Read ngakarimojong 2 Ŋimak. 1 Bible Online

2 Ŋimak. 1 - ngakarimojong bible

2 Ŋimak. 1

¹Ebunit abaruwa na aneni a Ŋiyudayan a ŋulu eyakasi Yerusalem ka nakwap a Yudaya, igiritae neni a ŋiyeneta kosi a Ŋiyudayan a ŋulu eyakasi Ijipit, ikimalae isua iyes ka ikigatakinitae isua iyes ekisil.

²Ikilipi kitiya Akuj ejok neni kus ka ikilipi totamu iŋes acamunet keŋ ka Aburaam, Isaka ka Yakob, ŋiketiyak keŋ ŋulu ekinyoma.

³Ikilipi ikiinak iŋes iyes daadaŋ ŋitai ŋulu ilipete neni keŋ ka akitiya acamit keŋ a ŋitai a ŋulu agogoŋok ka a ŋulu einakina akitiya ŋun.

⁴Ikilipi ikitocamu iŋes iyes ŋikisila keŋ ka ŋakiciketa keŋ ka ikilipi ikiinak iŋes iyes ekisil.

⁵Ikilipi kiira iŋes ŋakilipasinei kus ka tocamunos iyes ka iŋes, ikilipi nyikimyek iŋes iyes apaki ŋina iyakatar naronis.

⁶Ikilipi tokona isua a ne aŋuna kus.

⁷Alokaru a ŋolo a amiat ka ŋatomonikanikapei ka ŋikanikaomwon ipukat Demetrius, aponi isua Ŋiyudayan ikigirakin iyes abaruwa apaki ŋina ayakare isua locan ŋulu apipilak ŋulu apotu ikidolokis isua alokaru a ŋulu atupakinete ŋulu abunio Yosan ka ŋirukitos keŋ akitijiore akwap ŋina asegan ka ŋikepukak kosi,

⁸abu iŋes kicunya epuke a Yerusalem ka toar ŋituŋa ŋulu amam aronis etiyato. Aponi isua kilipae neni ke Ekapolon, ido abu iŋes kiira akilip kosi ka aponi isua inakinae amuronot ka ainakinet ŋina a ŋikinyom, aponi daŋ isua kinokakinae ŋitaae ka kiwuakinae ŋabopuloe lomesa.

⁹Aŋun, ikilimokini isua iyes atemar nyimyekis akitiya ŋasuban ŋuna a ŋisakaitei elap ŋolo a Kisilep ekaru ŋolo a amiat ka ŋatomonikanikauni ka ŋikanikauni.

¹⁰Ebunit abaruwa na aneni a ŋituŋa a Yerusalem ka Yudaya ta aneni a ŋikatukok a Ŋiyudayan ka Yudas, Igiritae neni ka Aristobulus, a ŋolo erae epei a ŋituŋa a ekal a ŋisacaradotin a ŋulu etyakunitae akitiya etic ka Akuj ka a ŋolo erae eketataman a erwosit Pitolemi ka neni a Ŋiyudayan a ŋulu eyakasi Ijipit. Ikimalae isua iyes ka ikigatakinit aŋaleu a ŋawat.

¹¹Ikwapei ikiunia isua Akuj alocan a ŋulu apipilak, ikilakara isua neni keŋ nooi aŋuna ikiunia isua aneni a erwosit,

¹²anerae abu Akuj kirita ŋulu etijiete etaun ŋolo asegan.

¹³Ani edoli ekarikon Perisia kaapei ka ŋasigarya ŋuna asibito nyepedoryo akiloun, aponi toarae ikes alo kai ka akuj a ŋina enyaritae Nanea, aaryo ikes kedaut ŋisacaradotin a akuj a ŋina enyaritae Nanea amodiun ikes.

¹⁴Abu Antiokus tolot nakibois ŋin, torukosi ka ŋikonei keŋ ŋice ŋulu ekinyoma, ikotere iŋes ya Nanea erae aberu keŋ, ido ya ŋisiliŋa ŋulu a akai a akuj a ŋin ikwapei ainakinet ŋina a ekiitanu.

¹⁵Ani kedaut ŋisacaradotin a akai ka akuj a Nanea acunakin ŋisiliŋa ka aris Antiokus kedolu nen erukito ka ŋikilyok ŋidikudyo, kelomu tooma neni italeo alomar alokai a ŋin, togolokis ŋisacaradotin ŋipukei atipei alokaku keŋ.

¹⁶Toŋaasi epuke ŋolo pa atakani alokidiama akai, kimasasi ŋamoru tooma kai, tocaka ekarikon ŋol ka ŋirukitos keŋ, ekaku kilenya ikes ŋawat kec, totubonosi ŋakyes kec, kimasasi kiŋa akai neni aya ŋituŋa.

¹⁷Kipuroe Akuj a ŋipitesyo a daadaŋ, Akuj ŋina abu kisican ŋulu apotu kitiyata ŋuna aronok.

