Read ngakarimojong 2 Ŋimak. 8 Bible Online

2 Ŋimak. 8 - ngakarimojong bible

2 Ŋimak. 8

¹Apaki ŋin abu Yudas ŋolo daŋ anyaritae Makabeus tolomasi ka ŋirukitos keŋ lorerya tonyarata ŋiyeneta kec, ido kigira ŋirorwa a ŋulu kepotu torubakis iwuapito anupit ŋina a Ŋiyudayan, apotu ikes tocunakis ŋituŋa ŋulu adolito ŋalipyo ŋakanikapei.

²Apotu ikes todyeka Ekapolon ikotere iŋolikini ŋituŋa ŋulu isicanitae ka ikotere tonomosi ikes ŋakiro ŋuna ka Akai ka Akuj a ŋina apotu ŋulu nyenupito Akuj kinyasut.

³todyeka daŋ ikes Ekapolon kisyoni etaun ŋolo enyasyo ka aapi aritakin kwap, todyeka ikes Ekapolon kiira akigworo a ŋituŋa a ŋulu apotu tobukosi ŋaokot kec, a ŋulu egworosi neni keŋ

⁴ka ikotere daŋ etamuni amunyaro a ŋiŋwea a ŋulu emam ŋakiro itiyato a ŋulu esicanitae emam ekisil ka ŋuna a ŋiyany a ŋulu iyanyere ekiro keŋ ka kitoodiu atemar eŋerit iŋes aronis.

⁵Kedau Makabeus acunakin ŋasigarya keŋ, apotu ŋituŋa ŋulugelae nyepedosi akiloun iŋes, anerae abu aŋoit a Ekapolon aŋuna a Ŋisirael kilocokin toruwor akisyon.

⁶Alosenene Makabeus akirem ŋimoe kec pa elimokinit, ido kicuny ŋitaunio ka ŋirerya. Abu kikamana ŋakiboisyo ŋuna ayenen aŋuna ke ejie ka tobwaŋ ŋimoe ŋulu alalak.

⁷Abu iŋes toyenu atemar ejok akirem ŋimoe nakwaare, ido abu arwonu keŋ kielakin akwap daadaŋ.

⁸Ani iŋolikini Pilipo atemar iyata apedor a Makabeus ka daŋ atemar alosi iŋes kiŋaren iloununui jik ŋimoe keŋ, abu kigir abaruwa neni a Pitolemi a ekepukan a Koelesiriya ka Poenicia, tonyarau ikes potu akiŋarakin apukan a erwosit.

⁹Abu nai Pitolemi toseu atipei Nikanor lokoku a Patrokulus, epei a ŋikonei a ŋulu apolok a ŋulu a erwosit, kiyakiya iŋes erikit ŋasigarya ŋuna pa akudyoko akilo ŋalipyo ŋatomoniarei ŋuna alemunitae anakwapin a daadaŋ a ŋuna a ŋituŋa a ŋulu pa arae Ŋiyudayan, ikotere elosete amunyar ŋituŋa a ekabila a Ŋiyudayan daadaŋ. Abu daŋ Pitolemi kiyakiya Nikanor kaapei ka Gorigias ekarikon a ŋasigarya, ekile ŋolo ayeni etic ŋolo ka asigar nooi.

¹⁰Abu Nikanor tocamu alemekin ocur neni a erwosit ataca ocur ŋolo amaikina iŋes totacak neni a Ŋiromanin, arae ŋisiliŋa ŋul ŋatalantae ŋalipyo ŋaarei ŋulu abu iŋes totamak aryamun anagyelanar Ŋiyudayan erae ŋipi.

¹¹Aŋun, abu iŋes kiyakiya ŋituŋa atipei lotaunio ŋulu idunyito anam alimokin ŋituŋa ŋul aponare akigyel ŋipi ka kiik daŋ ikes atemar egyelaryo ŋipi ŋatomonikanikaomwon a atalantait a apei, pa atami iŋes atemar aapi Akuj ŋina etiron akisican iŋes.

¹²Tolimokinae Yudas ŋakiro ŋuna ka abunore a Nikanor akirem akwap kec, ido ani elimokini iŋes ŋirukitos keŋ atemar adolu ajore a ŋimoe,

¹³apotu ŋulu sek daadaŋ akuryaka ka ŋulu pa ekinyomito akiyookino ŋina ka Akuj toema toekasi a nen.

