Read ngakarimojong 1 Ŋimak. 5 Bible Online

1 Ŋimak. 5 - ngakarimojong bible

1 Ŋimak. 5

¹Ani iirarete ŋituŋa ŋulu pa arae Ŋiyudayan ŋulu eboiyete alodiyete akwap a Yudaya atemar adukokin nabo namuroet ka etaleun nabo akibois ŋina asegan, lopite ŋolo sek ayakar ekiŋaren, toŋoa nooi,

²totubut amunyar ŋiletok a Yakob ŋulu eboiyete kaapei ka ikes anakwap kec. Aŋun, togeikis ikes akiar ka amunyar Ŋiyudayan.

³Nai abu Yudas tolot akitijiore ŋiletok a Esau ŋulu eboiyete alo Idumea, kitijik ikes alo Akirabatene, anerae apotu ikes torubakis edapito Ŋisirael. Kilou Yudas ikes tolema adedeŋu ka toŋatana ŋiboro kec.

⁴Totamu daŋ Yudas aronis a ŋidwe a Baean a ŋulusapa, ŋulu ekamete jik Ŋisirael ka adapito ikes alorotin.

⁵Abu Yudas togolok ŋituŋa ŋul naduketa kec ŋuna aoyak, togol ikes irikaunit ka kikoŋ amunyar ikes jik kicunya ŋaduketa kec ŋuna aoyak ka ŋituŋa daadaŋ ŋulu aya nen.

⁶Totubor nai Yudas tolot akitijikin Ŋiamoni neni abunio iŋes toryamunia ŋasigarya ŋuna ajiok ka ŋituŋa ŋulu alalak ŋulu arae ekarikon kec Timoteo.

⁷Abu Yudas kitiji ikes alojiesyo a ŋulu alalak ka aponi kilounae ikes alokiŋaren keŋ, toar Yudas ikes.

⁸Abu daŋ Yudas kikama Yaser ka ŋirerya keŋ, ekaku toboŋo nai Yudaya.

⁹Apaki ŋin tocunakinos ŋituŋa ŋulu pa arae Ŋiyudayan alo Gilead eremokino Ŋisirael ŋulu eboiyete anakwap kec, ido totukut amunyar ikes, nai apotu Ŋisirael toema akiŋop anaduketait a ŋina alo Dasema,

¹⁰ido kiyakiyasi abaruwa neni a Yudas ka ŋikaitotoi keŋ, egiritae nabaruwa ŋin ŋakiro nu; “Acunakin ŋituŋa ŋulu nyerae Ŋiyudayan ŋulu iboiyete alodiyete kosi aŋuna ka amunyar isua.

¹¹Itemonokinosi ikes aponare akikamar aduketait na neni aponi isua tomotunetei aiun, Timoteo iŋes erae ekarikon a ŋajorei kec.

¹²Aŋun, bua toiunae isua anapedor kec, anerae aari ŋituŋa kosi ŋulu alalak

¹³aari ŋiyeneta kosi daadaŋ ŋulu aya nakwap a Tob, ekamasi ŋimoe ŋaberu kec ka ŋidwe ta ŋiboro ka aari ŋituŋa ŋulu edolete aliput a ina.”

¹⁴Ani eriŋa esyomyo abaruwa ŋin, todolut ŋituŋa ŋice ŋulu eyakuunitae alo Galileya ecilicila ŋilowi kec, tolimut ŋakiro ŋuna ekote ŋunapei,

¹⁵abasi ikes ebe, “Acunakin ŋituŋa a Pitolemais, Tiro ka Sidon ta ŋulu a Galileya daadaŋ aneni eya ŋituŋa ŋulu nyerae Ŋiyudayan, acunakin ikes ikimanito isua ecamito amunyar isua.”

¹⁶Ani iirarete Yudas ka ŋituŋa ŋakiro ŋun, tonyaraunae atukot a ŋituŋa ŋina alalan nooi atyakun ŋakiro ŋuna emaikina ikes kitiyata aŋuna a ŋiyeneta kec a ŋulu ayakasi locan, a ŋulu isicanito ŋimoe.

¹⁷Tolimok nai Yudas lokaato keŋ Simon tema, “Toseu ŋikilyok ŋulu irukitotor iyoŋ, toloto aiun ŋiyeneta kus alo Galileya, Ikilosi ayoŋ ka Yonasan lokaato kaŋ Gilead.”

