Read ngakarimojong 1 Ŋimak. 12 Bible Online

1 Ŋimak. 12 - ngakarimojong bible

1 Ŋimak. 12

¹Ani eyenuni Yonasan atemar ejok apaki ŋin aŋuna keŋ, toseu ŋikilyok, ido kiyakiya Roma akitogogoŋ ka akikiteteun akoneo ka Ŋiromanin.

²Kiyakiya daŋ iŋes ŋabaruwae aŋuna a ŋakiro a ŋunapei neni a Ŋisiparitan ka nakiboisyo ŋunace.

³Toloto nai ŋikilyok ŋulu eyakitae Roma tolomasi nagule ŋina eboiyoto ŋikatukok temasi neni kec, “Ikiyakuunito isua Yonasan esacaradoti ŋolo apolon nooi ka Ŋiyudayan akikiteteun akoneo ka ariit kaapei ka ikes.”

⁴Apotu nai Ŋiromanin inakis ikes ŋabaruwae ŋuna egirakinitae neni a ŋituŋa a ŋakiboisyo a daadaŋ, akiŋitakin ikes akiŋarakin ŋikiyakitono a Yonasan alosit ka aboŋor emam ŋace anakwap a Yudaya.

⁵Erae nu ŋakiro ŋuna egiritae nabaruwa ŋina egirakinit Yonasan Ŋisiparitan;

⁶“Ebunit abaruwa na aneni a Yonasan a esacaradoti a ŋolo apolon nooi, aneni a ŋikatukok a akwap, a ŋisacaradotin ka aneni a Ŋiyudayan a ŋuluce, igiritae neni a ŋikaitotoi kosi a Ŋisiparitan ikimalatae isua iyes.

⁷Alorwa a ŋulu alunyarosi, egiritae abaruwa neni ka Onias a esacaradoti a ŋolo apolon nooi, egiritae abaruwa ŋin neni ka Aruis a ŋolo arae erwosit kus, alimorit abaruwa ŋin atemar, irae iyes ŋikaitotoi kosi, lopite ŋolo itoodiunitor abaruwa na ŋina idoŋit ne.

⁸Abu Onias kijau ŋikiyakitono a akitopoloorit, ido kigir abaruwa ŋina egiritae ileerete ŋakiro ŋuna ka ariit kaapei ka akoneo.

⁹Aŋun, tari pa kiitanitae isua ŋakiro ŋun, ikwapei eyakare isua akisimukekinet alokitaaboi a ŋulu asegak a ŋulu ikiyakar isua,

¹⁰aseun isua akiyakuun ŋituŋa aŋuna ka akikiteteun akimorikina a ekal yok ka akoneo ka iyes, ikotere nyikityakar isua aneni kus, anerae alunyar apaki ŋina aoyan ameun anapaki a ŋina iyakuuniata iyes abaruwa neni kosi.

¹¹Aŋun, ikitamunit isua iyes jik anapakio a daadaŋ, alorwa a ŋulu a ŋasuban kosi ka alorwa a ŋuluce a daadaŋ a ŋulu iitana, ikitamununuyo iyes, anapakio a ŋuna a ŋamuronisya kosi ka anakilip kosi, lopite ŋolo emaikina ka iyookino atamunit ŋikaitotoi.

¹²Ikilelyani isua aŋuna ka apolou kus,

¹³Nai ani eruwor isua, eryamunitae isua ŋakikatanakineta ŋuna alalak ka eya ŋijiesyo ŋulu alalak, ikitijiete isua ŋirwosi ŋulu eyakasi nawaetin kosi.

¹⁴Pa acamitae isua akitoŋo iyes ka ŋituŋa ŋuluce ŋulu ikiriitor isua ka ŋikonei kosi aŋuna a ŋijiesyo a ŋul,

¹⁵anerae eyakare isua akiŋarakinet ŋina ebunit anakuj, aŋun aponi kilounae ŋimoe kosi.

¹⁶Aŋun, aseun isua Numenius lokoku ka Antiokus ka Antipater lokoku a Yason, eyakuun isua ikes Roma akikiteteun akoneo yok ŋinaŋorot ka ariit kosi ka ikes.

¹⁷Alimokin isua ikes aponare neni kus daŋ, akimal iyes ka ainakin iyes abaruwa na ŋina igiritae isua ŋakiro ŋuna ka akikiteteun akimorikina a ekal yok.

¹⁸Ikilipit tokona isua iyes aboŋokin ŋakiro ŋun.”