¹⁸Ikwapei amaikina isua kitiyae ŋasuban ŋuna kitaleunet Akai ka Akuj ŋirwa ke elap ŋatomoniarei ka ŋikan, elap ŋolo a Kisilep, aponi isua totamakinae atemar itemokino akiteyenikin iyes ŋun, ikotere iyes daŋ itiyaete ŋasuban ŋuna a ŋisakaitei ka alopite a ŋol, itamunete epite ŋolo atakanunia akim apaki ŋina ainakinia Neemia ŋamuronisya kedau akiduk Akai ka Akuj ka namuroet.

¹⁹Apaki ŋina arikorere atapapaa yok Perisia, apotu ŋisacaradotin ŋulu anupak apaki ŋin yaasi akim anamuroet kiwua pa eyenio alotooma akare ŋina aonit, neni eteete ikes ejok nyeyenu ituŋanan idio.

²⁰Nai kelunyar ŋikaru ŋulu alalak, ikwapei ajokyata ŋun aneni ka Akuj, abu Neemia ikwapei eyakitor iŋes erwosit a Perisia, kiyakiya ŋiletok a ŋisacaradotin ŋulu ewuaito akim, akiom akim ŋin. Ani ikilimokinete ikes isua atemar nyeryamuna akim nai apotu toryamut ibore ŋini idikit tosibite akimyet, tolimok iŋes ikes aodun ibore ŋin ido yaut.

²¹Ani eyaunio ŋiboro ŋulu ka amuronot tolimok Neemia ŋisacaradotin awuatakin ibore ŋin nakito ka kidiama ŋiboro ŋulu edokokinitoe nakito.

²²Kedaun akitiya ŋun ka kelunyar adiopaki ka ani ecauni akoloŋ ŋina sek arapuwarito ŋidouwon, tonepu akim ŋina alalan, ido apotu ŋituŋa daadaŋ toumokis.

²³Ani eriŋa akim enomi amuronot, kilipete ŋisacaradotin ka ŋituŋa daadaŋ. Arae Yonasan arikit akilip, ido toboŋokis ŋuluce ka Neemia daŋ.

²⁴Elipete ikes ebasi, “Okoe Ekapolon, Ekapolon Akuj akasuban a ŋiboro a daadaŋ, irae iyoŋ Akuj ŋina etubulon ka ŋina agogoŋon, ŋina iyookino ka ŋina esyonon. Iyoŋ irae erwosit ka irimaana.

²⁵Iyoŋ bon ileleba ajokis, iyoŋ bon iyookino, irae Akuj ŋina etiron ka ŋina a ŋikaru ka ŋikaru. Iununui iyoŋ Ŋisirael anaronis a daadaŋ, ibu iyoŋ toseu atapapaa kosi ka ibu kitaleu ikes.

²⁶Tocamu amuronot na aŋuna a ŋituŋa kon a Ŋisirael a daadaŋ, kidar ŋituŋa kon ka kituruwo ikes ŋulu esegak.

²⁷Tocun iwapei ŋituŋa kosi ŋulu ielara, tolacak ŋulu ituruworitae ŋipi alotuŋa a ŋulugelae toyenut atemar irae iyoŋ Akuj kosi.

²⁸Kisican ŋulu isicanito ŋuluce ka ŋulu iturosi nooi.

²⁹Kiwuak ŋituŋa kon nakibois kon ŋina asegan, lopite ŋolo abunio Moses kiikinia.”

³⁰Toeoto nai ŋisacaradotin ŋieosyo.

³¹Kedau akim anomiyar ŋiboro ŋulu ayaunitae erae amuronot, tolimok Neemia ŋituŋa abukokin namoru ŋuna aburok ibore ŋini aliwan ŋini sek ayaunio ŋin, ŋini idoŋit.

³²Ani itiyakinio ŋun, torirau akim, nai ani ecauni akica ŋina ayai namuroet, toduŋe akim ŋin.

³³Ani eyenunete ŋituŋa ŋakiro ŋun ka elimokinio erwosit a Perisia atemar kebu ibore ŋini idikit min nakibois ŋina ewuaitotor ŋisacaradotin akim, apotu Neemia ka ŋirukitos keŋ kisitiyata ibore ŋin akicunyarya ŋainakineta ŋuna ka amuronot.

³⁴Abu erwosit kimimau ŋakiro ŋun, ido togol akibois ŋin, kituruwo iŋes akibois ŋin ŋina italeoritae.

³⁵Apotu erwosit ka ŋituŋa ŋulu amina iŋes inanakinos ŋainakineta ŋuna ajokak nooi.

³⁶Apotu Neemia ka ŋirukitos keŋ tonyarata ibore ŋini edikit ŋin “Nepisar” iŋes atemar akitaleuno, nai enyarito ŋituŋa ŋulu alalak iŋes “Napisa.”