apotu Ŋisirael torubakis eriito ka Alesanda ŋirwa ka akiyar keŋ daadaŋ.

⁴⁸Abu nai erwosit Alesanda tocunak ŋasigarya ŋuna alalak toloto kicodokis Demetrius.

⁴⁹Kiryamunos ŋirwosi ŋuluarei lojie ka apotu ŋasigarya a Demetrius tobwaŋas, kiwuap Alesanda Demetrius tari ŋina elounia.

⁵⁰Topuruu ejie tari ŋina adoiyorya akoloŋ, ido abu Demetrius totwan akoloŋit ŋin.

⁵¹Kiyakiya nai Alesanda ŋituŋa keŋ neni a Pitolemi a erwosit a Ijipit alimokin iŋes ŋakiro nu,

⁵²“Ikwapei aboŋunio ayoŋ nakwap ŋina epukat ayoŋ ka adau akiboikin lokicoloŋ atapapaa kaŋ akipuka, ido etogogoŋ daŋ apukan kaŋ, anerae elou ayoŋ Demetrius ka ekama ayoŋ akwap kosi;

⁵³abu ayoŋ ojioto ka iŋes alojie, eloun isua iŋes ka ŋasigarya keŋ ka ekamar isua apukan keŋ,

⁵⁴aŋun, ocamunos tokona toyakaun akoneo neni yok, inakinae ayoŋ nakoku kon toruwor aberu kaŋ, ido oruwor ayoŋ ekamuran kon ka akainakini ayoŋ iyoŋ ŋainakineta ka neni anakoku kon daŋ, ikotere torubak iyoŋ irae ekepukan.”

⁵⁵Toboŋok erwosit Pitolemi ŋakiro ka Alesanda tema, “Epol nooi alakara ŋina ka akoloŋit a ŋina iboŋunio iyoŋ nakwap atapapaa kon, ido toruwor erwosit a akwap kec.

⁵⁶Etiyae ayoŋ ŋuna ilimu iyoŋ, nai eryamunos Pitolemais, ikotere ikiyanyun iwon, ido aruwor ayoŋ lokamuran kon lopite ŋolo ilimunitor iyoŋ.”

⁵⁷Aŋun, torotok Pitolemi alo Ijipit, iŋes ka nakoku keŋ Kileopatra todolut Pitolemais, ekaru ŋolo a amiat ka ŋatomonikanikapei ka ŋiarei.

⁵⁸Kiryamunos erwosit Alesanda ka Pitolemi, ido abu Pitolemi inak Alesanda nakoku keŋ ŋina anyaritae Kileopatra aruwor aberu keŋ ka kinumunuma ŋasuban ŋuna a ekiitanu alo Pitolemais, apolok ŋasuban ŋun nooi, lopite ŋolo sek itiyaata ŋirwosi ŋasuban.

⁵⁹Kigir nai erwosit Alesanda abaruwa anyarare Yonasan bu akiryamun ka iŋes.

⁶⁰Aŋun, tolot Yonasan esirit nooi akiryamun alo Pitolemais ka ŋirwosi ŋul ŋiarei Alesanda ka Pitolemi, inak Yonasan ikes ka ŋikonei kec esilipa, egolid ka ŋainakineta ŋuna alalak ka tominakis ikes iŋes.

⁶¹Tocunakinos ŋikalukinok ka ŋikesyaak alo Isirael itoroniarito Yonasan kisitakis iŋes, nai abu erwosit nyemitak ŋakiro kec.

⁶²Tolimok erwosit ŋituŋa alacar ŋilowi a Yonasan kitanapikis iŋes elou ŋolo kipurat-areŋan; ido apotu ikes kitiyata ŋun.

⁶³Kisiboik daŋ erwosit Yonasan diyete keŋ, ido tolimok ŋikapolok ŋulu epukatotor iŋes tema, “Torukosi ka iŋes kidiŋ etaun kiseraut atemar mam ituŋanan emaikina tolimu ŋakiro ŋadi itoroniyarit Yonasan anakiro a ŋadi ka mam ituŋanan emaikina kitoŋo iŋes a ŋakiro a ŋadi.”

⁶⁴Ani iŋolikinete ŋulu esitakinito Yonasan epite ŋolo etopoloorere iŋes, lopite ŋolo alimorere anakiseraunet ka kiŋolikis iŋes enapit elou ŋolo kipurat-areŋan, apotu ikes daadaŋ toema.

⁶⁵Aŋun, abu erwosit kitopoloo Yonasan kituruwo iŋes epei a ŋikonei keŋ a ŋulu amina iŋes nooi ka abu kituruwo iŋes ekapolokiniton a ŋajorei ka ekepukan a akibois.

⁶⁶Toboŋo nai Yonasan Yerusalem a ekisil ka alakara.

⁶⁷Alokaru a ŋolo a amiat ka ŋatomonikanikapei ka ŋikan bu Demetrius lokoku a Demetrius alo Kirete nakwap atapapaa keŋ.

⁶⁸Ani iirari erwosit Alesanda ŋakiro ŋun, toŋo nooi toboŋoo Antiokia.

