Read ngakarimojong 2 Ŋimak. 10 Bible Online

2 Ŋimak. 10 - ngakarimojong bible

2 Ŋimak. 10

¹Apaki ŋin, apotu Makabeus ka ŋirukitos keŋ itenit Akuj ikes, kinyakut aneni a ŋimoe kec Akai ka Akuj ka etaun Yerusalem,

²apotu ikes tobwaŋabwaŋaasi ŋamuroeta ŋuna kepotu ŋituŋa ŋulu nyerae Ŋiyudayan todukokis nalapatu ŋina a ŋituŋa a daadaŋ ka kinyasut ŋakiboisyo ŋuna etaleiyorito sek ŋituŋa ŋul.

³Apotu kitaleut akibois ŋina asegan ka todukokis namuroet ace aŋuna a ŋamuronisya, ido ani kedaut akinokakin akim ŋina ekepunio anamoru, apotu inakis ŋamuronisya. Etiyaete ikes ŋun kelunyar ŋikaru ŋiarei ka apotu kicunyakis ekinyate, kinokakis ŋitaae ka torekis ŋamugati ŋuna ka ayakau a Ekapolon.

⁴Kedaut akitiya ŋun, apotu topero ebuburiyara, todyeka Ekapolon atemar nyecamak nabo todolokis ikes ŋican ŋulu ikote ŋulu apotu ikes toryamut ka ani keseca ikes nabo, kisyoni Akuj ikes kisican alotooma arimao, nai meere akipotokin ikes napedor a ŋituŋa a ŋakwapin a ŋulu eyenyak Akuj ka a ŋulu enyasak.

⁵Akoloŋit ŋinapei enyasuniata ŋigelaanotin akibois ŋina asegan, iŋes pei etaleunere akibois ŋina asegan, arae akoloŋit ŋin ŋirwa ke elap ŋatomoniarei ka ŋikan elap ŋolopei ŋolo enyaritae Kisilep.

⁶Apotu ikes kitiyata ka alelyanu ŋasuban ŋuna etaleunere akibois ŋina asegan, kitiyata ŋasuban ŋirwa ŋikanikauni, lopite ŋolo itiyaenenere ŋasuban ŋuna a ŋisakaitei, etamunito epite ŋolo erimitotor ikes alomoru ka anaturukanin a ŋityaŋ a ŋulu ka ariet ekiŋaren ŋirwa ŋidi ŋulu alunyarosi.

⁷Aŋun, apotu ikes toeto ŋieosyo ŋulu ka alakara neni a Ekapolon a ŋolo abu kitepedo ikes akitaleun nabo akibois keŋ ŋina asegan. Etiyaete ikes ŋun etiŋito ŋaikita a elogilog, ŋaten ŋuna ebusak ka ŋakuii a ŋidukan.

⁸Apotu ikes totubut ŋakiro ŋun erae ŋuna ikoŋitoe ka ecamunitae atemar emaikina Ŋiyudayan daadaŋ kitiyaete ŋirwa ŋul a ŋolokaru.

⁹Epite ŋol iŋes atwania Antiokus ŋolo daŋ anyaritae Epipanes.

¹⁰Ikilimokini tokona isua iyes ŋakiro ŋuna apotu kitiyakinos alorwa a ŋulu epukator Antiokus Eupator ŋolo arae lokoku a ekile a ŋolo pa anupit Akuj ka ikilimokini isua iyes euruwuaka ŋakiro ŋuna a ŋican a ŋulu a ŋijiesyo.

¹¹Abu ekile ŋol apaki ŋina ekamarya iŋes apukan toseu ekile ece ŋolo anyaritae Liasias apolokinit etic ŋolo ka apukan ka aruwor ekepukan a Koelesiriya ka Poenicia.

¹²Abu Pitolemi ŋolo daŋ anyaritae Makiron, togeik akitiya ŋuna iyookino neni a Ŋiyudayan aŋuna ka aronis a ŋina aponi kitiyae neni kec ka abu kikatak akiboi kaapei ka ikes isilito.

