Read ngakarimojong 1 Ŋimak. 13 Bible Online

1 Ŋimak. 13 - ngakarimojong bible

1 Ŋimak. 13

¹Kiira Simon atemar acunaki Tripo ŋasigarya ŋuna alalak aŋuna ka akirem Yudaya ka akinyasun

²ka abu iŋes kiŋolik atemar amaranete ŋituŋa aŋuna ka akuryanu. Aŋun, abu Simon tolot Yerusalem, ani kedau acunakin ŋituŋa iwapei,

³kisimukek ikes, tolimok tema, “Iyenete iyes ŋilopeyek ŋakiro ŋuna apolok ŋuna apotu ŋikaitotoi kaŋ ka ayoŋ ta ŋituŋa a ekal a papa kaŋ kitiyata aŋuna a ŋikisila ka aŋuna ka akibois a ŋina asegan, iyenete daŋ iyes ŋijiesyo ka ŋatyokisyo ŋuna apotu ŋikaitotoi kaŋ ka ayoŋ oryamutu.

⁴Aŋakiro a ŋun atwaka ŋikaitotoi kaŋ daadaŋ aŋuna a Isirael ka ayoŋ bon edoŋit.

⁵Aŋun, nyikiryama ca ayoŋ ka aiun akiyar kaŋ anapakio a daadaŋ aŋuna a ŋican, anerae nyajok ayoŋ akilo ŋikaitotoi kaŋ.

⁶Nai enyaŋari ayoŋ ŋuna adaun akitiya nakwap kaŋ ka nakibois ŋina asegan ka naberu kus ta lodwe, anerae acunakin ŋituŋa a ŋakwapin a daadaŋ aŋuna ikitidiŋitotor iwon ka aŋuna ka amunyar iwon.”

⁷Ani iirarete ŋituŋa ŋakiro ŋun, abu amukeo min lotai kec,

⁸ido toboŋokis ikieunito ŋitoilon temasi, “Irae iyoŋ ekarikon kosi, kilunyokin neni a Yudas ka neni alokaato kon Yonasan.

⁹Toji ŋijiesyo kosi, ido ikitiyae isua ŋakiro daadaŋ ŋuna ikilimokini iyoŋ isua.”

¹⁰Aŋun, abu Simon tocunak ŋikajiok daadaŋ, ido kiburuburak akirikakin akiduk ŋarwatatain a Yerusalem ka todukonok ŋaduketa ŋunajiet lowaetin daadaŋ.

¹¹Kiyakiya iŋes Yonasan lokoku ka Abusalom Yopa kaapei ka ŋasigarya ŋuna alalak, kirita Yonasan ŋituŋa ŋulu eboiyete alo Yopa, ido kiboikin iŋes nen.

¹²Torotok nai Tripo alo Pitolemais erukito ka ŋasigarya ŋuna alalak aŋuna ka akirem akwap a Yudaya, ayai Yonasan daŋ nen erae emabus ŋolo eyokiyete ŋasigarya.

¹³Kiboiyo Simon ka ŋasigarya keŋ Adida neni iteosi ka adipo a ŋikamukumukui.

¹⁴Toyenu Tripo atemar kitopoloor Simon kilunyokin neni alokaato keŋ Yonasan ka atemar aapi iŋes akitijikin ikes, aŋun kiyakiya Tripo ŋikiyakitono neni a Simon alimokin iŋes ebe,

¹⁵“Erae aŋuna a Ŋisirael a ŋulu amaikina lokaato kon Yonasan totac neni iŋadao ŋisiliŋa a erwosit aŋuna a ŋiticisyo a ŋulu etiyae iŋes, iŋes eenitere isua iŋes.

¹⁶Kiyaku tokona ŋatalantae a esilipa amiat ka ŋidwe keŋ ŋulusapa ŋiarei, ikotere ani kelacakin isua iŋes nyikitijik iŋes isua, ikilacakini nai isua iŋes.”

¹⁷Ayeni Simon atemar erworosi ikes neni keŋ amodiyo, nai abu iŋes kiyakiya ŋituŋa ayaun ŋisiliŋa ka ŋidwe a Yonasan ŋulusapa ŋiarei, ikotere nyeŋoa ŋituŋa neni keŋ, anerae acepaki epedorete ŋituŋa alimun ebe,

¹⁸“Erae aŋuna pa eyakiyarya Simon ŋisiliŋa ka ŋidwe a Yonasan ŋulusapa, iŋes atwania Yonasan.”

¹⁹Aŋun, kiyakiya Simon ŋatalantae amiat ŋuna ke esilipa ka ŋidwe a Yonasan ŋulusapa ŋiarei; nai abu Tripo nyisiyook ŋakiro keŋ ka abu nyelacak Yonasan.

