Read ngakarimojong 1 Ŋimak. 11 Bible Online

1 Ŋimak. 11 - ngakarimojong bible

1 Ŋimak. 11

¹Tocunak nai erwosit a Ijipit ŋasigarya ŋuna alalak, ŋuna atya asinyon alodiyete anam ka ŋameeli ŋuna alalak, kikatak akikamar akwap ka Alesanda a amodiyo kiyatakinia akwap keŋ.

²Torotok iŋes Asiriya a ŋakiro aŋuna ke ekisil, toŋakis ŋituŋa a ŋitaunio iŋes ŋipukei a ŋitaunio kec, ido toloto akisiryam iŋes, anerae alimokinit erwosit Alesanda ŋituŋa alosit akisiryam erwosit a Ijipit, ikwapei araakar iŋes ekamuran ka Alesanda.

³Nai ani elomari Pitolemi lotaunio, kimyek ŋasigarya alotooma ŋolotaun akiyok etaun.

⁴Ani eapiyari iŋes Asotus, kitoodikis ŋituŋa iŋes akai ka akuj Dagon ŋina ecunyaritae ka Asotus ta ŋirerya ŋulu edunyito icunyaritae toperete a nen ŋawat a ŋituŋa ka ŋawat ŋuna anomiyarit akim ŋuna kebu Yonasan kicunya a nen apaki ŋina ke ejie, anerae atukokinito ŋituŋa ka Asotus ŋawat a ŋituŋa a ŋul lorot ŋolo ameunit Pitolemi.

⁵Tolimokis daŋ ŋituŋa ŋul erwosit Pitolemi ŋakiro ŋuna abu Yonasan kitiya aŋuna ka amunaarya Yonasan kimanae, nai abu erwosit nyelimu ŋakiro ŋadi.

⁶Kiryamunos Yonasan ka erwosit Yopa itopoloorit Yonasan iŋes, ido apotu kimalakinos ka topero daadaŋ nen akuwar ŋin.

⁷Torukosi Yonasan ka erwosit tari naŋolol ŋina enyaritae Eleuserus, ido toboŋu nai iŋes Yerusalem.

⁸Aŋun, kikama Pitolemi ŋitaunio ŋulu aya diyete anam akitodol Seleucia diyete anam, torubak Pitolemi eye ŋakiro ŋuna aronok ŋuna acamit akitiya neni ka Alesanda.

⁹Kiyakiya iŋes ŋituŋa neni a erwosit Demetrius alimokin iŋes ebe, “Bua ocamunos iwon make, ido akainakini ayoŋ iyoŋ nakoku kaŋ ŋina arae aberu ka Alesanda aruwor aberu kon, ido ipukae iyoŋ akwap a papa kon.

¹⁰Aŋer tokona ayoŋ ŋakiro ŋuna abunio oinakinia Alesanda nakoku kaŋ, anerae ikatakinit iŋes akiar ayoŋ.”

¹¹Etoroniyarit iŋes Alesanda, anerae acamit Alesanda akiya akwap keŋ.

¹²Aŋun, kinyaka iŋes nakoku keŋ aneni ka Alesanda, ido inak neni a Demetrius. Aŋerit iŋes akimor ŋakiro ka Alesanda, ido abu ediŋet kec kileereu.

¹³Toloma nai Pitolemi Antiokia tonap ebokot ŋolo ka apukan ka Asia. Aŋun, abu iŋes tonap anakou keŋ ŋibokoto ŋiarei, ŋolo ka akwap ka Ijipit ka ŋolo ka akwap ka Asia.

¹⁴Apaki ŋin ayai erwosit Alesanda Cilicia, anerae apotu ŋituŋa a akwap a ŋin totukut akiŋer iŋes.

¹⁵Ani iirari Alesanda ŋakiro ŋun, abu toyeu akitijikin Pitolemi. Abu Pitolemi bu ka ŋasigarya keŋ ŋuna agogoŋok akitijikin iŋes, tobwaŋ Pitolemi ŋasigarya ka Alesanda.