¹⁸Nai abu Yudas kimyek Yosepu lokoku a Sakariya ka Asaria ŋolo arae ekarikon a ŋituŋa kidoŋo ka ŋasigarya ŋunace Yudaya akiyok nen;

¹⁹Tolimok ikes ŋakiro nu, “Kiyokiyete ŋituŋa lu, nai nyiloto lojie ka ŋituŋa ŋulu nyerae Ŋiyudayan akitodol ŋina eboŋunere isua.”

²⁰Toseunae nai ŋikilyok ŋalipyo ŋauni torukosi ka Simon alosit Galileya ka ŋikilyok ŋalipyo ŋakanikauni torukosi ka Yudas alosit Gilead.

²¹Aŋun, abu Simon tolot Galileya toji ŋijiesyo ŋulu alalak itijiyete ŋituŋa ŋulu nyerae Ŋiyudayan, ido kilounae ŋituŋa ŋulu pa arae Ŋiyudayan alokiŋaren keŋ.

²²Kiwuap Simon ikes tari lopukei a Pitolemais, totwaka ŋituŋa ŋulu pa arae Ŋiyudayan ŋalipyo ŋauni ka abu Simon toŋata ŋiboro kec.

²³Yau nai Simon Ŋiyudayan ŋulu eboiyete alo Galileya ka Aribata kaapei ka ŋaberu kec ka ŋidwe kec ta ŋiboro daadaŋ ŋulu ayakatar ikes, toriko ikes Yudaya elelyanete nooi.

²⁴Totuboros Yudas Makabeus ka lokaato keŋ Yonasan ekekwaye Yorodan, yaasi ŋirwa ŋiuni elosete tari ŋina adolioto naloŋisat.

²⁵Kiryamunos ikes ka Ŋinabeteani ŋulu apotu kisiryama Yudas ka Yonasan a ekisil, tolimokis Ŋinabeteani ikes ŋakiro daadaŋ ŋuna apotu kitiyakinos neni a ŋiyeneta a Yudas ka Yonasan alo Gilead temasi,

²⁶“Agolokin ŋituŋa kus ŋulu alalak Bosira, Bosor anakiboisyo a nu: Alema, Kasipo, Maked ka Karinaim.” Arae ŋitaunio ŋul daadaŋ ŋulu agogoŋok ka apolok,

²⁷“Egolokinitoe ŋituŋa ŋice lotaunio a Gilead ŋuluce, itemonokinosi ŋimoe akirem moi taparacu ŋakiboisyo ŋuna eŋopitotor ŋituŋa, itemonokinosi ikes aŋuna ka akikamar ka amunyar ŋituŋa ŋul daadaŋ alotooma akoloŋit apei.”

²⁸Kibelekinos Yudas ka ŋasigarya keŋ atipei kitoro lorot ŋolo ka aloŋisat toloto Bosira, kikama Yudas etaun, toar a ekileŋ ŋisapa daadaŋ, toŋata ŋiboro a etaun daadaŋ, ido kicunya etaun a akim.

²⁹Torotokis Yudas ka ŋirukitos keŋ alo Bosira nakwaare, toloto tari lotaun Dasema neni aya ŋaduketa ŋunajiet.

³⁰Ani taparacu kirereosi ikes kiŋolikis ŋasigarya ŋuna alalak nooi ŋuna pa apedoryo akimarun eryoŋito ŋamadalae, ŋiboorei ŋulu kiwuakinet akititis narwatata aŋuna ka akikamarya etaun, kitijiete Ŋiyudayan ŋulu aya tooma lotaun.

³¹Aŋun, toyenu Yudas atemar kegeu ejie, kiira ŋituŋa alotaun igworosi neni ka Akuj a ŋina anakuj erwosi ŋarupepe ka ecelasi ŋituŋa nooi.

³²Tolimok iŋes ŋasigarya ŋuna arukitotor iŋes tema, “Tojioto nakoloŋit na aŋuna a ŋiyeneta kus!”

³³Kitipeiyo nai Yudas alokaku a ŋimoe erukito ka ŋajorei ŋauni ŋuna akusete ŋarupepe kec ka kilipete ecelasi nooi.

³⁴Ani eyenuni ajore a Timoteo atemar erae Makabeus eyai nen toema alokiŋaren keŋ, tomunaiya Yudas ŋimoe keŋ. Totwaka ŋulu edolete ŋalipyo ŋakanikauni akoloŋit ŋin.

