Read ngakarimojong 2 Ŋimak. 13 Bible Online

2 Ŋimak. 13 - ngakarimojong bible

2 Ŋimak. 13

¹Alokaru a ŋolo a amiat ka ŋatomoniomwon ka ŋikanikaomwon, aponi tolimokinae Yudas ka ŋirukitos keŋ atemar ebunit Antiokus Eupator ka ajore ŋina alalan akirem Yudaya

²ka atemar erukito iŋes ka Liasias ekedaran keŋ, ŋolo apolokinit ŋakiro a apukan. Ayakatar Antiokus ka Liasias a ŋinituŋanan ŋasigarya a Ŋigirik ŋuna alosete a ŋakejen ŋuna arae ŋalipyo amiat ka ŋitomon ka ŋuna adokito ŋaŋolei ŋalipyo ŋakan ka ŋamiae ŋauni, ŋitome ŋatomoniarei ka ŋaarei ka ŋagaari ŋamiae ŋauni ŋuna iritae a ŋaŋolei ŋuna ayakatar ŋileŋia.

³Abu Menelaus daŋ tocunar neni ka Antiokus ka Liasias, ido alorwor a ŋolo a ŋisoswae keŋ, abu tolimok Antiokus alosit akirem Yudaya, meere aŋuna aminar iŋes akwap keŋ nai aŋuna acamitor iŋes kituruworoe iŋes esacaradoti ŋolo apolon nooi.

⁴Nai abu erwosit a ŋirwosi inak Antiokus toŋoik Menelaus, ani elimokini Liasias Antiokus atemar arae aŋuna a Menelaus ayakaunotor ŋican daadaŋ ŋulu apotu ikes toryamut, abu Antiokus tolimok ŋituŋa akiya Menelaus Beroea ka akiar iŋes alopite a ŋolo eareneneeta ŋituŋa a etaun a ŋol ŋituŋa,

⁵anerae ayai aduketait ŋina aoyan lotaun ŋol, ŋina arae aoyau keŋ ameun alokwap tari kidiama ŋamitae ŋatomoniarei ka ŋaarei ka eleleba ekuron naduketait ŋin, ido ayai tooma aduketait ŋin neni ekeuna totiyaara kwap alotooma ŋikelyo neni ayai ekuron.

⁶Ejukanakinete ŋituŋa a etaun a ŋol nen ŋinituŋanan iyenyit Akuj, kori ŋini itiyaenene aronis ace daadaŋ.

⁷Epite ŋol iŋes aarere Menelaus etuŋanan ŋolo aŋerit akiwuapit ŋikisila, aponi tari nyenuki.

⁸Eyookino ŋakiro ŋun aneni keŋ, anerae abu iŋes tosec ŋarwa ŋuna alalak kitiya aronis namuroet ŋina arae akim ka ekuron keŋ ŋiboro ŋulu asegak, abu iŋes totwan alokuron.

⁹Abu erwosit anaryenyeo keŋ a ŋina ka akituro bu akitoodikin Ŋiyudayan ŋakiro ŋuna aronok akilo ŋuna sek etiyat iŋes alorwa a ŋulu ayarya papa keŋ.

¹⁰Nai ani iirari Yudas ŋakiro ŋun, abu tolimok ŋituŋa akilip neni ke Ekapolon apaaran ka akuwar, ani kepedori kiŋarak ŋulu aapikinit aryamun ŋican aŋuna a ŋikisila ka akwap kec ka aŋuna ka Akai ka Akuj a ŋina asegan,

¹¹ido nyecamak ŋituŋa ŋulu ariŋa eryamunete ajokis toara ŋituŋa ŋulu nyerae Ŋiyudayan ŋulu eyenyak Akuj.

¹²Ani kedaut ikes daadaŋ akimorikin anakilip a apei ka kedaut akidyek Ekapolon ŋolo esyonon alotooma akigworo ka akiredakin akiron ta abubura itopoloorito iŋes ŋirwa ŋiuni emam akieŋun, abu Yudas kimaima ikes ka tolimok ikes akiten aŋuna a ejie.

