Read ngakarimojong 2 Ŋimak. 7 Bible Online

2 Ŋimak. 7 - ngakarimojong bible

2 Ŋimak. 7

¹Anapaki a ace, aponi kikamunae aberu ka ŋidwe keŋ ŋulusapa ŋikanikaarei. Abu erwosit kisidic ikes ŋituŋa, kibuŋae a ŋadase ka a ŋarukanes ikotere enyamete akiriŋ a eguruye ŋina etaleo ikes akinyam.

²Kirwor nai edya epei aŋuna a ŋikaitotoi keŋ tema, “Anukiro icamito iyes akiŋit isua ka ayenun aneni kosi? Anerae etenitae isua atwanare akilo akiŋer akiwuap ŋikisila atapapaa kosi.”

³Apotu ŋakiro ŋun kitoŋoa erwosit nooi, inakis iŋes alimokin ŋituŋa akidorokin ŋasipiryae ka ŋipipae tomwakut.

⁴Aponi kitiyae ŋun atipei. Tolimok nai erwosit ŋiketiyak keŋ atemar totubut aŋajep a edya a ŋolo abu kirwor aŋuna a ŋuluce adalacuun amuny ŋina a akook keŋ, totuboroe ŋakan ka ŋakejen keŋ iteete toto keŋ ka ŋikaitotoi keŋ ŋulukanikapei.

⁵Ani epapanuni edya ŋol nooi, tolimok erwosit ŋituŋa akiya iŋes nakim eriŋa iyeŋa, akikaraŋgakin iŋes anasipirya. Kielakin apuru ŋina alomunit anasipirya neni alalan, nai apotu ŋikaitotoi keŋ ŋuluce ka toto kec kisimukekinos make aŋuna ka atwanare itopolooritae, temasi,

⁶“Ikite Ekapolon Akuj iwon ka alotooma ŋuna a kire ikisyoni iŋes iwon, lopite ŋolo alimunitor Moses alo ete keŋ a ŋolo abu iŋes kiseraa kisuuda ŋakiro a ŋituŋa itoroniyarit ikes epupete ikes, apaki ŋina abaakar iŋes, ‘Isyoni iŋes ŋiketiyak keŋ.’”

⁷Ekaku a atwanare alokaato a ŋolo a ekiŋaren alodyain a ŋulukanikaarei, yaarae ŋolo a ŋiarei abolyar. Aponi todalaciyanarae amuny ŋina a akou keŋ kaapei ka ŋitim, ido kiŋita iŋes ebasi, “Inyami iyoŋ akiriŋ a amuronot kori mam akilo akisican akuwan kon etubonoryo ŋakan ka ŋakejen kon a ŋapeipei a?”

⁸Toboŋok iŋes a aŋajep atapapaa keŋ tolimok ikes tema, “Mam.” Aŋun, aponi kisicanae iŋes daŋ lopite ŋolo esicanitere lokaato keŋ ŋolo esyaunio akisican.

⁹Ani eapuuni iŋes atwanare, tema, “Iyoŋ ekasyaat ŋolo ikilamitae, ikilemarete iyes isua anakiyar a ŋina ka apaki a na, nai ikiteyaruni erwosit ŋolo ka akwap a daadaŋ isua nakiyar ŋinakitete ŋina a ŋikaru ka ŋikaru, anerae atwaki isua aŋuna a ŋikisila keŋ.”

¹⁰Ekaku keŋ tobolyatar ikes ŋolo a ŋiuni. Ani elimokinio iŋes atemar kimyelu aŋajep, abu iŋes kimyelu aŋajep keŋ atipei, ido toriyo ŋakan keŋ kiŋaren emam akuryanu

¹¹tolimu a akitopolooro tema, “Aryamuni ayoŋ ŋinerin lu aneni ka Akuj a ŋina anakuj, aŋuna a ŋikisila keŋ ajali ayoŋ ikes, ido egeno ayoŋ atemar aryamuni nabo ikes aneni keŋ.”

¹²Aŋuna a ŋakiro a ŋun, abu tobul erwosit elope ka ŋituŋa ŋulu arukitotor iŋes aŋuna ka atitinyu a etau a esorokit a ŋol, anerae ete iŋes ŋican esibit erae ibore koŋin.

