Read ngakarimojong 1 Ŋimak. 4 Bible Online

1 Ŋimak. 4 - ngakarimojong bible

1 Ŋimak. 4

¹Apaki ŋin, abu Gorigias ya ŋasigarya ŋuna alosete a ŋakejen ŋalipyo ŋakan ka ŋasigarya ŋuna emeto ŋaŋolei aliput ŋuna aseunitae, toloto ŋasigarya ŋun nakwaare

²nalomar a Ŋiburaniyae akirem ikes pa etenito. Ŋikilyok ŋulu sek eboiyete anakais a ŋuna kirereet etaun, ikes etenito Gorigias.

³Nai kebu Yudas kiira ŋakiro ŋun, ido abu Yudas kaapei ka ŋikajiok keŋ toloto akitijikin ŋasigarya a erwosit alo Emaus.

⁴Ani eriŋa ŋasigarya a Gorigias eyakasi kiŋa alomar.

⁵Apaki ŋina alomunia Gorigias nalomar a Ŋiburaniyae nakwaare, nyeryamu ituŋanan idio a nen, aŋun abu tolot akiwarit ikes lokamukumukui, anerae abu iŋes totamak ebe, “Keema ŋituŋa ŋul aneni kosi.”

⁶Ani iwalari akwap, totakanu Yudas anadipo a ŋikamukumukui erukito ka ŋikilyok ŋalipyo ŋauni, nai pa ayakatar ikes ŋiboro ŋulujiet ka ŋileŋia lopite ŋolo amaikina eyakatar.

⁷Kiŋolikis ikes alomar a ŋituŋa a ŋulu pa arae Ŋiyudayan egogoŋ ka eya ŋaduketa ŋunajiet ka kirimokinito ŋasigarya ŋuna ameto ŋaŋolei alomar ŋin, erae daŋ ŋikilyok ŋul ŋulu etatamitae ajiore.

⁸Nai abu Yudas tolimok ŋikilyok ŋulu arukitotor iŋes tema, “Nyikuryaketa aŋuna elalaketa ikes, kori nyikuryaketa icodunete ikes.

⁹Totamunito epite ŋolo aiunotor atapapaa yok ananam a ŋina Areŋan, apaki ŋina ewuapitotor Parao ka ŋasigarya keŋ ikes.

¹⁰Emaikina iwon tokona egworokisi Akuj ŋina anakuj, oyenuniata kikiŋarakini iŋes iwon totamu ka ketamuni acamunet keŋ ŋina acamunotor iŋes koloŋ ka atapapaa yok, ido tomunya ŋasigarya ŋun alokiŋaren yok nakoloŋit na.

¹¹Eyenunete nai ŋituŋa ŋulu nyerae Ŋiyudayan atemar eyai ŋini elakuni ka eiuni Ŋisirael.”

¹²Ani irereorete ŋituŋa ŋulugelae lokamukumukui, kiŋolikisi Ŋiyudayan eponito akitijikin ikes,

¹³apotu tolomut analomar aŋuna ke ejie. Tokutakis nai ŋikilyok ŋulu arukitotor Yudas ŋarupepe kec.

¹⁴Kisyakis ejie. Kilounae ŋituŋa ŋulu pa arae Ŋiyudayan, toema nadipoe a ŋikamukumukui,

¹⁵ido aponi toarae a ekileŋ daadaŋ ŋulu edoŋito kaku. Kiwuapa Ŋisirael ŋimoe kec tari Gasara ka nadipoe ŋuna a Idumea, kiwuapa tari Asotus ka Yaminia, aponi toarae ŋimoe ŋul ŋalipyo ŋauni.

¹⁶Tojoŋoto nai Yudas ka ŋirukitos keŋ akiwuapit ŋimoe kec toboŋosi,

¹⁷tolimok nai Yudas ŋituŋa tema, “Nyirorokoka anaŋatar ŋiboro, anerae eriŋa ejie eyai kiŋaren yok;

¹⁸eapiyete Gorigias ka ŋasigarya keŋ eya lokamukumukui. Nai towoikisi ŋimoe yok kitijikis ikes, ekaku toŋatasi ŋiboro kec emam akuryanu.”

¹⁹Apaki ŋinapei erikakinia Yudas akirworo ŋakiro ŋun, totakanu atyakatait apei a ŋimoe elomunito alokamukumukui.

²⁰Kiŋolikis atemar kebwaŋi ŋasigarya kec ka ecunyete Ŋiyudayan neni sek eboiyo ajiore kec, anerae etoodiunit apuru ŋina eteo aneni sek eboiyoto ikes ŋakiro ŋuna kepotu kitiyakinos.

²¹Ani eyenunete ikes ŋakiro ŋun, tobul ikes nooi ka ani iŋolikinete ikes ŋasigarya a Yudas icodorito anadipo aŋuna ke ejie,

²²toema ikes daadaŋ tolomasi nakwap a Ŋipilistin.

