Read ngakarimojong 1 Ŋimak. 6 Bible Online

1 Ŋimak. 6 - ngakarimojong bible

1 Ŋimak. 6

¹Alorwa a ŋulu erimitor erwosit Antiokus ŋakiboisyo ŋuna aya nenimukur, kiira iŋes atemar erae Elimais etaun ŋolo alo Perisia etaun ŋolo arwon nooi aŋuna a abaru keŋ a ŋina a esilipa ka egolid.

²Arae akai ka akuj ŋina ayai nen ŋina eleleba ebari, aya kai ŋin ŋaupala ŋuna etiyaunitae a egolid, aya ŋarapeta a atorobu alojie ka ŋiboro ŋulujiet ŋulu kebu Alesanda lokoku a Pilipo kimyek a nen. Arae Alesanda lokoku a Pilipo, erwosit a Ŋimacedonian ŋolo ageikini akipuka Ŋigirik.

³Aŋun, abu Antiokus bu kikatak akikamar etaun, anerae kepotu ŋituŋa a etaun a ŋol toyenut ŋuna acamit iŋes akitiya,

⁴ido apotu ŋituŋa a etaun a ŋol towoikis iŋes alojie kilout. Aŋun, abu Antiokus toem, ido toboŋo a nen tolot Babilon ekadakinit nooi.

⁵Kebu ituŋanan ice tolot neni keŋ alo Perisia, tolimok iŋes atemar kemunyar ŋasigarya keŋ ŋuna kelosito nakwap a Yudaya

⁶ka atemar kebu sek Liasias toloto ka ŋasigarya ŋuna agogoŋok, nai kebu Liasias toboŋu, toem alokiŋaren Ŋiyudayan, tolimok daŋ ituŋanan ŋin Antiokus atemar kepotu Ŋiyudayan togogoŋioto aŋuna a ŋiboro a ŋulujiet, a ŋamuja ka ŋiboro ŋulu alalak ŋulu kepotu ikes toŋatasi aneni a ŋasigarya a ŋuna apotu ikes tomunyasi.

⁷Tolimokinae daŋ atemar kepotu Ŋiyudayan tobwaŋabwaŋaasi etorube a akuj a ŋina kebu iŋes todukok namuroet ŋina ayai Yerusalem ka atemar kepotu Ŋiyudayan todukokis ŋarwatatain ŋuna aoyak towaut alowaetin a daadaŋ akibois ŋina asegan lopite ŋolo sek ayakar ka atemar kedukokin ŋarwatatain ŋuna aoyak Bes-Sur daŋ epei a ŋitaunio keŋ.

⁸Ani iirari erwosit ŋakiro ŋun, abu tobul ka tomaranik nooi. Abu erwosit tolot lokitaada keŋ todyakakin aŋuna aponiata ŋakiro tokadakis iŋes, anerae apotu ŋakiro nyitiyakin lopite ŋolo ayeunitor iŋes.

⁹Torubak iŋes eperi ya a nen ŋirwa ŋulu alalak, anerae abu torubak ekadakinit iŋes nooi, ido abu iŋes toyenu atemar eapi iŋes atwanare.

¹⁰Aŋun, abu iŋes tonyarau ŋikonei keŋ daadaŋ tolimok ikes tema, “Nyeriŋa ayoŋ ajotoonor ka alilimiyo etau kaŋ aŋuna ka akiyaloloŋ.

¹¹Abu ayoŋ atamak ebe, ‘Ani kiyaloloŋ na ŋina aryamu ayoŋ! Alucan ŋulu aloma ayoŋ tokona lu! Anerae arimaana ayoŋ ka akaminae ayoŋ anapedor kaŋ.’

¹²Nai tokona atamu ayoŋ aronis ŋina abu etiya alo Yerusalem, abu ayoŋ olema ŋiboro daadaŋ ŋulu esitiyao a nen, ŋulu etiyaunitae a esilipa ka egolid, abu ayoŋ eyakiya ŋituŋa amunyar ŋituŋa a Yudaya a ŋakiro a ŋuna pa eyookino.

¹³Ayeni ayoŋ atemar apotu ŋican lu neni kaŋ aŋuna a ŋakiro a ŋun, ayoŋ tokona lo aapuu atwanare anakwap a ŋinagela, akakadakinit nooi.”

¹⁴Tonyarau nai Antiokus Pilipo, epei a ŋikonei keŋ, kituruwo iŋes ekepukan akwap daadaŋ ŋina sek epukat iŋes.