¹⁴Apotu ŋice togyelanasi ŋiboro kec daadaŋ ŋulu edoŋito ka daŋ todyeka Ekapolon aiun ŋulu abu Nikanor ŋolo pa anupit Akuj togyelana eriŋa nyiryamuna ka ikes.

¹⁵Todyeka ikes Ekapolon aiun ikes, aŋuna ka acamit keŋ, kori aŋuna a acamunet a ŋina aponiata atapapaa kec tocamunotor ka Akuj ka aŋuna abunio Ekapolon tonyaraa ikes a ekiro keŋ a ŋolo asegan ka a ŋolo ka apolou.

¹⁶Nai abu Makabeus tocunak ŋasigarya keŋ ŋuna adolit ekimar ŋalipyo ŋakanikapei, kisimukek ikes nyekuryaketa aŋuna a ŋimoe, nyekuryaketa daŋ aŋuna a ŋituŋa a ŋulu nyerae Ŋiyudayan a ŋulu alalak a ŋulu eponito a aronis akitijiore ikes, nai tojioto erae ŋulu etitiny.

¹⁷Tolimonok daŋ Yudas ŋasigarya keŋ atemar totamunito aronis ŋina apotu ŋituŋa ŋulu nyerae Ŋiyudayan kitiyata nakibois ŋina asegan ka epite ŋolo esicanere ŋituŋa a etaun ka nabo daŋ epite ŋolo alemarere ŋitalyo atapapaa kec.

¹⁸Tolimok Yudas ikes tema, “Ikinyomito ikes ŋiboro ŋulujiet ka atitinyu alojie, nai ikikinyomit iwon Akuj ŋina etiron, ŋina epedori amunyar meere ŋimoe lu bon ŋulu eponito akitijiore iwon, nai epedori daŋ amunyar akwap daadaŋ.”

¹⁹Tolimok daŋ ikes ŋarwa ŋuna abunio Ekapolon kiŋarakinia atapapaa kec ŋirwa ŋulu a Senakerib, apaki ŋina aponere toarae ŋimoe ŋalipyo ŋatomonikanikauni ka ŋikanikauni

²⁰ka ŋuna a ejie ka Ŋigalati a ejie a ŋolo ayai Babilonia ŋina ajioto Ŋiyudayan ŋalipyo ŋakanikauni eriito ka Ŋimacedonian ŋalipyo ŋaomwon, tari ŋina etijikinioto ŋimoe Ŋimacedonian nooi, apotu Ŋiyudayan ŋulu arae ŋalipyo ŋakanikauni ŋul aŋuna ka akiŋarakinet a Akuj a ŋina anakuj toara Ŋigalati ŋalipyo amiat ka ŋatomoniarei ka toŋatasi ŋiboro ŋulu alalak nooi.

²¹Aŋakiro a ŋun, abu Yudas kisimukek nooi ŋasigarya keŋ, inak ikes akiten akijal akiyar kec aŋuna a ŋikisila kec ka aŋuna a akwap kec. Abu nai Yudas totyak ŋasigarya keŋ toruwor ŋajorei ŋaomwon.

²²Abu daŋ toseu ŋikaitotoi keŋ Simon, Yosepu ka Yonasan topolok ŋinituŋanan ajore apei ŋina a ŋasigarya, inak ŋinituŋanan ŋasigarya aliput ka ŋamiae ŋakan.

²³Abu daŋ Yudas toseu Eleasar asyomakin ikes ikeunit etoil ŋakiro ŋuna egiritae lokitaabo ŋolo asegan, tolimok ikes akirot na ŋina amaikina ikes tolimut alojie, “Ikiŋarakini iwon Akuj.” Abu nai iŋes kiŋarenik ajore ŋina esyaunan, kitijik Nikanor.

²⁴Ikwapei araakar Akuj ŋina etiron ariito ka ikes, apotu ikes toara ŋimoe ŋulu adeparito ŋalipyo ŋakanikaomwon, towana ka kiŋwala ŋasigarya a Nikanor ŋuna alalak, tobwaŋa ikes daadaŋ.

