Read ngakarimojong 2 Ŋimak. 9 Bible Online

2 Ŋimak. 9 - ngakarimojong bible

2 Ŋimak. 9

¹Alorwa a ŋulu aapikinito ŋirwa ŋul, abu Antiokus toboŋo anakwap a Perisia pa elakara.

²Kebu sek iŋes toloma lotaun ŋolo enyaritae Perisepolis, keris iŋes kikatak akokoiyar ŋiboro anakais a ŋakujo ka akikamar etaun. Aŋun, apotu ŋituŋa a etaun tomotunos eyakatar ŋiboro ŋulujiet aŋuna ka aiun etaun kec, ido kilounae Antiokus ka ŋasigarya keŋ, tobwaŋa ŋituŋa a etaun Antiokus ka ŋasigarya keŋ, toema ŋasigarya keŋ irumito ŋileec.

³Ani eriŋa Antiokus eyai lotaun Ekibatana, tolimokinae iŋes ŋakiro ŋuna kepotu kitiyakinos neni a Nikanor ka neni a ŋasigarya a Timoteo.

⁴Aŋuna a ŋoitor iŋes nooi, abu totamu alosit akisican Ŋiyudayan aŋuna aponiata ŋituŋa a Perisepolis kirisyata iŋes, aŋun abu iŋes tolimok ekameton agaari keŋ amere agaari jik akitodol ŋina edolio iŋes neni alosi. Nai pa ayeni iŋes atemar erikoritae iŋes natubokino ŋina ka Akuj a ŋina anakuj. Anakituro keŋ abu iŋes tema, “Ani adoli ayoŋ ama, eturuwori ayoŋ Yerusalem akibois ŋina enukio Ŋiyudayan.”

⁵Nai abu Ekapolon Akuj a Ŋisirael ŋina ite ŋakiro daadaŋ kitedyakak iŋes a edeke a ŋolo pa apedor iŋes aŋaleunio a ŋolo pa atakani. Ŋinapeipaki erikakinia iŋes erwor, apotu ŋamoliteny keŋ toryebut iŋes, pa apedori anomorit ŋin akitidipokino, toryebu daŋ iŋes tooma akuwan;

⁶abu iŋes toryamu aryebo ŋin iyookino, anerae abu iŋes kiteryeb ŋituŋa ŋakookyes a ŋakisicaneta a ŋuna alalak a ŋuna sek pa ayenio.

⁷Kikote neni daŋ, abu iŋes nyejoŋo aryenyeo keŋ, nai abu iŋes kiturokin nooi, kirwor ŋakiro ŋuna alilikinitor Ŋiyudayan ka tolimok ekameton agaari keŋ toem nooi. Aŋun, abu iŋes kimasun anagaari keŋ apaki ŋina akerya agaari nooi, ido apotu ŋinerin a akuwan keŋ daadaŋ toryebut iŋes nooi.

⁸Alopite a ŋol, aponi kitiditeunae Antiokus ŋolo sek ariŋa etami anakituro keŋ atemar apedori alimokin ŋikaguragurae a ŋakipi a anam ŋakiro ido kiirasi, atami sek iŋes atemar apedori tari ŋimoru ŋulu aoyak akipim apotis. Nai aponi iŋes atipei tocakunae kwap ka aponi todakae a adaket, kitoodik nen ŋituŋa daadaŋ apedor a Akuj.

⁹Aŋun, apotu ŋikur kilelebun nakuwan a ituŋanan a ŋina pa anupit Akuj ka ani eriŋa iŋes eyari iyaloloŋi ka eryeba, abu akuwan keŋ tobos, aŋuna a abosis a akuwan keŋ abu eure touniya ŋasigarya keŋ daadaŋ.

¹⁰Aŋuna ka abosis a ŋina pa apedori ituŋanan akidaŋidaŋ, mam ituŋanan abu torubak edakit iŋes ŋolo sek atami alotau keŋ atemar apedori akitap ŋikacer alokidiama.

¹¹Aŋun, anakiyaloloŋ keŋ, abu Antiokus togeik ajoŋore akituro keŋ, ido toyenu ŋakiro ŋuna ka akiyookino a ŋina esicania Akuj iŋes, anerae abu iŋes torubak eryeba a ŋinapaki.

¹²Aŋuna pa apedoritor iŋes akidaŋidaŋ abosis keŋ a elope, abu tolimu ŋakiro nu, “Iyookino akitiditeuna alokiŋaren Akuj, nyemaikina ŋituŋa etamete atemar eraakae ikes daŋ Akuj.”

¹³Abu nai Antiokus ituŋanan ŋini asiilyanan nooi ŋin, kikoŋ neni a Ekapolon a ŋolo pa apedorit apaki ŋin akisyon iŋes, kikoŋ atemar

¹⁴etaun ŋolo asegan, ŋolo sek eburiburi iŋes aritaar ka akituruwor neni enukyo Ŋiyudayan, alimu tokona iŋes atemar nyeriŋa irikaunio iŋes.