¹⁵Inak iŋes ebokot ka elou keŋ ta ekaboboot ŋolo ka apukan, ikotere epedori Pilipo akitatam lokoku keŋ Antiokus kitopolou iŋes tari ŋina eruworor erwosit.

¹⁶Alopite a ŋol, abu Antiokus totwana alokaru a ŋolo a amiat ka ŋatomoniomwon ka ŋikanikaomwon.

¹⁷Ani eyenuni Liasias atemar ketwana erwosit Antiokus, abu kiwuak Antiokus lokoku a erwosit akipuka. Kebu Liasias sek ekiŋaren kitopolou lokoku a erwosit ŋinapei eriŋa erae edya, abu inak iŋes ekiro Eupator.

¹⁸Apaki ŋin agolokinito ŋasigarya ka Asiriya ŋuna aya naduketa ŋunajiet Ŋisirael nakibois ŋina asegan. Emukekinito ikes jik akiwan Ŋisirael ka akitogogoŋ ŋituŋa ŋulu pa arae Ŋiyudayan.

¹⁹Aŋun, abu Yudas totub amunyar ikes, tocunak ŋituŋa daadaŋ akirikaun ikes aneni aya.

²⁰Tocunakinos Ŋisirael iwapei kirikaut aduketait ŋinajiet alokaru a ŋolo a amiat ka ŋatomonikan, todukonok Yudas ŋaduketa ŋuna aoyak ka ŋiboro ŋice ŋulu ke ejie aŋuna ka akikamar ŋaduketa ŋuna aya ŋasigarya ka Asiriya.

²¹Nai kepotu ŋasigarya ŋuna ka Asiriya ŋace tosiwa aneni erikaunitae ka apotu Ŋisirael ŋice ŋulu pa anupito Akuj torukosi ka ikes.

²²Toloto neni a erwosit tolimokis iŋes temasi, “Apaki ŋina etya ai, iyai iyoŋ nyitiya ŋuna iyookino, kinyaŋa ŋuna etiyatae neni a ŋiyeneta kosi?

²³Ikilakara isua ikitiyanakini papa kon, ikiyari aŋuna elimuni iŋes ka ikiwuapit ŋakiro keŋ.

²⁴Aŋuna a ŋakiro a ŋun, apotu ŋidwe a ŋituŋa kosi akirikaun aduketait ŋinajiet ka ikiremokinosi isua, nabo daŋ aara ikes ŋituŋa daadaŋ ŋulu apotu ikes kikamasi ka ekamasi daŋ ŋalup kosi.

²⁵Meere isua bon etijioto ikes, nai aremo daŋ ikes ŋakwapin daadaŋ ŋuna ikukworosi ka ikes,

²⁶topupok nai iyoŋ, nakoloŋit na erikaut ikes aduketait ŋinajiet alo Yerusalem aŋuna ka akikamar, aduko ikes ŋaduketa ŋunajiet nakibois ŋina asegan ka Bes-Sur.

²⁷Ani pa kiburuburak iyoŋ akiretakin ikes, epote ikes akitiya ŋakiro ŋuna aronok akilo, ido nyipedori iyoŋ ekaku akiretakin ikes.”

²⁸Abu erwosit toŋoo nooi iirari ŋakiro ŋun. Tonyara ŋikonei keŋ ŋikarikok a ŋajorei ka ŋulu ayakatar apolou,

²⁹Apotu daŋ ŋasigarya ŋuna egyelitae aŋuna ka ejie potu anakwapin a ŋace ka alocileta a ŋanamyo.

³⁰Arae ekimar a ŋasigarya keŋ daadaŋ a ŋuna alosete a ŋakejen ŋalipyo amiat, ŋasigarya ŋuna ameto ŋaŋolei ŋalipyo ŋatomoniarei ka ŋitome ŋatomoniuni ka ŋiarei ŋulu ayenikinito nooi ŋakiro ŋuna ke ejie.

³¹Apotu ŋasigarya ŋun kitorut Idumea kiboiyosi diyete Bes-Sur aŋuna ka akirem etaun ŋol, tojioto ikes ŋirwa ŋulu alalak, toduko ŋakititisyo ŋunalomaret lotaun. Nai apotu Ŋiyudayan tojioto ka agogoŋu, tolomasi kiŋa, kicunyasi ka akim ŋiboro ŋulujiet ka tojioto ka amukeo.

