Read ngakarimojong 1 Ŋimak. 9 Bible Online

1 Ŋimak. 9 - ngakarimojong bible

1 Ŋimak. 9

¹Ani iirari Demetrius atemar aari Nikanor ka ŋasigarya keŋ alojie, kiyakiya nabo Bakides ka Alicimus nakwap a Yudaya akiyakiyaret ŋina a ŋaarei, torukosi Bakides ka Alicimus ta ŋasigarya ŋuna ka Asiriya.

²Kitoro ikes lorot ŋolo elosere Gilgal, ido kirikaut etaun Mesalos ŋolo ayai Aribela, kikamasi ikes Mesalos ka toara ŋituŋa ŋulu alalak.

³Elap ŋolo esyaunan alokaru a ŋolo a amiat ka ŋatomonikan ka ŋiarei, kirikaut ikes Yerusalem,

⁴torotokis nai a nen toloto Berea erukito ka ŋasigarya ŋuna alosete a ŋakejen ŋalipyo ŋatomoniarei ka ŋasigarya ŋalipyo ŋaarei ŋuna adokito ŋaŋolei.

⁵Aurumikinit Yudas ka ŋasigarya keŋ ŋimoe alo Elasa, arukito iŋes ka ŋasigarya ŋalipyo ŋauni ŋuna aseunitae.

⁶Ani iŋolikinete ikes ŋasigarya a ŋimoe kec ŋuna alalak nooi, tokuryaketa ikes nooi, tosiwa ŋasigarya a Ŋiyudayan ŋace aneni aurumikinitotor ikes ŋimoe akitodol neni edoŋito ŋikilyok ŋulu pa adeparit ekimar kec ŋamiae ŋakanikauni.

⁷Ani iŋolikini Yudas atemar kesiwa ŋasigarya keŋ ka aapi akitijikin ikes, abu etau keŋ tolilimiyo, anerae amam iŋes apaki ŋina ecunakinia ŋasigarya keŋ.

⁸Kiyalaar akuwan a Yudas, nai tolimok iŋes ŋasigarya ŋuna apotu kidoŋo tema, “Onyoutu etijikisi ŋimoe yok, acepaki eryamunio iwon agogoŋu ŋinakitijiet ikes.”

⁹Nai apotu ŋasigarya ŋun kikatakis akisimyekin Yudas ejie ebasi, “Nyikiyakar iwon agogoŋu. Ejok iwon aiun akiyar yok tokona, oboŋosi, ido oboŋutu ka ŋiyeneta yok etijioto ŋimoe yok, ikikudyoko iwon nooi.”

¹⁰Nai tolimu Yudas tema, “Nyikiryama ca iwon ka akitiya ŋakiro ŋuna ikote ŋun ŋuna ka akiem aneni kec. Ani kedolit apaki yok, otwaka ikititiny aŋuna a ŋiyeneta yok, ikotere nyeyakaun ŋakiro ŋuna nyikiyenere iwon anapolou yok.”

¹¹Tolomut nai ŋasigarya a Bakides aneni eboiyoto, kicodosi aŋuna ka akiiryakin. Totyakas ŋasigarya ŋuna adokito ŋaŋolei ŋarwa ŋaarei ka kiŋareno ŋulu a ŋadoya ka ŋikagumak a ŋikaleŋeleŋe, lopite ŋolo eŋarenitotor ŋikajiok ŋulu arwok daadaŋ.

¹²Ayai Bakides lokicod ŋolo aloteten ajore. Aya ŋasigarya ŋunace kidiŋ, toya ŋasigarya ŋuna ameto ŋaŋolei nawaetin kec, kicodosi ikes ekusete ŋarupepe, tokutakis ŋikilyok ŋulu arukitotor Yudas daŋ ŋarupepe kec.

¹³Tomaranik akwap aŋuna ke ecelet a ŋasigarya a ŋajorei a ŋunaarei, tojioto ikes ameun taparacu tari eboŋ.

¹⁴Taanyu Yudas atemar aya Bakides ka ŋasigarya ka Asiriya lokicod ŋolo aloteten, ido arukito ŋikajiok ŋulu adedeŋak daadaŋ ka iŋes.

¹⁵Kilout Yudas ka ŋasigarya keŋ ŋimoe ŋulu aya lokicod ŋolo aloteten, kiwuapa Yudas ka ŋasigarya keŋ ikes tari moru Asotus.

