Read ngakarimojong Mat. 22 Bible Online

Mat. 22 - ngakarimojong bible

Mat. 22

¹Kirwor nabo Yesu lotuŋa a ŋakitadapeta tema,

²“Ikoni Apukan ŋina anakuj ne; ayai erwosit ŋolo abu kitemonok ŋasuban ŋuna ke ekiitanu alokoku keŋ.

³Kiyakiya ŋipi keŋ anyarare ŋituŋa ŋulu anyaritae nasuban, nai apotu ŋituŋa ŋul towout aponare.

⁴Kiyakiya nabo ŋipi keŋ ŋice, alimokin ŋulu anyaritae nasuban atemar, ‘Etemok ayoŋ akimuj, aarit ŋimoŋin ka ŋitak ŋulu atumak, etemokin ŋiboro daadaŋ; potu nasuban!’

⁵Nai apotu ŋituŋa ŋul nyemitakis, toloto akitiya ŋikeceticisyo; tolot epei lomanikor keŋ, ŋoloce tolot lodukan keŋ.

⁶Kikamut ŋuluce ŋipi, kibuŋata ka tobolyatar.

⁷Toŋo erwosit nooi, kiyakiya ŋajorei keŋ, tomunyasi ŋikaarak ŋul ka kicunya etaun kec.

⁸Tonyarau iŋes ŋipi keŋ tolimok tema, ‘Etemokin ŋasuban, nai ŋituŋa ŋulu anyaritae, nyitemokino ikes epote ne.

⁹Toloto tokona lorotin tonyaraut nasuban ŋituŋa daadaŋ ŋulu iryamunete iyes.’

¹⁰Toloto nai ŋipi lorotin, tonyaraut ŋituŋa daadaŋ ŋulu aryamunete ikes ŋulu aronok kaapei ka ŋulu ajokak; kilelebun ŋipeyok kai ŋina ke ekiitanu.

¹¹“Nai ani elomari erwosit aanyun ŋipeyok, toanyuwa ekile ŋolo pa anapit elou ŋolo ke ekiitanu.

¹²Kiŋit erwosit iŋes tema, ‘Ekone, ikokini iyoŋ ilomuni nege pa inapit elou ŋolo ke ekiitanu ai?’ Totakin ekile ŋol cek.

¹³Tolimok erwosit ŋipi keŋ tema, ‘Toena iŋes ŋakan ka ŋakejen, kimasasi kiŋa nakiryonut. Kigwor aina, tokonyanak ŋikyal.’

¹⁴Anerae elalak ŋulu enyaritae, nai ekudyoko ŋulu eseunio.”

¹⁵Toloto Ŋiparisayon totukut alokun Yesu anakiro a ŋuna erworo.

¹⁶Kiyakiyasi ŋikapolok a Ŋiparisayon ŋikasyomak kec ka ŋituŋa ŋice ŋulu ka atukot a ŋina ke Erode neni a Yesu, tolimokis iŋes temasi, “Eketataman, ikiyeni isua atemar irae iyoŋ ŋolo a kire ka itatami ŋakiro ŋuna a kire ŋuna ka Akuj, nyimisit iyoŋ ŋuna etamete ŋituŋa, anerae nyityakatyakat ŋituŋa.

¹⁷Tolimokinae isua ŋuna itami iyoŋ. Ikicamakinito mono Ŋikisila obukosi ocur neni ke ekepukan a Roma kori mam?”

¹⁸Nai aŋuna ayenia Yesu akeceronis, tolimok ikes tema, “Iyes ŋikaŋisoswae! Kaanukiro ikilokitotor iyes ayoŋ?

¹⁹Kitoodikinae cenite esiliŋ ŋolo tacet ocur.” Kitoodikis nai ikes Yesu esiliŋ.

²⁰Kiŋit Yesu ikes tema, “Ŋolo a ŋae ereet lo ka ŋakigireta nu?”

²¹Toboŋokis ikes temasi, “Ŋulu ke ekepukan a Roma.” Tolimok Yesu ikes tema, “Inakisi ekepukan a Roma ŋini erae ikeŋ, inakis Akuj ŋini erae ŋini ka Akuj!”

²²Ani iirarete ikes ŋakiro ŋun, toumokis, torotokis, kimyekis Yesu.