³²Torotok nai Yudas kimyek aduketait ŋinajiet, kiboiyosi ka ŋasigarya keŋ Bes-Sakaria neni eteosi ka neni eboiyoto ŋasigarya a erwosit ka Asiriya.

³³akoloŋit ŋina atupakini, taparacu sek, kitiŋak erwosit ka Asiriya ŋasigarya keŋ alosit ka iŋes emeto erot ŋolo elosere Bes-Sakariya totena ŋasigarya keŋ aŋuna ke ejie, tokutakis ŋarupepe kec.

³⁴Inakis ikes ŋitome epiini ŋolo acuunitae ka ŋaraito ŋuna esibito ŋakamurya ŋuna acuunitae, ikotere todedeŋeta ŋitome aŋuna ke ejie.

³⁵Tokorakis ikes ŋitome najorei, a ŋolotom tokorakinae ŋikilyok aliput ŋulu anapito anawat kec ŋikotyo ŋulu arae ŋasuwa ka tonapito anakyes kec ŋakopiyae ŋuna arae ŋasuwa, aya daŋ ŋasigarya ŋamiae ŋakan ŋuna aseunitae, ŋuna ameto ŋaŋolei, ayakatar ŋolotom ekimar ŋol.

³⁶ebakeneneete ŋul ekiŋaren aneni daadaŋ ayai etom, neni daadaŋ elosi etom aloseneneete ikes kaapei pa emyeanakinete ikes etom kec.

³⁷Kidiama ŋitome adukokinitae a ŋakito ŋaduketa ŋuna aoyak ŋuna agogoŋ ka arapitae. Aenikinitae ŋaduketa ŋun lotome a ŋasaaja a ŋuna agogoŋ, ido aya nen ŋasigarya ŋaomwon ŋuna ajiete a nen, ayai daŋ nen ekameton ŋolo alo India.

³⁸Aponi torikinoe ŋasigarya ŋunace nawaetin a ŋitome, eburusiyarito ŋajorei ŋaarei aŋuna ka akitijiore ŋimoe, nai toya ŋitome kidiŋ ŋajorei ŋunaarei.

³⁹Ani ecauni akoloŋ, kimilyaut ŋaupala ŋuna etiyaunitae a egolid ka ŋasuwa tocaut ŋikamukumukui esibit ŋatocyo ŋuna enokete.

⁴⁰Apaki ŋin ealakina epeiwae a ŋasigarya a erwosit lokamukumukui, toya ŋasigarya ŋace nadipo a ŋikamukumukui, ido ecodete ikes elosete jik ibakarito pa emaranete.

⁴¹Abu tobul ŋituŋa daadaŋ ŋulu apotu kiirasi ecelet a ŋasigarya a ŋuna alalak a ŋun, eruye a ŋakejen a ŋituŋa a ŋul ka eruye a ŋiboro kec a ŋulujiet, anerae alalak ŋasigarya ŋun nooi ka agogoŋ daŋ alojie.

⁴²Nai apotu Yudas ka ŋasigarya keŋ toloto akitijikin ikes, aponi toarae ŋasigarya a erwosit ka Asiriya ŋamiae ŋakanikapei.

⁴³Apaki ŋin kiŋolik Eleasar ŋolo daŋ anyaritae Aparan atemar ayakasi lotom epei ŋiboro a erwosit ŋulujiet. Aoi iŋes akilo ŋuluce daadaŋ, totamak iŋes atemar edokit tokona erwosit etom ŋol.

⁴⁴Aŋun, abu iŋes tojal akiyar keŋ aŋuna ka aiunia ŋituŋa keŋ ka ikotere eruunio ekiro keŋ ŋikaru ka ŋikaru.

⁴⁵Toem iŋes emam akuryanu tooma najiore a ŋimoe ikotere edoli lotom ŋol, toar Eleasar ŋituŋa alowaetin a daadaŋ, ido totyakas ŋimoe alowaetin keŋ a daadaŋ.

⁴⁶Toloma iŋes kwap etom, kicum etom alowae a ŋolo alokwap toar, nai abu etom ŋol tocakakin kwap totik Eleasar toar.

⁴⁷Ani iŋolikinete Ŋiyudayan agogoŋu a erwosit ka epite ŋolo ejieoto ŋasigarya ka adedeŋu, apotu tosuros toema.

⁴⁸Apotu ŋasigarya a erwosit ka Asiriya kitipeiyosi Yerusalem akitiji ŋituŋa a Yerusalem, kiboikin erwosit Yudaya moru Sion.

