Read ngakarimojong 2 Ŋimak. 4 Bible Online

2 Ŋimak. 4 - ngakarimojong bible

2 Ŋimak. 4

¹Simon ŋolopei sek alimunitoe, ŋolo abu tolimo ŋisiliŋa ŋulu aya nakwap keŋ iŋes pei abu kirwor itoroniyarit Onias, tolimu atemar arae Onias iŋes anyarauni Eliodorus ka iŋes ayauni ŋican neni yok.

²Kirwor Simon atemar erae Onias ituŋanan ŋini eye ŋakiro ŋuna aronok aŋuna ka apukan, torae bo Onias ituŋanan ŋini iŋarakinit etaun ŋini eiunit ŋituŋa a akwap keŋ ka ŋini emina ŋikisila.

³Ani erubakini Simon itidiŋit Onias todol tari ŋina aaryata ŋirukitos a Simon ŋituŋa,

⁴toyenu Onias atemar erae ediŋet a Simon ibore ŋini aronon nooi ka atemar iyasi Apolonius lokoku a Meneseus a ŋolo arae ekepukan a Koelesiriya ka Poenicia aronis a Simon.

⁵Aŋun, abu Onias tolimok ŋakiro ŋun neni a erwosit pa isitakinit ŋituŋa a akwap keŋ, nai eyakar ajokis a ŋituŋa a daadaŋ.

⁶Abu iŋes toanyu atemar pa keyenu erwosit ŋakiro nu, nyeyakaun ekisil ka nyejoŋoe Simon akitiya abaŋao keŋ.

⁷Ani etwani Seleucus ka kilunyokin Antiokus ŋolo daŋ anyaritae Epipanes lokicoloŋ kipuka, abu Yason lokaato keŋ ka Onias toruwor esacaradoti ŋolo apolon nooi a erot a ŋolo pa eyookino.

⁸Kiik iŋes erwosit apaki ŋina eyaniata iŋes ka erwosit ŋatalantae ŋamiae ŋauni ka ŋatomonikanikapei ŋuna ke esilipa, kiik nabo ŋatalantae ŋace ŋatomonikanikauni ŋuna irirauni iŋes a iwace ikwapei etacit.

⁹Abu daŋ kiik erwosit atemar etaci iŋes ŋatalantae ŋace amiat ka ŋatomonikan erae kecamaki erwosit iŋes edukokini neni ebolyare ka akiwuakin ŋisorok nakibois ŋin ka akigir ŋituŋa a Yerusalem toruwor ŋulu ka Antiok.

¹⁰Ani ecamuni erwosit, ido togeik Yason etic ŋolo ka asacaradotonu, abu Yason kilocok eyare a ŋituŋa a akwap keŋ inak ikes kiwuapa eyare a Ŋigirik.

¹¹Kikisa Yason ŋakiro ŋuna aminasi ŋituŋa daadaŋ ŋuna sek ainakinit erwosit Ŋiyudayan, ajokis ŋina abu Yoana papa keŋ ka Eupolemus toyakaunor, arae Yoana abu tolot akitogogoŋ akoneo ka ariit ka Ŋiromanin. Tolema Yason eyare ŋolo iwuapitere ŋikisila, kiwuak ŋitalyo ŋulu kitet ŋulu nyiwuapitere ŋikisila.

¹²Abu tojoik iŋes adukokin akibois ŋina ebolyare diyete ekamukumukut ŋolo ka Akai ka Akuj, inak ŋisorok ŋulu arae ŋidwe a ŋikapolok anapit ŋakopiyae ŋuna a Ŋigirik.

¹³Tolakar akiwuapit ŋitalyo a Ŋigirik kiwuapa ŋituŋa ŋipitesyo a eyare a ŋituŋa a ŋulugelae aŋuna ka aronis a ŋina alalan a ŋina a Yason a ŋolo pa anupit Akuj ka pa arae esacaradoti ŋolo apolon kire.

¹⁴Apotu tari ŋisacaradotin tojamakis ŋiticisyo kec ŋulu sek etiyaete anamuroet. Tojamakis ŋiticisyo ŋulu a Akai ka Akuj ka tojamakis ŋamuronisya. Apotu toloto akitiya ŋuna pa acamakinitae ikes, torukonosi ka ŋituŋa nakibois ŋina elyakare ka abolya aneni abolyare imasyo ŋamoru.

¹⁵Pa amisito ikes ŋakiro daadaŋ ŋuna aminasi atapapaa kec, apotu ikes tomitakis aryamun akitopolooro aneni a Ŋigirik.

¹⁶Aŋakiro a ŋun, apotu ŋican ŋulu apolok todoikis ikes, anerae apotu ŋituŋa ŋulu pei aminasi ikes ŋipitesyo kec ka ŋulu apotu ikes kimukekis akiwuap ŋitalyo kec toruworos ŋimoe kec ka kisicana ikes.

¹⁷Erae ibore ŋini aronon nooi ajamuwar ŋikisila a Akuj, lopite ŋolo iŋolikiniata iyes ileerete anakiro a ŋuna adaut atakanun.