²³Akoloŋit ŋinapei, potu neni a Yesu Ŋisadukayon ŋulu abasi emam ayarun,

²⁴temasi, “Eketataman, abala koloŋ Moses, ‘Ani ketwana ekile tomam ŋidwe, itemokino lokaato keŋ kirum aberu, touri ŋidwe ŋulu eruwor ŋulu a lokaato keŋ a ŋolo atwana.’

²⁵Ayakasi ŋikaitotoi ŋikanikaarei ŋulu aya ne. Kiita ŋolo kiyae, nai abu iŋes totwan nyeryamuna ŋidwe, tosodi kidoŋ aberu keŋ neni a lokaato keŋ.

²⁶Kitiyakinos ŋakiro ŋunapei neni a lokaato keŋ a ŋolo a ŋiarei, ka ŋolo a ŋiuni daŋ, tari neni a ŋolo a ŋikanikaarei.

²⁷Ani ketwaka ikes daadaŋ, totwan aberu daŋ.

²⁸Aŋun, eruwor mono aberu ŋin ŋina a ŋae, ŋina eyaruniata ŋikatwak? Anerae abu iŋes toruwor aberu a ŋikaitotoi a ŋul a daadaŋ?”

²⁹Nai toboŋok Yesu ikes tema, “Idyakarito iyes, anerae nyiyenete ŋuna igiritae Nakigireta kori apedor ŋina ka Akuj.

³⁰“Anerae ŋina eyaruniata ŋikatwak, ikokinete ikes ŋimalaikan ŋulu anakuj, ŋulu nyiitanarete kori nyiitanaryo.

³¹Nabo ŋuna ka ayarun alokatwak, nyesyoma iyes ŋuna ikilimokini Akuj ebala,

³²‘Arae ayoŋ Akuj ŋina ka Aburaam, ka Isaka, ta ŋina a Yakobo’ a? Meere iŋes Akuj a ŋikatwak, nai Akuj a ŋulu eyarete.”

³³Ani iirarete ŋasepico a ŋituŋa ŋakiro ŋun, toumokis aŋuna ka akitatam keŋ.

³⁴Nai ani iirarete Ŋiparisayon atemar esililiŋ Yesu Ŋisadukayon, totukokinos iwapei.

³⁵Abu epei ŋolo arae eketataman a Ŋikisila, toloku Yesu ka akiŋiset

³⁶tema, “Eketataman, anikiciket epol nooi a Lokisila?”

³⁷Toboŋok Yesu iŋes tema, “Tomina Ekapolon Akuj kon ka ekonitau a daadaŋ, ka akonikiyar a daadaŋ ta a ŋakonitameta a daadaŋ.

³⁸Erae ŋin akiciket ŋina epol nooi ka ŋina eŋarenon.

³⁹Ŋina a ŋaarei daŋ, ikwaan ka ŋina ke ekiŋaren, ‘Tomina ekonikidunyet ikwaŋina iminar iyoŋ akonikuwan.’

⁴⁰Ŋikisila a Moses daadaŋ ka ŋakitatameta a ŋikadwarak daadaŋ eyakasi nakiciketa ŋuna arei ŋun.”

⁴¹Kiŋit Yesu Ŋiparisayon eriŋa etukokina iwapei

⁴²tema, “Itamete iyes atemar ŋae erae Kristo ka Lokoku a ŋae iŋes?” Toboŋokis ikes temasi, “Lokoku a Daudi.”

⁴³Kiŋit Yesu ikes tema, “Nyo bo nai itanyaritor Etau ŋolo ka Akuj Daudi iŋes Ekapolon? Ebala Daudi,

⁴⁴‘Atema Ekapolon neni ke Ekapolon kaŋ, kiboikin iyoŋ teten kaŋ, akitodol neni ewuakinia ŋikonimoi kwap ŋakejen kon.’

⁴⁵Ani kenyarit Daudi iŋes, ‘Ekapolon,’ ikokini nabo iŋes eruwor Lokoku a Daudi ai?”

⁴⁶Emam ituŋanan ŋini abu toboŋok Yesu adiokirot, anyoun akoloŋit ŋin, emam ituŋanan ŋini abu totitinyik akiŋit iŋes ŋakiro ŋadi.