¹⁹Erae nu ŋakiro ŋuna egiritae nabaruwa ŋina egirakinitae Onias,

²⁰“Ebunit abaruwa na aneni a erwosit Arius a ŋolo a Ŋisiparitan, igiritae neni ka Onias a esacaradoti a ŋolo apolon nooi, ekemalat ayoŋ iyoŋ.

²¹Aryamun anakigireta ŋakiro ŋuna a Ŋisiparitan ka Ŋiyudayan atemar erae ikes ŋikaitotoi ka erae ŋiletok ka Aburaam.

²²Ikwapei tokona ayenunere isua ŋakiro ŋun ikilipit isua iyes kigirakinae isua abaruwa, ikilimokis isua epite ŋolo iyakatar iyes,

²³ikigirakini isua alowae kosi neni kus akiteyenikin iyes atemar erae ŋibaren kus ka ŋiboro kus ŋulu kosi, ido erae ŋulu kosi ŋulu kus. Aŋun, ikilimu isua atemar ikilimokis iyes ŋikiyakitono kosi ŋakiro ŋuna iyookino.”

²⁴Kiira Yonasan atemar aboŋut ŋikapolokinitok a ŋasigarya a Demetrius, apotu ka ŋasigarya ŋuna alalak akilo ŋuna aponito ekiŋaren akitijiore iŋes.

²⁵Aŋun, torotok iŋes alo Yerusalem ka ŋasigarya keŋ kiryamunos ka ŋasigarya a Demetrius nakwap ŋina ka Amas, anerae abu iŋes nyeinak ikes apaki ŋinalomunet nakwap keŋ toremo.

²⁶Kiyakiya Yonasan ŋirototin neni eboiyoto ŋajorei a Demetrius, toboŋut ŋul tolimokis iŋes atemar icodorito ŋimoe aŋuna ka akitijikin Ŋiyudayan nakwaare.

²⁷Aŋun, ani kedoiyo akoloŋ, tolimok Yonasan ŋasigarya keŋ totena ka totiŋito ŋiboro kec ŋulujiet a ŋakan ikotere etenito akuwar daadaŋ aŋuna a ejie, ido kiwuanak iŋes ŋatuketa a ŋasigarya nawae neni eboiyoto ikes.

²⁸Ani iirarete ŋimoe atemar etenito Yonasan ka ŋasigarya keŋ aŋuna ke ejie, abu tobul ikes, toryaŋakinos ŋitai kec, aŋun, kinokakis ikes ŋakimia neni eboiyoto ikes, ido toema.

²⁹Nai pa ayenete Yonasan ka ŋasigarya keŋ ŋakiro ŋun akitodol taparacu, anerae eteete ikes ŋakimia enokete.

³⁰Kiwuap nai Yonasan ikes, nai abu nyedita ikes, anerae keris ikes kedokasi ekekwaye aŋolol Eleuserus.

³¹Aŋun, kibelekin Yonasan tolot akitijiore Ŋimarabui ŋulu enyaritae Ŋisabedean, kilou ikes ka toŋata ŋiboro kec.

³²Torotokis nai ikes aneni eboiyoto, toloto Damasko, kirimo anakwap a ŋin a daadaŋ.

³³Tolot Simon daŋ kirim akwap daadaŋ todoiyo tari Asikalon ka nakiboisyo ŋunajiet ŋuna aapiyete a nen. Tori a nen tolot Yopa, kikama etaun pa etenito ŋituŋa a etaun,

³⁴anerae kebu iŋes kiira atemar acamito ikes ainakin ŋaduketa ŋunajiet neni a ŋasigarya a ŋuna eyakuunit Demetrius. Kiwuak Simon ŋasigarya lotaun ŋol akiyok etaun.

³⁵Ani eboŋori Yonasan, tonyarau ŋikasikou ka ŋituŋa, toyeut kaapei akiduk ŋaduketa ŋunajiet Yudaya,

³⁶adukokin ŋarwatatain a Yerusalem tooyaketa ameun alokwap tari kidiama ka adukokin arwatata ŋina aoyan ameun alokwap tari kidiama toyai kidiŋ aduketait ŋinajiet ka etaun, totyakaritere aduketait ŋinajiet alotaun, ikotere epakara iŋes, nyepedosi ŋimoe akigyel, kori agyelanar ŋiboro ŋulu aya nen.

³⁷Aŋun, apotu ikes tocunakinos daadaŋ aŋuna ka adukokin nabo etaun, aritaara epeiwae arwatata alowae a ŋolo alo Kide a ŋolo ka akadipaalat, ido tosubakis neni enyaritae Kapenasa.

