Read ngakarimojong 2 Ŋimak. 2 Bible Online

2 Ŋimak. 2 - ngakarimojong bible

2 Ŋimak. 2

¹Epedori ituŋanan aryamun igiritae nakigireta atemar kebu ekadwaran Yeremia tolimok ŋituŋa ŋulu arikoritae Babilon akiya akim adio lopite ŋolo alimunitere

²ka atemar kedau ekadwaran Yeremia ainakin ŋituŋa ŋikisila, abu tolimok ŋituŋa ŋulu arikoryo atemar nyimuryakis ikes ŋakiciketa a Ekapolon, kori nyitooliyor ikes anatameta kec iŋolikinete ŋitorubei ŋulu itiyaunitae a esilipa ka egolid ka epite ŋolo isibusitere ŋitorubei ŋul.

³Aŋakiro a ŋuna ikote ŋun, abu Yeremia tolimok ŋituŋa atemar nyemaikina ikes kikisasi ŋikisila alotai kec.

⁴Egiritae daŋ lokitaabo ŋolopei atemar kedau ekadwaran aryamun anakiruja akisileerekinet, abu tolimok ŋituŋa atemar emaikina eema ka Asaduku ŋina ka acamunet torukosi ka iŋes ka atemar abu iŋes tolot lomoru ŋolo sek abu Moses tolot ka abu kiŋolik akwap ŋina ainakinit Akuj Ŋisirael.

⁵Toryamu Yeremia alomoru a ŋol aturukan ŋina abu toruwor neni eboiyo iŋes, ido ya inaa eema, Asaduku ŋina ka acamunet ka namuroet ŋina a ekinyate, ido togolok akituk a aturukan a ŋin.

⁶Apotu ŋice ŋulu arukitotor iŋes kitipeiyosi ecamito ayenun erot, nai apotu nyeryamut erot ŋol.

⁷Ani eyenuni Yeremia ŋakiro ŋun, abu kiŋenyak ŋituŋa ŋul tema, “Emaikina nyeyenun akibois ŋin akitodol ŋina ecununia Akuj ŋituŋa keŋ iwapei nabo ka kitoodiu akisyon keŋ.

⁸Itoodiuni nai Ekapolon ŋiboro ŋul, ido etakanuni apolou a Ekapolon ka adis, lopite ŋolo atakanuniata alorwa a ŋulu a Moses ka lopite ŋolo eŋitar Solomon atemar emaikina kitaleunoe akibois.”

⁹Aponi daŋ kisileereunoe atemar, aŋuna ayakar Solomon aosou, abu Solomon inak amuronot aŋuna ka akitaleunio ka aŋuna ka akirikakinia Akai ka Akuj.

¹⁰Lopite ŋolo abunio Moses kilipya neni ka Akuj, ido abu akim alokidiama tonomiya ŋamuronisya, abu Solomon daŋ kilip, ido abu akim totiyaun tonyamuwa ŋainakineta ŋuna epeyo daadaŋ.

¹¹Tolimu Moses tema, “Abu akim tonomiya ŋainakineta ŋun, anerae pa anyamitae ainakinet aŋuna ka asecit.”

¹²Abu Solomon daŋ kiricak ŋirwa ŋulukanikauni.

¹³Igiritae ŋakiro ŋunapei ŋun lokitaaboi ŋulu igiritae ŋakiro a Yeremia ka ŋuna etamunitere iŋes. Igiritae daŋ atemar abu Yeremia toduk akai ŋina iŋadao ŋikitaaboi ka abu kirirau ŋikitaaboi ŋulu egiritae ŋakiro a ŋirwosi ka ŋikadwarak ka ŋakigireta a Daudi, ŋabaruwae a ŋirwosi ŋuna a ŋakiro a ŋuna a ŋainakineta a ŋuna ikoŋitere ŋadikiro.

¹⁴Alopite a ŋolopei a ŋol, abu Yudas daŋ kirirau ŋikitaaboi daadaŋ ŋulu kepotu toŋopiyasi apaki ŋina ke ejie a ŋolo abu ikidolok iwon, ido eyakare tokona ikes.

¹⁵Aŋun, ani kiitanito iyes ikes, kiyakuutu ŋituŋa omut ikiinut iyes.

