Read ngakarimojong 2 Ŋimak. 12 Bible Online

2 Ŋimak. 12 - ngakarimojong bible

2 Ŋimak. 12

¹Ani kedaut Ŋiyudayan acamun anakiro a ŋun ka Ŋigirik, abu Liasias toboŋo neni a erwosit, ido apotu Ŋiyudayan toboŋosi akitare ŋimanikorin kec.

²Nai apotu ŋikepukak ŋice anakiboisyo a ŋuna egelegelya, ŋikepukak ŋul ikes ata Timoteo, Apolonius lokoku a Genaeus, Ieronimus ka Demopon ta Nikanor ekepukan a Cipiro nyecamut akimyekin Ŋiyudayan akiboi emam ŋace ka ekisil.

³Apotu ŋituŋa a Yopa kitiyata ŋakiro ŋuna eŋerit Akuj ŋuna ikote nu: Apotu ikes tonyaraut Ŋiyudayan ŋulu eboiyete kaapei ka ikes adokar nameeli kaapei ka ŋaberu kec ta ŋidwe kec, esibit nyimanito ŋituŋa a Yopa Ŋiyudayan,

⁴etiyaete ikes ŋun erae ŋuna acamunito ŋituŋa a etaun daadaŋ. Ani ecamunete Ŋiyudayan aponare aŋuna acamitotor akiboi a ekisil ka ŋirukitos kec ka pa ayenete atemar ikimodiyaritae, apotu ŋituŋa a Yopa yaasi ikes nanam ka apotu kimasakis Ŋiyudayan daadaŋ nanam, aapikinito Ŋiyudayan ŋul ŋamiae ŋaarei.

⁵Ani iirari Yudas aryenyeo ŋina keponi kitiyakinae neni a ŋiyeneta keŋ, abu tolimok ŋakiro neni a ŋikajiok keŋ,

⁶ido kilipa neni ka Akuj, akatubon ŋakiro anakiyookino, ekaku toloto kitijikis ŋikaarak a ŋiyeneta keŋ. Apotu kicunyakis nakwaare akibois ŋina adukitoe lodoket ka anam, kicunyasi ŋatakerin ka toara ŋituŋa ŋulu kepotu toloto nen akiŋop.

⁷Aŋuna agololyoto ŋipukei a etaun, abu Yudas toboŋo erae ŋolo acamit aboŋun ekaku amunyar ŋituŋa a Yopa daadaŋ.

⁸Nai ani iirari atemar ecamito ŋituŋa a Yaminia daŋ akitiya ŋakiro ŋunapei etiyato ŋituŋa a Yopa ŋuna ka amunyar Ŋiyudayan ŋulu eboiyete ka ikes,

⁹abu Yudas kitijik Ŋiyaminiae nakwaare kicunya akibois ŋina adukitoe lokipetot ka anam kaapei ka ŋatakerin, kiŋolikinae tari alo Yerusalem akica ŋina ka akim, arae aoyau alo Yopa tari Yerusalem ŋakilomitae ŋatomonikan.

¹⁰Ani kedaut Yudas ka ŋirukitos keŋ alosit neni eapiyarit ŋakilomitae ŋaarei alo Yaminia, elosete akitijiore Timoteo, apotu Ŋimarabui ŋulu adolito ŋalipyo ŋakan ka ŋasigarya kec ŋuna adokito ŋaŋolei ŋuna arae ŋamiae ŋakan kitijikis Yudas ka ŋirukitos keŋ.

¹¹Ekaku a ejie a ŋolo apotyon nooi, apotu Yudas ka ŋirukitos keŋ aŋuna ka akiŋarakinet a Akuj kilout Ŋimarabui. Apotu nai Ŋimarabui todyeka Yudas kiik ikes ekisil, kiikis daŋ ikes ainakin iŋes ŋibaren ka akiŋarakin ŋituŋa keŋ alopitesyo a daadaŋ.

¹²Ani eyenuni Yudas atemar epedorete ŋituŋa ŋul akiŋarakin ikes alopitesyo a ŋulu egelegelya, abu tocamu akisil ka ikes, ido ani kedaut aryamun ŋibaren ka ekisil ŋulu eikinitae iŋes, apotu Ŋimarabui toboŋosi loeemae kec.

¹³Abu daŋ Yudas torem etaun ece ŋolo adukitoe nooi ŋaduketa ŋunajiet a ŋalup todukitetei daŋ ŋarwatatain, eboiyete a nen ŋituŋa ŋulu pa arae Ŋiyudayan ŋulu agelegelya. Arae ekiro a etaun a ŋol Kasipin.

¹⁴Ekinyomito ŋituŋa ŋulu aya tooma etaun ŋol agogoŋu a ŋarwatatain kec ka akimuj ŋina alalan ŋina ayakatar ikes, apotu ŋituŋa ŋul tojamuwasi Yudas ka ŋirukitos keŋ, tocela iyanyete iŋes, ido kiyenyete Akuj ka kirworos ŋuna aronok nooi ŋuna pa asegak.