¹⁸Apaki ŋina abolyare ŋabolyasinei alo Tiro, ŋabolyasinei ŋuna etiyaeneneo a ŋinapaki edolete ŋikaru ŋikan, ayai erwosit daŋ nen,

¹⁹kiyakiya Yason ŋolo pa ajok ŋol ŋikilyok ŋulu aseunitae, anerae arae ikes ŋituŋa ka Antiokia ŋulu aya Yerusalem, akiwokor ŋakiloi ŋalipyo ŋatomon ŋuna ke esilipa aŋuna ka ataca amuronot neni a akuj a ŋina anyaritae Erikules. Nai apotu ŋikilyok ŋulu ewokito ŋisiliŋa totamut atemar pa eyookino akisitiya ŋisiliŋa ŋul aŋuna ka amuronot, anerae pa eyookino ŋun, nai apotu ŋulu ewokito yaasi kisitiyata a etic a ece.

²⁰Acamit sek Yason atemar kisitiyae ŋisiliŋa ŋul aŋuna ka amuronot neni a Erekules, nai apotu ŋulu ewokito totukut akisitiya aŋuna ka adukunio ŋameeli ŋuna ke ejie.

²¹Ani iyakiyaryo Apolonius lokoku a Meneseus Ijipit nasuban ŋuna eturuworere Pilometor erwosit, toyenu Antiokus atemar aremokino Pilometor apukan keŋ, aŋun kiwuar aiun akiyar keŋ. Aŋun, ani edoli iŋes Yopa, abu kiropo tolot Yerusalem.

²²Apotu Yason ka ŋituŋa a etaun kijaut Antiokus lotaun ejok nooi, toloto ŋituŋa akisiryam iŋes ecelasi ka etiŋito ŋakimya ŋuna anokete. Toloto nai Antiokus ka ŋasigarya keŋ Poenicia.

²³Ani elunyar ŋikaru ŋiuni, kiyakiya Yason Menelaus lokaato keŋ a Simon a ŋolo sek alimitoe, akiwokor ŋisiliŋa neni a erwosit ka akirikakin akigir ŋakiro ŋuna atyonok ŋuna etapito ariit kec.

²⁴Nai ani ewoi Menelaus alokiŋaren erwosit, kitoodiyar iŋes neni a erwosit esibit ituŋanan ŋini eyakar apolou nooi ka abu inak erwosit ŋatalantae ŋuna ke esilipa ŋamiae ŋauni, ikotere ituruworere iŋes esacaradoti ŋolo apolon nooi, alalak ŋisiliŋa ŋul akilo ŋulu alemunit Yason.

²⁵Kedau Menelaus akiirar ŋakiro ŋuna alimokini erwosit iŋes, abu iŋes toboŋo pa erae ituŋanan ŋini etemokino toruwor esacaradoti ŋolo apolon nooi, nai arae iŋes ituŋanan ŋini aŋoona, aryenyaana ka adedeŋ esibit etyaŋ ŋolo ka ariet.

²⁶Aŋun, aponi Yason ŋolo sek alemari lokaato keŋ anaraakau esacaradoti ŋolo apolon nooi kiritarae tolot akiŋop anakwap ka Amon.

²⁷Tari ŋina arubakinitor Menelaus erae esacaradoti ŋolo apolon nooi, pa atacenene iŋes a ŋinapaki ŋisiliŋa ŋulu eikinitae erwosit.

²⁸Ani erubakini Sositratus ekarikon a ŋasigarya a ŋuna eboiyete anaduketait a ŋinajiet iŋisenene atacakino ŋisiliŋa, anerae arae iŋes apolokinit ŋisiliŋa ŋulu acununuyo, tonyaraiya erwosit ikes ŋuluarei aŋuna a ŋakiro a ŋun.

²⁹Abu Menelaus kimyek lokaato keŋ Lisimakus kiluny mono lotic keŋ ŋolo ka araakau esacaradoti ŋolo apolon nooi, ido kimyek Sositratus towoik erae ekarikon ŋasigarya ŋuna a Cipirian alokiro keŋ.

³⁰Ani eriŋa ŋakiro ikote nen, kepotu ŋituŋa a Tarisus ka Malus toŋero erwosit, anerae keponi kipotorae ŋitaunio kec ikwapei ainakinet neni ka Antiokis aberu a erwosit ŋina pa eisitae.

³¹Aŋun, abu erwosit tolot atipei akitemokin ŋakiro ŋun, kimyek Anidironikus ekile ŋolo etopolooritae nooi akitiya ikwapei ekewuapan keŋ.

³²Nai kebu Menelaus etami atemar aryam apaki ŋina ajokan, tokokoiya ŋiboro ŋulu etiyaunitae a egolid ŋulu esitiyao alokai ka Akuj, inak ikes neni ka Anidironikus, togyela ŋiboro ŋice Tiro ka lotaunio ŋulu aapiyete a nen.

³³Ani eyenuni Onias ejok ŋakiro ŋun, abu tolimok ŋituŋa emam akimunono toris iŋes kelot akiŋop anakibois a ŋina asegan alo Dapine alodiyete Antiok.

