Read ngakarimojong 2 Ŋimak. 3 Bible Online

2 Ŋimak. 3 - ngakarimojong bible

2 Ŋimak. 3

¹Apaki ŋina eboiyoto ŋituŋa alotaun a ŋolo asegan a ekisil a ŋolo arubakinit eyai ka kiricakinitetei ŋikisila, anerae arae Onias esacaradoti ŋolo apolon nooi ituŋanan ŋini anupit ka aŋerit aronis,

²totakania atemar apotu ŋirwosi ŋilopeyek kitopoloosi akibois ŋin ka kitopoloosi Akai ka Akuj, yaununut ŋainakineta ŋuna ajokak nooi

³todol tari ŋina aŋeryo erwosit Seleucus ŋolo ka Asia ŋikisila ŋulu sek alimununuyo aŋuna keŋ alotic a ŋolo ainanakinere ŋamuronisya.

⁴Nai abu ekile epei ŋolo anyaritae Simon ŋolo alokabila a Benjamin ka ŋolo aponi kituruworoe ŋolo epolokinit Akai ka Akuj topegakinos ka esacaradoti ŋolo apolon nooi anakiro a ŋuna a epite a ŋolo epukatere neni egyelanarere ŋiboro alotaun.

⁵Ikwapei pa apedoritor iŋes akiloun Onias, abu iŋes tolot neni ka Apolonius a ŋolo a Tarisus a ŋolo arae apaki ŋin ekepukan a Koelesiria ka Poenicia,

⁶tolimok iŋes atemar elalak nooi ŋisiliŋa ŋulu iŋadatae kai ŋina iŋadatae abaru alo Yerusalem ŋulu nyeyenio epite ŋolo kelemunere, aŋun etyono nooi ayenun atemar erae ŋisiliŋa ŋul ŋulu ka etic ka ali ka atemar nyerae ŋisiliŋa ŋul daadaŋ ŋulu iriraunitae alotic a ŋolo einanakinere ŋamuronisya, nai epedorete ŋisiliŋa ŋul daadaŋ aruwor ŋulu irirao aŋuna a erwosit.

⁷Ani iryamunosi Apolonius ka erwosit, tolimok iŋes ŋakiro a ŋisiliŋa a ŋulu aponi tolimokinae iŋes. Abu erwosit toseu Eliodorus ŋolo apolokinit ŋakiro a erwosit, kiyakiya iŋes, tolimok atemar tolemarae ŋisiliŋa ŋul aneni aya.

⁸Torotok Eliodorus atipei esibit elosi aanyun ŋitaunio ŋulu a Koelesiria ka Poenicia nai ŋuna a kire alosi iŋes akitiya ŋuna eyakitor erwosit iŋes.

⁹Ani edoli iŋes Yerusalem ka kedau esacaradoti ŋolo apolon nooi ŋolo ke etaun akijaun ka arimao, tolimok iŋes ŋakiro ŋuna keponi tolimoroe ka tolimok daŋ iŋes ŋakiro ŋuna abunitor iŋes. Kiŋit daŋ Eliodorus esacaradoti ŋolo apolon nooi kiyookino ŋakiro ŋun kire.

¹⁰Tolimok erwosit iŋes atemar eya ŋisiliŋa ŋice ŋulu erae ŋulu a ŋapuseru ka ŋikokyok

¹¹ka erae ŋisiliŋa ŋice ŋulu a Irakanus alokoku a Tobias ekile ŋolo etopolooritae nooi, ido arae ŋisiliŋa keŋ daadaŋ ŋatalantae ŋimiae ŋaomwon ŋuna ke esilipa ka ŋatalantae ŋamiae ŋaarei ŋuna ke egolid. Aŋun, kebu Simon ŋolo pa arae ekanupan tolimu ŋakiro ŋuna pa eyookino.

¹²Tolimok daŋ Onias Eliodorus atemar nyiyookino kitiyae ŋuna aronok neni a ŋituŋa a ŋulu apotu kikinyoma asegis a akibois a ŋin ka epite ŋolo italeunitere ta epite ŋolo nyepedorere akitiya aronis alo Kai ka Akuj a ŋina itopolooritae anakwap a daadaŋ.