¹⁵Nai apotu Yudas ka ŋirukitos keŋ kedaut akilip neni ka Akuj a ekepukan ŋakwapin daadaŋ, Akuj ŋina abu kikama Yeriko ŋirwa ŋulu a Yosua emam ŋiboro ŋuludoket kori ŋulujiet, apotu ikes toema enyunyurasi nooi, ido toporokis ŋarwatatain a etaun.

¹⁶Apotu ikes kikamasi etaun anacamit a Akuj ka apotu toara ŋituŋa ŋulu emam ituŋanan eyeni ekimar, tari ŋina areŋuniata ŋakipi a anam a ŋina ayai diyete etaun a ŋina aapikinit alalau keŋ akilomita apei, tosubut ŋaokot ereŋak ananam ileleba meere ŋakipi.

¹⁷Kedaut Yudas ka ŋasigarya keŋ alosit neni edoli ŋakilomitae amiat ka ŋatomonikan ameun alo Kasipin, todolo Karas neni a Ŋiyudayan a ŋulu anyaritae Ŋitaubiani.

¹⁸Apotu ikes nyeryamut Timoteo anakwap a ŋin, anerae keris iŋes kerotoki a nen nyirikakina akitiya ŋakiro ŋadi tari daŋ ŋina kebunio iŋes kimyekinia anakibois ka apei ŋasigarya ŋuna ajiok.

¹⁹Apotu Dasiseus ka Sosipater ŋulu arae ŋikarikok a ŋajorei a ŋuna apolokinit Makabeus toloto tomunyasi ŋasigarya ŋuna kebu Timoteo kimyek anaduketait a ŋinajiet, toara ŋasigarya ŋuna adeparito ŋalipyo ŋatomon.

²⁰Abu Makabeus kisibakiyana ŋasigarya keŋ a ŋajorei, kiwonyakis ŋikilyok ŋulu apolokinito ŋajorei, kiwonyakis atipei akiwuapakin Timoteo ŋolo ayakar ŋasigarya ŋuna alosete a ŋakejen ŋalipyo amiat ka ŋatomoniarei ka ŋasigarya ŋuna adokito ŋaŋolei ŋalipyo ŋaarei ka ŋamiae ŋakan.

²¹Ani iirari iirari Timoteo atemar adolu Yudas, abu kiyakiya ŋidwe ka ŋaberu ka ŋiboro kec nakibois ŋina anyaritae Karinaim, anerae pa apatana akirikaun akibois ŋin ka atyono akidol inaa, anerae aridid ŋirotin ŋulu etoreneneo alosio nen.

²²Nai ani iŋolikinete ikes ajore a Yudas ŋina eŋarenon, abu tobul ka tokuryaketa ŋimoe anatakanunet a Ekapolon a ŋolo ite ibore daadaŋ. Ani ebwaŋasi ikes, apotu toema ŋiwaetin daadaŋ, ido alokabule kec, apotu ikes tobwaŋas lowaetin daadaŋ ka apotu ŋulu alalak kicumucumaaros a ŋileŋia a ŋirukitos kec.

²³Kitijik Yudas ikes ka agogoŋu nooi, ido toar ŋikasecak ŋulu arae ŋalipyo ŋatomoniuni.

²⁴Kikamut Dosiseus ka Sosipater ta ŋasigarya kec Timoteo. Anamodiyo a ŋina apolon, abu Timoteo todyek ikes akimyekin iŋes tolot emam ŋace, anerae aenit iŋes ŋikauruunak a ŋulu alalak kec ka ŋikaitotoi a ŋice ŋulu ani pa kimyekin iŋes nyisyonio ikes.

²⁵Ani kedau iŋes akitogogoŋ akiikinet keŋ a ŋakiro a ŋuna alalak akimyekin ŋiyeneta a ŋituŋa a ŋul toloto emam ŋace, apotu ikes kimyekis iŋes tolot aŋuna ka aiunia ŋiyeneta kec.

²⁶Abu nai Yudas tolot akirem Karinaim ka akai ka akuj ŋina ayai Atarigatis ka abu toar ŋituŋa ŋalipyo ŋatomoniarei ka ŋikan.

²⁷Kedau akikamar ŋakiboisyo ŋun ka amunyar ŋituŋa ŋul, abu daŋ tolot akirem Epiron, etaun ŋolo aya ŋaduketa ŋunajiet ka neni eboiyoto Liasias ka ŋituŋa ŋulu alalak ŋulu aponito anakwapin a daadaŋ. Apotu ŋisorok ŋulu agogoŋok toloto narwatatain a etaun kec ka apotu tojioto a nen ka agogoŋu, eŋadatae daŋ tooma etaun ŋiboro ŋulujiet ŋulu agelegelya.

²⁸Nai apotu Ŋiyudayan kilipa neni a Akuj a ŋina etiron, Akuj ŋina ielari a apedor keŋ agogoŋu a ŋimoe keŋ; ido apotu Yudas ka ŋirukitos keŋ kikamasi etaun, toara ŋituŋa ŋulu arae ŋalipyo ŋatomoniarei ka ŋikan ŋulu ayakasi lotaun.

²⁹Ani erotokinete a nen, apotu kiwonyakis Sisopolis lotaun ŋolo arae ŋakilomitae amiat ka ŋatomoniarei alo Yerusalem.