¹³Ekaku ka atwanare a ŋol daŋ, kisicana ka kidica ŋolo a ŋiomwon daŋ, lopite ŋolopei sek esicaniata ŋuluce.

¹⁴Ani eapuuni iŋes atwanare, tema, “Emaikina ituŋanan tocamu atwanare aneni a ŋituŋa, nai kitopoloo akigeno ŋina ikiinakini Akuj, akigeno ŋina ikiteyarunia iŋes. Nai iyes, emam ayarun nakiyar ŋina a ŋikaru ka ŋikaru!”

¹⁵Ekaku yaut kiŋaren ŋolo a ŋikan, ido kisicana iŋes.

¹⁶Nai kiŋolik esorokit ŋol erwosit, ido tema, “Aŋuna ipolokinitor iyoŋ ŋituŋa ka torae iyoŋ daŋ ituŋanan, kitiya ŋuna ikitalakarito iyoŋ. Nai nyitami atemar aŋer Akuj ŋituŋa kosi.

¹⁷Torubak itiyae ŋakiro kon, ido iŋolikini iyoŋ epite ŋolo ikisicania iŋes iyoŋ ka ŋiletok kon a apedor keŋ a ŋina etiron.”

¹⁸Ekaku yaunae ŋolo a ŋikanikapei. Ani eapuuni iŋes atwanare, tema, “Nyimodikin bon ikoŋin, anerae ikiseunit isua aryamun ŋican lu aŋuna a ŋasecisya kosi aŋuna ikisecit isua aneni a Akuj kosi a ŋilopeyek. Aŋun, etiyakin ŋakiro ŋuna etubulok.

¹⁹Nai nyitami atemar nyikisicanio iyoŋ aŋuna ikatakinia akitijiore Akuj!”

²⁰Arae toto a ŋisorok a ŋul aberu ŋina agogoŋ etau ka ŋina amaikina toryamu akitopolooro ŋina nyimuryakini ŋituŋa. Tari ŋina eteo iŋes ŋidwe keŋ ŋulukanikaarei etwakete alotooma akoloŋit apei, abu iŋes kidaŋidaŋak ŋakiro ŋun alotau keŋ, anerae egeno iŋes neni a Ekapolon.

²¹Abu iŋes kisimukek ŋidwe keŋ ŋulusapa daadaŋ irworo a aŋajep atapapaa kec. Eleleba lotau keŋ etau ŋolo ka akitopoloorit Akuj, abu kitogogoŋ etame keŋ ŋolo ka aberu kikwaanikin ka atitinyu ŋina a ekile, ido tolimok ŋidwe keŋ ŋulusapa tema,

²²“Nyayeni ayoŋ epite ŋolo kiyakaunotor iyes nakook kaŋ, meere ayoŋ akainakini iyes akiyar ka ekieŋanu, kori daŋ meere ayoŋ ewuanakini iwapei ŋinerin a ŋawat kus.

²³Aŋun, Ekapolon ekasuban a akwap, ŋolo ayeuni akisyakinet a ŋituŋa a daadaŋ ka kiwuak akisyakinet a ŋiboro a daadaŋ iŋes ikiinakini iyes akiyar ka ekieŋanu nabo anakisyon keŋ ikwapei tokona ijalyata iyes akiyar kus aŋuna a ŋikisila keŋ.”

²⁴Totamak Antiokus atemar akajamuwaritae iŋes, ido abu epite ŋolo erworor aberu ŋin kiinaya etau keŋ. Ikwaŋina ariŋaakar ŋoloŋoorit a ŋidyain a ŋul eyari, abu Antiokus nyimaima iŋes a ŋakiro bon, nai abu kiik anakikoŋ atemar itabari iŋes edya ŋol erae keŋer iŋes akiwuap ŋakiro atapapaa keŋ ka atemar ituruwori iŋes edya ŋol ekone keŋ ka einakini iŋes apolokin ŋiticisyo a apukan.

²⁵Ikwapei pa acamitor edya akiwuap ŋakiro a erwosit jik, abu erwosit tonyara toto a edya neni keŋ, kimaima iŋes alimokin lokoku keŋ aiun akiyar keŋ.

²⁶Kedau erwosit alimonokin aberu ŋin ŋarwa ŋuna alalak akimaima lokoku keŋ aiun akiyar keŋ, tocamu aberu ŋin akimaima lokoku keŋ.

