Read ngakarimojong 1 Ŋimak. 8 Bible Online

1 Ŋimak. 8 - ngakarimojong bible

1 Ŋimak. 8

¹Kiira Yudas ŋuna ka arwonu a ŋiromanin, atemar egogoŋ ikes nooi alojie ka atemar etenito ikes akiŋarakin ŋituŋa daadaŋ ŋulu ecamito akirii ka ikes, atemar iikinito ikes akoneo neni a ŋulu epote neni kec

²ka atemar egogoŋ ikes nooi alojie. Keponi tolimokinae Yudas ŋuna a ŋijiesyo a Ŋiromanin ka ŋiticisyo kec ŋulu etoodiyarito atitinyu kec, ŋiticisyo ŋulu kepotu ikes kitiyata neni a ŋituŋa a Gaul, epite ŋolo keponiata ikes kilouniata ŋituŋa ŋul ka kitiŋakis ikes akitac ocur neni kec.

³kiira daŋ Yudas ŋuna kepotu Ŋiromanin kitiyata anakwap a Sipain aŋuna ka akikamarya ŋakiboisyo ŋuna abokere esilipa ka egolid a nen

⁴ka epite ŋolo kikamaryata ikes akwap ŋin daadaŋ a epite a ŋolo ayeete ikes ŋakiro ka a ŋolo ka akidaŋidaŋ ŋakiro, tari ŋina alwania akwap ŋin aneni eboiyoto ikes. Kepotu daŋ ikes kilout ŋirwosi ŋulu kepotu kitijioto ikes ŋulu keponito anakisaleta a akwap, tari ŋina amunyaryata ŋirwosi ŋul ka kinyasut ŋakwapin ŋuna epukato ŋirwosi ŋul, kitiŋakis ŋulucerwosi akitac ocur neni kec a ŋolokaru.

⁵Kepotu Ŋiromanin kilout alojie Pilipo ka erwosit Periseus ŋolo a Macedonia ka ŋice ŋulu apotu tocamut akitijikin ikes.

⁶Kepotu daŋ Ŋiromanin kilout Antiokus ŋolo apolon, erwosit ka Asia ŋolo kebu tolot akitijikin ikes a ŋitome a amiat ka ŋatomoniarei ka ŋasigarya ŋuna ameto ŋaŋolei ka ŋagaari ŋuna eritae a ŋaŋolei ta ŋasigarya ŋuna alalak nooi kilout Ŋiromanin iŋes;

⁷kikamasi iŋes eyari totubut atemar emaikina iŋes ka ŋirwosi daadaŋ ŋulu epote akipuka ekaku keŋ totaca ocur ŋolo alalan ka inanakis ŋituŋa ŋulu eyaaryo nakwap a Ŋiromanin ka tojalakis ŋakiboisyo kec ŋace ŋuna ajokak neni a Ŋiromanin,

⁸ikwapei India, Media ka Lidia. Apotu Ŋiromanin yaasi ŋakwapin ŋun, ido inakis neni a erwosit Eumenes.

⁹Toyeut Ŋigirik aponare amunyar Ŋiromanin,

¹⁰nai kepotu Ŋiromanin toyenut ŋakiro ŋun, ido kiyakiyasi ekarikon a ŋasigarya ka ŋasigarya akitijiore Ŋigirik. Towanae ka toarae Ŋigirik ŋulu alalak, torikosi Ŋiromanin ŋaberu ka ŋidwe a Ŋigirik toŋatasi ŋiboro kec ka kikamasi akwap kec, toritaanasi ŋaduketa kec ŋunajiet ka kituruwosi Ŋigirik ŋipi kec tari nakoloŋit na.

¹¹Ŋakwapin ŋunace ka ŋiculeta a anam daadaŋ ŋuna apotu toŋero ikes, apotu Ŋiromanin tomunaasi ka kituruwosi ŋituŋa kec ŋipi.

¹²Nai torubakis erimaaka neni a ŋikonei kec ka neni a ŋulu ekinyomito ikes. Kepotu Ŋiromanin kilout ŋirwosi ŋulu aya nakwapin ŋuna aapiyete, kori ŋuna alwaka, ido ŋirwosi daadaŋ ŋulu apotu kiirasi ŋakiro a Ŋiromanin, apotu tokuryaketa aŋuna kec.

¹³Ŋulu acamito ikes akiŋarakin ka akituruwor ŋirwosi, apotu kituruwosi ŋirwosi, ido ŋulu acamito ikes alemar anapolou alemanarete, etopolooritae Ŋiromanin nooi.