²⁰Ekaku aŋun, tolot Tripo akirem akwap a Yudaya ka akinyasun iŋes, abu kilodu alorot a ŋolo elosere Adora. Nai torubakis Simon ka ŋirukitos keŋ elosete, emanito alowae a ŋolo eteosi ka ŋasigarya a Tripo aneni daadaŋ apotu ikes kitoro.

²¹Torubakis ŋikilyok ŋulu aya naduketait ŋinajiet iyakiyanarete ŋituŋa neni a Tripo alimokin iŋes abunore neni kec kitorut lorot ŋolo ka aloŋisat ka akiyakikin ikes akimuj.

²²Aŋun, kitemok Tripo ŋasigarya keŋ daadaŋ ŋuna ameto ŋaŋolei aŋuna ka alosit, nai akoloŋit ŋin nakwaare, todout ŋakako ŋuna alalak nooi, ido abu iŋes nyelot aŋuna a ŋakako. Tolot iŋes a nen nakwap a Gilead.

²³Ani eapiyari iŋes Basikama, toar Yonasan a nen ka aponi tonukae nen.

²⁴Kibelekin nai Tripo, toboŋo nakwap keŋ.

²⁵Abu Simon kiyakiya ŋituŋa alemun ŋakoyo alokaato keŋ Yonasan, tonuk Modein, lotaun atapapaa keŋ.

²⁶Kigworo Ŋisirael daadaŋ Yonasan a akiwolol a ŋina apolon ka kigworo ŋirwa ŋulu alalak.

²⁷Todukok Simon aduketait kidiama neni anukitae papa keŋ ka ŋikaitotoi keŋ todukok aduketait ŋin eoya nooi ikotere epedoryo akiŋolikin aneni alwanan, kiwuak ŋamoru ŋunasulut kiŋaren ka kaku.

²⁸Todukok daŋ ŋaduketa ŋuna ikwaan ka ŋuna ewuanakinete Ŋijipitian ŋawat a ŋirwosi kec, todukok ŋaduketa ŋun ŋakanikaarei iteosi; todukok aŋuna a papa keŋ, a toto keŋ ka aŋuna a ŋikaitotoi keŋ a ŋuluomwon.

²⁹Aŋuna a ŋaduketa a ŋun, abu Simon kiwuanak nawaetin ŋipirin ŋulu aburok, ido kicienak ŋitorubei a ŋiboro a ŋulujiet lopirin ŋul, ikotere etamunitere jik ŋijiesyo kec, ido diyete ŋitorubei a ŋiboro a ŋulujiet, kicienak ŋitorubei a ŋameeli ikotere iŋolikinete daadaŋ ŋulu elosete ananam.

³⁰Arae aduketait ŋina ayai neni anukitae ŋiyeneta keŋ ŋina abu Simon toduk ka eriŋa eyai nen tari nakoloŋit na.

³¹Abu Tripo kitiya emodiyana neni a edya Antiokus a ŋolo arae erwosit ka abu toar iŋes,

³²kilunyokin iŋes aruwor arwosit, tonap ebokot ka akwap ka Asia, ido abu yau ŋican ŋulu apolok nakwap.

³³Nai abu Simon toduk ŋaduketa ŋunajiet Yudaya, ido towa daadaŋ a ŋarwatatain, todukonok ŋaduketa ŋuna aoyak ka ŋarwatatain ŋuna aburok, kiwuanak ŋipukei ka ŋigolyet, ido kiŋada akimuj naduketa ŋun.

³⁴Abu daŋ Simon toseu ŋikiyakitono, kiyakiya ikes neni a Demetrius iŋita atemar kisieŋunae ŋituŋa a akwap keŋ akitac ocur, anerae ŋuna abu Tripo kitiya, arae akiŋat ŋiboro anakwap kec.

³⁵Kiyakik erwosit Demetrius Simon ŋakiro ŋuna ajokak eboŋokini akiŋiset keŋ, kigirak iŋes abaruwa ŋina egiritae ŋakiro nu:

³⁶“Ebunit abaruwa na aneni a erwosit Demetrius, neni a Simon esacaradoti ŋolo apolon nooi ka ekone a ŋirwosi ka neni a ŋikasikou a akwap a Ŋiyudayan, ekemalae ayoŋ iyes.

³⁷Aryamun isua ebokot ŋolo etiyaunitae a egolid ka ateni a ekiŋol, ŋulu ikiyakikini iyoŋ isua, ido ikitenit isua acamun ekisil ka iyes ka akigirakin ŋabaruwae neni a ŋikapolok a ŋulu ikipukator isua akimyekin iyes nyitaca ocur neni kosi.