¹³Nai abu Eliodorus aŋuna a ŋakiro a ŋuna alimokinit iŋes erwosit tolimu atemar emaikina ŋisiliŋa lu tolemarae kiwuakinae neni iŋadao ŋisiliŋa a erwosit.

¹⁴Aŋun, abu iŋes toseu akoloŋit ŋina elosyo iŋes elope akisyem ŋisiliŋa ŋul. Apotu ŋun inakis ŋituŋa a etaun daadaŋ akioroun ecelasi.

¹⁵Apotu ŋisacaradotin toryediko alokiŋaren namuroet enapito ŋilowi kec ŋulu ka asacaradotonu, kilipa neni ka Akuj a ŋina anakuj a ŋina abu inak ikes ŋikisila ŋulu iŋadaere ŋisiliŋa, ikotere erubakinete ŋisiliŋa ŋul erae ŋulu a ŋikulepek a ŋulu eŋadakinete nen.

¹⁶Apaki ŋin, arae akiŋolikin esacaradoti ŋolo apolon nooi ibore ŋini apipilan alotau, abu ereet keŋ tonyoridid, itoodiunit ŋakiro ŋuna anomorito etau keŋ nooi,

¹⁷anerae abu tobul iŋes ka tomaranik akuwan keŋ itoodiunit jik neni a ŋini iŋolikini iŋes atemar eyaloloŋi iŋes nooi alotaun keŋ.

¹⁸Tolomut ŋituŋa daŋ atipei anakais kec toruworos atukot ŋina alalan aŋuna ka akilip kaapei neni ka Akuj, anerae aapi amunaar akibois ŋina asegan.

¹⁹Tonapa ŋaberu ŋiguniyae alokorei kec kilelebun lorotin a etaun. Toema ŋasorok kiŋa ŋuna sek pa acamakinitae alomun anakais, toloto kaapei lopukei ka narwatatain a etaun, ŋace toripununut alodirisae.

²⁰Kilipa daadaŋ edyikito Akuj ikyaarito daadaŋ ŋakan kec kidiama.

²¹Atakanete ŋakiro erae ŋuna acamitotor ikes akisyonio, anerae apotu ŋituŋa daadaŋ kitiditeunos ka eyaloloŋi nooi esacaradoti ŋolo apolon nooi.

²²Apaki ŋina elipyata ŋituŋa neni a Ekapolon a ŋolo etiron ikotere iŋes iyoki ŋisiliŋa ŋulu eŋadatae Kai ka Akuj torubakis eya nen nyelemar, nai kidoŋo eya nen aŋuna a ŋulu apotu yaut nen,

²³abu Eliodorus nyimyek akitiya ŋuna aris ketubun akitiya.

²⁴Nai ani edoli iŋes kai ŋina eŋadatae abaru erukito ka ŋasigarya ŋuna eteete iŋes, totakanu Ekapolon a apedor a daadaŋ eiliili nooi ka tobul ŋituŋa daadaŋ ŋulu sek adedeŋ iwuapito Eliodorus, apotu ŋun kitiyakin alotooma apedor a Akuj tari ŋina ekamunia ikes ekabule.

²⁵Anatakanunet a ŋin, apotu ikes kiŋolikis aŋole ka ekameton keŋ. Ayakar aŋole asaajait ŋina esibusitae nooi, ido anapit ekameton aŋole ŋiboro ŋulu ke ejie ŋulu etiyaunitae a egolid, arae ituŋanan ŋini ikitubuli. Toem aŋole atipei neni ka Eliodorus topet iŋes a ŋakewas keŋ.

²⁶Kiŋolik daŋ Eliodorus ŋikilyok ŋiarei ŋulu atakanete egogoŋ, ebusak nooi, ecayete ka enapito ŋilowi ŋulu ebusak nooi, awuasi ŋikilyok ŋul epei aloteten ka epei alokedyeny keŋ, torubakis ibuŋaete iŋes ka ewanawanaete iŋes.

