Read ngakarimojong 1 Ŋimak. 16 Bible Online

1 Ŋimak. 16 - ngakarimojong bible

1 Ŋimak. 16

¹Tolot Yoana alo Gasara alimokin papa keŋ Simon ŋakiro ŋuna kebu Cenedebeus kitiya.

²Tonyara nai Simon ŋidwe keŋ ŋulusapa ŋuluarei ŋulu apolok Yudas ka Yoana, tolimok ikes tema, “Aji ayoŋ ka ŋikaitotoi kaŋ ka ŋituŋa a ekal apapa kaŋ ŋijiesyo aŋuna a Ŋisirael ameun anasoroko kosi tari nakoloŋit na ka apotu ŋakiro toloto ejok aneni kosi, ido aponi isua toiunae Ŋisirael ŋarwa ŋuna alalak.

³Nai amojoŋ tokona ayoŋ ka ikilakara neni ka Akuj, anerae ipolout tokona iyes, kilunyokinos lorot kaŋ ka lorot a ŋikaitotoi kaŋ, toloto tojioto aŋuna ka akwap yok, elipi ikiŋarak iyes Akuj ŋina alokidiama.”

⁴Aŋun, toseu Yoana anakwap kec ŋikajiok ŋalipyo ŋatomoniarei ka ŋulu ameto ŋaŋolei, toloto akitijiore Cenedebeus, apotu ikes kiboiyosi akuwar ŋin Modein.

⁵Taparacu sek iwalari akwap, toloto nadipo a ŋikamukumukui, neni aponito ŋasigarya ŋuna alalak ŋuna alosete a ŋakejen ka ŋuna ameto ŋaŋolei akisiryamia ikes, ido ayai ayonae kidiŋ kec.

⁶Kicodosi nai Yoana ka ŋasigarya keŋ akitikijin ŋimoe. Kiŋolik Yoana atemar ekerito ŋasigarya keŋ akidok ayonae, aŋun kisyau iŋes adokar ekekwaye ayonae, ani iŋolikinete ŋasigarya edokari iŋes, todokasi ikes daŋ ekekwaye ayonae totupakis iŋes.

⁷Totyakatyaka Yoana ŋasigarya keŋ, kiwuak ŋasigarya ŋuna ameto ŋaŋolei kidiŋ ŋuna alosete a ŋakejen, anerae alalak nooi ŋasigarya a ŋimoe ŋuna ameto ŋaŋolei.

⁸Tokutakis ikes ŋarupepe, tosodi tobwaŋas Cenedebeus ka ŋasigarya keŋ, kibusonokin ŋulu alalak ewanan, toema ŋuluce naduketait ŋinajiet.

⁹Apaki ŋin keponi towanae Yudas lokaato keŋ a Yoana, nai abu Yoana kiwuap ŋimoe tari ŋina adolio Cenedebeus Kediron etaun ŋolo sek adukit iŋes.

¹⁰Toema ŋimoe ŋice lopemwon ŋulu aya lomanikorin ka Asotus, abu Yoana kicunya ŋipemwon ŋul, toarae ŋasigarya a ŋimoe ŋuna aapikinito ŋalipyo ŋaarei. Toboŋo nai Yoana Yudaya emam ŋace.

¹¹Apaki ŋin, keris keseun Pitolemi lokoku ka Abubus aruwor ekepukan a akwap a ŋina ka adipo a Yeriko, eŋadat iŋes esilipa ka egolid ŋolo alalan nooi,

¹²anerae arae iŋes ekamuran a esacaradoti a ŋolo apolon nooi.

¹³Abu iŋes kiturokin nooi, tocamu akikamar akwap, toyeu amodikin Simon ka ŋidwe keŋ ŋulusapa ka akiar ikes.

¹⁴Apaki ŋin epeyonokini Simon ŋitaunio, einanakini ikes ŋiboro ŋulu eitanito, ido tolot Yeriko kaapei ka ŋidwe keŋ ŋulusapa Metasias ka Yudas alokaru a ŋolo a amiat ka ŋatomonikanikaarei ka ŋikanikaarei, elap ŋolo a ŋitomon ka epei, ŋolo enyaritae Sebat.

¹⁵Kijau lokoku ka Abubus ikes emodiunit naduketait ŋina edit ŋinajiet ŋina enyaritae Dok, aduketait ŋina keris iŋes kedukoki. Kitemok ŋasuban ŋuna apolok aŋuna kec ka kiwua ŋikilyok a nen.

¹⁶Ani emerakin Simon ka ŋidwe keŋ ŋulusapa, tonyout Pitolemi ka ŋikilyok ŋulu arukitotor iŋes, tolemut ŋiboro kec ŋulujiet, kionyakis neni a Simon ka ŋidwe keŋ ŋulusapa ŋuluarei toarae ikes kaapei ka ŋiketiyak a Simon ŋice.

¹⁷Aŋun, abu Pitolemi kitiya ŋakiro ŋuna aronok ŋuna ka amodiyo, kitiya iŋes ŋuna aronok torae bo sek etiyatae neni keŋ ŋuna ajokak.

¹⁸Kigir nai Pitolemi ŋakiro ŋun, kiyakiya neni a erwosit, kiŋit Pitolemi erwosit akiyakikin iŋes ŋasigarya ŋuna iŋarakinete iŋes ka abu iŋes kiŋit erwosit ainakin iŋes ŋitaunio kaapei ka akwap a Yudaya.

¹⁹Kiyakiya iŋes ŋasigarya ŋace Gasara akiar Yoana, kiyakiya daŋ ŋabaruwae neni a ŋikarikok a ŋajorei alimokin ikes aponare neni keŋ ikotere iŋes einakini ikes esilipa ka egolid ka ŋainakineta,

²⁰ido kiyakiya ŋasigarya ŋace akikamar Yerusalem ka ekamukumukut ŋolo a Akai ka Akuj.

²¹Nai abu ituŋanan toem Gasara tolimok Yoana atemar aari papa keŋ ka ŋikaitotoi keŋ ka alimokin iŋes ebe, “Eyaku Pitolemi ŋikilyok akiar iyoŋ daŋ.”

²²Ani iirari Yoana ŋakiro ŋun, abu tobul nooi, kikamu ŋikilyok ŋulu eyakuunitae akiar iŋes, ido abu toar ikes, anerae abu iŋes toyenu atemar acamito ikes akiar iŋes.

²³Ŋiticisyo a Yoana ŋuluce daadaŋ ka ŋijiesyo keŋ ka ŋiticisyo ŋulu ka atitinyu ŋulu abu iŋes kitiya, akiduk ŋarwatatain ŋuna abu iŋes kirikanak ka ŋakiro ŋuna abu iŋes kitiya ejok,

²⁴igiritae lokitaabo ŋolo a ŋakiro a esacaradotonu keŋ ameun anapaki a ŋina aruworor iŋes esacaradoti ŋolo apolon nooi ekaku a papa keŋ.