³⁸Ŋakiro daadaŋ ŋuna aponi isua tocamunetei ka iyes eriŋa ikote neni pei ka emaikina ŋaduketa ŋunajiet ŋuna iduki iyoŋ toruworos ŋuna kus.

³⁹Ikisyoni isua iyes anadyakanareta ka aronis a ŋina ipotu iyes kitiyata akitodol nakoloŋit na, alemar daŋ ocur neni ke erwosit ŋolo emaikina iyes totaca, tosodi ŋisiliŋa daadaŋ ŋulu sek eyaununuyo alo Yerusalem aŋuna ka ocur ke edio, nyeriŋa nabo elemununuyo.

⁴⁰Ani keya lotuŋa kus ŋulu epedorete aruwor ŋasigarya ŋuna ikiyokiyete isua, emaikina kigirae ikes ka emaikina toyakaun ekisil kidiŋ yok.”

⁴¹Alokaru a ŋolo a amiat ka ŋatomonikanikaarei, tojoŋoto ŋituŋa ŋulu nyerae Ŋiyudayan akisican Ŋisirael,

⁴²togeikis ŋituŋa akigir lokitaaboi kec ka nacamununiata kec ebe, “Alokaru a ŋolo esyaunan erae Simon ŋolo apolon esacaradoti ŋolo apolon nooi ekapolon a ŋasigarya ka ekarikon a Ŋiyudayan.”

⁴³Alorwa a ŋul, tourumikis Simon ka ŋasigarya keŋ Gasara kirikaut. Kitiyau Simon iborosit ŋinibwaŋet etaun, todoku lotaun, toritaiya arwatata a etaun, ido kikama aduketait ŋina aoyan apei.

⁴⁴Toporut ŋikilyok ŋulu sek esitiyaete iborosit ŋinibwaŋet etaun, tolomasi lotaun kiguryakin ŋituŋa alotaun.

⁴⁵Toema ŋikilyok ŋulu ke etaun kaapei ka ŋaberu ta ŋidwe kec todokasi narwatata ecilicilaara ŋilowi, kiworout ecelasi nooi, iŋitasi Simon akisil ka ikes.

⁴⁶Temasi ikes, “Nyikisican isua lopite ŋolo itiyatere isua erono, nai kitiya lopite ŋolo ka akisyon kon.”

⁴⁷Aŋun, tocamunos Simon ka ikes, ido tojoŋo akitijiore ikes. Nai abu Simon kirita ŋituŋa ŋul alotaun, ido kitaleu ŋakais ŋuna ewuakinitae ŋakujo, tolomasi nai Simon ka ŋirukitos keŋ lotaun eosi ka ipurosi Akuj.

⁴⁸Tolema Simon ibore daadaŋ ŋini asiilyana alotaun a ŋol, ido kiwuak nen ŋituŋa ŋulu ewuapito ŋikisila ŋulu ka Akuj. Abu daŋ Simon kitogogoŋ ŋaduketa a etaun a ŋol ŋunajiet, ido todukok nen akai aŋuna keŋ.

⁴⁹Pa acamakinitae ŋituŋa ŋulu aya Yerusalem,ŋulu aya naduketait ŋinajiet alomar a nen akigyel, kori agyelanar idiobore anakwap a ŋin, aŋun abu akoro tonyam ikes ka apotu ŋulu alalak alokidiŋ kec totwaka aŋuna ka akoro.

⁵⁰Apotu nai ikes kigworokis Simon akisil ka ikes, ido abu Simon tocamu ŋakiro kec. Nai abu kirita ikes a nen, ido kitaleu aduketait anaronis a daadaŋ a ŋina etiyatae a nen.

⁵¹Ŋirwa ke elap ŋatomoniarei ka ŋiuni elap ŋolo a ŋiarei ekaru amiat ka ŋatomonikanikaarei ka epei, tolomasi Ŋiyudayan naduketait ŋin ipurosi ka etiŋito ŋaten a ŋaŋolya, toramete ŋaduŋgui, ŋitworoi ka ŋiboro ŋulu a ŋaunoi ka toeos, anerae aponi kilounae emoit ŋolo aronon nooi ka kiritarae alo Isirael.

⁵²Totub Simon atemar a ŋolokaru emaikina ikes kinumunuma akoloŋit ŋin ka alelyanu. Kitogogoŋ Simon ŋarwatatain ŋuna ke emukura a ŋolo ka Akai ka Akuj kaapei ka ŋuna a aduketait a ŋinajiet, ido apotu iŋes ka ŋirukitos keŋ kiboiyoto a nen.

⁵³Kiŋolik Simon atemar apolou lokoku keŋ Yoana aruwor ekile, aŋun, abu kituruwo iŋes ekarikon a ŋasigarya a daadaŋ ka eboi iŋes alo Gasara.