Read ngakarimojong 1 Ŋimak. 3 Bible Online

1 Ŋimak. 3 - ngakarimojong bible

1 Ŋimak. 3

¹Abu nai Yudas lokoku a Matasias ŋolo anyaritae Makabeus kilunyokin lokicoloŋ kipuka.

²Apotu ŋikaitotoi keŋ daadaŋ ka daadaŋ ŋulu apotu toriwo ka papa keŋ kiŋarakis iŋes, tojioto ka alakara aŋuna a Ŋisirael.

³Abu Yudas kituru nooi apolou a ŋituŋa keŋ. Abu tonap ŋiboro keŋ ŋulujiet anatorobu esibit ekajion ŋolo aburon nooi, tonap ŋiboro keŋ ŋulu ke ejie kisyak akitijiore ŋimoe; toiu iŋes ŋituŋa a alomar keŋ a ekileŋ.

⁴Etiyae iŋes ŋiticisyo ka agogoŋu esibit eŋatuny, esibit itaok a eŋatuny ŋini irurumae aŋuna a ityaŋ a ŋini ikamunit akinyam.

⁵Abu iŋes kiwar ka kiwuap ŋulu abilibiliyete ŋikisila; abu kicunya ŋulu esicanito ŋituŋa keŋ.

⁶Apotu ŋulu pa abilibiliyete ŋikisila tosiliyosi aŋuna keŋ tobul daadaŋ ŋulu etiyaete aronis ka abu alakuno torubak elosi kiŋaren aneni a ŋituŋa keŋ.

⁷Abu iŋes tobenyu ŋirwosi ŋulu alalak, nai abu kitalaka ŋiletok a Yakob a ŋiticisyo keŋ. ido iterereŋitoe atamunit iŋes ŋikaru ka ŋikaru.

⁸Abu iŋes tolot lotaunio a Yudaya, abu tomunya ŋulu pa anupito Akuj anakwap, aŋun, tolema anyunyura ka Akuj aneni a Ŋisirael.

⁹Arae iŋes ŋolo ayenen tari anakisaleta a akwap, abu iŋes tocun ŋulu aapi amunyar.

¹⁰Abu Apolonius tocunak ŋituŋa ŋulu pa arae Ŋiyudayan ta ŋasigarya ŋuna alalak alo Samaria aŋuna ka akitijio Ŋisirael.

¹¹Ani eyenuni Yudas ŋakiro ŋun, abu tolot akisiryam Apolonius ka abu kilou ka toar iŋes. Aponi towanae toarae ŋituŋa ka Apolonius ŋulu alalak, ido toema ŋuluce.

¹²Apotu nai Ŋiyudayan toŋatasi ŋiboro kec ka abu Yuda ya ekileŋ ka Apolonius, kisitiya alojiesyo ŋirwa ka akiyar keŋ daadaŋ.

¹³Ani iirari Seron ŋolo arae ekapolokiniton a ŋasigarya ka Asiriya atemar acunaki Yudas ŋasigarya ŋuna alalak kaapei ka ŋasigarya ŋuna ekinyoma ŋuna eboiyete kaapei ka aloseneneete lojie,

¹⁴tema Seron, “Eturuuni ayoŋ ekiro kaŋ anakwap a daadaŋ a ŋina ipukat erwosit ka Asiriya, ikotere oruwor ituŋanan ŋini eketopolooritae anakwap a na. Alosi ayoŋ akitijikin Yudas ka ŋirukitos keŋ ŋulu ejamuwarito ŋakiro ŋuna alimu erwosit.”

¹⁵Apaki nai ŋin daŋ, apotu ŋikilyok ŋulu pa anupito Akuj toloto akiŋarakin Seron akinyaŋ ŋakiro a Ŋisirael.

¹⁶Ani eapiyari iŋes neni edokarere Bes-Oron, tolot Yudas akisiryam iŋes erukito ka ŋituŋa ŋidikudyo.

¹⁷Nai ani iŋolikinete ikes ajore a ŋituŋa ka Asiriya eponito akitijikin ikes, tolimokis ŋirukitos a Yudas Yudas temasi, “Alipite epedorere iwon ikikudyoko konaga akitijikin ŋasigarya ŋuna alalak ka togogoŋ ŋun. Nabo daŋ ikiupit iwon, anerae mam ibore emuji akoloŋit na?”

¹⁸Toboŋok Yudas tema, “Epatana ŋituŋa ŋulu ekudyoko amunyar ŋituŋa ŋulu alalak, anerae aneni ka Akuj ikiuni iŋes iwon kikilalak, kori kikikudyoko.

¹⁹Nyilounete ŋituŋa ŋimoe kec aŋuna a ŋasigarya a ŋuna alalak, nai ebuni agogoŋu aneni ka Akuj.

²⁰Apotu ŋimoe yok neni yok ka akituro ka aryenyeo amunyar iwon ka ŋaberu yok ta ŋidwe yok ka aŋatar ŋiboro yok,

²¹nai ikiji iwon aŋuna ka akiyar yok ka aŋuna a ŋikisila yok.