⁶⁹Toseu Demetrius Apolonius aruwor ekepukan a Koelesiria, ido abu Apolonius tocunak ŋasigarya ŋuna alalak kirikau Yaminia. Kiyakiya nai iŋes ŋakiro nu neni a Yonasan a esacaradoti a ŋolo apolon nooi.

⁷⁰“Iyoŋ bon emaikina ikitidiŋ isua, aryamu ayoŋ ŋiyany ka ŋileec aŋuna kon. Kaanukiro ituruworor iyoŋ bon ekapolon kosi anakwap a ŋina a ŋikamukumukui?

⁷¹Ani tokona kikinyomit iyoŋ ŋasigarya kon totiyaun nadipo a ŋikamukumukui eryamun ka isua, bua ekatakinos a nen, anerae ayakar ayoŋ agogoŋu a ŋitaunio.

⁷²Kiŋitanar toyenu atemar ŋae ayoŋ ka ataŋae ŋuluce ŋulu ikiŋarakinito isua. Ikilimokinete iyoŋ ŋituŋa atemar nyipedori iyoŋ akitijiore isua, anerae aponi tobwaŋae atapapaa kon ŋarwa ŋaarei anakwap kec.

⁷³Nyipedori iyoŋ tokona akitijiore ŋasigarya kaŋ ŋuna edokito ŋaŋolei ka ŋasigarya ŋuna ikote nu ŋuna eya nadipo a ŋikamukumukui neni emam amoru kori ataaba, kori neni epedori ituŋanan akiem.”

⁷⁴Ani iirari Yonasan ŋakiro ka Apolonius tonyunyurikin etau keŋ, toseu ŋikilyok ŋalipyo ŋatomon, torotokis alo Yerusalem tolot lokaato keŋ Simon akisiryam ka akiŋarakin iŋes.

⁷⁵Kiboiyosi ikes laalo Yopa, nai apotu ŋituŋa a etaun a ŋol togolokis ŋipukei a etaun, anerae ayakar Apolonius ŋasigarya keŋ Yopa.

⁷⁶Aŋun, apotu ikes kitijikis ŋituŋa a Yopa. Tobul ŋituŋa toŋaasi ŋipukei a etaun, kikama nai Yonasan Yopa.

⁷⁷Ani iirari Apolonius ŋakiro ŋun, tocunak ŋasigarya ŋalipyo ŋauni ŋuna adokito ŋaŋolei ka ŋasigarya ŋuna alalak, ido toloto Asotus esibit elosete kiŋaren. Apaki ŋinapei ŋin totiyaar nadipo a ŋikamukumukui, anerae ayakar iŋes ŋasigarya ŋuna alalak ŋuna adokito ŋaŋolei ka ekinyomit iŋes ŋasigarya ŋun.

⁷⁸Kiwuapa Yonasan Apolonius tari Asotus, ido tojikinos ŋajorei kec.

⁷⁹Apaki ŋin kimyekinit alokaku kec Apolonius anakimunono ŋasigarya aliput ŋuna adokito ŋaŋolei.

⁸⁰Toyenu Yonasan atemar kedapunito iŋes ŋasigarya ŋace alokaku keŋ, anerae apotu ikes kirikaut ŋasigarya keŋ toguma ŋasigarya keŋ a ŋikaleŋeleŋe ameun taparacu sek tari esoŋakini akoloŋ.

⁸¹Nai apotu ŋasigarya a Yonasan towoikis ikes lopite ŋolo alimokinitor Yonasan ikes, ido abu toup ŋaŋolei a ŋimoe.

⁸²Yau nai Simon ŋasigarya keŋ potu kiŋaren kitijikis ŋimoe (anerae aris keup ŋaŋolei) kitubulo ŋasigarya a Simon ŋimoe kiteema,

⁸³ido kielakin ŋasigarya ŋuna ameto ŋaŋolei nadipo a ŋikamukumukui. Toema Asotus, tolomasi Bes-Dagon, kai a akuj kec aŋuna ka aiun.

⁸⁴Nai abu Yonasan kicunyak Asotus ka ŋitaunio ŋulu aya diyete Asotus, toŋata ŋiboro ŋulu aya nen, kicunyak Yonasan akai ka akuj a ŋina anyaritae Dagon kaapei ka ŋituŋa ŋulu apotu toema nen akiŋop.

⁸⁵Arae ekimar a ŋulu aponi toarae alojie kaapei ka ŋulu aponi kicunyarae ŋalipyo ŋakanikauni.

⁸⁶Tolot Yonasan a nen tourumik Asikalon; apotu ŋituŋa a etaun a ŋol tolomut kiŋa akisiryam Yonasan itopoloorito nooi.

⁸⁷Toboŋosi nai Yonasan ka ŋirukitos keŋ Yerusalem iwokito ŋiboro ŋulu alalak ŋulu aŋatunete ikes.

⁸⁸Ani iirari erwosit Alesanda ŋakiro ŋun, kitopoloo Yonasan nabo nooi

⁸⁹ido kiyakik iŋes arokoba ŋina erwatae ŋina etiyaunitae a egolid, lopite ŋolo a etal a ŋolo einanakinere neni a ŋiyeneta a erwosit. Abu daŋ erwosit Alesanda inak Yonasan Ekiron ka ŋirerya ŋulu idunyatar aruwor ŋulu keŋ.