Read ngakarimojong Mat. 2 Bible Online

Mat. 2 - ngakarimojong bible

Mat. 2

¹Kedaun akidoun Yesu alo Betelem anakwap a ŋina a Yudaya, ŋirwa ŋulu araakar Erode erwosit, potu ŋikaosok ŋice alo Kide tari Yerusalem,

²iŋitasi ebasi, “Ai eyai erwosit ŋolo a Ŋiyudayan ŋolo ariŋa sek idounio? Anerae ikianyu isua etop keŋ ebuni alo Kide, ikiponit aryedik akima iŋes.”

³Ani iirari erwosit Erode ŋakiro ŋun, kiyaloloŋo ka ŋituŋa a Yerusalem daadaŋ.

⁴Tonyarau ŋisacaradotin ŋulu apolok daadaŋ ka ŋiketatamak ŋulu a Ŋikisila, kiŋit ikes neni etemokino kidounere Kristo.

⁵Tolimokis ikes iŋes temasi, “Betelem, nakwap a Yudaya, anerae igirit ekadwaran ebe,

⁶‘Iyoŋ Betelem akwap a Yuda, meere iyoŋ idit nooi alotaunio a ŋulu a Yuda. Anerae alotooma kon elomuni ekarikon ŋolo iyoki ŋituŋa kaŋ Ŋisirael.’ ”

⁷Tonyara nai Erode ŋikaosok ŋul neni kec make, kiŋit ikes kojokan apaki ŋina kire atakanunia etop;

⁸kiyakiya iŋes ikes Betelem tema, “Toloto akimimaun ejok ŋuna a ikoku, ani kiryamut, ipotu itolimokis, ikotere ayoŋ daŋ alosi oryedik, oma iŋes.”

⁹Ani kedaut ikes akiirar ŋuna alimokini erwosit ikes torotokis; a nen, kiŋarenik ikes etop ŋolo sek aris ikes kiŋolikis alo Kide, tari ŋina awuoya alokidiama neni ayai ikoku.

¹⁰Ani iŋolikinete ikes etop, tolelyana nooi.

¹¹Tolomasi ikes kai, kiŋolikis ikoku ka toto keŋ Maria, toryediko ikes alokiŋaren keŋ, tomaa, toŋaasi nai ŋicweei kec, tolemikis iŋes ŋainakineta nu: egolid, eminae ŋolo ke ekinyate ka eceminae ŋolo akukunyon nooi.

¹²Aŋuna abunio Akuj kicik ikes anakiruja atemar nyeboŋosi neni eyai Erode, kitoro ikes lorot ece eboŋorete nakwap kec.

¹³Ani kerotokis ikes, totakanu emalaika ŋolo ke Ekapolon neni a Yosepu anakiruja tema, “Tonyou, ya ikoku ka toto keŋ tosiya tari Ijipit. Kiboi aina tari ŋina akalimokinia ayoŋ iyoŋ, anerae ecamit Erode akimimaun ŋakiro a ikoku, ecamit akiar.”

¹⁴Tonyou Yosepu ya ikoku ka toto keŋ nakwaare, tolot Ijipit.

¹⁵Kiboiyoto ikes aina tari ŋina atwania Erode. Etiyakinosi ŋun daadaŋ kiyookinotor ŋuna erworit Ekapolon alokadwaran ebe, “Anyarau ayoŋ Lokoku kaŋ alo Ijipit.”

¹⁶Ani eanyuni Erode atemar amodikis ŋikaosok iŋes, tonyunyurikin nooi, kiyakiya ŋisigarya keŋ Betelem ka akwap ŋin daadaŋ akiar ŋidwe ŋulusapa daadaŋ, ŋulu adolito ŋikaru kec ŋiarei ka ŋulu ariŋa ŋikaru kec nyedolo ŋiarei. Kitiya iŋes ŋun itamakina napaki ŋina kiŋitunit iŋes ejok alokaosok.

¹⁷Kiyookinos nai ŋakiro ŋuna erworit ekadwaran Yeremia ebala,

¹⁸“Aponi kiirarae alo Rama, etoil ŋolo egworo ka kisuta nooi. Rakel iŋes igworo aŋuna a ŋidwe keŋ; ewounit akisirworiuno, anerae aris ketwaka.”

¹⁹Ani ketwana Erode, totakanu emalaika ŋolo ke Ekapolon anakiruja neni a Yosepu alo Ijipit

²⁰tema, “Tonyou, ya ikoku ka toto keŋ, toboŋo nakwap a Ŋisirael, anerae atwaka ŋulu ewarito akiar ikoku.”

²¹Tonyou nai Yosepu ya ikoku ka toto keŋ, tolot nakwap a Ŋisirael.

²²Nai ani iirari iŋes atemar elunyokin Arikaleo lokicoloŋ a papa keŋ ke Erode aruwor erwosit ŋolo a Yudaya, tokuryaniar iŋes alomar Yudaya. Ani kedau Akuj akicik iŋes anakiruja, abu Yosepu tolot Galileya.

²³Kiboi alotaun a ŋolo anyaritae Nasaret, kiyookinotor ŋuna erworito ŋikadwarak ebe, “Enyarao iŋes Enasaroit.”