Read ngakarimojong 2 Ŋimak. 5 Bible Online

2 Ŋimak. 5 - ngakarimojong bible

2 Ŋimak. 5

¹Ŋulupeirwa, abu Antiokus tolot akirem Ijipit aremyet ŋina a ŋaarei.

²Apaki ŋin alotooma ŋirwa ŋulu edolete ŋatomoniomwon, toyakaun atakanunet alokidiama etaun daadaŋ, eteete ŋituŋa ŋasigarya ŋuna ameto ŋaŋolei ŋuna anapito egolid ekerete alokuwuam, atyakanara a ŋatuketa edokito ŋaŋolei totiŋito ŋakwaaras ka ŋileŋia ŋulu alemaritae ŋakuraroi,

³ayakasi ŋasigarya ŋuna ameto ŋaŋolei etenito aŋuna ke ejie, ajiete ka etijikinitoe alowae ke epei ka alowae a ŋoloce, ikyaanarete ŋaupala ka etakunito ŋakwaaras egumanarete ŋikaleŋeleŋe, kimilyas ŋasaaja a ŋaŋolei ŋuna etiyaunitae a egolid ka ŋiboro ŋulujiet ŋulu a ŋikabilae a daadaŋ.

⁴Aŋun, apotu ŋituŋa daadaŋ kilipa atemar kerae ca torae atakanunet na ŋina itoodiunit ŋakiro ŋuna ajokak.

⁵Ani iirarete ŋituŋa ŋakiro ŋuna pa ajokak ŋuna ka atwanare ka Antiokus, abu Yason atipei ya ŋikilyok ŋulu pa akudyoko akilo aliput torem etaun pa eyenio. Ani ebwaŋio ŋasigarya ŋuna ayakasi kidiama arwatata ka kikamarae etaun, abu Menelaus tosi, tolot naduketait ŋinajiet.

⁶Nai torubak Yason eari ŋituŋa a akwap keŋ emam akisyon. Abu Yason nyenup atemar akiloun ŋituŋa kon pei erae ayaun ŋican nakuwan kon pei. Abu iŋes totamak tari atemar elou iŋes ŋimoe meere ŋituŋa a akwap keŋ.

⁷Kikote neni daŋ, abu Yason nyikama apukan, ekaku abu iŋes toryamu ajamuwaro anakiro keŋ a ŋuna aye iŋes, ido abu nabo toem nakwap a Ŋiamoni.

⁸Ekaku ŋun daadaŋ abu Yason totwan eyakar ŋileec. Aponi kisitakinae iŋes alokiŋaren Aretas ekepukan a Ŋimarabui, torubak Yason ekeri alotaun a epei tari ŋoloce, irisito ŋituŋa daadaŋ, aremokino ŋituŋa iŋes ikwapei araakar iŋes ituŋanan ŋini aŋerit ŋikisila, aŋeritoe iŋes ikwapei araakar ŋolo aari ŋituŋa a akwap, ido aponi kimasakinae iŋes lokipetot a anam alo Ijipit.

⁹Abu Yason ŋolo sek abu kirita ŋituŋa ŋulu alalak anakwap kec a ŋilopeyek tolot akiboi nakwap ace ka totwanik nakwap ŋinagela; abu sek iŋes todok ameeli ecamit alosit Lacedaemon igeno aryamun aiuno, anerae ayenasi iŋes ka ŋituŋa a Lacedaemon.

¹⁰Iŋes ŋolo sek abu toar ŋituŋa ŋulu alalak kimyek a nen nyenuka, mam ituŋanan abu kigwor iŋes, amam ŋasuban ŋadi ŋuna ka akinuk iŋes ka nyenukakina iŋes neni anukitae atapapaa keŋ.

¹¹Ani eyenuni erwosit ŋakiro ŋuna apotu kitiyakinos, abu iŋes totamak atemar aŋero Ŋiyudayan iŋes. Aŋun, abu toŋoo alotau keŋ, torotok alo Ijipit kikama etaun Yerusalem pa eyenete ŋituŋa.

¹²Tolimok erwosit ŋasigarya akiar emam akisyon ituŋanan daadaŋ ŋini iryamatar ikes ka toara tari ŋulu elomarete nakais kec.

¹³Toarae ŋisorok ka ŋimojoŋ, tomunyarae ŋidyain, ŋaberu, ŋidwe, ŋapesur ka ŋiŋwea.

¹⁴Alotooma ŋirwa ŋiuni aponi toarae ŋituŋa ŋalipyo ŋakanikauni, toarae ŋalipyo ŋatomoniomwon alojie a ŋolo elyakare ka aponi kikamarae ŋulu alalak ŋulu eriyan ekimar kec ka ŋolo a ŋulu aponi toarae.