²²Akuj alope iŋes emunyari ikes alokiŋaren yok, ani eruwor iyes nyikuryaketa aŋuna kec.”

²³Ani edauni Yudas erwor, toem atipei akitijikin, Seron ka ŋasigarya keŋ, ido apotu ikes kilout ŋasigarya a Seron.

²⁴Kiwuapa Yudas ka ŋirukitos keŋ Seron ka ŋasigarya keŋ totiyaaros aneni edokarere Bes-Oron, todolo nadipoe a ŋikamukumukui. Toarae ŋasigarya a Seron ŋamiae ŋakanikauni ka apotu ŋuluce toema nakwap a Ŋipilistin.

²⁵Toruworos nai Yudas ka ŋikaitotoi keŋ ŋituŋa ŋulu akeritae ka tobul ŋituŋa ŋulu pa arae Ŋiyudayan ŋulu eboiyete alodiyete kec.

²⁶Todol arwonu a Yudas neni a erwosit ka kirworos ŋituŋa ŋulu pa arae Ŋiyudayan ŋuna a ŋijiesyo a Yudas.

²⁷Ani iirari erwosit Antiokus ŋakiro ŋun, abu iŋes toŋoo nooi, ido abu kiyakiya ŋituŋa acunakin ŋasigarya daadaŋ ŋuna aya nakwap ŋina epukat iŋes, arae ŋasigarya ŋun, ŋuna agogoŋok nooi.

²⁸Abu Antiokus toŋaa ŋakais ŋuna eŋadatae ŋisiliŋa keŋ, ido inak ŋasigarya keŋ etacit ŋolo a ekaru a epei, tosodi tolimok ikes atenit aŋuna a akiitanit a daadaŋ.

²⁹Toyenu nai Antiokus atemar kedaun ŋisiliŋa alokai a ŋina eŋadatae, toyenu daŋ atemar akudyoko ŋisiliŋa ŋulu eriraununuyo, anerae abu iŋes yau ŋican nakwap aŋuna alemarya iŋes ŋikisila ŋulu sek ewuapito ŋituŋa alorwa a ŋulu a koloŋ.

³⁰Abu nai iŋes toŋayan atemar nyeyakaunor iŋes ŋisiliŋa ŋulu etya ŋulu sek ayakar ekiŋaren aŋuna ka akisitiya aloticisyo ka anainanakineta a ŋuna anait iŋes ainanakin car car akilo ŋirwosi ŋuluce ŋulu epukato ekiŋaren keŋ.

³¹Totamatama Antiokus nooi, tosodi nai totubu alosit Perisia akiriraun ocur aneni a ŋituŋa a ŋulu eboiyete anakiboisyo ka akwap a Perisia, ikotere eryamuni ŋisiliŋa ŋulu alalak.

³²Abu Antiokus kimyek Liasias ekile ŋolo ayenen alotuŋa a ateker a erwosit, kituruwo iŋes ŋolo epolokinit ŋakiro a erwosit ameun anaŋolol Eupurate akitodol lokukworin a Ijipit.

³³Amaikina daŋ Liasias kiricak lokoku a erwosit Antiokus tari ŋina eboŋunio erwosit.

³⁴Abu nabo Antiokus inak Liasias atutubet apei ŋina a ŋasigarya keŋ ka ŋitome, tolimok daŋ iŋes ŋakiro daadaŋ ŋuna acamit iŋes kitiyakinae. Ani eruwor ŋituŋa ŋulu eboiyete alo Yudaya ka alo Yerusalem,

³⁵amaikina Liasias kiyakiya ŋasigarya akitijikin ka amunyar ikes todaun agogoŋu a Ŋisirael ka agogoŋu a ŋipiya a Yerusalem, amaikina iŋes tomunya ikes tojoŋoe atamunit ikes nabo anakibois a ŋin,

³⁶ido kiwuak ŋituŋa ŋulu nyerae Ŋiyudayan kiboiyoto anakwap kec a daadaŋ ka tokorakinae akwap kec neni a ŋituŋa a ŋice anakilamilam.

³⁷Abu nai erwosit torukosi kaapei ka atutubet apei ŋina a ŋasigarya keŋ torotokis alo Antiokia alotaun keŋ a ŋolo apolon, arotokinete ikes alokaru a ŋolo a amiat ka ŋatomoniomwon ka ŋikanikaarei. Todoka ikes aŋolol Eupurate, totuboros anakiboisyo a ŋuna aya neni ikyaara.

³⁸Abu Liasias toseu Pitolemi lokoku a Dorimenes ka Nikonor ta Gorigias ŋikilyok ŋulu apedorito ejie alokonei a erwosit,

³⁹kiyakiya ikes kaapei ka ŋasigarya ŋuna alosete a ŋakejen ŋalipyo ŋatomoniomwon ka ŋasigarya ŋalipyo ŋakanikaarei ŋuna ameto ŋaŋolei, toloto nakwap a Yudaya amunaar akwap ŋin, lopite ŋolo alimunitor erwosit.

⁴⁰Aŋun apotu ŋikilyok ŋul torotokis kaapei ka ŋasigarya kec daadaŋ, ani edolete ikes nakwap a Yudaya kiboiyosi diyete Emaus etaun ŋolo ayai nadipo a ŋikamukumukui.

