Read ngakarimojong 1 Ŋimak. 2 Bible Online

1 Ŋimak. 2 - ngakarimojong bible

1 Ŋimak. 2

¹Alorwa a ŋul, abu Matasias lokoku a Yoana a ŋolo arae lokoku a Simeon, a ŋolo arae esacaradoti alokal a Yoarib, towotok alo Yerusalem tolom Modein.

²Ayakar Matasias ŋidwe ŋulusapa ŋikan lu: Yoana ŋolo alimokinitae ekiro Gadi,

³Simeon ŋolo anyaritae Sasi,

⁴Yudas ŋolo anyaritae Makabeus,

⁵Eleasar ŋolo anyaritae Aparan ka Yonasan ŋolo anyaritae Apus.

⁶Abu iŋes kiŋolik epite ŋolo eyanyere Akuj alo Yerusalem ka alo Yudaya, ido tema,

⁷“Okoe! Kaanukiro kekedounere ayoŋ eŋolik ŋakiro nu: Akinyasuno a ŋituŋa kaŋ, akinyasuno a etaun a ŋolo asegan ka akiboi a ne apaki ŋina epotokinere etaun lo napedor a ŋimoe, apaki ŋina epotokinere akibois ŋina asegan napedor a ŋituŋa a ŋulugelae?

⁸Ekwaanikin Akai ka Akuj ŋina alo Yerusalem ka ituŋanan ŋini emam apolou;

⁹ayaar ŋiboro ŋulu asegak ŋulu isitiyao alotooma keŋ nakwap ace. Aari ŋidwe keŋ ŋulucicik alorotin a etaun, aari ŋisorok keŋ a ekileŋ a ŋimoe.

¹⁰Anikwap nyituruworo ŋakais a ŋirwosi a Yerusalem ŋuna kec ka nyeŋatara ŋiboro keŋ?

¹¹Ayaar ŋiboro daadaŋ ŋulu esibusitere iŋes; nyeriŋa ŋituŋa keŋ itiyaete ŋuna ecamito, aruworosi ŋipi ka ŋapi.

¹²Topupok, aruwor akibois kosi ŋina asegan, ŋina ebusan ka ŋina etopolooritae isua acaryoit. enyasa ŋituŋa ŋulu nyerae Ŋiyudayan iŋes.

¹³Kaanukiro eriŋa isua eyarere?”

¹⁴Apotu nai Matasias ka ŋidwe keŋ ŋulusapa tocila ŋilowi kec tonapa ŋiguniyae ka kigworo nooi.

¹⁵Apaki ŋin, apotu ŋikapolok ŋulu eŋarakinito erwosit akipuka, ŋulu etiŋakinito ŋituŋa akiŋer Akuj potu Modein akitiŋakin ŋituŋa a nen ainakin ŋamuronisya.

¹⁶Apotu Ŋisirael ŋulu alalak potu neni kec, ido apotu Matasias ka ŋidwe keŋ ŋulusapa tocunakinos.

¹⁷Apotu nai ŋikapolok ŋul kirworo neni a Matasias temasi, “Irae iyoŋ ekarikon ŋolo ikitopolooritae ka ipol nooi alotaun a lo ka eriito ŋidwe kon ŋulusapa ka ŋikaitotoi kon ka iyoŋ.

¹⁸Kisyak abunore kitiya ŋuna elimunit erwosit lopite ŋolo etiyaata ŋituŋa ŋulu daadaŋ nyerae Ŋiyudayan ka ŋituŋa a Yudaya ka ŋulu idoŋito Yerusalem; iruworosi nai iyoŋ ka ŋidwe kon ŋulusapa ŋikonei a erwosit, ido ikitopolooryo iyoŋ ka ŋidwe kon ŋulusapa, ikiinakinio esilipa, egolid ka ŋainakineta ŋuna alalak.”

¹⁹Tolimok nai Matasias ikes ecela nooi tema, “Tari kiwuapito ŋituŋa daadaŋ ŋulu iboiyete anakwap a ŋina ipukat erwosit ŋakiro a erwosit ka keseunito akiwuap ŋuna elimunit iŋes, kimyekinito ikes daadaŋ edin atapapaa kec,

²⁰ikirubakini ayoŋ ka ŋidwe kaŋ ŋulusapa ta ŋikaitotoi kaŋ ikiyari ikiwuapit acamunet atapapaa kosi.

²¹Nyikiryama ca isua ka akimyekin ŋikisila ka ŋakiro ŋuna etubunitoe.

²²Nyikiwuapi isua ŋakiro a erwosit anakiŋer edin kosi, nyikitiyae ŋadi ŋuna nyiyookino.”

²³Kedau Matasias akirwor ŋakiro ŋun, abu Eyudayat ece, bu kiŋaren ŋituŋa daadaŋ ainakin amuronot anamuroet alo Modein lopite ŋolo alimunitor erwosit.