³⁵Kedaun ŋun, tolot Yudas Maapa kitiji ŋituŋa ŋulu aya nen, kikama etaun. Toar Yudas ŋisapa daadaŋ ŋulu aya Maapa, toŋata ŋiboro keŋ, ido kicunyak a akim.

³⁶A nen, tolot Yudas kiŋaren kikama Kasipo, Maked ka Bosor ka ŋitaunio a Gilead ŋuluce.

³⁷Ekaku a ŋakiro a ŋun, tocunak Timoteo ŋasigarya ŋace, kiboiyosi neni eteosi ka Rapon ekekwaye ayonae.

³⁸Kiyakiya Yudas ŋituŋa akireb alomar a Timoteo, ido toboŋut yaut ŋakiro neni keŋ temasi, “Ariwo ŋituŋa ŋulu nyerae Ŋiyudayan daadaŋ ŋulu iboiyete alodiyete yok ka Timoteo, erae ikes ŋasigarya ŋuna alalak nooi.

³⁹Epaŋgata daŋ ikes Ŋimarabui akiŋarakin ikes, tosodi eboiyosi ikes ekekwaye ayonae, etenito aponare akitijikin iyoŋ.” Abu Yudas tolot akisiryam ikes.

⁴⁰Ani eapiyarete Yudas ka ŋasigarya keŋ nayonae ŋin, ŋina aya ŋakipi, tolimok Timoteo ŋikarikok a ŋasigarya keŋ tema, “Ani kedoku iŋes laalo ayonae neni yok, nyikipedori iwon akiloun iŋes, anerae kire jik, ikilouni iŋes iwon.

⁴¹Nai ani kekuryaniar iŋes, ido kiboiyo ekekwaye ayonae, etuboroi iwon ekekwaye, ido eloutu iŋes.”

⁴²Ani eapiyari Yudas nayonae ŋina aya ŋakipi, kisiboik ŋikarikok a ŋasigarya keŋ nen tolimok ikes tema, “Nyicamut idiotuŋanan iboikin iwadio, nai emaikina daadaŋ tolomasi lojie.”

⁴³Totubor nai iŋes ekekwaye ayonae eriŋa ŋimoe nyedokuna, ido kiwuapakis iŋes ŋasigarya daadaŋ. Aponi kilounae ŋituŋa ŋulu pa arae Ŋiyudayan daadaŋ alokiŋaren Yudas, tocakasi ŋiboro kec ŋulujiet toema kai ka akuj ŋina ayai Karinaim.

⁴⁴Nai abu Yudas kikama etaun kicunya akai ka akuj a akim kaapei ka ŋituŋa daadaŋ ŋulu aya tooma keŋ. Aŋun, aponi kikamarae Karinaim, nyepedosi nabo ŋituŋa ŋulu pa arae Ŋiyudayan akitijiore Yudas.

⁴⁵Tocunak nai Yudas Ŋisirael daadaŋ ŋulu eboiyete alo Gilead, ŋituŋa ŋulucaryo ka ŋikapolok kaapei ka ŋaberu kec ka ŋidwe kec ta ŋiboro kec, tocunak Yudas ŋituŋa ŋulu alalak nooi ikotere elosete nakwap a Yudaya.

⁴⁶Todolo nai ikes Epiron. Arae Epiron etaun ŋolo alalan nooi ka ŋolo agogoŋon ka ayai lorot ŋolo ameto ikes. Pa apedorito ikes akilodakin etaun ŋol a ewae a edio, nai apotu ikes kitoro kidiŋ etaun.

⁴⁷Nai apotu ŋituŋa a etaun a ŋol togolosi ikes kiŋa, togolo ŋipukei a ŋamoru.

⁴⁸Kiyakiya Yudas ituŋanan alimokin ŋituŋa a Epiron ŋakiro nu ŋuna ka akoneo tema, “Kimyekinae isua kitoroi nakwap kus tolotoi nakwap kosi. Mam ituŋanan ikiwani iyes, atubor bon etuboroi isua elosyo a ŋakejen.” Nai towout ŋituŋa a Epiron aŋaar iŋes.

⁴⁹Abu nai Yudas tolimu atemar kiserakinae losigarya atemar kiboikinos ŋituŋa daadaŋ neni eyakasi.