¹⁶Aŋun, toem Alesanda Arabia aiun aina, kilou erwosit Pitolemi Alesanda.

¹⁷Totubo Sabidiel ŋolo arae Emarabut akou ka Alesanda kiyakiya neni a Pitolemi.

¹⁸Nai abu erwosit Pitolemi totwan kelunyar ŋirwa ŋiuni anakoloŋit a ŋin, toara ŋituŋa ŋulu eboiyete anaduketa a ŋunajiet ŋasigarya keŋ ŋuna ewuakinit iŋes naduketa ŋunajiet.

¹⁹Aŋun, toruwor Demetrius erwosit alokaru a ŋolo a amiat ka ŋatomonikanikapei ka ŋikanikaarei.

²⁰Alorwa a ŋul, tocunak Yonasan ŋituŋa a Yudaya aŋuna ka akirem akai ŋinajiet ŋina aoyan ŋina alo Yerusalem, abu iŋes toduk ŋadoketa ikotere itijiyo ŋituŋa ŋulu aya tooma aduketait ŋin.

²¹Nai kepotu ŋikesyaak ŋice ŋulu pa aminasi akwap kec toloto neni a erwosit tolimokis iŋes atemar erikaut Yonasan ka ŋasigarya keŋ aduketait ŋinajiet ŋina aoyan.

²²Ani iirari erwosit ŋakiro ŋun abu toŋoo, ido ŋinapei eirarya iŋes ŋakiro ŋun abu tolot neni a erwosit a ŋolo ayai Pitolemais, a nen kigirak Yonasan abaruwa, tolimok iŋes atemar tojoŋo akirikaunit etaun, nai bu akiryamun ka iŋes atipei akiyanun ŋakiro alo Pitolemais.

²³Ani iirari Yonasan ŋakiro ŋun, tolimok ŋituŋa nyimyekis akirikaunit aduketait. Abu iŋes toseu ŋikasikou a Isirael ŋidi ka ŋisacaradotin arukor ka iŋes, tocamu akijal akiyar keŋ.

²⁴Tolot Pitolemais akiryamun ka erwosit, ya esilipa, egolid ka ŋilowi ta ŋainakineta ŋuna alalak. Tolakar erwosit aŋuna a Yonasan.

²⁵Tari daŋ ŋina arubakinitotor ŋikesyaak a akwap a Yudaya elimonokinete erwosit ŋakiro ŋuna aronok itoroniarito Yonasan,

²⁶abu erwosit kitiya neni a Yonasan lopite ŋolo etiyatotor neni a Yonasan ŋirwosi ŋulu epukato ekiŋaren keŋ, kitopoloo iŋes Yonasan alokiŋaren ŋikonei keŋ daadaŋ.

²⁷Kitogogoŋ nabo araakau a Yonasan esacaradoti ŋolo apolon nooi ka apolou daadaŋ ŋina sek ayakar Yonasan alotuŋa keŋ, kituruwo daŋ iŋes epei a ŋikonei keŋ a ŋulu amina iŋes nooi.

²⁸Kiŋit nai Yonasan erwosit tolema ocur alo Yudaya ka anakiboisyo a ŋunauni a ŋuna a Samaria, ido kiik iŋes ŋitalantae ŋamiae ŋauni.

²⁹Tocamu erwosit ŋakiro ŋun daadaŋ, ido kigir abaruwa neni a Yonasan, ŋakiro ŋuna egiritae nabaruwa ŋin ikes nu:

³⁰“Ebunit abaruwa na aneni a erwosit Demetrius neni alokaato kaŋ Yonasan ka neni a Ŋiyudayan. Ekemalae ayoŋ iyes.

³¹Abaruwa naga ŋina egirit ayoŋ ŋakiro kon eyakiyarit neni a eyenet kaŋ Lasisenes, egirit ayoŋ neni kon daŋ ikotere iyoŋ daŋ iyenuni ŋakiro ŋuna eya tooma keŋ.