³⁰Nai ani isuudaete Ŋiyudayan ŋulu aya lotaun ŋol ajokis ŋina apotu ŋituŋa a etaun a ŋol kitiyata neni kec ka epite ŋolo atiŋitotor ikes Ŋiyudayan ejok anapakio a ŋuna a ŋican,

³¹apotu ikes tolakaros neni a ŋituŋa a Sisopolis ka tolimokis ikes akitiya ejok neni a Ŋiyudayan tari alorwa a ŋulu epote. Toloto nai ikes Yerusalem, ikwapei aapiyata ŋirwa a ŋasuban a ŋuna a ŋisabito.

³²Ani elunyar ŋasuban ŋuna enyaritae Pentekoste, kiwonyakis ikes akitijikin Gorigias, ekepukan a Idumea,

³³ŋolo abu tolomu alotaun erukito ka ŋasigarya ŋuna alosete a ŋakejen ŋalipyo ŋauni ka ŋuna adokito ŋaŋolei ŋamiae ŋaomwon.

³⁴Ani ejikinosi ikes ka Ŋiyudayan aponi toarae Ŋiyudayan, aponi toarae Ŋiyudayan ŋidikudyo.

³⁵Nai kebu ekile epei ŋolo anyaritae Dosiseus, epei a ŋikilyok a ŋulu ariito ka Bacenor ŋolo adokit a ŋole ka arae ekile ŋolo agogoŋon kikamu Gorigias, totiŋ elou keŋ ido kiriya ka agogoŋu ecamit arikor ekasyaat ŋol eyari, nai abu epei a ŋasigarya a Siracian ŋolo adokit aŋole totubo akan a Dosiseus, tobucar nai Gorigias toem Marisa.

³⁶Ikwapei aponiata ŋikilyok ŋulu ariito ka Esidiris tojioto apaki ŋina aoyan ka abu toup ikes, abu Yudas kilip neni a Ekapolon ikotere itoodikini ikes atemar eriito ka ikes ka erae iŋes ekarikon kec alojie.

³⁷Kiworou Yudas a aŋajep atapapaa keŋ toramak eli ka toeo daŋ. Toemakin nai ikes ŋasigarya a Gorigias pa etenito, ido tobwaŋa ikes.

³⁸Abu nai Yudas tocunak ŋasigarya keŋ tolot lotaun Adulam. Ikwapei aapuunitor akoloŋit ŋina a Sabato, apotu ikes kitaleunos lopite ŋolo iitanitotor ŋitalyo, ido kieŋut akoloŋit ŋina a Sabato a nen.

³⁹Akoloŋit ŋina ewuapakini, ikwapei amaikina ikes kitiyaata, apotu Yudas ka ŋirukitos keŋ toloto alemar ŋawat a ŋituŋa a ŋulu aponi toarae alojie ka akinuk ikes neni anukitae atapapaa kec.

⁴⁰Apotu ikes toryamut alolowi a ŋikatwak a daadaŋ ŋiboro ŋulu etaletoi ŋulu a ŋitorubei a ŋakujo a ŋuna a Yaminia, ŋiboro ŋulu eŋerito ŋikisila Ŋiyudayan anapit. Toyenut ŋituŋa daadaŋ atemar ŋakiro ŋun ikes atwakyata ŋituŋa ŋul.

⁴¹Aŋun, apotu ikes daadaŋ kiterereŋo ŋuna ka akiwuapit ŋuna a Ekapolon, a ekatubon ŋakiro anakiyookino, ŋolo isileereuni ŋakiro ŋuna iwuaitae,

⁴²apotu nai ikes togeut akilip, kilipa ikotere elemari Ekapolon jik asecit ŋina apotu ikes toseca. Abu Yudas tolimok ŋituŋa nyeseca, anerae apotu ikes kiŋolikis a ŋakonyen kec ŋakiro ŋuna apotu kitiyakinos aŋuna ka asecit a ŋulu aponi toarae alojie.

⁴³Abu daŋ iŋes kirirau ŋainakineta aneni a ŋinituŋanan, kirirau ŋisiliŋa ŋulu arae ŋakiloi ŋaarei ŋuna a esilipa, ido kiyakiya Yerusalem erae ainakinet aŋuna ka asecit. Aŋuna etiyaa iŋes ŋun, abu iŋes kitiya ŋakiro ŋuna ajokak ŋuna itopolooritae ŋuna etoodiunito ŋuna ka ayarun alokatwak,

⁴⁴anerae kerae nyigeno iŋes atemar eyarunete nabo ŋulu apotu totwaka kecaryoono ka kerae akilip aŋuna a ŋikatwak abaŋao.

⁴⁵Nai ani kerae kigeno iŋes aryamun eropit ŋolo ailiilon ŋolo iŋadat Akuj aŋuna a ŋulu etwakete enupito Akuj, kerae ŋin daŋ atametait ŋina asegan ka ŋina ka anupit Akuj. Aŋun, abu iŋes kitiya ŋun amookunia ŋikatwak, ikotere elakunio ikes anasecit kec.