Read ngakarimojong 1 Ŋimak. 14 Bible Online

1 Ŋimak. 14 - ngakarimojong bible

1 Ŋimak. 14

¹Alokaru a ŋolo a amiat ka ŋatomonikanikaarei ka ŋiarei, abu erwosit Demetrius tocunak ŋasigarya keŋ, ido tolot Media aryamun akiŋarakino, ikotere epedori akitijiore Tripo.

²Ani iirari erwosit Arisaces ŋolo a Perisia ka Media atemar kelomu erwosit Demetrius nakwap keŋ, kiyakiya ekarikon a ŋasigarya keŋ epei ayaun iŋes neni keŋ eyari.

³Abu ekarikon a ŋasigarya ŋol tolot, kilou ŋasigarya a Demetrius, kikam iŋes ya neni ka Arisaces a ŋolo abu kiwuak ŋasigarya akiyok Demetrius.

⁴Abu akwap kieŋu ŋirwa daadaŋ ŋulu ayarya Simon, ewarit iŋes ajokis a akwap keŋ, alakara daadaŋ aŋuna a apukan keŋ ikwapei etoodiunitotor ŋituŋa itopoloorito iŋes ŋirwa daadaŋ ŋulu ayarya iŋes.

⁵Aŋuna ka akitoodiun apolou keŋ, abu kituruwo Yopa ŋolo eyai diyete anam etaun, ido toŋaa ŋirotin ŋulu elosere loculeta a anam.

⁶Abu kiyatak akwap keŋ kipuka akwap daadaŋ.

⁷Abu kinyaku ŋituŋa ŋulu alalak ŋulu arae ŋirikon, kipuka Gasara ka Bes-sur ta aduketait ŋinajiet. ka abu kitaleu aduketait ŋin, mam ituŋanan abu topegak iŋes.

⁸Apotu ikes kitata ŋimanikorin kec a ekisil; abu akwap kitolomu akimuj ŋina alalan ka toraa ŋikito anadipoe a ŋikamukumukui.

⁹Kiboiyonokin ŋikasikou lotemwan ŋulu aya lorotin, erworosi daadaŋ kaapei ŋakiro ŋuna ajokak, ido anapito ŋisorok ŋilowi ŋulu ebusak ŋulu a ŋasigarya.

¹⁰Abu Simon tokoranak akimuj lotaunio, kiwuanak lotaunio ŋiboro ŋulu eiunotor ŋituŋa tari ŋina adolyo arwonu keŋ nakisaleta a akwap.

¹¹Abu yau ekisil nakwap tolelyana Ŋisirael a alelyanu a ŋina apolon.

¹²Apotu ŋituŋa daadaŋ kiboiyonokin lotolimon a ŋikito kec a ŋulu ke epiini ka a ŋiboboryo ka amam ŋini etukuryani ikes.

¹³Mam erwosit ece abu kidoŋ nakwap akitijiore Ŋiyudayan. aponi kilounae ŋirwosi alorwa a ŋul.

¹⁴Abu Simon kiŋarak ŋituŋa daadaŋ alotuŋa keŋ ŋulu ajamuwaritae; ewarit iŋes akiwuapit ŋikisila ka abu tomunya ŋikesyaak ka ŋulu aŋerito ŋikisila.

¹⁵Abu kisibus akibois ŋina asegan ka kiyatak ŋiboro ŋulu esitiyao anakibois a ŋina asegan.

¹⁶Ani edolete ŋakiro ŋuna ka atwanare a Yonasan Roma ka Suparita apotu ŋituŋa ŋul kiyaloloŋo nooi.

¹⁷Nai ani iirarete ŋituŋa ŋul atemar elunyokin Simon lokaato keŋ aruwor esacaradoti ŋolo apolon nooi ka atemar ipukat iŋes akwap ka ŋitaunio a akwap kec,

¹⁸apotu ikes kigira nasuwa ŋuna arae eburonis ŋakiro ŋuna ka acamunet akikiteteun akoneo ŋina sek aponiata ikes tocamunotor ka ŋikaitotoi a Simon Yudas ka Yonasan, ido kiyakiyasi ŋasuwa ŋun neni a Simon.

¹⁹Aponi tosyomakinae ŋakiro ŋun neni ka atukot a ŋituŋa alo Yerusalem.

²⁰Erae nu ŋakiro ŋuna egiritae nabaruwa ŋina egirete Ŋisiparitan: “Ebunit abaruwa na aneni a Ŋisiparitan ka ŋikepukak kec, igiritae neni a Simon a esacaradoti a ŋolo apolon nooi, neni a ŋisacaradotin a Ŋiyudayan ka neni a Ŋiyudayan a daadaŋ a ŋulu erae ŋikaitotoi kosi, ikimalae isua iyes.