²⁷Nai togwaŋar aberu ŋin diyete lokoku keŋ, ido kirwor neni keŋ a aŋajep kec, ejamuwarit erwosit, ekepukan ŋolo aryenyaanan tema, “Lokoku kaŋ kisyoni ayoŋ, abu ayoŋ ekewok iyoŋ anakook kaŋ ŋilapyo ŋikanikaomwon, ido abu eketanak iyoŋ ŋikaru ŋiuni ka abu eketan ka eketopolou akitodol apaki na ŋina ka akiyar kon, adau ayoŋ akidar iyoŋ.

²⁸Ekemaimai ayoŋ iyoŋ, lokoku kaŋ, kiŋolik nakuj ka akwap, ido kiŋolik ibore daadaŋ ŋini eyai tooma kec, toyenu atemar pa asubuni Akuj ŋiboro ŋul aloboro a ŋulu sek ayakasi. Ŋituŋa daŋ apote nakwap lopite ŋolopei.

²⁹Nyikuryaniar aaro a na, nai kitoodiu atemar kitiyae neni kon daŋ ŋuna etiyae neni a ŋikaitotoi kon. Tocamu atwanare, ikotere anakisyon a ŋina ka Akuj akaryamuni nabo ayoŋ iyoŋ kaapei ka ŋikaitotoi kon.”

³⁰Ani eriŋa toto keŋ irworo, tolimu esorokit tema, “Nyo idarito iyes? Nyewuapi ayoŋ ŋakiro ŋuna alimu erwosit, nai ewuapi ayoŋ ŋakiro a ŋikisila a ŋulu aponi inakinae neni atapapaa kosi aneni a Moses.

³¹Nai iyes ŋulu itiyata aronis daadaŋ neni a Ŋiburaniyae, nyibucarosi jik anapedor a Akuj.

³²Ikiryamunit isua ŋican aŋuna a ŋasecisya kosi.

³³Ani keŋoit apaki ŋina euruwuana Ekapolon kosi ŋolo eyari aŋuna ka akiŋenyakinia ka akida isua, ebuni iŋes akisil nabo ka ŋiketiyak keŋ a elope.

³⁴Nai iyoŋ, ekasyaat ŋolo nyiseg iyoŋ ŋolo ikitoroniyaritae alotuŋa a daadaŋ, nyiturokin akidiŋ ka nyigeno ibore idio apaki ŋina iarya iyoŋ ŋidwe a Akuj a ŋina anakuj.

³⁵Eriŋa iyoŋ nyebucara anakisicanet a ŋina ka Akuj a ŋina etiron ka a ŋina ite ŋakiro daadaŋ,

³⁶anerae kedaut ŋikaitotoi kosi akidaŋidaŋ ŋican apaki ŋina euruwuana, eyakatar tokona akiyar anakileleba alotooma acamunet a Akuj, nai iyoŋ, anatubokinet a Akuj iryamuni akisicanet ŋina iyookino aŋuna ka akituro kon.

³⁷Ikwapei ŋikaitotoi kaŋ, ajali ayoŋ akuwan kaŋ ka akiyar kaŋ aŋuna a ŋikisila atapapaa kosi, elipi Akuj kisyoni ŋituŋa a akwap kosi atipei ka ikitocamu iyoŋ a ŋakisicaneta ka ŋidekesyo atemar iŋes bon erae Akuj

³⁸“Ka aŋuna a akisicanet kaŋ ka ŋina a ŋikaitotoi kaŋ todaun aŋoit a Akuj a ŋina etiron ŋina abu iyookino lotuŋa daadaŋ a akwap kosi.”

³⁹Toŋoo erwosit nooi, kisican edya ŋol akilo ŋikaitotoi keŋ, anerae abu toup iŋes akipup ŋuna ajamuwaritor edya ŋol iŋes.

⁴⁰Abu edya ŋol totwan iwuapit ŋikisila, ikinyomit Akuj a etau keŋ a daadaŋ.

⁴¹Ekaku aponi toarae toto a ŋidwe a ŋul kedaut ŋidwe keŋ ŋulusapa atwakare.

⁴²Etemokin ŋun aŋuna a ŋakiro a ŋuna ka akinyam ŋamuronisya ka ŋakisicaneta ŋuna aronok nooi.