¹⁵Apotu ŋakiro ŋun nyisisila etau ka Antiokus, aŋun abu todedeŋiar toloma Kai ka Akuj ŋina asegan nooi anakwap a daadaŋ, arae Menelaus ŋolo abu toruwor emoit a ŋikisila ka a akwap keŋ iŋes etenit Antiokus.

¹⁶Tolema Antiokus a ŋakan keŋ a ŋuna pa asegak ŋiboro ŋulu asegak ŋulu esitiyao alo Kai ka Akuj, kiudaa a ŋakan keŋ a ŋuna pa etaleuno ŋainakineta ŋuna ikoŋitotor ŋituŋa, ŋainakineta ŋuna sek keinakinete ŋirwosi ŋuluce aŋuna ka akitopoloorya akica ka apolou a Akai ka Akuj.

¹⁷Abu Antiokus kiturokin nooi, nyeyenu atemar etoŋoa ŋakiro ŋun Ekapolon, ŋakiro ŋuna a ŋasecisya a ŋuna etiyaete ŋituŋa ŋulu eboiyete alotaun ka atemar arae ŋakiro ŋun iŋes aŋoikinia Ekapolon akibois ŋina asegan.

¹⁸Nai kerae nyesecito ikes ŋasecisya ŋuna alalak, kibuŋatae ekile ŋol, kisimyekinitae iŋes nyitiya ŋakiro ŋun ŋinapeipaki alomunia iŋes tooma, lopite ŋolo ebuŋatere Eliodorus ŋolo eyakuunit erwosit Selerikus akisyeme akai ŋina eŋadatae ŋisiliŋa.

¹⁹Nai pa aseuni Ekapolon ŋituŋa a akwap a na aŋuna ka akibois a ŋina asegan, nai aseuni iŋes akibois aŋuna a ŋituŋa a akwap.

²⁰Aŋun, abu akibois daŋ toryamu ŋinyas ŋulu apotu ŋituŋa toryamut, ido ekaku abu akibois daŋ toryamu ajokis ŋina apotu ŋituŋa toryamut, tosodi akibois ŋina sek aŋerit Akuj ŋina etiron aponi kitojokunae nabo kinyakakinae akibuses keŋ daadaŋ apaki ŋina esilya Ekapolon.

²¹Aŋun, abu Antiokus kiwuoko alo Kai ka Akuj ŋatalantae aliput ka ŋamiae ŋakanikauni, kiwonyak atipei tolot Antiok etami anakituro keŋ atemar apedori amere ŋameeli analup ka alosit a ŋakejen anakipi, anerae eleleba akituro lotau keŋ.

²²Abu iŋes kimyek ŋikapolokinitok ŋituŋa isicanito ŋituŋa. Abu iŋes kimyek alo Yerusalem Pilipo ŋolo auruunitae alo Pirigia ka ŋolo aroko ŋipitesyo akilo ŋulu a erwosit a ŋolo aseuni iŋes,

²³kimyek alo Gerisim Anidironikus kimyek daŋ Menelaus ŋolo abu kisican ŋituŋa a akwap keŋ akilo tari neni esicanitotor ŋuluce. Emanit Antiokus Ŋiyudayan nooi,

²⁴abu Antiokus kiyakiya Apolonius ekarikon a ŋasigarya a Misia, torukosi ka ŋasigarya ŋalipyo ŋatomoniarei ka ŋaarei, tolimok Antiokus Apolonius akiar ŋikilyok ŋulu apolok daadaŋ, ido togyelana ŋaberu ka ŋidyain erae ŋapi ka ŋipi.

²⁵Ani edoluni Apolonius Yerusalem, abu tomodik ŋituŋa tosub ebunit a ekisil, kiriya akitodol akoloŋit ŋina a Sabato, apaki ŋina pa ayakatar Ŋiyudayan loticisyo kec, tolimok ŋasigarya keŋ, torotokis a ŋilaino etiŋito ŋiboro ŋulujiet.

²⁶Abu Apolonius toar ŋituŋa daadaŋ ŋulu apotu tolomut kiŋa akiŋolikin ŋasigarya, ekaku toloma lotaun ka ŋasigarya keŋ ŋuna atiŋito ŋiboro ŋulujiet, toara ŋituŋa ŋulu alalak nooi.

²⁷Nai apotu Yudas Makabeus kaapei ka ŋikilyok ŋice ŋikanikaomwon, toema naloŋisat torubakis Yudas eyarete ka ŋirukitos keŋ alomoru, lopite ŋolo eyaryata ŋityaŋ ŋulu ka ariyet. Torubakis ikes eyarete imujete ŋaraito ŋuna ka ariyet, ikotere nyemunaasi ŋawat kec lopite ŋolo aponiata ŋuluce tomunaasi.