²³Toboŋosi nai Yudas ka ŋirukitos keŋ aŋatar ŋiboro aneni sek eboiyoto ŋimoe ŋul, apotu ikes toŋatut egolid ŋolo alalan ka esilipa ka ŋilowi ŋulu epuritae a eraŋgi a ŋolopus ka eraŋgi ŋolo kipurat-areŋan, toŋatut daŋ ikes ebari ŋolo alalan.

²⁴Ani eboŋunete ikes, toeto ŋieosyo ka ŋikipurisyo neni a Akuj a ŋina anakuj ebasi, “Ejok Akuj, erubakini akisyon keŋ ŋikaru ka ŋikaru.”

²⁵Aŋun, apotu Ŋisirael toryamut alakuno ŋina apolon nooi akoloŋit ŋin.

²⁶Apotu ŋituŋa ŋulugelae ŋulu apotu tobucar toloto tolimokis Liasias ŋakiro daadaŋ ŋuna apotu kitiyakinos.

²⁷Ani iirari Liasias ŋakiro ŋun, apotu ŋakiro ŋun inakis iŋes atamatam ka tokadanak, anerae apotu ŋakiro nyitiyakin neni a Ŋisirael lopite ŋolo sek acamitor iŋes, kori nyitiyakin lopite ŋolo alimunitor erwosit.

²⁸Nai ekaru ŋolo atupakini, abu Liasias toseu ŋasigarya ŋalipyo ŋatomonikanikapei ŋuna alosete a ŋakejen ka ŋasigarya ŋuna ameto ŋaŋolei ŋalipyo ŋakan aŋuna ka akilounia Ŋisirael.

²⁹Apotu ŋasigarya ŋun toloto Idumea kiboiyosi Bes-Sur, ido abu Yudas bu erukito ka ŋikilyok ŋalipyo ŋatomon akitijiore ikes.

³⁰Ani eanyuni Yudas atemar egogoŋ ŋasigarya a Liasias, kilip ebala; “Okoe ekalakunan a Ŋisirael, irereŋ iyoŋ, iyoŋ ibu tomunya ŋasigarya a ekajion a ŋolo etiron a akan a eketiyan kon a Daudi, ido kipotok alomar a Ŋipilistin napedor a Yonasan alokaku a Saul ka neni a ekile a ŋolo atiŋit ŋiboro a Yonasan ŋulujiet.

³¹Tomunya ŋimoe lu a apedor a ŋituŋa kon a Ŋisirael ka kimyek ikes kiruma ŋileec anakigeno neni a ŋasigarya kec ka neni a ŋaŋolei kec.

³²Kilelebik akuryanu neni kec, tolema adedeŋu ka agogoŋu kec, kimyek ikes tomarana anamunyaro kec.

³³Tomunya ikes a ŋileŋia a ŋituŋa a ŋulu ikiminasi iyoŋ ka kimyek daadaŋ ŋulu ikiyenete iyoŋ ikipuro iyoŋ a ŋieosyo.”

³⁴Kiiryakinos nai ŋajorei ŋunaarei ŋun, toarae ŋasigarya a Liasias ŋalipyo ŋakan, aaryo ikes ejio.

³⁵Ani iŋolikini Liasias epite ŋolo aarere ŋasigarya keŋ ka atitinyu a ŋasigarya a Yudas ka epite ŋolo atenitotor ikes kerae akiyar kori atwanare emam ŋileec, abu kikuto alojie toboŋo Antiokia, ido kigir ŋituŋa ŋulutacan aŋuna ka akirem Yudaya nabo a ŋasigarya a ŋuna alalak nooi akilo.

³⁶Temasi nai Yudas ka ŋikaitotoi keŋ, “Kiirasi, eloun ŋimoe yok, etipeiyosi etesegutu akibois ŋina asegan ka etaleutu iŋes.”

³⁷Aŋun, apotu ŋasigarya daadaŋ tocunakinos, ido kitipeiyosi lomukura Sion.

³⁸Apotu ikes kiŋolikis akibois ŋina asegan esil, kemunaar namuroet ka kicunyar ŋipukei. Kiŋolikis ikes ŋikito keruput analapatu lopite ŋolo erupyata anamoni, kori alomoru a edio; kiŋolikisi daŋ ŋagulei a ŋisacaradotin inyasunitae.

³⁹Tocilicila nai ikes ŋilowi kec ka kigworo a akiwolol a ŋina apolon nooi kipurupura ekuron nawat kec,

⁴⁰ido topero ebuburiyara todolo ŋireetin kwap. Tosodi ani eruunete ŋarupepe kigworo neni ka Akuj a ŋina anakuj.

⁴¹Tolimok nai Yudas ŋikilyok toloto akitijiore ŋituŋa ŋulu eboiyete anaduketa a ŋunajiet tari ŋina edaunia iŋes akitaleun akibois ŋina asegan.

⁴²Toseu Yudas ŋisacaradotin ŋulu nyitoroniyaritae ka ŋulu einakina a ŋuna a ŋikisila,

⁴³ido apotu ŋul kitaleut akibois ŋina asegan ka tolemasi ŋamoru ŋuna itoroniyaritae yaasi nakibois ŋina nyeseg.