¹³Aŋakiro a ŋun, apotu ŋikonei a erwosit kisitakis iŋes alokiŋaren Eupator. Abu Pitolemi kiira ebookoi erae iŋes ekalukinon a ŋinapaki a daadaŋ, anerae abu iŋes toŋer Cipirus akibois ŋina abu Pilometor kicikak neni keŋ ka abu toriwo ka Antiokus Epipanes. Ani ayenuni Pitolemi atemar pa apedorit iŋes araakau ituŋanan ŋini ikinyoma alotic keŋ, abu tomat ibore ŋini aaran kiŋalakin totwan.

¹⁴Ani ituruworyo Gorigias ekepukan a akwap a ŋin, abu iŋes torubak eyakar ŋasigarya ŋuna epaŋgatae, ido a ŋinapaki alosenene iŋes akitijiore Ŋiyudayan.

¹⁵Pa arae ŋun bon, apotu Ŋiidumean ŋulu ekamarito ŋakiboisyo ŋunajiet torubakis isicanito Ŋiyudayan, apotu ikes kijaut ŋituŋa ŋulu eritunitae alo Yerusalem, kimukekis jik akitolot ejie kiŋaren.

¹⁶Nai apotu Makabeus ka ŋasigarya keŋ, kedaut akilip neni ka Akuj edyekito iŋes ajiore aŋuna kec, apotu toema naduketa ŋunajiet ŋuna ayakasi Ŋiidumean.

¹⁷Apotu Makabeus ka ŋirukitos keŋ kitijikis Ŋiidumean nooi, kikamasi ŋakiboisyo, tobwaŋa ŋulu ajiete alokidiama arwatata ka toara daadaŋ ŋulu apotu ikes kiiryakinotor, apotu ikes toara ŋulu pa akudyoko akilo ŋalipyo ŋatomoniarei.

¹⁸Ani eemete Ŋiidumean ŋulu adolito ŋalipyo ŋakanikaomwon akiŋop anaduketa a ŋuna agogoŋok tooyak, apotu toema nen eyakatar ŋiboro ŋulujiet ŋulu epedoryata abwaŋia ŋasigarya a Makabeus ŋuna erikaunito etaun,

¹⁹abu Makabeus kimyek Simon ka Yosepu ka Sakeus daŋ ta ŋasigarya keŋ ŋuna apedorito agolokin Ŋiidumean ŋul tooma naduketait, ido abu iŋes tolot nakiboisyo ŋuna eitanitere iŋes nooi.

²⁰Nai apotu ŋituŋa ŋulu arukitotor Simon ŋulu eburito ŋisiliŋa nooi tocamut akaluŋuluŋut aneni a Ŋiidumean a ŋulu agolokinitoe naduketa ŋuna aoyak, ido kedaut akijaun ŋakiloi ŋatomonikanikapei ka ŋaomwon ŋuna a esilipa, apotu kimyekis Ŋiidumean ŋice tosiwa.

²¹Ani elimokinio Makabeus ŋakiro ŋuna kepotu kitiyakinos, abu Makabeus tocunak ŋikarikok a ŋituŋa, kisitak ŋituŋa ŋulu acamunete akaluŋuluŋut tolimok atemar apotu ŋituŋa ŋul, togyelasi ŋiyeneta kec aŋuna alacakineta ŋimoe akitijiore ikes.

²²Abu nai Makabeus toar ŋikilyok ŋulu apotu toruworos ŋikalukinok ŋul, ido kikama atipei ŋaduketa ŋunaarei ŋun ŋuna aoyak.

²³Aŋuna eloununuya Makabeus ŋimoe alojiesyo keŋ a daadaŋ, abu iŋes toar ŋituŋa ŋulu edeparito ŋalipyo ŋatomoniarei anaduketa a ŋunajiet a ŋunaarei a ŋun.

²⁴Apaki ŋin, abu Timoteo ŋolo sek aris Ŋiyudayan kilout, tolimok ajore ŋina alalan ŋina a ŋasigarya a ŋuna epaŋgatae, tonyarau alo Asia ŋasigarya ŋuna alalak ŋuna ameto ŋaŋolei. Abu iŋes bu ecamit akikamar Yudaya ka agogoŋu.