¹⁶Aŋun, ikwapei eapiya iwon akitiya ŋasuban ŋuna kitaleunet, ikigirakini isua iyes abaruwa. Ikilipit atemar emaikina iyes kiricakis ŋirwa ŋul.

¹⁷Akuj abu toiu ŋituŋa keŋ daadaŋ ka enyakak daadaŋ ŋalup kec, enyakak daŋ arwosiyanut, asacaradotonu ka akitaleuno,

¹⁸lopite ŋolo eikinitor alokisila. Igenoi isua neni ka Akuj atemar ikisyoni iŋes iwon atipei ka ikicununi iwon alowaetin a daadaŋ anakwap, ikicunak nakibois keŋ ŋina asegan, anerae ikilaku iŋes iwon alocan a ŋulu apolok ka etaleu akibois.

¹⁹Eemut a Yudas Makabeus ka ŋikaitotoi keŋ ka akitaleuno a Akai ka Akuj a ŋina apolon ta akitaleuno anamuroet,

²⁰ŋijiesyo ŋulu abu Yudas toji itiji Antiokus Epipanes ka Eupator lokoku ka Antiokus,

²¹atakanunet ŋina abuni anakuj neni a ŋulu ajiete ka atitinyu aŋuna a edin a Ŋiyudayan, ido tari ŋina akudyokunioto ikes, apotu kikamasi akwap daadaŋ, kiwuapa ŋajoresyo a ŋibaŋaanotin a ŋulu arae ŋimoe,

²²todemut ikes Akai ka Akuj ŋina ayenen anakwap a daadaŋ ka toiut etaun, kinyakakis nabo ŋikisila ŋulu adikino elemaryo, anarimao keŋ a ŋina apolon abu Ekapolon kitiya neni kec ejok.

²³Ŋakiro nu daadaŋ ŋuna abu Yason ŋolo Cirene kigir lokitaaboi ŋikan, ikikatakini isua acunakin euruwuaka lokitaabo epei.

²⁴Aŋuna elalaketa ŋakiro ŋuna emaikina kigirae ka aŋuna etyonio ŋituŋa ŋulu ecamito akisyom ŋiemuto a ŋakiro a ŋuna apotu totakanut,

²⁵acamun isua akitalakar ŋulu ecamito akisyom ŋakiro nu, ikotere epataka aneni a ŋulu ecamito akiric ŋakiro a ŋakyes kec ka topedosi daadaŋ ŋulu ecamito akisyom ŋakiro ŋun ayenun ŋuna ecamito.

²⁶Ani eruwor isua ŋulu ikimukek akituuruwan ŋakiro nu, nyerae etic ŋolo epatana, nai iitanit abukor ŋakinyinyir ka akijal ŋajo,

²⁷lopite ŋolo nyepatania aneni a ituŋanan a ŋini ecamit akitemokin ŋasuban ka kiitanite alakara a ŋuluce. Kikote neni daŋ, aŋuna ka alakar a ŋulu alalak, ikidaŋidaŋi isua ka alakara etic lo ŋolo nyepatana,

²⁸kimyekinae etic ŋolo a ŋakiro a ŋuna alalak neni a ekegiran ekitaabo, kitiyae isua ŋuna ka akisileereununun ŋakiro ŋuna apolok ŋuna ecunakinitae euruwuaka.

²⁹Ikwaŋina emaikina ekadukon a akai a ŋinakitete toyeni etic ŋolo a akai a daadaŋ, nai toyeni ŋolo iosi eraŋgi ka isibusi akai etic ŋolo ka akisibus akai bon, ikote ŋakiro nen aŋuna a etic kosi daŋ.

³⁰Erae etic a ekegiran ŋiemuto akitemokin etic ŋolo esyaunan, alimun ŋakiro ŋuna egelegelya ka alimun ŋakiro daadaŋ ikwapei eyakatar,

³¹nai ituŋanan ŋini igiri ŋakiro ŋun nabo, emaikina iŋes tomunik akigir ŋakiro euruwuaka kimyek ŋakiro ŋuna alalak.

³²Ogeutu nai tokona akigir ŋakiro, emam akiyatakin ŋakiro ŋace nakiro ŋuna sek alimun, anerae eruwor abaŋao akitooya ŋakiro ŋuna egeunete, ido kituuruwanae eemut a ŋakiro.