³⁸Toduk Simon daŋ Adida neni eyai Sepela, todukok ŋaduketa ŋunajiet, kiwuanak ŋipukei ŋulu aya ŋigolyeta.

³⁹Togeu nai Tripo akitidiŋ erwosit ŋolo ka Asia, tonap ebokot ka kisyak akitijiore erwosit Antiokus.

⁴⁰Akuryana iŋes, anerae atami atemar nyecamuni Yonasan iŋes itiyae ŋun, nai ebuni acepaki akitijiore iŋes, aŋun torubak iŋes iwarit akikamun ka akiar iŋes, torotok nai iŋes, tolot Bes-san.

⁴¹Tolot Yonasan akisiryam iŋes erukito ka ŋikajiok ŋulu aseunitae ŋalipyo ŋatomoniomwon, todolo Bes-san.

⁴²Ani iŋolikini Tripo atemar ebunit Yonasan erukito ka ŋasigarya ŋuna alalak toker akitijikin iŋes.

⁴³Aŋun, abu kijau iŋes ka akitopoloorit, kipur daŋ iŋes alokiŋaren ŋikonei keŋ, inak ŋainakineta ŋuna alalak, ido kicik ŋikonei keŋ ka ŋasigarya keŋ akiwuap ŋakiro a Yonasan lopite ŋolo iwuapitotor ŋuna keŋ.

⁴⁴Tolimok nai Tripo Yonasan tema, “Kaanukiro iteryamunitor iyoŋ ŋituŋa lu daadaŋ ŋican nyejio bo iwon?

⁴⁵Tolimok ikes toloto lorerya kec tokona ka toseu aŋuna kon ŋikilyok ŋidi kiboiyoto ka iyoŋ, ido ibu orukosi ka ayoŋ Pitolemais. Akainakini ayoŋ iyoŋ etaun ŋol kaapei ka ŋaduketa ŋunajiet ŋunace ka ŋasigarya ŋuna idoŋito nen ka ŋikapolokinitok a ŋasigarya daadaŋ, ido nai oboŋo ayoŋ lore. Ŋakiro ŋun ikes ayakar ayoŋ ne.”

⁴⁶Abu Yonasan kikinyom Tripo, kitiya lopite ŋolo alimokinere iŋes, abu tolimok ŋasigarya alosit, ido apotu ŋasigarya toboŋosi nakwap a Yudaya,

⁴⁷kidoŋo ka iŋes ŋikilyok ŋalipyo ŋauni, alokidiŋ ŋul kimyek ŋalipyo ŋaarei alo Galileya torukosi nai iŋes ka ŋikilyok aliput.

⁴⁸Nai ani elomari Yonasan Pitolemais, togolokis ŋituŋa a Pitolemais ŋipukei a etaun, kikamasi Yonasan, ido toara iŋes a ekileŋ ka ŋulu daadaŋ apotu tolomasi ka iŋes lotaun.

⁴⁹Kiyakiya nai Tripo ŋasigarya ŋuna alosete a ŋakejen ka ŋuna ameto ŋaŋolei Galileya ka nadipo a ŋikamukumukui ŋina apolon amunyar ŋasigarya a Yonasan daadaŋ.

⁵⁰Nai toyenut ŋasigarya a Yonasan atemar kikamar Yonasan ka keari iŋes ka ŋirukitos keŋ, apotu nai ikes kisimukekinos make, torubakis icodete ibakito aŋuna ka akitijiore ŋimoe.

⁵¹Ani iŋolikinete ŋimoe ŋulu ewuapito ŋasigarya a Yonasan atemar etenito ikes ajiore aŋuna a akiyar kec, kibelekinos toboŋosi.

⁵²Aŋun, apotu ŋasigarya a Yonasan todolo nakwap a Yudaya emam ŋace, kigworo ikes aŋuna a Yonasan ka aŋuna a ŋirukitos keŋ, ido abu akuryanu ŋina apolon min neni kec ka apotu Ŋisirael daadaŋ kigworo nooi.

⁵³Apotu ŋituŋa a ŋakwapin ŋulu edunyatar Ŋiyudayan kikatakis amunyar Ŋiyudayan, anerae apotu ikes temasi, “Emamukatar ikes ekarikon, kori ekeŋarakinan. Aŋun etijikisi tokona ikes tojoŋoto ŋituŋa atamunit ikes nabo jik.”