³⁴Aŋun, abu Menelaus ya Anidironikus nawae, todyek iŋes akiar Onias. Abu Anidironikus tolot neni ka Onias tomodik iŋes kiik anakikoŋ aiun iŋes kimala iŋes ekoneono, tari ŋina aosunitor Onias, abu Menelaus kimaima iŋes alomun anakibois a ŋina asegan, ido toar iŋes atipei pa emitakinit ŋakiro ŋuna ka akiyookino.

³⁵Aŋuna a ŋakiro a ŋun, meere Ŋiyudayan bon apotu kiyaloloŋo ka toŋoa aŋuna aarere Onias, nai tari ŋituŋa a ŋakwapin a ŋunace.

³⁶Ani eboŋuni erwosit anakwap a ŋina a Celicia, apotu Ŋiyudayan ŋulu a etaun todyeka iŋes aŋuna a ŋakiro a ŋuna aarere Onias a ŋuna pa eyookino, toŋoa Ŋigirik daŋ aŋuna ka atwanare ka Onias.

³⁷Aŋun, abu Antiokus kiyaloloŋ nooi ka tonomo atwanare ka Onias ka kigwor aŋuna araakar Onias ituŋanan ŋini eyapara ka ajokak ŋipitesyo.

³⁸Anaŋoit keŋ, abu tolaca atipei elou ŋolo kipurat-areŋan aneni ka Anidironikus, tocilicila elou keŋ toriko iŋes kirimokinia etaun ya nakibois ŋinapei aarya iŋes Onias, toarak iŋes nenipei. Abu Ekapolon kisican Anidironikus lopite ŋolo amaikina kisicanere.

³⁹Ani elalakunete ŋakiro ŋuna alemyata Lisimakus kaapei ka Menelaus ŋiboro ŋulu asegak alotaun ka kedolo ŋakiro kec nakwapin, apotu ŋituŋa tocunakin eŋerito Lisimakus, anerae aris kekokoyar ŋiboro ŋulu asegak ŋulu alalak.

⁴⁰Aŋuna aponiata ŋituŋa toŋoa nooi, abu Lisimakus inak ŋituŋa ŋulu adolete ŋalipyo ŋauni ŋiboro ŋulu ke ejie, ido kitijik ŋituŋa a ŋakiro aŋuna pa eyookino. Arae Auranus ekile ŋolo amojoŋiarit iŋes apolokinit ŋituŋa ŋul, arae iŋes ekile ŋolo aris amojoŋu kitabaŋaniya.

⁴¹Nai ani eyenunete Ŋiyudayan atemar ebunit Lisimakus akitijiore ikes, tolemut ŋice ŋamoru, ŋice ŋakito, tolemut ŋice ekuron ŋolo ayai nen kimasakis ka kielakis neni a Lisimakus ka ŋirukitos keŋ.

⁴²Aŋakiro a ŋun, apotu ŋituŋa towana ŋirukitos a Lisimakus ŋice, toara ŋice ka kiteema ŋuluce daadaŋ. Toarakinae Lisimakus ekokolan a ŋiboro a Akai ka Akuj diyete akai ŋina eŋadao abaru.

⁴³Kisitakinae Menelaus aŋuna a ŋakiro a ŋun.

⁴⁴Ani elosi erwosit Tiro, apotu ŋikilyok ŋiuni ŋulu eyakiyarete ŋikatubok tolimokis erwosit ŋakiro a Menelaus.

⁴⁵Nai abu Menelaus ŋolo aris kidici kiik akaluŋuluŋut ŋina alalan neni a Pitolemi a lokoku ka Dorimenes ikotere kisupa erwosit aŋuna keŋ.

⁴⁶Aŋun, kedau Pitolemi akiya erwosit nawae neni arekina ŋipirin esibit enyaraarit iŋes akimat ibore idio, abu kimaima erwosit akilocokin ŋatameta keŋ.

⁴⁷Abu nai erwosit toesik Menelaus ŋolo etiyae ŋakiro ŋun daadaŋ ŋuna aronok, abu nyisican iŋes, nai totubok atwanare neni a ŋikilyok a ŋuluuni, a ŋulu tari kerae Sisians ŋolo aryenyaanan etubit ŋakiro kec, keryamunit emam aronis itiyato, nai aponi ikes totubokinae atwanare.

⁴⁸Aŋun, aponi kisicanae atipei a ŋakiro aŋuna pa eyookino ŋituŋa ŋul ŋulu erworosi itojokito etaun ka ŋirerya ka ŋiboro ŋulu asegak.

⁴⁹Aŋun, apotu ŋituŋa a Tiro daŋ itoodiyarito atemar aŋerito ikes ŋakiro ŋuna aarere ŋituŋa ŋul, tonuka ŋituŋa ŋul itopoloorito nooi.

⁵⁰Nai abu Menelaus aŋuna ka arorokanut a ŋulu ayakatar apedor torubak erae esacaradoti ŋolo apolon nooi, kiyata aronis keŋ ikwapei abunio toruwor ŋolo iloit anayere ŋakiro ŋuna aronok itoroniyarit ŋituŋa a akwap keŋ.