²⁵Ani eapiyari iŋes Yudaya, apotu Makabeus ka ŋirukitos keŋ kipurupurakis apuwa nakyes kec tonapa anacirin kec ŋiguniyae ilipete neni ka Akuj.

²⁶Toryediko ikes anadoketa a ŋuna alokiŋaren namuroet, todyeka Akuj akitiya ejok neni kec, lopite ŋolo elimunitere alokisila.

²⁷Ani kedaut akilip kec, tolemut ŋiboro kec ŋulujiet, toloto nenipei alwanan alotaun, ido ani edolete ikes diyete ŋimoe, apotu towua.

²⁸Ani iwalari akwap, tojikinos ŋajorei ŋunaarei, ekinyomito ŋasigarya a Makabeus atitinyu kec ka akiŋarakinet aneni a Ekapolon aŋuna ka akisiyookin etic kec ka akiloun, nai ekinyomito ŋasigarya a Timoteo ajiore alotooma aryenyeo.

²⁹Ani epuruuni ejie, totakanut ŋikilyok ŋulu acayete ŋawat kec edokito ŋaŋolei ŋuna aenikinitae ŋisaaja ŋulu etiyaunitae a egolid, eŋarenikinito ŋikilyok ŋul ŋasigarya a Ŋiyudayan.

³⁰Apotu ŋiarei a ŋikilyok a ŋul kiwuakis Makabeus kidiŋ kec, kiteriboosi iŋes a ŋaupala kec ka a ŋiboro kec a ŋulujiet, nyimyekis iŋes ewanio. Toguma ŋikilyok ŋul ŋimoe a Ŋiyudayan a ŋikaleŋeleŋe ka topeto a ŋamoru, akitodol ŋina eguryakinotor ka tomudukaketa, kielun a ŋipeipei toarae.

³¹Aponi toarae ŋimoe ŋalipyo ŋatomoniarei ka ŋamiae ŋakan pa imaritae ŋulu adokito ŋaŋolei ŋulu arae ŋamiae ŋakanikapei.

³²Abu Timoteo elope toem naduketa ŋunajiet ŋuna enyaritae Gasara neni aya ŋasigarya ŋuna alalak ŋuna arae Kaeres iŋes arikit.

³³Tolakaros nai Makabeus ka ŋirukitos keŋ kirikaut aduketait ŋin, yaasi ŋirwa ŋiomwon irikaunito.

³⁴Apotu ŋikilyok ŋulu aya tooma nen, ikinyomito agogoŋu a akibois a ŋin, torubakis iyenyete Akuj nooi ka elimununeete ŋakiro ŋuna aronok.

³⁵Nai ani taparacu epete ŋirwa ŋikan, apotu ŋisorok ŋatomoniarei ŋulu arukitotor Makabeus toŋoa nooi, anerae eyenyete ŋituŋa ŋul Akuj, tolilyata nooi, ido alotooma atitinyu, apotu todoka arwatata, toara ŋituŋa daadaŋ ŋulu apotu ikes kiryamunotor.

³⁶Todokasi ŋirukitos a Makabeus ŋice arwatata a aduketait a ŋinajiet alowae a ŋoloce, tolomasi tooma naduketait, kicunyakis ŋaduketa ŋuna aoyak tonom akim ŋituŋa ŋulu alalak ŋulu aya nen, ŋulu sek eyenyete Akuj. Tobwaŋa ŋice ŋipukei a aduketait, kitolomut ŋasigarya ŋunace tooma aduketait, ido apotu ikes kikamasi etaun.

³⁷Apotu ikes toara Timoteo ŋolo aŋopit alotooma akare, toara daŋ Kaereas lokaato keŋ ka Apolopanes.

³⁸Kedaut ikes akitiya ŋakiro ŋun, toeoto ka tolakaros einakinito alakara neni a Ekapolon a ŋolo abu torimaaniar aneni a Ŋisirael ka inak ikes akiloun ŋimoe kec.