²¹Apotu ŋituŋa ŋulu iyakuunito iyes neni kosi ikilimokis isua epite ŋolo ikitopolooritere iyoŋ ka epite ŋolo irworia iyoŋ. Aponi isua tolelyanae aŋuna ka apeyo kec,

²²ido adaun akigir ŋakiro ŋuna erworosi ikes lokitaaboi ŋulu igiritae ŋakiro aŋuna a ŋituŋa a daadaŋ. Ŋakiro ŋun ikes nu. ‘Apotu Nominius lokoku ka Antiokus ka Antipater lokoku a Yason, ŋikilyok ŋulu arae ŋikiyakia a Ŋiyudayan, potu neni kosi akikiteteun acamunet ŋina ka akoneo ka isua.

²³Elakara ŋituŋa kosi akijaun ŋituŋa ŋul a akitopoloorit a daadaŋ ka akiwuakin ŋakiro aŋuna a ŋituŋa a daadaŋ, ikotere eyakatar ŋituŋa a Siparita ŋakiro ŋun igiritae. Egirakin daŋ ŋakiro ŋun neni a Simon a esacaradoti a ŋolo apolon nooi.’ ”

²⁴Ekaku a ŋun kiyakiya Simon Numenius Roma, ya aupal ŋina apolon ŋina etiyaunitae a egolid ŋina arae apotis keŋ ŋakiloi ŋamiae ŋakan, arae ŋin aŋuna ka akitogogoŋio ariit keŋ ka Ŋiromanin alojie.

²⁵Ani iirarete ŋituŋa ŋakiro ŋun, temasi, “Alipite ikitoodiunia iwon alakara yok neni a Simon ka ŋidwe keŋ ŋulusapa?

²⁶Anerae arubakis iŋes ka ŋikaitotoi keŋ ka ŋituŋa a ekal a papa keŋ ejiete ka agogoŋu, ajioto ikes ka abwaŋa ŋimoe a Ŋisirael, ido etogogoŋ akipuka kec make.”

²⁷Aŋun, egira ikes ŋakiro ŋun nasuwa ŋuna a eburonis, ewuakis lopirin ŋulu alo moru Sion. Erae nu ŋakiro ŋuna apotu ikes kigirakis loburonis ŋol, “Ŋirwa ke elap ŋitomon ka ŋikanikauni elap ŋolo ka Elul alokaru a ŋolo a amiat ka ŋatomonikanikaarei ka ŋiarei, iŋes ekaru ŋolo a ŋiuni erae Simon esacaradoti ŋolo apolon nooi,

²⁸aponi ikiserakin isua ŋakiro nu alo Asaramel anatukot a ŋina apolon a ŋina a ŋisacaradotin ka ŋituŋa, ŋikepukak a akwap ta ŋikasikou a akwap;

²⁹“Ikwapei alalaketa ŋijiesyo anakwap, apotu Simon lokoku a Matasias a ŋolo arae esacaradoti a ŋidwe a Yoarib ka ŋikaitotoi keŋ tocamut akijal akiyar kec, ido kitijioto ŋimoe a akwap kec, ikotere eiuniata akibois kec ŋina asegan ka ŋikisila kec, ido apotu yaut akibuses ŋina apolon nakwap kec.

³⁰Abu Yonasan tocunak ŋituŋa a akwap keŋ, toruwor esacaradoti kec ŋolo apolon nooi ka aponi tonukae neni anukitae atapapaa keŋ.

³¹Ani apaki ŋina acamitotor ŋimoe kec akirem akwap kec, kikamasi akibois ŋina asegan,

³²abu Simon toji aŋuna a akwap keŋ. Abu kisitiya ŋisiliŋa keŋ a elope ŋulu alalak, abu inak ŋasigarya a akwap keŋ ŋiboro ŋulujiet ka totac ikes.

³³Abu toduk ŋaduketa ŋunajiet Yudaya, Bes-sur etaun ŋolo ayai lokukor a Yudaya, neni sek eŋadatae ŋiboro a ŋimoe ŋulujiet, ido kiwuak nen ŋasigarya a Ŋiyudayan.

³⁴Abu daŋ Simon toduk ŋaduketa ŋunajiet Yopa, etaun ŋolo eyai diyete anam, toduk ŋaduketa ŋunajiet Gasara daŋ etaun ŋolo eyai lokukor ka Asotus neni sek eboiyoto ŋimoe. Kiwuak iŋes Ŋiyudayan lotaun ŋol ka inanak ŋituŋa ŋulu aya lotaunio ŋul akimuj daadaŋ ŋina eitanito ikes ayarya.