¹⁵Kikoŋ daŋ atemar Ŋiyudayan ŋulu sek abala iŋes nyemaikina tonukae etwakete, nai emaikina ikes kimasarae kiŋa kaapei ka ŋidwe kec tonyama ŋityaŋ ŋulu ka ariet ka ŋikyeny, ituruwori iŋes ikes ŋulu eriyan ka ŋituŋa a etaun Asenis

¹⁶ka akibois ŋina asegan, ŋina sek abu iŋes toŋata ŋiboro keŋ, ebuni iŋes akisibus a ŋainakineta a ŋuna ajokak nooi ka ilelebikini iŋes ŋiboro ŋulu asegak nen ŋulu alalak akilo ŋulu a ekiŋaren, ido ŋisiliŋa ŋulu etacenenere ŋibaren ŋulu a ŋamuronisya, abu iŋes kikoŋ atemar alemuni ŋisiliŋa ŋul alosiliŋa a ŋulu sek elemenakinio iŋes.

¹⁷Abu daŋ iŋes kikoŋ atemar eruwor iŋes Eyudayat ka elosi neni daadaŋ iboiyoto ŋituŋa akisera apedor a Akuj.

¹⁸Nai ani eanyuni iŋes atemar arubaki aryebo eyai neni keŋ, anerae esicanit Akuj iŋes iyookino akisican, abu akigeno todaun aneni keŋ, ido abu kigir neni a Ŋiyudayan abaruwa eya ŋakiro ŋuna ka akilip nu:

¹⁹“Egirit ayoŋ abaruwa na neni a Ŋiyudayan a ŋulu erae ŋituŋa kaŋ ŋulu iyookino, ayoŋ Antiokus erwosit kec ka ekarikon a ŋasigarya, ekemalat iyes anamina a ŋina a etau kaŋ ka akagatakinit iyes ajokis a ŋawat ka abaru.

²⁰Ani kiyakasi iyes ejok ka ŋidwe kus ka tojokak ŋakiro kus lopite ŋolo icamitotor iyes, alakara ayoŋ. Ikwapei eyakar akigeno kaŋ daadaŋ nakuj,

²¹atamunit ayoŋ ka amina ajokis kus ka acamit kus ŋuna ajokak. Apaki ŋina aboŋunio ayoŋ alo Perisia, abu ayoŋ odyakakin nooi, ido acamu ayoŋ atemar iyookino atamunit aiuna a ŋituŋa a daadaŋ.

²²Nyakakadanakinit ayoŋ aŋuna a epite a ŋolo ayakar ayoŋ tokona, anerae ayakar ayoŋ akigeno atemar aŋaleuni ayoŋ anadyaka kaŋ,

²³nai abu ayoŋ oanyu atemar abu papa kaŋ toseu ekelunyon lorot keŋ apaki ŋina alositor iŋes akirem ŋituŋa ŋulu eya nakwap ŋinamukur,

²⁴ikotere ani kitiyakin ŋadi neni keŋ ŋuna nyetamakinitae, kori kepotu ŋakiro ŋuna nyejokak alotuŋa neni keŋ, nyeryamut ŋituŋa a akwap a daadaŋ a ŋina ipukat iŋes ŋican, anerae emaikina ikes eyenete ituŋanan ŋini aponi kimyekinere apukan

²⁵ka nabo daŋ, ayeni ayoŋ epite ŋolo eyakatar ŋikapolok a ŋituŋa a ŋulu idunyito ŋikukworwo a akwap yok ka ŋituŋa ŋulu iboiyete alodiyete akwap yok, idarito ikes ŋapakio ŋuna itiyakinotor ŋadi, idarito ikes ŋuna etakanunete. Aŋun, aseu ayoŋ lokoku kaŋ Antiokus aruwor erwosit, erae iŋes ituŋanan ŋini abu ayoŋ ŋirwa ŋulu alalak oinak apolou ka eturuwo ekapolon kus a ŋulu alalak apaki ŋina ekirikiranaror ayoŋ nakiboisyo ŋuna eya nenimukur ka egirak ayoŋ iŋes ŋakiro ŋuna igiritae nabaruwa na.

²⁶Aŋun, akalimokini ayoŋ iyes ka ekelipit totamut ŋiticisyo kaŋ neni a ŋituŋa a daadaŋ ka neni a ŋituŋa a ŋidikudyo, ŋiticisyo ŋulu abu ayoŋ etiya neni kus, ekelipit daŋ iyes torubakis iricito acamit kus ŋina ajokan ŋina ikitoodikinito iyes ayoŋ ka neni alokoku kaŋ,

²⁷anerae ayeni ayoŋ atemar iwuapi iŋes ŋakiro ŋuna etiyae ayoŋ ka itiyae iŋes neni kus ejok ka arimao.”

²⁸Aŋun, abu ekaaran ka ekeyenyan Akuj, kedau akidaŋidaŋ ŋican ŋulu apipilak ŋulu ekwaan ka ŋulu abu iŋes kiteryamu ŋuluce, abu iŋes totwana atwanare ŋina ikisyonio ituŋanan, totwanik iŋes kidiŋ ŋimoru anakwap a ŋinagela.

²⁹Abu Pilipo epei a ŋikonei keŋ ya akuwan keŋ lore, ido aŋuna akuryania iŋes aŋuna a lokoku a erwosit Antiokus, abu tolot akiboi nakwap a Pitolemi Pilometor alo Ijipit.