Read ngakarimojong 2 Ŋimak. 11 Bible Online

2 Ŋimak. 11 - ngakarimojong bible

2 Ŋimak. 11

¹Ekaku a ŋakiro a ŋun, nyelunyara apaki ŋina aoyan, abu Liasias ekeyokon a erwosit ka eyenet keŋ ŋolo ainakinitae apolokinit ŋakiro a apukan kiira ŋuna kepotu kitiyakinos. Abu iŋes toŋoo nooi,

²tocunak ŋasigarya ŋuna alosete a ŋakejen, ŋuna adolete ŋalipyo ŋatomonikanikauni, tolot kaapei ka ŋasigarya keŋ ŋuna adokito ŋaŋolei akitijiore Ŋiyudayan. Acamit iŋes akituruwor Yerusalem ere a Ŋigirik

³ka acamit daŋ iŋes atubokin ocur aŋuna ka Akai ka Akuj, lopite ŋolo abunio iŋes kitiyaa neni a ŋakiboisyo a ŋuna etaleunitoe anakwapin a ŋunace ka agyelanar apolou ŋina a esacaradoti a ŋolo apolon nooi a ŋolokaru.

⁴Pa amisit iŋes tari iwadio daŋ ŋuna ka apedor a Akuj, nai eturo iŋes aŋuna a ŋasigarya keŋ a ŋuna elosete a ŋakejen, arae ŋasigarya ŋun ŋalipyo ŋatomon ka aya ŋalipyo ŋuna adokito ŋaŋolei, ido ayakar ŋitome keŋ ŋulu arae ŋatomonikanikauni.

⁵Torem iŋes Yudaya, ido toapiya Bes-Sur lotaun ŋolo aya ŋaduketa ŋunajiet, ŋolo arae ŋakilomitae ŋatomoniuni alowae a ŋolo alo Kwap Yerusalem, kitijik iŋes ŋituŋa ŋulu aya Bes-Sur nooi.

⁶Ani iirarete Makabeus ka ŋirukitos keŋ atemar irikaunit Liasias ka ŋasigarya keŋ ŋaduketa ŋunajiet, kilipa ikes ka ŋituŋa daadaŋ iwololoete ka igworosi neni a Ekapolon, ikotere iŋes iyakuuni emalaika ŋolo eiuni Ŋisirael.

⁷Abu Makabeus elope togeu alemun ŋiboro ŋulujiet, tolimok ŋuluce daŋ akijal akiyar kec kaapei ka iŋes aŋuna ka aiunia ŋiyeneta kec. Apotu nai ikes kaapei toema akitijikin ŋimoe kec.

⁸Ani eriŋa ikes eyakasi diyete Yerusalem, totakanu alokiŋaren kec ituŋanan edokit aŋole, enapit ŋilowi ŋulu akwaŋak ka etiŋit ŋiboro ŋulujiet ŋulu acayete ŋulu etiyaunitae a egolid,

⁹ido apotu ikes daadaŋ kaapei kipuro Akuj ŋina esyonon, tomukyaketa alotai kec, totena akitijikin ŋituŋa, kori ŋityaŋ ŋulu adedeŋak, kori akidok arwatata ŋina a ŋasuwa.

¹⁰Kicodosi nai ikes erukito ka ŋolo ariitotor ikes ŋolo abunit anakuj, anerae abu Ekapolon kisyoni ikes.

¹¹Apotu ikes toemakin lomoe esibito ŋiŋatunyo, toara ŋimoe ŋalipyo ŋatomon ka apei toara tari ŋulu adokito ŋaŋolei ŋulu arae aliput ka ŋamiae ŋakanikapei, tobwaŋa ŋuluce daadaŋ.

¹²Aponi tolacae ka toarae ŋimoe ŋulu alalak, abu Liasias tosi, anerae abu irumito ŋileec toem esibit ituŋanan ŋini akuryanan.

¹³Ikwapei pa aosyo Liasias, abu totamatama ŋuna ka akiloun a ŋina elounere iŋes, ido toyenu atemar nyepedor akiloun Ŋiburaniyae, anerae eji Akuj ŋina etiron aŋuna kec. Aŋun, abu iŋes kiyakiya ŋituŋa neni a Ŋiburaniyae,

¹⁴ido kimaima ikes akirworiun ka iŋes ŋakiro alopite a ŋolo iyookino, kiik daŋ atemar imamai iŋes erwosit ka itacamuni iŋes aruwor ekone kec.

¹⁵Aŋuna aminar Makabeus atemar kiboiyete ŋituŋa daadaŋ ejok, abu tocamu ŋakiro daadaŋ ŋuna eŋita Liasias, anerae abu erwosit tocamu ŋakiro daadaŋ ŋuna abu Makabeus kigirak nabaruwa ŋina eyakikini iŋes neni a Liasias.

¹⁶Ŋakiro ŋuna egiritae nabaruwa ŋina egirakini Liasias Ŋiyudayan ikes nu, “Ebunit abaruwa na aneni a Liasias, igiritae neni a Ŋiyudayan, ekemalae ayoŋ iyes.

¹⁷Apotu Yoana ka Abusalom ŋulu iyakiunete iyes neni kosi yaut ŋakiro kus ŋuna itogogoŋito iyes ka adaut akiŋit isua aboŋokinet kosi ŋina a ŋakiro a ŋuna eya nabaruwa kus.