⁴⁹Kisila erwosit ka ŋituŋa a Bes-Sur, ido apotu ŋituŋa ŋul kimyekis etaun, anerae amamu akimuj a nen ŋina etemokinio kimujae apaki ŋina agolokinitere ikes lotaun, anerae arae ekaru ŋol ŋolo a ŋikanikaarei, amaikina ŋimanikorin kieŋut nyitae.

⁵⁰Aŋun, abu erwosit ka Asiriya kikama Bes-Sur, kiwuak ŋasigarya ŋace akiyok etaun.

⁵¹Kiboikin nai erwosit ka ŋasigarya keŋ kiŋaren akibois ŋina asegan, kiriyata a nen ŋirwa ŋulu alalak. Todukok ŋaduketa ŋuna aoyak ŋunajiet aŋuna ka akikamar etaun, tosiponok ŋiboro ŋuludoket ŋulukimasanaret akim ka ŋamoru, ŋulugumanaret ŋikaleŋeleŋe ka ŋulupetonoret ŋamoru.

⁵²Apotu Ŋiyudayan daŋ kitemonokis ŋiboro kec ŋuludoket ŋulu ekwaan ka ŋulu a ŋimoe kec tosodi tojioto ŋirwa ŋulu alalak.

⁵³Nai amamukatar ikes akimuj ŋina eŋadatae, anerae arae ekaru ŋol ŋolo a ŋikanikaarei ekaru ŋolo nyitaununeere akimuj, kepotu ŋituŋa ŋulu amotunosi aŋuna a ŋimoe Yudaya aiun ŋulu pa arae Ŋiyudayan kirikasi akimuj ŋina kidoŋit neni iŋadao akimuj.

⁵⁴Ŋikilyok ŋidikudyo bon kidoŋito nakibois ŋina asegan, kepotu ŋuluce kielaros lorerya kec, anerae kebu akoro tonomo ikes nooi.

⁵⁵Kiira Liasias atemar keboŋu Pilipo ŋolo kebu erwosit Antiokus eriŋa eyari toseu akitopoloun lokoku ka Antiokus aŋuna ka aruwor erwosit.

⁵⁶Kiira iŋes atemar keboŋu iŋes alo Perisia ka Media ka ŋasigarya ŋuna arukoritotor iŋes inaa kaapei ka erwosit ka atemar ecamit Pilipo akikamar apukan.

⁵⁷Aŋun, abu Liasias tolimok atipei ŋasigarya keŋ aboŋun alojie, tolimok erwosit ka ŋikarikok a ŋajorei ta ŋasigarya tema, “Ikipalagagia iwon a ŋinakoloŋit, aditeu tari akimuj yok, egogoŋ ŋituŋa ŋulu ikitiji iwon ka nabo daŋ iitana iwon akitiya ŋakiro ŋuna apolok ŋuna atakanut napukan yok.

⁵⁸Aŋun, ocamunos ka ŋituŋa lu, esila ka ikes ka ŋituŋa a akwap kec daadaŋ.

⁵⁹Ocamakisi ikes toyara iwuapito ŋikisila kec lopite ŋolo sek etiyaata ekiŋaren, anerae arae aŋuna a ŋikisila kec a ŋulu aponi iwon tolemarae, iŋes aŋoeta ka aponiata kitiyaata ŋakiro ŋun daadaŋ.”

⁶⁰Apotu ŋakiro ŋun kitalakasi erwosit ka ŋikarikok a ŋajorei, ido kiyakiya ŋituŋa neni a Ŋiyudayan alimokin ikes atemar esila, ido apotu Ŋiyudayan tocamut ekisil.

⁶¹Aŋun, apotu erwosit ka ŋikarikok a ŋajorei kikoŋo neni a Ŋiyudayan. Aŋakiro a ŋun, apotu Ŋiyudayan kimyekis ŋakiboisyo ŋunajiet.

⁶²Nai ani elomari erwosit lomoru Sion ka iŋolikini ŋaduketa ŋunajiet, ŋuna aya nen erae ŋuna agogoŋ nooi, toŋer akiwuap ŋakiro ŋuna sek ekoŋit iŋes, ido tolimok ŋasigarya keŋ aritaar arwatata daadaŋ.

⁶³Ekaku tolot iŋes atipei toboŋo Antiokus. Toryamu iŋes Pilipo kikama etaun, nai abu erwosit kitiji Pilipo tari ŋina ekamarya etaun.