⁴¹Ani iirarete ŋikecurutak a akibois a ŋin ŋakiro ŋuna alimokinio ikes, apotu yaasi esilipa ka egolid ŋolo alalan ta ŋiriko, ido toloto neni eboiyoto ŋasigarya ka Asiriya aŋuna ka akipotorya Ŋisirael yaarae erae ŋipi. Apotu ŋasigarya ka Asiriya ka ŋuna ka akwap a Ŋipilistin kimorikinos ka ŋikecurutak ŋul.

⁴²Toyenut nai Yudas ka ŋikaitotoi keŋ atemar kiyatakin ŋican kec ka atemar kiboiut ŋasigarya a ŋimoe nakwap kec. Toyenut daŋ ŋakiro ŋuna kebu erwosit tolimu kitiyae neni a ŋituŋa a Isirael, ikotere emunyaryo ikes jik.

⁴³Nai apotu ikes kirworikinos make temasi, “Emaikina iwon enyakutu ŋipiya a ŋituŋa yok ka ojioto aŋuna a ŋituŋa yok ka aŋuna ka akibois a ŋina asegan.”

⁴⁴Aŋun, apotu ŋituŋa tocunakinos iwapei totena aŋuna ke ejie ka kilipa ka todyekut akisyon ka akiŋarakino.

⁴⁵Amam ŋituŋa eboiyete alo Yerusalem, ekwaan ka aloŋisat; mam ŋituŋa keŋ ŋulu alomununeete tooma keŋ ka tolomanarete kiŋa. keponi tomunaarae akibois ŋina asegan, ido eboiyete ŋituŋa ŋulugelae anaduketa a ŋuna kirereet etaun, kebu nen toruwor neni eperete ŋituŋa ŋulu pa arae Ŋiyudayan. Aponi tolemarae alelyanu aneni a ŋiletok a Yakob tojoŋoi akikut ŋapilui ka akiram ŋaduŋgui.

⁴⁶Apotu nai Ŋisirael tocunakinos, ido toloto Misipa, etaun ŋolo eteosi ka Yerusalem, anerae eturuworito sek Ŋisirael Misipa akibois ŋina ilipere.

⁴⁷Akoloŋit ŋin, kiredakis ikes akiron, tonapa ŋiguniyae, kiwuanakis ekuron nakyes kec ka tocilicila ŋilowi kec.

⁴⁸Tosodi toŋaasi ekitaabo ŋolo a ŋikisila akiŋitunia ŋakiro ŋuna kepotu ŋituŋa ŋulu nyerae Ŋiyudayan kiŋitunut alotorubei a ŋakujo kec.

⁴⁹Apotu daŋ ikes yaut ŋilowi asacaradotonu ka ŋaraito ŋuna eŋarenok ta atutubet apei alotooma ŋitomon a ŋiboro kec; tonyaraut daŋ Ŋinasari ŋulu aris kirikakis ŋirwa kec ŋulu ka akitaleun,

⁵⁰tosodi kigworokis Akuj ebasi, “Anukiro itiyao isua aŋuna a ŋiboro a lu? Ai ikiai isua ikes?

⁵¹Amunaar ka eyanyi akibois kon ŋina asegan ka igworosi ŋisacaradotin kon aŋuna etiditeunere.

⁵²Acunun ŋituŋa ŋulu nyerae Ŋiyudayan ne aŋuna ka amunyar isua, iyeni iyoŋ ŋakiro ŋuna etukosi ikes akitiya neni kosi.

⁵³Alipite ikipedorya isua awoikin ikes erae pa kikiŋarakini iyoŋ isua?”

⁵⁴Apotu nai ikes tokutakis ŋarupepe tocelut nooi.

⁵⁵Kedaun ŋun, toseu Yudas ŋikarikok a ŋituŋa ŋulu epolokinete ŋituŋa ŋalipulipui, ŋamiamiae, ŋatomonikanikani ka ŋitomotomoe.

⁵⁶Tolimok iŋes ŋituŋa ŋulu adukete ŋakais, kori ŋulu aapi akiitar, kori ŋulu adupete ŋikito a epiini, kori ŋulu kebu tobuliyo alotai kec alosit lorerya kec lopite ŋolo elimunitor ekisil.

⁵⁷Torotokis nai ŋasigarya kiboiyosi lowae ŋolo alo Kwap Emaus.

⁵⁸Tema nai Yudas, “Totiŋa ŋiboro kus ŋulu ke ejie ka nyikuryaketa. Totena moi taparacu nataparacu aŋuna ka akitijikin ŋituŋa ŋul ŋulu nyerae Ŋiyudayan ŋulu acununa aŋuna ka akitijiore iwon, amunyar iwon ka akinyasun akibois ŋina asegan.

⁵⁹Ejok aneni yok atwanare alojie akilo akiŋolikin ŋican a akwap yok ka ŋulu a akibois a ŋina asegan.

⁶⁰Nai ikwapei eyakar acamit keŋ anakuj, itiyae Akuj lopite ŋolopei.”