¹⁸Adau ayoŋ alimokin erwosit ŋakiro daadaŋ ŋuna amaikina alimokin iŋes, ido acamaki iŋes ŋakiro daadaŋ ŋuna apedoro.

¹⁹Ani kirubakis iyes itiyaete ŋuna ajokak neni a apukan, emukekini ayoŋ alorwa a ŋulu eponito akiŋarakin iyes aŋuna ka akitojok epite ŋolo ka akiyar kus.

²⁰Ŋakiro daadaŋ ŋuna etapito ŋakiro ŋun ka ŋace ŋuna alalak, alimok ayoŋ ŋikilyok lu ka ŋikawoikinitok kaŋ akiryamun ka iyes kirworiut.

²¹Ikiyanyun. Ekaru ŋolo a amiat ka ŋatomoniomwon ka ŋikanikauni ŋirwa a elap ŋatomoniarei ka ŋiomwon elap ŋolo enyaritae Diosikorinisius.”

²²Ŋakiro ŋuna egiritae nabaruwa a erwosit ikes nu, “Ebunit abaruwa na aneni a erwosit Antiokus, igiritae neni a alokaato kaŋ Liasias, ekemalae ayoŋ iyoŋ.

²³Ikwaŋina tokona atwania papa yok alosyo neni a ŋakujo, ikicamit isua atemar nyisicani ŋituŋa ŋulu ka apukan yok anakiro a ŋuna ka akiyar kec.

²⁴Eirar isua atemar nyecamito Ŋiyudayan ŋakiro ŋuna abu papa yok tolimok ikes akiwuap, ŋuna a ŋitalyo a Ŋigirik, nai ecamito akiwuap ŋipitesyo a akiyar kec ka iŋitasi atemar tocamakinae ikes akiwuap ŋitalyo kec.

²⁵Aŋuna a ŋakiro a ŋun, ikwapei ikiseunia iwon atemar nyemaikina kisicanae ŋituŋa a akwap yok, ŋuna atubun iwon ikes atemar kinyakakinae ikes Akai ka Akuj kec ka atemar emaikina ikes kiwuapa ŋitalyo atapapaa kec.

²⁶Ibuni iyoŋ akitiya ejok erae kiyakik ikes akirot ŋina atubun ka alimokin ikes akoneo kaŋ ka ikes, ikotere ikes itiyaete ŋuna ecamito alotooma ekisil, tomam ŋuna itakadakinito ikes.”

²⁷Ŋakiro ŋuna egiritae nabaruwa ŋina egirakinit erwosit Ŋiyudayan ikes nu, “Ebunit abaruwa na aneni a erwosit Antiokus, igiritae neni a ŋikatubok a Ŋiyudayan ka neni a Ŋiyudayan a ŋuluce, ekemalae ayoŋ iyes.

²⁸Ani kiyakasi iyes ejok, ŋakiro ŋuna ikigasi isua daŋ ŋun. Ikiya isua daŋ ejok.

²⁹Adau Menelaus alimokin isua atemar icamito iyes aboŋor lorerya kus ka totiŋa ŋakiro a akiyar kus.

³⁰Aŋun, ŋulu eboŋorete lorerya kec ŋirwa ke elap ŋatomoniuni elap ŋolo a Sansikus eryamunete akiikinet kosi ŋina ka akoneo ka ikicamakinitae alosit emam ŋace,

³¹aŋuna iraakatar Ŋiyudayan, ikotere ipedorete akimuj ŋamuja kus a ŋilopeyek ka akiwuap ŋikisila kus, lopite ŋolo sek itiyaata, ido mam ikes ŋini emaikina kisicanae a epite a edio aŋuna a ŋakiro a ŋadi aŋuna keponi kitiyae a abaŋao.

³²Eyaku daŋ ayoŋ Menelaus akisimukekin iyes.

³³“Ikiyanyun. Ŋirwa ŋitomon ka ŋikan elap ŋolo a Sansikus ekaru amiat ka ŋatomoniomwon ka ŋikanikauni.”

³⁴Apotu Ŋiromanin daŋ kigirakis Ŋiyudayan abaruwa, ŋakiro ŋuna egiritae nabaruwa ŋin ikes nu, “Ebunit abaruwa na aneni a Kuinitus Menius ka aneni a Tito Manius, ŋikiyakitono a Ŋiromanin, igiritae neni a Ŋiyudayan, ikimalae isua iyes.

³⁵Alotooma ŋakiro ŋuna abu Liasias eyenet a erwosit ikicamak iyes akitiya, ikicamu isua daŋ ŋakiro ŋun.

³⁶Nai, ani eruwor ŋakiro ŋuna abu iŋes totub atemar emaikina iyes kitiyata, erae erwosit etyakuni, ani kidaut iyes atamatam ŋakiro ŋun, kiyakuutu atipei ituŋanan neni kosi ikotere ikipedori isua akiteyenikin iyes ŋuna eriyan, ŋuna ikilimokini isua iyes, anerae tokona eyakae isua lorot elosyo Antiokia.

³⁷Aŋun, kiburuburakisi akiyakuun ŋituŋa ikotere isua ikiyenuni ŋakiro ŋuna itubut iyes anakiro a ŋun.

³⁸Ikiyanyun. Ŋirwa ke elap ŋitomon ka ŋikan elap ŋolo a Sansikus ekaru amiat ka ŋatomoniomwon ka ŋikanikauni.”