¹⁶Ani iŋolikinete ŋasigarya a Bakides ŋuna aya lokicod ŋolo alokedyeny atemar eloun ŋasigarya kec ŋuna aya lokicod ŋolo aloteten, kibelekinos kiwuapakis Yudas ka ŋasigarya keŋ alokaku.

¹⁷Topuruu ejie nooi ka towanae ka totwaka ŋasigarya ŋuna alalak a ŋajorei a daadaŋ.

¹⁸Toarae Yudas daŋ, ido toema ŋasigarya keŋ ŋunace.

¹⁹Apotu nai Yonasan ka Simon yaasi akuwan alokaato kec tonukakis neni anukitae atapapaa kec alo Modein,

²⁰ido kigworo aŋuna keŋ. Kiwololoto Ŋisirael daadaŋ nooi aŋuna keŋ, kigworo ŋirwa ŋulu alalak ebasi,

²¹“Kaanukiro atwania ekajion ŋolo arwon ekaiunan a Ŋisirael.”

²²Ŋiticisyo a Yudas ŋuluce daadaŋ ka ŋijiesyo keŋ ka ŋiticisyo ŋulu ka atitinyu ŋulu abu iŋes kitiya ka apolou keŋ, nyigiritae lokitaabo edio, nai alalak ŋiticisyo keŋ nooi.

²³Ekaku a atwanare a Yudas, kielun ŋikesyaak anakwap a Isirael a daadaŋ, totakanut ŋulu etiyaete aronis daadaŋ.

²⁴Alorwa a ŋul, toyakaun akoro ŋina alalan, kiwuapakis ŋituŋa a akwap kec daadaŋ ŋikesyaak ŋul,

²⁵toseu Bakides ŋituŋa ŋulu pa anupito Akuj kituruwo ikes ŋikapolok anakwap kec.

²⁶Kimimata ikes, kiwara ŋulu sek arae ŋikonei a Yudas, ido yaut ikes neni a Bakides a ŋolo abu kisican ikes inyaŋi ŋakiro kec, tobolyar ikes.

²⁷Aŋun, toyakaun akiyaloloŋ Isirael, akiyaloloŋ ŋina nyeyakauna ŋinapei aŋopiyaryata ŋikadwarak alokidiŋ kec.

²⁸Apotu nai ŋikonei a Yudas daadaŋ tocunakinos tolimokis Yonasan temasi,

²⁹“Ŋinapei atwania lokaato kon Yudas, mam ituŋanan ŋini ikwaan ka iŋes ŋini elosi akitijikin ŋimoe yok ka Bakides ka akisican ŋituŋa yok ŋulu ikiremokino iwon.

³⁰Aŋun, ikiseu tokona isua iyoŋ nakoloŋit na kilunyokin neni keŋ ikwapei ekepukan kosi ka ekarikon kosi torik ajore aŋuna kosi.”

³¹Aŋun, tocamu Yonasan aruwor ekarikon apaki ŋin kilunyokin neni a Yudas alokaato keŋ.

³²Ani eyenuni Bakides ŋakiro ŋun, kiwuar akiar Yonasan.

³³Nai toyenut Yonasan ka Simon lokaato keŋ ta daadaŋ ŋulu arukitotor iŋes ŋakiro a Bakides, toloto naloŋisat ŋina a Tekoa kiboiyosi diyete abwal ŋina ka Asipar.

³⁴Toyenu Bakides ŋakiro ŋun akoloŋit ŋina a Sabato, ido todoka iŋes ka ŋirukitos keŋ Yorodan totuboros ekekwaye aŋolol.

³⁵Aŋun, kiyakiya Yonasan lokaato keŋ ikwapei ekarikon a ŋituŋa a ŋulu alalak. Kilip Ŋinabatea ŋulu arae ŋikonei keŋ tocamut akiŋadakin aŋuna keŋ ŋiboro ŋulu alalak ŋulu ayakatar ikes.

³⁶Nai abu ekal a Yamibiri a ŋolo a Medeba bu kikama Yoana ka ŋiboro daadaŋ ŋulu ayakar, yaa daadaŋ torotokinioto.

³⁷Ekaku a ŋakiro a ŋun, tolimokinae Yonasan ka lokaato keŋ Simon ebe, “Inumunumete ŋituŋa a ekal a Yamibiri ŋasuban ŋuna a ekiitanu ka itenarito ikes ateran, nakoku a ekapolon a epei a ŋolo a Kanaan, itenarito alo Nadabas ka erukito ka ŋituŋa ŋulu alalak.”