³⁵“Apotu ŋituŋa kiŋolikis akikinyoma a Simon ka apolou ŋina abu iŋes kimukek aryamun aŋuna a akwap keŋ, ido apotu ŋituŋa kituruwosi iŋes ekarikon kec ka esacaradoti ŋolo apolon nooi, anerae abu iŋes kitiya ŋakiro ŋun daadaŋ ka aŋuna etiyaa iŋes ŋuna eyookino ka aŋuna araakar iŋes ŋolo ewuapit ŋakiro, ŋipitesyo ŋulu abu iŋes torubak itiyae anakwap a ŋituŋa keŋ. Abu iŋes kiwar ŋirotin daadaŋ ŋulu kitopolooret ŋituŋa keŋ.

³⁶Alorwa keŋ etiyasi ŋakiro ejok, aŋun, aponi kiritarae ŋituŋa ŋulu pa arae Ŋiyudayan anakwap keŋ, kiritarae tari ŋulu aya lotaun a Daudi alo Yerusalem, ŋituŋa ŋulu apotu toduko aŋuna kec aduketait ŋinajiet neni alomuniata ikes akinyas ŋakiboisyo ŋuna aya diyete akibois ŋina asegan, tomunaasi nooi asegis a akibois a ŋina asegan.

³⁷Kiwuak Simon Ŋiyudayan naduketait ŋin ka towua a arwatata, ikotere emam ituŋanan ewani ŋituŋa a akwap keŋ ka emunaari etaun. Abu daŋ iŋes todukok ŋarwatatain a Yerusalem tooyaketa nooi.

³⁸“Aŋakiro a ŋun, abu erwosit Demetrius kitogogoŋ iŋes arakau esacaradoti ŋolo apolon nooi,

³⁹kituruwo iŋes epei a ŋikonei keŋ ka kitopoloo iŋes nooi,

⁴⁰anerae kebu iŋes kiira atemar anyarito Ŋiyudayan Ŋiromanin ŋikonei kec, ŋulu eriito ka ikes ka atemar kepotu Ŋiromanin kijaut ŋikiyakitono a Simon itopoloorito.

⁴¹“Kebu daŋ iŋes kiira atemar acamut Ŋiyudayan ka ŋisacaradotin kec atemar toruwor Simon ekarikon kec ka esacaradoti ŋolo apolon nooi ŋikaru ka ŋikaru akitodol ŋina etakanunia ekadwaran ŋolo ikinyoma

⁴²ka atemar toruwor iŋes ekepukan kec ka emaikina iŋes topolok akibois ŋina asegan ka toseu ŋikapolokinitok ŋiticisyo ŋulu itiyao a nen, topolok daŋ ŋiboro ŋulujiet ka ŋaduketa ŋunajiet ka emaikina iŋes topolok akibois ŋina asegan

⁴³ka emaikina ŋituŋa daadaŋ kiwuapa ŋakiro keŋ ka emaikina ŋisacaradotin daadaŋ kigirae alokiro keŋ ka kitanapikinae iŋes elou ŋolo kipurat-aregan ka tonap arokoba ŋina itiyaunitae a egolid.

⁴⁴“Mam ituŋanan idio kori ŋisacaradotin, ŋini ecamakinitae akiŋer ŋakiro ŋuna atubun ŋun, kori apegakin ŋakiro ŋuna elimuni Simon, kori acunakin atukot a ŋituŋa anakwap pa ecamakinit iŋes, kori acamakin ituŋanan akinap elou ŋolo kipurat-aregan, kori akinap arokoba ŋina itiyaunitae a egolid.

⁴⁵Ituŋanan daadaŋ ŋini nyiwuapit ŋakiro ŋun, kori eŋeri ŋakiro ŋun ŋadi emaikina kisicanae.”

⁴⁶Apotu ŋituŋa daadaŋ tocamut ainakin Simon apedor ŋinakitijiet iwuapit ŋakiro ŋuna atubun ŋun.

⁴⁷Aŋun, abu Simon tocamu aruwor esacaradotin ŋolo apolon nooi ka aruwor ekarikon ka ekepukan a Ŋiyudayan ka ŋisacaradotin ka aruwor ekaiunan kec a daadaŋ.

⁴⁸Apotu daŋ tolimut atemar kigirae ŋikisila ŋul nasuwat ŋinadapal ŋina erae eburonis, kiwuakinae nakibois ŋina epedoryata ŋituŋa daadaŋ akiŋolikin anagulei a ŋuna ka akibois a ŋina asegan,

⁴⁹ka kiwuakinae ŋikitaaboi ŋulu igiritae ŋakiro ŋun ŋice kai ŋina iŋadao ŋisiliŋa, ikotere Simon ka ŋidwe keŋ ŋulusapa eyakatar ikes.