¹³Kedau Yudas akirworiun ŋakiro ka ŋikasikou aneni kec make, abu tocamu alosit atyakun ŋakiro anakiŋarakinet a Akuj eriŋa ŋasigarya a erwosit nyelomuna Yudaya kikamasi etaun.

¹⁴Aŋun, anakiwuakin ŋakiro neni ka Akuj a ŋinaasuban akwap anakisimukekin ŋasigarya keŋ ajiore ka atitinyu tari natwanare aŋuna a ŋikisila, a Akai ka Akuj, a etaun, a akwap ka aŋuna a ŋipitesyo a daadaŋ a ŋulu ka akiyar; abu Yudas kisiboiyo ajore keŋ diyete Modein.

¹⁵Abu iŋes tolimok ŋasigarya keŋ akirot ŋina eyenatar ikes make, iŋes na, “Erae akiloun ŋina ka Akuj.” Abu nai iŋes toseu ŋikajiok ŋulusorok ŋulu atitinyok kitijikis ŋasigarya a erwosit nakwaare. Apotu ŋul toara ŋikilyok anajore a ŋasigarya a erwosit ŋalipyo ŋaarei. Kicum Yudas etom ŋolo arikit ŋuluce ka ekameton keŋ.

¹⁶Ekaku apotu ikes kitubulo ka kisiguryakis ŋimoe daadaŋ ŋulu aya najore a ŋasigarya a erwosit, ido toboŋosi Yudas ka ŋasigarya keŋ erae ŋikelounak.

¹⁷Etiyakin ŋun apaki ŋina ewalya akwap, anerae eŋarakinit Ekapolon ikes.

¹⁸Kedau erwosit akidaŋidaŋ adedeŋu a Ŋiyudayan, abu kiwar epite ŋolo itijikinio ŋakiboisyo kec.

¹⁹Abu tolot akirem Bes-Sur, aduketait ŋinajiet ŋina agogoŋon ŋina a Ŋiyudayan, nai aponi kiritae, torem nabo, ido kilounae.

²⁰Kiyakiya Yudas neni a ŋasigarya a ŋuna aya Bes-Sur ibore daadaŋ ŋini eitana.

²¹Nai abu Rodokus, epei a ŋasigarya a Ŋiyudayan, tolimok ŋakiro ŋuna emunonitae neni a ŋimoe, aponi kiwarunae iŋes kikamunae, ido toenae alojera.

²²Kimaima nabo erwosit ŋituŋa a Bes-Sur acamun ŋakiro keŋ, kiik ikes ŋakiro ŋace ka ikes daŋ kiikis iŋes, nai abu toboŋo akitijikin Yudas ka ŋirukitos keŋ, nai aponi kilounae iŋes.

²³Tosodi abu erwosit kiira atemar abu Pilipo ŋolo aponi kimyekinae apolokinit apukan toŋer apukan alo Antiokia, abu tokadak erwosit ka abu tonyarau Ŋiyudayan, tocamu akirii ka ikes ka kikoŋ atemar emyekini ikes kitiyata ŋuna ecamito, abu nai iŋes tocamu akiboi ka Ŋiyudayan, inak amuronot, kitopoloo akibois ŋina asegan ka inanak ŋiboro aŋuna ka akibois a ŋina asegan.

²⁴Abu erwosit kijau Makabeus, kimyek Egemonises erae ekepukan akwap ageun alo Pitolemais akitodol Gerar,

²⁵ido tolot iŋes Pitolemais. Aŋoito ŋituŋa a Pitolemais aŋuna a ŋakiro a ŋuna acamunotor erwosit ka Ŋiyudayan, aŋoito ikes nooi acamito tari kikisarae ŋakiro ŋuna ka acamunet.

²⁶Nai abu Liasias kirwor alokiŋaren ŋituŋa itogogoŋit ŋakiro ŋuna ka acamunet lopite ŋolo apedoritor, abu kisirworiu ikes, kisisil ŋitai kec ka kisirworik ikes egatakinito iŋes ajokis; abu nai iŋes a nen tolot Antiokia. Alopite a ŋol, abu erwosit Antiokus kimyek akitijiore Ŋiyudayan.