⁴⁴Kirworiut ikes ŋakiro ŋuna amaikina kitiyae namuroet ŋina a ŋainakineta a ŋuna epeyo ŋina keponi tomunaarae.

⁴⁵Totamut ikes atemar ejok abwaŋabwaŋaar namuroet ŋin, ikotere nyeruwor ŋina erubakini eyaunit ŋileec neni kec aŋuna aponiata ŋituŋa ŋulu nyerae Ŋiyudayan tomunaasi. Aŋun, apotu ikes tobwaŋabwaŋaasi namuroet ŋin;

⁴⁶kiŋadakis ŋamoru nakibois ŋina aseunitae alokamukumukut a ŋolo a adukitoe Akai ka Akuj akitodol ŋina ebunio ekadwaran alimun ŋuna emaikina kitiyae namoru ŋun.

⁴⁷Tolemut nai ikes ŋamoru ŋuna pa ecietae, lopite ŋolo elimunitere alokisila, ido todukunioto namuroet ŋinakitete ŋina ekuwaan ka ŋinaŋorot.

⁴⁸Apotu daŋ ikes todukokis nabo akibois ŋina asegan tooma Akai ka Akuj, ido kitaleut ŋalapatui.

⁴⁹Apotu ikes kitiyaut ŋiboro ŋulukitet ŋulu asegak ŋulu isitiyao alo Kai ka Akuj, yaut tooma Kai ka Akuj awoet a etaa, namuroet ŋina a ekinyate ta emesa.

⁵⁰Inakis nai ekinyate a namuroet ka kinokakis ŋitae alokidiama awoet, kitacaut ŋitaae ŋul Akai ka Akuj.

⁵¹Kiwuakis ŋamugati lomesa ka kinenekis ŋanaŋgae. Aŋun, apotu ikes kirikakis etic ŋolo alosikinito akitiya.

⁵²Ani taparacu sek ŋirwa ke elap ŋatomoniarei ka ŋikan elap ŋolo a ŋikanikaomwon ŋolo enyaritae Kisilep alokaru a ŋolo a miat ka ŋatomoniomwon ka ŋikanikauni,

⁵³tonyout ikes inakis amuronot alokidiama namuroet ŋinakitete ŋina a ŋainakineta a ŋuna epeyo a ŋina apotu ikes todukut. Etiyaete ikes ŋun iwuapito ŋuna elimunitoe alokisila.

⁵⁴Apotu ikes kitaleut namuroet anapaki ka anakoloŋit a ŋinapei koloŋ aponiata ŋituŋa ŋulu pa arae Ŋiyudayan kinyasuniata namuroet. Kitaleut ikes namuroet eosi ŋieosyo ka eramete ŋaduŋgui, tokusete ŋapilui ka toramete ŋitworoi.

⁵⁵Apotu ŋituŋa daadaŋ kijuuroto todolo ŋireetin kwap, ido kilipa ka kipuro Akuj ŋina anakuj, Akuj ŋina abu kiŋarak ikes.

⁵⁶Kinumunuma ikes ŋasuban ŋuna etaleunere namuroet pena ŋirwa ŋikanikauni, inanakis ŋamuronisya ŋuna epeyo ŋuna elemuni ituŋanan a acamit keŋ ta ŋuna ka alakar neni ka Akuj.

⁵⁷Kisibusa ikes kiŋaren Akai ka Akuj a ŋitorubei a ŋibokoto ka ŋiupala. Kiwuanakis ŋipukei ka ŋagulei a ŋisacaradotin, kiwuakis daŋ ŋikekya nagulei a ŋisacaradotin.

⁵⁸Alakara ŋituŋa nooi, apaki ŋin, ido aponi tolemarae ŋileec ŋulu apotu ŋituŋa ŋulu pa arae Ŋiyudayan yaut loyudayan.

⁵⁹Apotu nai Yudas ka ŋikaitotoi keŋ ka atukot a ŋituŋa daadaŋ totubut atemar emaikina a ŋolokaru anapaki a ŋinapei a ŋin, kitiyae ŋasuban alotooma alelyanu ka alakara ŋirwa ŋulu etaleunere namuroet, emaikina kinumunumae ŋasuban ŋun ŋirwa ŋikanikauni, ameun anakoloŋit a ŋina a ŋirwa ke elap ŋatomoniarei ka ŋikan elap ŋolo a Kisilep.

⁶⁰Apaki ŋin, apotu ikes todukokis arwatata ŋina aoyan lomoru Sion, todukokis daŋ ŋaduketa ŋuna agogoŋok ka ŋuna aoyak kiryam emoru cib, ikotere nyelomut nabo ŋituŋa ŋulu nyerae Ŋiyudayan amunyar ikes lopite ŋolo etiyatotor ekiŋaren.

⁶¹Abu Yudas kiwuak ŋasigarya naduketa ŋuna aoyak ŋun akiyok etaun, abu daŋ toduk ŋaduketa ŋunajiet Bes-Sur, ikotere iteoto ŋituŋa a Bes-Sur, ikotere ŋituŋa eyakaunotor aduketait ŋina eiunotor alotuŋa a Idumea.