³⁸Ani etamunete ikes epite ŋolo aarere lokaato kec Yoana, toloto toŋopa aepeiwae emoru.

³⁹Toŋoleŋolekis ikes a nen, kiŋolikis ŋituŋa ŋulu alalak ŋulu emwomworete elosete iwokito ŋiboro ŋulu alalak, potu kiŋaren ateran kaapei ka ŋikonei keŋ ka ŋikaitotoi keŋ akisiryam ikes eramete ŋiburuni ka eosi ka eyakatar ŋiboro ŋulujiet ŋulu alalak.

⁴⁰Kipumunos nai Yonasan ka ŋirukitos keŋ, aneni sek aŋopitotor, kitijikis ŋituŋa ŋul, kisyakis akiar. Towana ka toarae ŋulu alalak, ido toema ŋuluce moru, yaasi nai Ŋiyudayan ŋiboro kec daadaŋ.

⁴¹Aŋun, kilocokin ŋasuban ŋuna ke ekiitanu toruwor akigworo, ŋikaeok ŋulu sek aeosi ŋieosyo ŋulu ka alakara togeikis akiwolol.

⁴²Kedaut ikes akinyaŋar ejok ŋaokot alokaato kec, toboŋosi lopworin a Yorodan.

⁴³Ani iirari Bakides ŋakiro ŋun, tolot erukito ka ŋasigarya ŋuna alalak akoloŋit ŋina a Sabato, todolo lokipetetyo a Yorodan.

⁴⁴Tolimok Yonasan ŋikilyok ŋulu arukitotor iŋes tema, “Onyoutu tokona ojioto aŋuna a akiyar yok, anerae nakoloŋit na nyejokak ŋakiro lopite ŋolo sek.

⁴⁵Kiŋolikisi! Eyai ejie kiŋaren yok ka kaku yok, eyakasi ŋakipi a Yorodan lowae lo ka lowae ŋol, toyai nabo daŋ ekipwor ka amoni, emam neni epedoryo iwon akitor.

⁴⁶Kigworokisi tokona Akuj ŋina anakuj ikotere ilakunosi iyes anapedor a ŋimoe yok.”

⁴⁷Togeu nai ejie, kiwopeiyo Yonasan akan keŋ akitel Bakides, nai abu Bakides toem toboŋo kaku ajore.

⁴⁸Toporosi nai Yonasan ka ŋirukitos keŋ tolomasi naŋolol Yorodan, kikwaŋaros ekekwaye a ŋolol, ido apotu ŋimoe nyedoka aŋolol akitijikin ikes.

⁴⁹Akoloŋit ŋin, aponi toarae ŋasigarya a Bakides ŋuna aapikinito aliput.

⁵⁰Toboŋo nai Bakides Yerusalem, toduk ŋitaunio ŋulu agogoŋok Yudaya, todukok Yeriko, Emaus, Bes-Oron, Besel, Timinas, Parason ka Tepon, todukonok Bakides ŋarwatatain ŋuna aoyak lotaunio ŋul kiwuanak tari ŋipukei ka ŋasuwa ŋunakiloryet ŋipukei.

⁵¹Tosodi kiwuanak ŋasigarya lotaunio ŋul akisican Ŋisirael.

⁵²Abu daŋ Bakides toduk ŋaduketa ŋunajiet lotaunio lu: Bes-Sur ka Gasara todukok daŋ Yerusalem aduketait ŋina kirereet, kiwuak ŋasigarya lotaunio ŋul ka ŋakais ŋuna iŋadao akimuj.

⁵³Ya ŋidwe ŋulusapa ŋulu a ŋikilyok a ŋulu ayenen anakwap Yudaya erae ŋienan; kiwuak ŋasigarya ŋuna eyokiyete ikes alo kai a ŋinakirereet a ŋina ayai Yerusalem.

⁵⁴Elap ŋolo a ŋiarei alokaru a ŋolo amiat ka ŋatomonikan ka ŋiuni, tolimok Alicimus ŋituŋa aritaar arwatata ŋina a alapatu a ŋina alotooma akibois ŋina asegan. Abu iŋes toritak kwap ibore ŋini sek aris ŋikadwarak kitiyata.

⁵⁵Nai ani isyakini iŋes akitiya ŋun, abu akuwan keŋ tolilimiyo, todaun epite ŋolo elosyo etic keŋ kiŋaren, tojoŋo iŋes akirworo ka tolilimiyo, todaun nai alimokinet ituŋanan ŋakiro, kori ŋololimokinet ŋituŋa ŋakiro ŋadi aŋuna a ekal keŋ.