²⁴Ani iŋolikini Matasias ŋakiro ŋun, toŋoo nooi ka tonyunyurikin alotau keŋ toŋoo ka aŋoit a ŋina eyookino, tosodi toem toar ekile ŋol anamuroet.

²⁵Apaki ŋinapei ŋin, toar ekapolon ŋolo etiŋakinit ikes ainakin amuronot ka abu toritak namuroet.

²⁶Aŋoit nooi Matasias apaki ŋin aŋuna aŋeritere akiwuap ŋikisila, abu iŋes kitiya lopite ŋolo abunio Pineas kitiya neni a Simiri alokoku a Salu.

²⁷Abu nai Matasias kiworou nooi alotaun ebala, “Ituŋanan daadaŋ ŋini einakina nakiwuapit ŋikisila ka ŋini emina acamunet, emaikina bu orukosi ka ayoŋ!”

²⁸Apotu nai iŋes ka ŋidwe keŋ ŋulusapa toema lokamukumukui, kimyekis ŋiboro daadaŋ ŋulu ayakatar ikes alotaun.

²⁹Apaki ŋin, apotu daadaŋ ŋulu ewarito akiyookino ka akitub ŋakiro anakiyookino toloto akiboi naloŋisat.

³⁰Apotu ikes toloto ka ŋidwe kec ŋulusapa, ŋaberu kec ka ŋibaren kec, anerae apotu ŋican todolokis ikes nooi.

³¹Keponi tolimokinae ŋikapolok ŋulu epukatotor erwosit ka ŋasigarya ŋuna eboiyete alo Yerusalem alotaun a Daudi atemar atiyaar ŋulu aŋerito ŋakiro a erwosit naloŋisat nakiboisyo ŋunaŋopet.

³²Apotu ŋituŋa ŋulu alalak toloto akiwuapakin ikes, toditasi; kiboiyosi neni eteosi ka ikes ka kitemokinos aŋuna ka akitijikin ikes akoloŋit ŋina a Sabato.

³³Tolimokis ŋituŋa ŋul ŋirukitos a Matasias temasi, “Etemokin ŋakiro ŋun, tolomutu potu kitiyata ŋuna elimunit erwosit, ido iyarete iyes.”

³⁴Nai apotu Matasias ka ŋirukitos keŋ temasi, “Nyikilomuni isua, kori nyitiyao isua ŋuna elimunit erwosit, ido tojamuwarae akoloŋit ŋina a Sabato.”

³⁵Apotu nai ŋimoe kitijikis ŋituŋa ŋul atipei.

³⁶Nai nyitijikino ŋirukitos a Matasias ikes, nyimasa ikes ŋimoe kec a ŋamoru, kori nyegolo ikes neni elomarere naturukanin ŋuna ayakasi ikes,

³⁷anerae apotu ikes temasi, “Otwaka iwon daadaŋ emam aronis itiyatae, elimorete nakuj ka akwap atemar ikiarete iyes isua emam aronis ŋina itiyatae.”

³⁸Aŋun, apotu ŋimoe a Ŋiyudayan kitijikis Ŋiyudayan akoloŋit ŋina a Sabato, apotu Ŋiyudayan totwaka kaapei ka ŋaberu kec, ŋidwe kec ta ŋibaren kec, adolit ekimar a ŋituŋa a ŋulu apotu totwaka aliput.

³⁹Ani eyenunete Matasias ka ŋikonei keŋ ŋakiro ŋun, apotu kigworo nooi aŋuna a Ŋiyudayan a ŋulu aponi toarae.

⁴⁰Tolimokis daadaŋ ŋikidunyet kec ebe, “Ani kitiyae iwon daadaŋ lopite ŋolo etiyaata ŋiyeneta yok, ŋolo awouniata akitijikin ŋituŋa ŋulu nyerae Ŋiyudayan aŋuna a akiyar yok ka aŋuna a ŋikisila yok, ikimunyarete ikes iwon atipei anakwap.”

⁴¹Aŋun, akoloŋit ŋin apotu ikes toseut akitiya ŋakiro nu temasi, “Etijikisi ituŋanan daadaŋ ŋini ebuni akitijiore iwon akoloŋit ŋina a Sabato, nyemaikina iwon daadaŋ otwaka lopite ŋolo atwakyata ŋiyeneta yok aneni a ŋopitotor.”

⁴²Apotu ŋirukitos a Matasias kimorikinos ka Ŋiasidean, arae ikes ŋikajiok ŋulu etirok alo Isirael ŋulu ainakina, daadaŋ aŋuna a ŋikisila.

⁴³Apotu daŋ daadaŋ ŋulu apotu toruwor ŋikerimitok anariet aŋuna a ŋican kec kimorikinos ka ikes ka kitogogoŋo ikes.

⁴⁴Apotu ikes daadaŋ kitemokis asigar ka toara ŋikasecak anaŋoit kec ka ŋikesyaak ananyunyura. Apotu ŋulu apiyanun toema neni a ŋituŋa a ŋulu nyerae Ŋiyudayan aŋuna ka aiuno.

