Read ngakarimojong Mat. 1 Bible Online

Mat. 1 - ngakarimojong bible

Mat. 1

¹Erae lu ŋirorwa atapapaa a Yesu Kristo, a ŋolo arae ekanateker a Daudi a ŋolo arae lopapait ka Aburaam.

²Arae Aburaam papa a Isaka, touru Isaka Yakobo, touru Yakobo Yuda ka ŋikaitotoi keŋ.

³Touru Yuda Peres ka Sera (arae toto kec Tamar). Touru Peres Esiron, touru Esiron Ram.

⁴Touru Ram Aminadab, touru Aminadab Nason, touru Nason Salmon;

⁵touru Salimon Boas (arae toto keŋ Raab). Touru Boas Obed (arae toto keŋ Rus). Touru Obed Yese.

⁶Touru Yese Daudi erwosit. Touru Daudi Solomon (ŋolo sek arae toto keŋ aberu a Uria).

⁷Touru Solomon Reoboam, touru Reoboam Abija, touru Abija Asa,

⁸touru Asa Yosapat, touru Yosapat Yoram, touru Yoram Usia,

⁹touru Usia Yotam; touru Yotam Akas, touru Akas Esekia,

¹⁰touru Esekia Manase, touru Manase Amon, touru Amon Yosia,

¹¹touru Yosia Yekonia ka ŋikaitotoi keŋ ŋirwa ŋulu arikorere Ŋisirael nakwap ŋina a Babilon aruwor ŋipi.

¹²Kedaun arikor ikes Babilon, abu Yekonia touru Saelatiel, touru Saelatiel Serubabel,

¹³touru Serubabel Abiud, touru Abiud Eliakim, touru Eliakim Asor,

¹⁴touru Asor Sadok, touru Sadok Acim, touru Acim Eliud,

¹⁵touru Eliud Eleasar, touru Eleasar Matan, touru Matan Yakobo,

¹⁶touru Yakobo Yosepu, ŋolo abu toruwor ekile a Maria a ŋina edouni Yesu, ŋolo enyaritae Kristo.

¹⁷Ŋanyameta a ŋituŋa a ŋul ameun aneni ka Aburaam tari neni a Daudi, arae daadaŋ ŋatomon ka ŋaomwon, ameun aneni a Daudi tari ŋina arikorere Ŋisirael Babilon aruwor ŋipi, arae ŋatomon ka ŋaomwon, nabo ameun anarikoret Ŋisirael Babilon tari ŋina edounere Kristo, arae ŋuna daŋ ŋatomon ka ŋaomwon.

¹⁸Ekoni akidouno a Yesu Kristo etakanuni ne: eikinitae Maria toto a Yesu aruwor aberu a Yosepu, nai ani eriŋa ikes nyeruko, toryamunae Maria epoti aŋuna ka apedor a ŋina ke Etau a ŋolo Asegan.

¹⁹Aŋuna araakar Yosepu ekile keŋ ŋolo ajokan, abu iŋes totamu aesikin Maria ekililiŋat, anerae pa acamit akisirum iŋes ŋileec alotuŋa.

²⁰Nai ani eriŋa iŋes etamatamae ŋakiro ŋun, totakanu emalaika ŋolo ke Ekapolon neni keŋ anakiruja tema, “Yosepu lopapait a Daudi, nyikuryaniar akiit Maria toruwor aberu kon, anerae ŋini epoti iŋes ebunit aneni ke Etau a ŋolo Asegan;

²¹idouni iŋes ikoku ŋini sapat, ilimokini iyoŋ ekeekiro Yesu, anerae eiuni iŋes ŋikeetuŋa anasecisya kec.”

²²Apotu ŋun daadaŋ totakanut, ikotere iyookinotor ŋuna koloŋ kirworo Ekapolon anakituk ke ekadwaran ebe,

²³“Epotiuni ka idouni apese ŋina nyiryamakina ka ekile ikoku ŋini sapat, enyarao ekeekiro Emmanuel.” (Apolou keŋ atemar, “Ikirukit iwon ka Akuj.”)

²⁴Ani ekienyuni Yosepu, kitiya ikwaŋina alimokinitor emalaika ŋolo ke Ekapolon iŋes, ya iŋes Maria aruwor akeeberu.

²⁵Nai nyiryamakina tari ŋina edounio Maria ikoku ŋini sapat, tolimok Yosepu ekiro a ikoku Yesu.