²⁵Apotu ikes yaasi ŋisiliŋa a ŋulu aponito akigyel ŋituŋa kec erae ŋipi. Kedaut akiwuap ŋimoe neni alwanan, apotu ikes toboŋut, anerae abu akwap towar.

²⁶Arae akoloŋit ŋina ajioto ikes ŋina isyauni eriŋa akoloŋit ŋina a Sabato, aŋuna a Sabato, apotu ikes nyerubakis iwuapito ŋimoe.

²⁷Ani kedaut akiriraun ŋiboro a ŋimoe ŋulujiet ka keŋatut aneni kec ŋiboro kec, kieŋut akoloŋit ŋina a Sabato, kipuro ka inakis alakara neni ke Ekapolon nooi, Ekapolon ŋolo abu toiu ikes ka inak ikes Sabato toruwor akoloŋit ŋina egeunia akisyon.

²⁸Ani elunyar akoloŋit ŋina a Sabato, apotu tokorakis ŋiboro ŋulu aŋatunete ikes ŋice neni a ŋituŋa a ŋulu apotu ŋimoe kidica ka neni a ŋapuseru ka ŋikokyok, ido tokorakis ŋiboro ŋuluce neni kec ka neni a ŋidwe kec.

²⁹Ani kedaut ikes akitiya ŋun, kilipa kaapei neni a Ekapolon a ŋolo esyonon todyeka iŋes kisila ka ŋiketiyak keŋ.

³⁰Apaki ŋina etijioto Yudas ka ŋasigarya keŋ ŋasigarya a Timoteo ka ŋuna a Bakides, apotu ikes toara ŋasigarya a Timoteo ka Bakides ŋuna adeparito ŋalipyo ŋatomoniarei, kikamanasi ŋaduketa ŋunajiet ŋace ŋuna aoyak nooi ka tokorakis ŋiboro ŋulu alalak ŋulu a ŋatunete ikes tokoranakis ikes neni a ŋulu edicitae, neni a ŋikokyok ka ŋapuseru, tokorakis daŋ neni a ŋimojoŋ ŋiboro ŋulu ariyan ka ŋulu kec.

³¹Apotu ikes kiriraut ŋiboro a ŋimoe ŋulujiet, ido kiŋadakis ŋiboro ŋul daadaŋ ejok nakiboisyo ŋuna eyokiyere ikes ejok, tosodi yaasi ŋiboro ŋice ŋulu eyokiyete ikes ejok; ido yaasi ŋiboro ŋuluce Yerusalem.

³²Apotu ikes toara ekarikon a ŋasigarya a Timoteo, arae ekile ŋol ituŋanan ŋini aronon nooi, iŋes abu kisican Ŋiyudayan nooi.

³³Apaki ŋina enumunumyata ikes ŋasuban alotaun atapapaa kec aŋuna a akiloun ŋimoe kec, apotu kicunya ŋulu kepotu kicunya ŋipukei ŋulu etaleoritae, apotu ikes kicunya Kalis-Senes ka ŋice daŋ ŋulu kepotu tosiwa kai ŋini cici, aŋun apotu ŋul toryamut akisicanet ŋina etemokino aŋuna pa anupitotor Akuj.

³⁴Ani eruwor Nikanor ŋolo ecenen ŋarwa ŋauni ka ŋolo abu yau ŋikecurutak ŋulu arae aliput akigyel Ŋiyudayan,

³⁵kedaut ŋimoe keŋ ŋulu sek ajamuwarit iŋes akitiditeun iŋes anakiŋarakinet a Ekapolon, abu tolaca ŋilowi keŋ ŋulu ebusak, tolot bon esibit epito ŋolo eemit aneni a ekapolon keŋ, kitor kidiŋ akwap a Ŋiyudayan akitodol ŋina adolio Antiokia kedau akitumunyar ŋimoe ŋasigarya keŋ.

³⁶Aŋun, abu Nikanor ŋolo sek acamit akiriraun ocur aŋuna a Ŋiromanin anakikamar ŋituŋa a Yerusalem, kiserau atemar eyakatar Ŋiyudayan ekaiunan ka atemar nyepedoryo akiwan Ŋiyudayan, anerae iwuapito ikes ŋikisila ŋulu einakinit ikes ekaiunan ŋol.