³²‘Neni a erwosit Demetrius, neni a papa kaŋ Lasisenes, ekemalae ayoŋ iyoŋ.

³³Adaun isua acamun akitiya ŋuna ajokak neni a Ŋiyudayan, a ŋulu erae ŋikonei yok ka akitiya ŋuna emaikina isua kitiyae neni kec, aŋuna ka arimao a ŋina ikitoodikinito ikes iwon.

³⁴Etogogoŋi isua atemar toruwor akwap ŋina a Yudaya ka ŋakiboisyo ŋunauni nu ŋuna kec: Apairema ka Lidia ta Rasamin, aponi kiyatakinae Rasamin ka ŋakiboisyo ŋuna idunyatar iŋes Yudaya, ŋuna atyakunio alo Samaria. Atubun isua atemar nyemaikina ŋituŋa daadaŋ ŋulu einanakinete ŋamuronisya alo Yerusalem akitac ocur neni a erwosit, ocur ŋolo sek ejaununui erwosit aneni kec a ŋolokaru, ocur ŋolo a ŋinyomen a ŋulu etaununete ikes ka ŋaraito a ŋikito.

³⁵Tosodi ŋiboro ŋuluce ŋulu sek elemununuyete ikes aŋuna yok, ŋatutubeta ŋapei pei alotooma ŋatomon ka ocur ŋolo sek etaceneneete ikes neni yok ta ŋapanya a acumbi ka ocur ŋolo elemuneneete ikes aŋuna a erwosit, nyelemunete ikes ŋiboro ŋul nabo.

³⁶Nyitelemunio nabo ikes ŋiboro ŋul jik ameun nakoloŋit na tari ŋikaru ka ŋikaru.

³⁷“‘Aŋun, kigir ŋakiro nu nakaratas ace, ido emaikina inakinae neni a Yonasan, kiwuakinae nakibois ŋina ileere alo moru a ŋolo asegan.’ ”

³⁸Ani eyenuni erwosit Demetrius atemar esil akwap ka emam ŋituŋa aremokino iŋes, abu kiela, ŋasigarya keŋ daadaŋ tolot ŋinituŋanan lore keŋ, ŋasigarya ŋunagelae ŋuna kenyarauni iŋes aloculeta a anam bon apotu kidoŋo. Aŋun, apotu ŋasigarya daadaŋ ŋuna a ŋirwosi a ŋulu epukato eriŋa iŋes kitidiŋa iŋes.

³⁹Ayai ekile ece ŋolo anayritae Tripo ŋolo sek arae epei a ŋulu ariito ka Alesanda, abu iŋes toyenu atemar eŋuruŋurasi ŋasigarya daadaŋ aŋuna a Demetrius. Aŋun abu iŋes tolot neni ka Imalikue a ŋolo arae Emarabut, a ŋolo ainakinitae akitopoloun Antiokus lokoku ka Alesanda ŋolo cici,

⁴⁰torubak iŋita jik atemar inak Imalikue iŋes Antiokus, ikotere kituruworoe erwosit kiluny neni a papa keŋ. Abu daŋ iŋes tolimok Imalikue ŋakiro ŋuna kebu Demetrius kitiya ka tolimok daŋ iŋes ŋuna a ŋasigarya aŋuna eŋerito Demetrius, ido kiboi iŋes a nen ŋirwa ŋulu alalak.

⁴¹Apaki ŋin, kiyakiya Yonasan ituŋanan neni a erwosit Demetrius akiŋit iŋes tolema ŋasigarya anaduketait a ŋina aoyan a ŋinajiet a ŋina ayai Yerusalem ka ŋasigarya ŋuna aya naduketa ŋunace ŋunajiet, anerae arubakinito ikes itijiete Ŋisirael.

⁴²Kiyakiya nai Demetrius ituŋanan alimokin Yonasan ŋakiro nu, “Meere ŋakiro ŋun bon etiyakini ayoŋ aŋuna kon ka akwap kon, nai eketopoloori ayoŋ iyoŋ nabo nooi ka akwap kon erae ca karyamu ayoŋ apaki.