⁵⁶Abu Alicimus totwan apaki ŋin eryeba nooi.

⁵⁷Ani eyenuni Bakides atemar atwana Alicimus, toboŋo neni a erwosit, toyakaun ekisil nakwap a Yudaya ŋikaru ŋiarei.

⁵⁸Totuko nai ŋulu pa aminasi ŋikisila aruruma temasi, “Kiirasi! iboiyete Yonasan ka ŋirukitos keŋ emam ŋace ka eiuna. Aŋun, onyarautu tokona Bakides toboŋu, ikamari iŋes ikes alotooma akuwar apei.”

⁵⁹Toloto nai ikes kirworiut ŋakiro kec ka Bakides.

⁶⁰Bu Bakides erukito ka ŋasigarya ŋuna alalak, ido kiyakiya ŋabaruwae anakimunono neni a daadaŋ a ŋulu ariito ka iŋes alo Yudaya, alimokin ikes kikamut Yonasan ka ŋirukitos keŋ, nai nyepedosi ikes akitiya ŋun, anerae aponi toyenunae ayeunet kec.

⁶¹Kikamut Yonasan ka ŋirukitos keŋ ŋikilyok ŋulu eapiyarito ŋatomonikan alo Yudaya ŋulu arae ŋikarikok anakiro a ŋuna ka akikamun ikes, ido apotu toara ŋikilyok ŋul daadaŋ.

⁶²Toloto nai Yonasan ka ŋikilyok ŋulu arukitotor ta lokaato keŋ Simon Bes-basi tooma aloŋisat. Todukokis nabo neni amunaara alo Bes-basi neni keponi tomunaarae, ido toduko nen ŋaduketa ŋunajiet.

⁶³Ani eyenuni Bakides ŋakiro ŋun, tocunak ŋasigarya keŋ daadaŋ kiyakiya ŋituŋa alimokin ŋikilyok ŋulu a Yudaya ŋakiro.

⁶⁴Toloto nai tourumikis Bes-basi irikaunito. Kitiji Bakides ŋituŋa a Bes-basi ŋirwa ŋulu alalak, kitiyau tari ŋiboro ŋulujiet aŋuna ka akikamarya etaun.

⁶⁵Nai abu Yonasan kimyek Simon lokaato keŋ alotaun, tolot iŋes nariet, torukosi iŋes ka ŋikilyok ŋidikudyo.

⁶⁶Toar Yonasan Odomera ka ŋiyeneta keŋ ka ŋituŋa a Pasiron, toar ikes aloeemae kec.

⁶⁷Ani ilounio ŋituŋa ŋul, apotu toloto kaapei ka ŋasigarya a Yonasan akitijikin ŋasigarya a Bakides, tojiunos Simon ka ŋirukitos keŋ alotooma etaun, kicunyasi a akim ŋiboro ŋulujiet ŋulu ewuakinit Bakides diyete etaun.

⁶⁸Tojioto ikes ka Bakides, kilounae Bakides, kitijioto ikes Bakides etiŋito ka agogoŋu, anerae apotu ŋakiro ŋuna ayeunit iŋes ka ŋuna abunitor iŋes toruwor ŋakoŋinae.

⁶⁹Aŋun, toŋoik Bakides ŋasyaanisya ŋuna anyaraunete iŋes abunore Yudaya, ido abu iŋes toar ikes ŋulu alalak. Totub nai iŋes aboŋor nakwap keŋ.

⁷⁰Ani eyenuni Yonasan ŋakiro ŋun kiyakiya ŋituŋa neni a Bakides ikotere ecamuni ekisil, tolacakinere ŋituŋa ŋulu apotu ŋimoe kikamasi.

⁷¹Tocamu Bakides ŋakiro a Yonasan kitiya lopite ŋolo eŋitar Yonasan, ido kikoŋ iŋes neni a Yonasan atemar nyiwari nabo iŋes akiwan Yonasan ŋirwa daadaŋ ŋulu ka akiyar keŋ.

⁷²Kinyakak Bakides Yonasan ŋituŋa ŋulu ekamari iŋes ekiŋaren anakwap a Yudaya, tolot nai nakwap keŋ, nyeboŋu nabo nakwap a Ŋiyudayan.

⁷³Aŋun, todaun ejie alo Isirael, kiboiyo Yonasan Mikimas, toruwor ekatubon ŋakiro a ŋituŋa, tomunya iŋes alo Isirael ŋituŋa ŋulu pa anupito Akuj.