¹⁴Kikote neni daŋ, mam Eromanit abu tonap ebokot, kori tonap elou ŋolo kipurat-areŋan akitoodiunia akituro keŋ ikwapei arwonit,

¹⁵nai apotu ikes toyeut aŋuna kec atukot ŋina epukat akwap, a ŋinakoloŋit eboiyonokin ŋikatukok ŋamiae ŋauni ka ŋatomoniarei akiyanun ka acamun anakiro a ŋuna emaikina kitiyae aŋuna a ŋituŋa, kipukaata ikes ŋituŋa ejok.

¹⁶Ekinyomeneneete ikes ekile epei a ŋolokaru akipuka ikes ka apolokinit akwap kec daadaŋ apupete ikes daadaŋ ŋakiro a ekile a ŋol, ido amam ediŋet, kori arakao alokidiŋ kec.

¹⁷Aŋun, abu Yudas toseu Eupolemis lokoku a Yoana a ŋolo arae lokoku ka Akos, toseu daŋ Yason ŋolo arae lokoku ka Eleasar, kiyakiya ikes Roma akitogogoŋ akoneo ka akirii ka Ŋiromanin

¹⁸ka alemar akisicanit ikes, anerae apotu ikes taanyut atemar eturuworito Ŋigirik Ŋisirael ŋipi jik.

¹⁹Toloto ikes Roma, nakwap ŋina alwanan nooi tolomasi nagule ŋina eboiyonokin ŋikatubok, kirworo neni kec temasi,

²⁰“Ikiyakuunito isua neni kus Yudas ŋolo daŋ enyaritae Makabeus ka ŋikaitotoi keŋ ta Ŋiyudayan daadaŋ aŋuna ka acamun akirii ka iyes ka akisil ka iyes, ikotere eruworoi isua ŋulu ikiriit ka iyes ka ŋikonei kus.”

²¹Apotu ŋakiro ŋun kitalakasi ŋikatukok a Ŋiromanin,

²²ŋakiro ŋuna apotu ikes kigira ikwapei aboŋokinet a akiŋitakinet ŋuna egiritae nasuwat ŋinadapal ŋina enyaritae eburonis, ŋuna apotu ikes kiyakiyasi Yerusalem, kiŋadae nen ikwapei ŋuna etamunitere ekisil ka akirii ikes nu,

²³“Ikilipi toyakas ŋakiro ejok aneni a Ŋiromanin ka Ŋiyudayan ŋulu eya nanam ka nakwap a Ŋiyudayan ŋikaru ka ŋikaru, ikilipi atemar nyiryama ikes ka aaro a ekileŋ ka nyiryama ikes ka ŋimoe jik.

²⁴Ani keyakaun ejie lotuŋa a Roma, kori neni a ŋituŋa a ŋulu eriitotor ikes anakwap a ŋina ipukato ikes a daadaŋ,

²⁵eriyete Ŋiyudayan ka ikes a ŋitai kec a daadaŋ, lopite ŋolo iitanitotor ŋakiro ikes akitiya.

²⁶Nyeinakinete ikes akimuj, kori ŋikinyom, ŋiboro ŋulujiet, ŋisiliŋa, kori ŋameeli neni a ŋituŋa a ŋulu erae ŋimoe, lopite ŋolo atubunioto ŋituŋa a Roma, ido emaikina ikes kitiyata ŋuna emaikina ikes kitiyata emam etacit.

²⁷Ikwaŋinapei, ani keyakaun ejie nakwap a Ŋiyudayan ekiŋaren itiyaete Ŋiromanin ŋuna emaikina aŋuna a ŋulu eriitotor ikes lopite ŋolo iitanitotor ŋakiro ikes akitiya,

²⁸ido nyeinakinete Ŋiromanin ŋimoe ŋikinyom, ŋiboro ŋulujiet, ŋisiliŋa kori ŋameeli lopite ŋolo atubunioto ŋituŋa a Roma, emaikina ikes kiwuapa ŋakiro ŋun emam amodiyo.

²⁹Aŋakiro a ŋun, apotu Ŋiromanin tocamunos ka Ŋiyudayan.

³⁰Ani ekaku kedaut ŋituŋa ŋul acamun anakiro kec, ido kiitana akiyatakin ŋace, kori alemar, epedorete akitiya ŋun lopite ŋolo ejoikinitor ikes, tosodi ŋuna iatakinete ikes, kori elemarete, eruwor ŋuna ecamuna.

³¹“Ani eruwor aronis ŋina itiyae erwosit Demetrius neni a Ŋiyudayan, egirakin isua iŋes abaruwa, alimokin iŋes ŋakiro nu, ‘Kaanukiro isicanitor iyoŋ nooi Ŋiyudayan ŋulu erae ŋikonei kosi ka ikiriit ka isua?’

³²‘Ani nabo kepotu ikes neni kosi akiŋita akiŋarakino anakitijiore iyoŋ, ikiuni isua ikes, ido ikitijikin iyes ananam ka aneni emam ŋakipi.’ ”