⁴³Aŋun, kiyakikinae tokona ayoŋ ŋikilyok akiŋarakin ayoŋ, anerae akaŋero ayoŋ ŋasigarya kaŋ daadaŋ.”

⁴⁴Aŋun, abu Yonasan kiyakiya Antiokia ŋasigarya ŋuna agogoŋok alojie ŋalipyo ŋauni, ani edolete ŋasigarya ŋun neni a erwosit tolelyan erwosit aŋuna adolunioto ikes.

⁴⁵Tocunakinos nai ŋituŋa a etaun tooma etaun, ŋituŋa ŋulu arae ekimar kec ŋalipyo amiat ka ŋatomoniarei, tocamito akiar erwosit.

⁴⁶Nai abu erwosit tosi kai a apukan. Toloto nai ŋituŋa a etaun lorotin ŋulu apolok a etaun, togeikis ajiore.

⁴⁷Aŋun, abu erwosit tonyarau Ŋiyudayan akiŋarakin iŋes, tocunaros daadaŋ kirimokis erwosit kidiŋ, kicodosi a nen kiryama etaun daadaŋ, ido apotu Ŋiyudayan toara akoloŋit ŋin ŋituŋa ŋulu apikinito ŋalipyo amiat.

⁴⁸Kicunyakis etaun ka toŋatasi ŋiboro ŋulu alalak akoloŋit ŋin ka toiut erwosit.

⁴⁹Ani iŋolikinete ŋituŋa a etaun atemar ekamasi Ŋiyudayan etaun lopite ŋolo acamitotor, todaun amukeo kec, ido kigworokis erwosit edyekito a ŋakiro a nu,

⁵⁰“Inakinae isua ekisil, ido tolimok Ŋiyudayan tojoŋoto akitijiore isua ka akiel etaun kosi.”

⁵¹Tocakakis nai ikes ŋiboro kec ŋulujiet kwap kisila. Aŋun, apotu ikes kitopoloosi Ŋiyudayan alokiŋaren erwosit ka ŋituŋa daadaŋ ŋulu ka akwap a ŋina epukat iŋes, ido apotu Ŋiyudayan toboŋosi Yerusalem iwokito ŋiboro ŋulu alalak ŋulu aŋatunete ikes.

⁵²Aŋun, kiboikin erwosit Demetrius lokicoloŋ ŋolo ka apukan keŋ, ido toyakaun ekisil nakwap keŋ.

⁵³Nai abu iŋes nyiwuap ŋakiro keŋ ŋuna sek eikinit iŋes Ŋiyudayan. Toŋer iŋes Yonasan ka nyetac Yonasan ejok aŋuna a ŋiticisyo a ŋulu abu Yonasan kitiya, nai totiŋ iŋes erono nooi.

⁵⁴Ekaku a ŋakiro a ŋun toboŋo Tripo Antiokia kaapei ka edya Antiokus ŋolo abu togeik akipuka ka tonap ebokot.

⁵⁵Apotu ŋasigarya daadaŋ ŋuna sek etoboŋori Demetrius lorerya kec toriwo ka Tripo itidiŋito Demetrius, toem Demetrius kedaun akiloun.

⁵⁶Kikama Tripo ŋitome ka topolok Antiokia.

⁵⁷Kigir nai edya Antiokus abaruwa neni a Yonasan tema, “Eketogogoŋ ayoŋ iyoŋ anaraakau esacaradoti ŋolo apolon nooi ka ekewuak ayoŋ iyoŋ apolokin ŋakiboisyo ŋunaomwon, eketuruwo daŋ ayoŋ iyoŋ epei a ŋikonei a erwosit.”

⁵⁸Kiyakik daŋ Antiokus Yonasan asaani ŋina etiyaunitae a egolid ka ŋiboro ŋulukimujet ŋulu etiyaunitae a egolid, inak daŋ apedor ŋina emasya a ŋikopoi a ŋulu itiyaunitae a egolid ka anapit elou ŋolo kipurat-areŋan ta anapit arokoba ŋina etiyaunitae a egolid.

