Read ngakarimojong Mat. 18 Bible Online

Mat. 18 - ngakarimojong bible

Mat. 18

¹Apaki ŋin potu ŋikasyomak a Yesu neni keŋ kiŋita iŋes temasi, “Ŋae epol nooi a Napukan a ŋina anakuj?”

²Tonyarau Yesu ikoku, kitowuo alokidiŋ kec,

³tolimok ikes tema, “Akalimokini ayoŋ iyes kire atemar, mati kibelekinosi iyes kikokis ŋidwe ŋulu cicik, nyilomarete Napukan ŋina anakuj.

⁴Aŋun, ituŋanan ŋini itiditeun ikwa ikoku en, iŋes epol nooi a Napukan a ŋina anakuj.

⁵Ituŋanan ŋini ijauni ikoku ŋini cici ŋini ikoni en alokiro kaŋ, ekejau iŋes ayoŋ.

⁶“Nai ituŋanan ŋini iteseci ipei a ŋulu cicik a lu, a ŋulu akanupito ayoŋ, kitemokino iŋes toenikinae amoru ŋinakiryeet lomosiriŋ keŋ, kimasakinae nanam.

⁷Ekaŋ iyes ŋituŋa ŋulu itesecete ŋuluce! Anerae itemokino ŋakitemyet ŋun toyakaun, nai ekaŋ iŋes ŋini eyauni ikes!

⁸“Ani kikitesec iyoŋ akonikan kori akonikeju totubo tocaka. Ejok iyoŋ alomar nakiyar iŋwalit kori icodo, akilo ayakau ka ŋakan ŋaarei kori ŋakejen ŋaarei, ido itocakakin nakim ŋina nyeduŋe.

⁹Ani kikitesec iyoŋ akoŋu kon, togoro tocaka. Ejok iyoŋ alomar nakiyar emam apeikoŋu akilo ayakau ŋakonyen daadaŋ, ido itocakakin nakim ŋina nyeduŋe.

¹⁰“Tocoito ijamuwarete tari ipei a ŋulu cicik a lu, anerae akalimokini ayoŋ iyes atemar, erukito ŋimalaikan kec jwi jwi ka Papa kaŋ ŋolo eyai nakuj. [

¹¹Anerae abuni Lokoku a Ituŋanan aiun ŋulu eolito.]

¹²“Nyaanu ŋuna itamete iyes? Ani keyakar ituŋanan ŋamesekin amiat, ido tooli apei, nyeesikini mono iŋes ŋuna tomononikanikaomwon ka ŋakanikaomwon anadakar, tosodi tolot akiwarit ŋina eolit a?

¹³Ani ŋina eryamunia iŋes amesek ŋin, akalimokini ayoŋ iyes kire atemar, elakar iŋes nooi aŋuna atakanunia amesek ŋin akilo ŋuna tomonikanikaomwon ka ŋakanikaomwon ŋuna pa aolito.

¹⁴Ikwaŋinapei ikoŋin, nyecamit Papa kus ŋolo anakuj atemar tooliyo ipei a ŋulu cicik a lu.

¹⁵“Ani kesec lokaato kon neni kon, tolot neni keŋ kiteyenik iŋes adyakaret keŋ aneni kus make. Ani kiira iŋes ŋuna ilimok iyoŋ, iŋes atemar inyaku iyoŋ lokaato kon.

¹⁶Nai ani pa kiira iŋes, ya ituŋanan ipei kori ŋiarei, ikotere kisuudata ŋituŋa ŋuluarei kori ŋuluuni ŋakiro daadaŋ ŋuna esecit iŋes.

¹⁷Ani erae kewou akiirar ikes, tolimok atukot a Ŋikristo. Ani nabo keŋer akiirar tari ŋuna elimokini atukot ŋin, kimyek iŋes kikok aneni kon ituŋanan ŋini nyenupit ŋakiro ŋuna ka Akuj kori kikok ekeriran ocur.

¹⁸“Akalimokini ayoŋ iyes daadaŋ kire atemar, ŋuna daadaŋ nyicamakinete iyes anakwap, nyecamakinio anakuj. Nai ŋuna icamunete iyes anakwap, ecamunio anakuj.

¹⁹“Nabo akalimokini ayoŋ iyes atemar, ani kecamunosi ŋiarei alokidiŋ kus anakwap, aŋuna a ibore a ŋini ilipasi ikes, itiyakini Papa kaŋ ŋolo anakuj neni kec.

²⁰Anerae neni ecunakin ŋiarei kori ŋiuni alokiro kaŋ, ayakaun ayoŋ kidiŋ kec.”

²¹Bu Petero neni ayai Yesu kiŋit iŋes tema, “Ekapolon, ŋarwa ŋayai itemokino ayoŋ esyoniyo lokaato kaŋ kesec neni kaŋ? Ŋarwa ŋakanikaarei a?”

²²Toboŋok Yesu iŋes tema, “Nyabala ayoŋ ŋarwa ŋakanikaarei, nai ŋatomonikanikaarei ŋarwa ŋakanikaarei.

²³Anerae ikoni Apukan ŋina anakuj ne, ayai erwosit ŋolo acamit aanyun ŋamicae keŋ ŋuna ayakatar ŋiketiyak keŋ.

²⁴Ani isyakini iŋes etic ŋol, yaunae epei ŋolo edenit ŋitalantae ŋalipyo ŋatomon.

²⁵Aŋuna pa apedorya eketiyan ŋol akitac eden, abu ekapolon tolimu atemar togyelarae iŋes, akeeberu, ŋikeedwe ka ŋinibore ayakar iŋes daadaŋ, totacere eden.

²⁶Toryedik eketiyan alokiŋaren ekapolon todyek iŋes tema, ‘Ekapolon, inakinae kare ca adiopaki! Ataci ayoŋ eden daadaŋ.’

²⁷Tosodi ekapolon kisyoni eketiyan ŋol, kikisa tari eden, tolacak iŋes tolot.

²⁸“Nai ŋolopite alosyo eketiyan ŋolopei ŋol kiŋa, kiryamunos ka epei ŋolo edeniyorit ŋidinari ŋulu akudyoko. Kikam tomyed tema, ‘Totac eden kaŋ!’

²⁹Toryedik eketiyan ŋol alokiŋaren keŋ todyek iŋes tema, ‘Inakinae kare ca adiopaki! Ataci ayoŋ eden daadaŋ.’

³⁰“Nai abu iŋes towou, tolot kipotok iŋes mabus toenae akitodol neni etaca eden keŋ.

³¹Ani eanyuwarete ŋiketiyak ŋuluce ŋakiro ŋun, tobul nooi toloto tolimokis ekecekapolon ŋuna daadaŋ apotu totakanut.

³²Tonyarau nai ekapolon eketiyan ŋol, tolimok tema, ‘Iyoŋ eketiyan ŋolo aronon, abu ayoŋ ekisa eden aŋuna ibunio iyoŋ ikidyek ayoŋ.

³³Pa kitemokino iyoŋ daŋ akisyon eketiyan ŋoloce ikwaŋina abunio ayoŋ ekesyon iyoŋ a?’

³⁴Toŋo ekapolon nooi, kipotok iŋes mabus toenae akitodol neni etaca eden daadaŋ.”

³⁵Toŋetak Yesu ebala, “Itiyakini Papa kaŋ ŋolo anakuj ikwaŋinapei neni kus erae pa kisyon ŋinituŋanan lokaato keŋ alotau.”