²⁷Ani ibusokin iŋes kwap ka kiryoniar akwap aneni keŋ, todakasi iŋes ŋikilyok ŋulu arukitotor iŋes, kiwuakis iŋes nadaket,

²⁸ido todakasi iŋes, abu ekile ŋolo sek ariŋa elomari kai ŋina iŋadao abaru erukito ka ŋikilyok ŋulu alalak ka ŋasigarya daadaŋ ŋuna eteete iŋes nyepedo akiloun ŋolo etiji iŋes kiŋarakin bon. Apotu ikes tocamut jik atemar erae ŋin Akuj ŋina ka apedor a daadaŋ.

²⁹Apaki ŋina aperyo Eliodorus ebubura ililiŋi cek emam akigeno atemar ejokuni aŋuna abunio Akuj kisicania iŋes,

³⁰apotu Ŋiyudayan kipuro Ekapolon ŋolo abu kitiya ŋuna ka aumokin aŋuna a akibois keŋ a elope. Toyakaun alakara ka alelyanu Kai ka Akuj ŋina sek apaki ŋina auruwuanan ayai akuryanu ka akigurya, anerae abu Ekapolon ŋolo etiron totakanu.

³¹Apotu ŋikonei ka Eliodorus atipei kimaimaa Onias akilip neni ka Akuj a ŋina alokidiama nooi inak akiyar neni ka Eliodorus a ŋolo aperi ililiŋi cek eapikinit atwanare.

³²Aŋun, abu esacaradoti ŋolo apolon nooi aŋuna akuryanitor atemar acepaki ebuni erwosit akisican Ŋiyudayan aŋuna etamunia atemar kepotu Ŋiyudayan kitiyata ŋuna aronok neni ka Eliodorus, inak amuronot ikotere ejokuni Eliodorus.

³³Ani eriŋa esacaradoti itiyae amooki totakanut nabo ŋisorok ŋulupei sek neni ka Eliodorus enapito ŋilowi ŋulupei sek anapito, towua, ido temasi neni ka Eliodorus, “Tolakar neni ka Onias a esacaradoti a ŋolo apolon nooi, anerae aŋuna keŋ ikiinak iyoŋ Ekapolon akiyar.

³⁴Emaikina nai iyoŋ ŋolo abu Ekapolon ikida tolimok ŋituŋa daadaŋ ŋuna ka ailiil ka apedor ŋina ka Akuj.” Kedaut alimun ŋakiro ŋun toŋopiyasi.

³⁵Inak nai Eliodorus amuronot neni a Ekapolon, tolimok ŋakikoŋieta ŋuna apolok neni a ekaiunan a akiyar keŋ, kedau akimal Onias, torotokis ka ŋasigarya keŋ, toloto neni a erwosit.

³⁶Tolimok Eliodorus ŋituŋa daadaŋ ŋiticisyo a Akuj a ŋina alokidiama nooi a ŋina abu iŋes kiŋolik a ŋakonyen keŋ.

³⁷Ani iŋisi erwosit Eliodorus atemar ituŋanan ŋini ikoni ai epedoryo akiyakiyar Yerusalem aŋuna ka etic a ece, toboŋok iŋes tema,

³⁸“Ani kiyakar iyoŋ emoit edio, kori ŋini etuko akikamar apukan kon, kiyakiya iŋes inaa, anerae eboŋuni iŋes neni kon ibuŋatae ejok erae kire keyar iŋes, anerae kire jik eyai apedor a Akuj nakibois ŋin.

³⁹Akuj ŋina eyai akibois keŋ nakuj ite akibois ŋin ka iyakuununui akiŋarakinet nakibois ŋin ka isicani ka emunyari daadaŋ ŋulu elosete akitiya aronis nen.”

⁴⁰Erae ŋun ŋuna abu Eliodorus tolimok ŋituŋa ka epite ŋolo aiunia Ekapolon Akai ka Akuj ka akibois ŋina eŋadao ebari.