⁵⁹Toseu Antiokus lokaato a Yonasan Simon aruwor ekepukan a akibois a ŋina edokarere Tiro akitodol lokukworin a Ijipit.

⁶⁰Torotok nai Yonasan alo Yerusalem todoka ekekwaye aŋolol ka kitor lotaunio, apotu ŋasigarya ka Asiriya daadaŋ tocununos neni keŋ erae ŋulu apotu toriwo ka iŋes, ani edoluni iŋes Asikalon, apotu ŋituŋa a etaun kisiryama iŋes itopoloorito.

⁶¹A nen, tolot Yonasan Gasa, nai apotu ŋituŋa a Gasa towout a ŋaar iŋes. Aŋun, abu iŋes kisirikau ŋasigarya keŋ etaun, kicunyasi ŋirerya ŋulu aya diyete etaun, toŋatasi ŋiboro a nen.

⁶²Todyeka nai ŋituŋa a Gasa Yonasan, ido abu Yonasan kisila ka ikes, ya ŋidwe ŋulusapa ŋulu a ŋikepukak kec erae ŋirikon, kiyakiya ikes Yerusalem. Tolot nai Yonasan kitor kidiŋ akwap ŋin todol Damasko.

⁶³Kiira Yonasan atemar apotu ŋikapolok ŋulu a ŋajorei a Demetrius Kades lotaun ŋolo eyai Galileya erukito ka ŋasigarya ŋuna alalak, ecamito alemar iŋes anapolou.

⁶⁴Tolot Yonasan akitijiore ikes, nai kimyek lokaato keŋ Simon alo Yudaya.

⁶⁵Kirikaut Simon ka ŋirukitos keŋ ŋimoe eriŋa ikes nyedolo Bes-Sur, kitijioto ikes ŋituŋa a Bes-Sur ŋirwa ŋulu alalak, ido ekaku, kirikaut etaun.

⁶⁶Kiŋita nai ŋituŋa a Bes-Sur Simon acamun ka ikes kisila, abu iŋes tocamu. Tolema Simon ŋituŋa ŋul alotaun kec, kikama etaun, ido kiwuak ŋasigarya nen ŋuna eyokiyete etaun.

⁶⁷Tourumikis Yonasan ka ŋirukitos keŋ ŋimoe alodiyete anam Galileya. Ani eriŋa ataparacu toloto nadipo ŋina ka Asior,

⁶⁸Kiryamunos ikes nen ka ŋasigarya a ŋituŋa a ŋulugelae, kedapito sek ŋimoe ŋul ikes alokamukumukui, nai apotu ikes kiryamunos ediyediye.

⁶⁹Tolomut nai ŋimoe ŋulu sek kidasito anakiboisyo a ŋuna sek kidasitotor ikes tolomasi lojie.

⁷⁰Toema ŋikilyok daadaŋ ŋulu arukitotor Yonasan, mam epei daŋ abu kidoŋ mati Matasias lokoku ka Abusalom ka Yudas lokoku a Kalipi ŋulu arae ŋikarikok a ŋasigarya.

⁷¹Tocil Yonasan ŋilowi keŋ, kiwuak apuwa nakou keŋ, ido kilip.

⁷²Toboŋo nai akitijikin ŋimoe, kilou Yonasan ŋimoe, ido toema ŋimoe.

⁷³Ani iŋolikinete ŋirukitos a Yonasan ŋulu sek aemete atemar abwaŋ Yonasan ŋimoe, toboŋut neni keŋ, kiwuapakis kaapei ŋimoe akitodol Kades neni sek aponitotor ŋimoe ŋul, ido kirikaut ikes nen.

⁷⁴Toarae ŋituŋa ŋulu arae ŋigelae akoloŋit ŋin ŋulu arae ekimar kec ŋalipyo ŋauni. Toboŋo nai Yonasan Yerusalem.