⁴⁵Toloto Matasias ka ŋirukitos keŋ nakwap ŋin daadaŋ toritaanasi ŋamuroeta

⁴⁶kitiŋakis akileŋer ŋidyain daadaŋ ŋulu pa eleŋeritae ŋulu aryamunete ikes anakiboisyo a ŋuna aya diyete neni eboiyoto Ŋisirael.

⁴⁷Kiwara ikes ŋiketurok ka abu etic kec tolot emam ŋace.

⁴⁸Apotu ikes kinyakut ŋikisila anapedor a ŋituŋa a ŋulu pa arae Ŋiyudayan ka aneni a ŋirwosi, nyimyekina ikes ekasecan ilouni ikes.

⁴⁹Apaki ŋin toapu apaki ŋina etwania Matasias, tolimok iŋes ŋidwe keŋ ŋulusapa tema, “Agogoŋioto tokona akituro ka ajamuwaro, erae tokona na apaki ŋina ka amunyaro ka aŋoit ŋina ka aryenyeo.

⁵⁰Ŋidwe kaŋ, tokona kitoodiutu ainakina kus alotooma ŋakiciketa ka tojala akiyar kus aŋuna ka acamunet atapapaa kus.

⁵¹“Totamunito ŋiticisyo atapapaa ŋulu etiyaete ikes ananyameta kec, ido iryamunete iyes akitopolooro ŋina apolon ka ekiro ŋolo erubakini ŋikaru ka ŋikaru.

⁵²Pa mono aponi toryamunae atemar arae Aburaam ituŋanan ŋini eyookino apaki ŋina ekatakinere iŋes ka apotu ŋun kituruwosi iŋes ŋolo eyookino a?

⁵³Apaki ŋina ayakar Yosepu locan, abu kiwuap ŋakiciketa, ido abu toruwor ekapolon alo Ijipit.

⁵⁴Abu papaa yok Pineas toryamu acamunet ŋina ka asacaradotonu ŋina a ŋikaru ka ŋikaru, anerae arae iŋes ituŋanan ŋini ainakina.

⁵⁵Aŋuna abunio Yosua kisiyook ŋuna alimokinio iŋes, abu toruwor ekatubon ŋakiro alo Isirael.

⁵⁶Aŋuna abunio Kaleb tolimu ŋakiro alokiŋaren atukot, abu toryamu akwap ŋina abu toruwor ŋina keŋ.

⁵⁷Aŋuna araakar Daudi ituŋanan ŋini esyonon, abu toruwor erwosit ŋikaru ka ŋikaru.

⁵⁸Aŋuna araakar Eliya ituŋanan ŋini ainakina akiwuap ŋikisila, aponi todakarae iŋes nakuj.

⁵⁹Apotu Anania, Asaria ka Misael tonupa, ido aponi toiunae ikes anarira.

⁶⁰Aŋuna pa etiyator Daniel aronis, aponi toiunae iŋes nyenyama ŋiŋatunyo.

⁶¹“Aŋun, toyenete atemar ananyameta a daadaŋ emam ipei daŋ a ŋulu ikinyomito Akuj ŋini icanakin agogoŋu.

⁶²Nyikuryaka aŋuna a ŋakiro a ŋikasecak, anerae ilocokin akibuses kec eruwor aoret ka ŋikur

⁶³itopolooryo ikes nakoloŋit na, nai taparacu keŋ, nyeryamunio ikes, anerae aruwor ikes apuwa ka edaunosi ŋakiro ŋuna eyeete ikes.

⁶⁴Ŋidwe kaŋ, tomukyaketa ka togogoŋioto anakiwuapit ŋikisila, anerae kitiyata iyes ŋun ikitopolooryo.

⁶⁵“Lokaato kus Simeon lo, ŋolo ayeni ayoŋ atemar eos anakisirworiunun, topupete ŋakiro keŋ jwi jwi, eruwor iŋes papa kus.

⁶⁶Ŋinapei anasoroko kaŋ, arae Yuda Makabeus ekajion ŋolo adedeŋan, iŋes eriki ŋasigarya aŋuna kus ka itiji ŋituŋa.

⁶⁷Ipote iyes daadaŋ neni keŋ, iyes ŋulu iwuapito ŋikisila, ido kinyaŋasi aronis ŋina itiyatae lotuŋa kus.

⁶⁸Totacakisi ŋituŋa ŋulu nyerae Ŋiyudayan ŋuna itemokino toryamut ka kiwuapa ŋakiciketa ŋuna elimunitoe alokisila.”

⁶⁹Abu nai Matasias kiterereŋ ŋidwe keŋ, ido totwana, tonukae neni anukitae atapapaa keŋ.

⁷⁰Atwani Matasias alokaru a ŋolo arae amiat ka ŋatomoniomwon ka ŋikanikapei ka aponi tonukae iŋes neni anukitae atapapaa keŋ alo Modein. Apotu Ŋisirael daadaŋ kigworo aŋuna keŋ iwololoete nooi.