⁵⁰Aŋun, apotu ŋasigarya kiboikinos neni sek ayakasi, ido abu Yudas kitiji ŋituŋa a Epiron apaaran ŋin daadaŋ ka akuwar daadaŋ ka abu iŋes kikama etaun.

⁵¹Tomunya Yudas ŋisapa daadaŋ alotaun a ŋol a ekileŋ, toritanak ŋakais ka toŋata ŋiboro a etaun. Kitoro nai ikes kidiŋ etaun ipudaete ŋawat a ŋituŋa a ŋulu atwakito.

⁵²Totuboros nai ikes ekekwaye Yorodan todolo nadipo a ŋikamukumukui ŋina eyai lalo Bes-San.

⁵³Torubak Yudas ecunakinit ŋikajiok kisimukekinite ŋituŋa erot daadaŋ tari ŋina adolioto ikes Yudaya.

⁵⁴Aŋun, kitipeiyosi ikes moru Sion elelyanete ka elakara, inakis ŋainakineta ŋuna epeyo, anerae apotu ikes toboŋut emam ŋace, mam ipei daŋ kec keponi toarae.

⁵⁵Apaki ŋina ayakatar Yudas ka Yonasan Gilead, toyai lokaato kec Simon Galileya itiji Pitolemais,

⁵⁶apotu Yosepu lokoku a Sakariya ka Asaria ŋulu arae ŋikarikok a ŋajorei kiirasi ŋiticisyo a Yudas ka Yonasan ŋulu etoodiunito adedeŋu ka ŋuna a ŋijiesyo a ŋulu apotu ikes tojioto kilout ŋimoe kec.

⁵⁷Aŋun, tolimut ikes temasi, “Eturuutu iwon daŋ ŋirorwa yok oloto etijioto ŋituŋa ŋulu nyerae Ŋiyudayan ŋulu iboiyete alodiyete yok.”

⁵⁸Aŋun, apotu ikes tolimokis ŋikajiok ŋulu arukito ka ikes, ido toloto akitijiore ŋituŋa a Yaminia.

⁵⁹Apotu Gorigias ka ŋasigarya keŋ tolomut kiŋa etaun akitijikin Yosepu ka ŋirukitos keŋ.

⁶⁰Aponi kilounae Yosepu ka Asaria kiwuapae tari lokukworin a Yudaya. Aponi toarae Ŋisirael ŋulu adolito ŋalipyo ŋaarei akoloŋit ŋin.

⁶¹Aŋun, aponi kilounae Ŋisirael nooi akoloŋit ŋin, anerae atamete ikes atemar ikipedori akitiya etic ŋolo itoodiuni adedeŋu kec, nyiwuapa ikes ŋakiro a Yudas ka ŋikaitotoi keŋ.

⁶²Pa arae ikes ŋulu ke ekal a ŋolo aseunit Akuj ayaunia neni a Ŋisirael alakuno.

⁶³Etopolooritae Yudas ka ŋikaitotoi keŋ nooi aneni daadaŋ alimitere ŋirorwa kec alo Isirael ka alotuŋa a ŋulu pa arae Ŋiyudayan.

⁶⁴Apotu ŋituŋa tocunakinos neni kec kipuro ikes.

⁶⁵Toloto nai Yudas ka ŋikaitotoi keŋ akitijiore ŋiletok a Esau anakwap a ŋina ayai lowae ŋolo alo Kwap. Abu Yudas torem Eburon ka ŋirerya keŋ, toritaana ŋaduketa a etaun ŋunajiet ka kicunya ŋaduketa ŋuna aoyak alowaetin a daadaŋ.

⁶⁶Ekaku tolot Yudas a nen akirem akwap a Ŋipilistin, kitor Marisa.

⁶⁷Akoloŋit ŋin, apotu ŋisacaradotin ŋice ŋulu acamito akitiya ŋuna ka adedeŋu totwaka alojie, anerae apotu ikes toloto lojie emam aosou.

⁶⁸Nai abu Yudas tori tolot Asotus etaun ŋolo ayai nakwap a Ŋipilistin, abu tobwaŋabwaŋaa ŋamuroeta kec ka ŋitorubei a ŋakujo kec ŋulu ecietae, ido kicunya a akim, toŋatana ŋiboro alotaunio, tosodi toboŋo nakwap a Yudaya.